إستقرار إجباري

" 10 "

ريناد أول ما شافتو خافت وتلقائي مسكت في إيد داغر جامد وإستخبت وراه
إتكلم الراجل وقال : بتستخبي مني يا بنت أخويا
إتكلمت ريناد وهي في ضهر داغر وقالت بِصوت واطي : أبوس إيدك مشيه من هنا هيضربني
بصلها داغر وقال بِصوت واطي : طول ما إنتي في بيت داغر الدويري محدش هيقدر يقربلك
بص داغر لِلشخص وقال : ها متعرفناش بيك يعني
إبتسم الشخص وقال : أنا مجدي عمها
إبتسم داغر إبتسامة باردة وقال : إتشرفنا ، أومال إيه الزيارة اللي مش مرغوب فيها دي 
بص مجدي ورا داغر وقال : جاي أخد اللي لينا من عندكم
قامت أسماء وقفت وقالت : وإنت ملكش حاجة يا مجدي هنا
لف مجدي ليها وقال : لأ ليا ، ريناد بنت أخويا وأنا أولي بيها منكُم
قرب مجدي من داغر وبيحاول ياخد ريناد من وراه
ريناد مسكت في داغر جامد من ورا وعيطت
داغر مسك إيد مجدي وقال : إهدا علي حالك ومفيش حاجة بتتاخد بالغصب حتي لو كانت ملكك وإنت أولي بيها زي ما بتقول
إتكلم داغر مع ريناد وقال : ريناد متخافيش وقولي إنتي عايزة تمشي مع عمك ولا لأ
هزت ريناد راسها جامد وقالت بِصوت واطي : لأ
بصلها داغر وقال : علي صوتك يا ريناد وقولتلك متخافيش
عيطت أكتر وخبت وشها في كتف داغر وهي مازالت واقفة وراه
شدها داغر ووقفها قدامو ورجع شعرها لِورا وقال : قولتلك متخافيش إنتي هنا وسطينا وقولي
بصِت لِعمها لاقتو بيبصلها بِخبث من فوق لِتحت ، جسمها إترعش ومسكت في دراع داغر وقالت : لأ..م..مش هروح لأ
لف داغر وبصلو وقال : هي مش عايزة تيجي معاك ، ومش بالعافية مش صح ولا إيه
زعق مجدي وقال : ومن إمتي إحنا بناخد بإذن حد هي هتيجي معايا يعني هتيجي معايا ، بدل ما تبقي في بيت الغريب هنا
إتكلمت أسماء بِثقة وقالت : ومين قالك إنها في بيت الغريب ، دا بيتها وقاعدة هنا مع جوزها وحماتها
كلهم بصولها بِصدمة ومجدي قال : جوزها ! ، إزاي يعني جوزها إنتو كدا عداكو العيب أوي ، إزاي تتجوز وإحنا عيلتها معندناش عِلم بِدا
إتكلمت أسماء ببرود وقالت : لسه الفرح الإسبوع الجاي ، وإنت وعيلتك كلها اللي للأسف مضطرين نعزمكم علي الفرح أكيد هتيجو وريناد هتفضل هنا لإن دا بيتها ومش هتمشي منو لا بِرضاها ولا حتي غصب عنها
مجدي إتعصب أكتر وبيقرب علشان ياخد ريناد مسكو داغر من هدومو وقال : أنا لحد دلوقتي بتعامل معاك كويس لكن أقسم بالله هوريك وش نتفاجئ أنا وإنت بيه ، إمشي أحسن ما أطلعك من هنا عاجز
بعد مجدي لِورا وعدل هدومو ووجه كلامو لِريناد وقال : إسمعي يا بت إنتي لو هتتحامي في مين ولا هتستخبي مني فين مسيري هاخدك وهجيبك وإفتكري الكلام دا كويس إنتي فاهمه
قال الكلمتين دول ومشي بسرعة قبل ما داغر يِتحول عليه
وقعت ريناد علي الأرض وفضلت تعيط وهي بتقول : مش هيسيبوني في حالي ، هيموتوني
قربت منها أسماء وحضنتها وقالت : ملكيش دعوة بيه هو جه هنا وأخد نصيبو من الكلام والتهزيق ومشي وسيبك منو ميقدرش يعملك حاجة بس إيه مشاكي يا ريناد ، مشيتي ليه
رفعت ريناد راسها وبصِت لِداغر وسكتت
داغر إستنتج من نظرتو ليها ومن كلامها في بيت سندس إنها مشيت بِسببو
إتكلمت ريناد وقالت بِكدب : طلعت برا ملاقتش السواق وقولت أروح أقعد مع سندس شوية
مسحت أسماء دموع ريناد وقالت : إنتي وقعتي قلبي عليكي ، متكررهاش تاني لما تحبي تشوفي حد من صحابك هما يجولك هنا أو السواق يوديكي ويستناكي تحت البيت لِحد ما تخلصي لكن إوعي تمشي تاني إتفقنا ؟
هزت راسها وقالت : إتفقنا
قومتها وقامت معاها وقالت : وكلام اللي إسمو مجدي دا إنسيه تماماً
إتكلم داغر وقال : ممكن أفهم كلمة جوزها دا إيه نظامها! ، إنتي ليه قولتيلوا كدة ؟
إتنهدت أسماء وقالت : طلعت مني تلقائي عادي ، وبعدين كان هياخدها بالقوة كان لازم حاجة توقفو
إتكلم داغر وقال : كان فيه مليون حاجة توقفو إلا إنك تقولي كدة ، إنتي كدة كدبتي وأكيد هيروح يقولهم كلهم إن فرحي أنا وريناد الإسبوع الجاي
إبتسمت أسماء وقالت : ومين قالك إنو كدب ؟
بصو داغر وريناد لِبعض وقالو في وقت واحد : مستحيل
بصتلهم أسماء وقالت : ليه مستحيل ، جواز علي الورق ولو عايزين تطلقو بعد كدة إتطلقو لكن قدام الناس إنتو هتفضلو متجوزين لكن لازم فرح يتعمل علشان عيلتك تبطل تحاول تاخدك تاني
كملت كلامها بِتحذير وقالت : وإياكي ثم إياكي تطلعي من البيت هنا لِوحدك معاكي السواق وحارس إحنا منضمنش هما ممكن يعملو إيه وتطلعي من كليتك تركبي العربية علي طول وتيجي بلاش تعملي زي النهاردة يا ريناد إتفقنا ؟
إتكلمت ريناد وقالت : إتفقنا بس أنا مش عايزة أتج..
قطعتها أسماء في الكلام وقالت : هيبقا لينا قاعدة وكلام في الموضوع دا المهم دلوقتي إطلعي ريحي في أوضتك
طلعت ريناد أوضتها وبص داغر لِأسماء وقال : اللي فيه دماغك يا سمسم مش هيحصل
ضحكت أسماء وقالت : تعالي نقعد يا قلب سمسم ونتكلم
قعدت أسماء وقعد داغر قدامها مستنيها تتكلم
إتكلمت أسماء وقالت : اللي إستنتجتو منك إنت وريناد إنكم مش بتطيقو بعض بس يا داغر مقولتلكش حبها بس إتجوزها علشاني
إتعصب داغر وقال : هو إيه اللي إتجوزها علشاني هو الجواز دا لعب يعني
أخدت أسماء نفس عميق وقالت : عمها عايزها مش علشان صلة الرحم والجو دا ، عمها عايزها لإنو عايز يقرب منها ، من وإمها عايشه كان ييجي يحاول مع أمها وعلشان أمها كانت بتصدو كان بيضربها ويدخل يضرب ريناد ويمشي ، وهكذا كان يجيلها كل فترة بس لما بييجي بيضرب ريناد ضرب غبي لِدرجة إن لما حبيبة رفضت تديهالو علشان كان عايز ياخدها جاب السكينة وطعنها في جمبها ، بس ساعتها رنت عليا وروحنالها أنا وأبوك ولحقناها الحمدلله ، ريناد بتخاف منهم موت وخصوصاً مجدي ، محدش من عيلة ابوها بيحبهم ومكانوش بيهدو إلا لما أخدو منهم ورث بتاع أبوها إبراهيم الله يرحمو ، لِحد ما هي ظبطت أمورها وإشتغلت وخلِت ريناد تكمل دراستها لإنها من بدري نفسها تشوفها دكتورة ، علشان كدة بقولك إتجوزها ، لما يعرفو إن ليها ضهر وراجل ياخدلها حقها مش هيقدرو يتكلمو ولو فكرو يروحو للحكومة علشان تعمل حاجة ساعتها نتكلم ونقول دي مراتك وهي في بيت جوزها ، فاهمني يا داغر ؟
حط داغر راسو بين إيديه وقال : أنا مش هقدر أعمل كدة بجد
مسكت أسماء إيدو وقالت : علشان خاطري يا داغر ، علشان خاطري أنا ، وأنا ريناد هتكلم معاها برضوا ، لو هي مرتاحتش أو إنت مرتاحتش طلقها بس هتفضلو قدام الناس متجوزين فاهمني ؟
قام داغر وقف وقال : سيبيني أفكر
قامت أسماء وقالت : مفيش حاجة إسمها سيبيني أفكر ، مفيش وقت يا حبيبي علي الأقل المأذون ييجي بكرة أو بعدو علشان لو حتي فكرو يعملو حاجة قبل ما معاد الفرح ييجي ميقدروش
بصلها داغر وقال : هو إيه اللي بكرة ولا بعدو إنتي هتهزري معايا في حاجة زي كدة ليه ، قولتلك الجواز مش لعب
أسماء ببساطة : خلاص النهاردة
إتكلم داغر بِغيظ وقال : إنتي عايزة تجننيني ، مستحيل دا يحصل مستحيل ، أنا مش هتجوز حد ولو علي حمايتها هنحميها من غير جواز إنما أنا مش هتجوز حد ودا قرار نهائي 

" بعد مرور ساعة "
" بارك الله لكُما ، وبارك عليكُما وجمع بينكُما في خير "
زغرطت أسماء بِفرحة وحضنت ريناد اللي مكانش فيه أي ريأكشن علي وشها وقالت : ألف مليون مبروك يا حبيبتي بقيتي مرات إبني ومفيش أي حاجز
قربت من داغر وقالت : مبروك يا حبيبي وعقبال ما أشيل ولادك
بصلها داغر بِعصبية بس سكت
إتكلم علاء وقال : مبروك يا صاحبي ، جهز نفسك للفرح بقا
بصلو داغر وقال : غور من وشي علشان مزعلكش
ضحك علاء وقال : خلاص يا عم وحد الله كدة
قرب مروان وقال : أخويا الغالي أخيراً يا عم بقيت متجوز ، مبقتش في المصيدة لِوحدي أهو
نغزت أسماء داغر في كتفو وقالت : إبتسم علشان الناس يا داغر
إبتسم داغر بالعافية وقالها : تمام كدة
مسكتو من خدودو وقالت : قمر يا حبيبي قمر عيشت وشوفتك عريس
كانت ريناد واقفة مش حاسه بأي حاجة غير إنها بترمي نفسها في الهلاك وبتحمي نفسها في واحد مش بيطيق وجودها بس مُجبرة علشان أهلها ، الدموع إتحجرت في عينيها وكانت واقفة ساكتة تماماً
قربت منها مي مرات مروان وقالت : مبروك يا حبيبتي ، هي أول مرة أشوفك أه بس شكلك كيوت كدة وهنبقا صحاب إن شاء الله
إبتسمت ريناد وقالت : إن شاء الله
قربت زهرة وقالت لِداغر : ألف مبروك يا داغر والحمدلله ربنا عوضك
بصلها كدة شوية وبعدها قرب من ريناد وأخدها في حضنو وقال : أه الحمدلله عوض ربنا حلو برضوا
بصتلهم زهرة وإبتسمت وقالت : ربنا يهنيكم ويتمملكم علي خير يارب
إبتسم داغر ليها وقال : بإذن الله
كل الناس مشيت والفيلا فضيت علي داغر وريناد وأسماء
ريناد مازالت ساكته ومش بتتكلم وداغر قاعد عمال يهز في رجليه من الضغط والخنقة اللي هو فيها وأسماء عماله تبصلهم هما الإتنين
إتكلمت أسماء وقالت : دول مش منظر عِرسان جُداد أبداً إفردو وشكو كدة لو سمحت علشان دا مينفعش
إتنهد داغر وقال : هيفرق في إيه مش اللي في دماغك نفذتيه خلاص
إبتسمت أسماء وقالت : اللي في دماغي مسيركو تعرفو إن هو صح
دخل واحد من الخدم ليهم وقال : فيه واحد واقف برا بيقول إنو عايز داغر
شاورلتو أسماء وقالت : دخلو
دخل واحد من الباب وقال : مساء الخير
رفعت ريناد راسها وفي ثواني كانت إتصدمت وقالت : خالد!
بصلها داغر وأسماء و ....

يتبع ..
#رودي_عبدالحميد