إستقرار إجباري

" 39 " | الأخير |

دخل المكتب وقال وهو متفاجئ :
إيه دا ، محمد!
قام محمد وقف وقال : أسف إن جاي من غير ميعاد وكدا بس كنت حابب أتكلم مع حضرتك شوية
قرب داغر وقعد قُصادو وقال : إتفضل أقعد وإتكلم مع حضرتي شوية
قعد محمد وقال بإحراج : بص هو حضرتك يعني عارف اللي حصل الفترة الأخيرة وإن أنا وزهرة سيبنا بعض بسببي بس لو حلفت لِحضرتك إن حسيت بِقيمتها ومش قادر يعدي يوم من غيرها ومن غير دوشتها في حياتي هتصدقني ؟
فضل داغر باصصلو شوية وبعدها ضحك ضحكة خفيفه وقال : أصدقك أه لإن الواحد مبيحسش بِقيمة الحاجة غير لما بتضيع من إيديه ودا اللي حصل فعلاً
بص محمد في الأرض وقال : أنا جاي أعتذر أشد الإعتذار وأنا بصراحه حابب إن حضرتك تتكلم مع زهرة يعني ترجعنا لِبعض
بصلو داغر بِشك وقال : إنت روحتلها وكشفتلك ولا إيه؟
إبتسم محمد وقال : لأ أنا قولت أجي لِحضرتك الأول علشان حضرتك الوالي عنها ومن الإحترام إن أجيلك الأول
رجع داغر ضهرو لِورا بأريحيه وقال : إنت محترم جداً يا محمد والكل بيحلف بإحترامك بس عملت حركة خليت إحترامك وإنت شخصياً تنزل من نظري ومش من نظري أنا بس يعني
بص محمد في الأرض وقال : أنا مستعد أعمل أي حاجة ومستعد لأي عقاب بس زهرة ترجعلي
فضل داغر باصصلو شوية وبعدها قال : إرفع عينك وبصلي في عيني كدا وإطلبها من تاني
إتنهد محمد ورفع عيونه وبص لِداغر وكانت عيونه مدمعه وقال : أنا أسف.. بس أنا عايز زهرة ، عايز زهرة ترجعي
إبتسم داغر وقال : إمسح دموعك ، زهرة عندي هنا في البيت هطلع أناديهالك وإتكلمو وإتعاتبو ولو رضيت تمام مرضيتش خلاص بقا نصيب
رد محمد عليه وعيونه كلها ترجي : ممكن زهرة متوافقش وحقها بس أنا محتاج مساعدتك..
قام داغر وقف وقال : لما تتكلمو الأول جايز هي بطلت تحبك ومش عايزاك هنجبرها يعني ؟
إتكلم محمد بِثقه وقال : بس أنا واثق إن زهرة لسه بتحبني
إفتكر داغر اللي زهرة عملتو وضحك بِسخريه وقال : طبعاً ، طبعاً ، عموماً خليك وأنا هنزلهالك
طلع داغر من المكتب وطلع أوضتو وأول ما دخل وقفت ريناد وقربت منو وقالت : مين اللي تحت 
رد وهو بيطلع المفتاح من دُرج التسريحة : دا محمد خطيب زهرة سابقاً
بصِت علي المفتاح اللي في إيدو وقالت : وإنت رايحلها ليه بقا إن شاء الله
ضحك وقال : بقولك محمد تحت ، أكيد عايز يتكلم معاها شوية ، هنزلهالو تتكلم معاه وبعدها بقا تروح بيتهم لإن خلاص معتش عايزها هنا
ضيقت عينيها وقالت : هاجي معاك
لسه هيتكلم قالتلو : مش هنزل بس هاجي معاك عند زهرة ودا أخر كلام عندي
إتنهد وقال : يلا يختي
بصتلو بِغرور وخرجت قبلو من الأوضة ، فضل يضحك عليها وطلع وراها وفتح الباب ودخل لِزهرة وريناد دخلت وراه
قامت زهرة وقفت وقالت : خير جايينلي إنتو الإتنين ليه ؟
حط داغر إيديه في جيبو وقال : محمد تحت وعايز يتكلم معاكي
ربعت إيديها وقالت : مش عايزة أشوفو
قربت ريناد وقالت : بعيداً علي إننا مش طايقين بعض لِسبب بس إسمعيه وبعدها قرري مترفضيش من غير أي سبب كدا ، اللي بينكم أكيد مش قليل فَ إنزلي وإقعدي معاه شوية
كمل داغر الكلام وقال : هو باين عليه ندمان وجداً كمان ، ثم أنا مش هجبرك عليه بس إديلو فرصه وإسمعيه وبعدها قرري
إتنهدت وقالت : طيب
بصِت ريناد علي منظرها وقالت : متنزليش كدا هجبلك فُستان من عندي أو تيشيرت وبنطلون زي ما تحبي وخديلك شاور كدا وإنزلي
وبصلها داغر بِتحذير وقال : وإنتي هنا كنتي موجودة تقعدي معانا شوية تمام !
هزت راسها وقالت : حاضر
مسكت ريناد إيد داغر وقالت : تعالي يلا
طلع داغر وريناد وراحت ريناد جابتلها تيشيرت وبنطلون وفستان ودخلت بيهم ليها وقالت : خدي شوفي أنهي اللي هيريحك وإلبسيه
مسكت زهرة الهدوم وقالت : شكراً
إبتسمت ريناد وقالت : العفو ، أنا هسيبلك الباب مفتوح ووقت ما تخلصي إنزليلوا هو في المكتب
هزت راسها وقالت : حاضر
خرجت ريناد من الأوضة ودخلت أوضتهم لقِت داغر واقف قدام المرايه
راحت وقفت وراه وحضنتو وقالت : مفيش خروج يا حبيبي
ضحك وقال : مش خارج بس ببص علي دقني حاسس إن عايز أحلقها
لفِت ووقفت قُصادو وهي حاضناه وبصتلو وقالت : أحلقهالك ؟
حط إيدو علي دقنو وقال : لأ يا حبيبتي مش مستغني عن وشي أنا
ضحكت وقالت : متقلقش هعملهالك بِالمكنه إيه رأيك ؟ ، بس هخففهالك علشان شكلك حلو وإنت مربيها
بص عليها في المرايه وقال : إممم ماشي