جِلدُ أفعى

الحلقة التاسعة و العشرون

"جِلْدُ أفعى"
للكاتبة مجهولة ...
الانستا  no_one_0290

فضلا ⭐ لا تنسوها و متكلفكم بس تفرق عندي و علقوا بين الفقرااااات ❤️

ــــــــــــــــــــــــــــ

الاخطاء ... دائما الاخطاء الي يرتكبها الاهل يدفع ثمنها ابنائهم، و اغلب الأحيان الاهل يكونون همَ الحافز الاقوى لأطفالهم سواء بالشر او بالخير و بالفشل او بالربح ،اكبر غلطة يرتكبها الأهل تجاه ابنائهم هو تجاهل اخطائهم او تحفيزهم لارتكاب هاي الاخطاء دون اي تأنيب ضمير يُذكر، مثال على هالحالة هو عمي غياث و جدتي ....

اسرعت بمشيتي ورجلي وحدة تطگ بالثانية من كثر خوفي ،دخلت بالشارع الي بي بيت خالتي ام جانيار ،فرحت لان مابقى شي و اوصل ،بعدني توني خطيت اول خطوتين ما حسيت غير على صوت سيارة وايد قوي صفّت يمي ونزلوا اثنين منها لثموا وجهي بنقاب اسود ودخلوني للسيارة ....

انهبطت و نشف الدم بعروقي، متت من الخوف حسيت انتهى كل شيء حلو بحياتي ،حسيت نفسي انتهيت خلاص راح يعتدون عليه و يذبوني بأي مكان حالي حال اي حيوان رخيص يردون يتخلصون منه ..

صدرت مني صرخة قوية حيل و ضربت واحد برجلي والثاني كرصته بايده،اريد اقاوم و اوخر النقاب الاسود من وجهي، انا عندي فوبيا من الاماكن المغلقة من يوم حبسني بابا بالغرفة و ما اقدر اتنفس بسهولة وهذوله ملثميني ،ومن حلاة روحي صرخت بصوت عالي:
-ررااااح اختنگ رااااح اموووت ما اااتحمل والله

سمعت صوت واحد يگول:
-خاف تموت ولك!

الثاني جاوبه:
-ما يصير بيها شيء بنت الـ...

رجعت صرخت اكثر:
-والله اختنگ ما ااااتحملللل

الاول گال:
-لك خاب هسه تموت ونتورط

شال الغطى من وجهي فوراً تفلت بوجه شخص ما اعرفه كان دا يسوق كدام ،عصب اكثر ومسح خده و گال بعصبية:
-اخذها منج من عمج بنت الـ...

سمعت صوت صريخ بنت غير بالسيارة التفتت يمنة ويسرة ماكو غير هذولة اثنين و انا بنصهم و واحد يسوق ،رجع گال الاول الي دا يسوق:
-انتِ اسكتي هاي بنت عمج وجبناها وياج

انصدمت و درت وجهي بسرعة على مرايم ،همست بصوت مصدوم:
-مراايم هاي انتِ!!

التفتتلي وعيونها مدمعة بخوف:
-جـ..جواهر

كالت اسمي وبجت مبين مخوفينها ما تقدر تنطق، حاولت اطمنها بعيوني بس انا مو اقل منها وايد خايفة هذولة شكلهم مايطمن ابد ،تقززت من تقربهم الي وشلون كاعدين يمي و ملتصقين بيه، زمخت بيهم بتقزز:
-زفرتكم دمرتني وخرواا عني

واحد منهم باوعلي بأستغراب والثاني بقي يشمشم بنفسه وهو يگول:
-كذابة ريحتي چنها العافیة