جريمة لم تنفذ

Part16

جريمة لم تنفذ
🖋️مريم عبدالله

أجى واحد عليّا وكالي شبيك؟
أحسّ حملك ثكيل ودمعة بعيونك
وأحسّ داخل كليبك نار تشعل نار
وأحسّ ظهرك حنيتة وهدّلن متونك
كتلة القصة هيج وهيج بيّا الصّار
ما عدهم كلب ذولا اللّي يخونونك
تتعذّب عليمن أنتَ هم إنسان؟
بس دوس أعلى كلبك لا يدوسونك
وعليمن تنتظرهم والله ميرجعون
حيــــل بعيد صاروا ما يذكرونك
ولو بيهم أمل أنتظر جان ويّاك
بس قاسي كلبهم ما يفيدونك
وأُخُذ منّي نصيحة وعوف دمع العين
صافن لا تظلّ باجر يعبرونك.

********🦋🦋🦋

يوم جديد من بعد ليله مليئة كعادتها بالذكريات اخذت علاجي ونمت كعدت بيه طاقه حلوه فتحت الشبابيك شغلت فيروز واني استمتع بكل كلمة من كلماتها تجهزت لدوامي لروضه وطلعت كلي طاقه استقبلوني الاطفال وبين العب وياهم انتهى نص نهار حلو بمعنى الكلمة ماعرف احس فراشات بداخلي اطير من السعادة شنو سبب هاي السعادة ماعرفه رغم جانت ليله كئيبه بسبب الذكريات
ولكن الصبح يجلي كل هم يأتي في الليل

بعد ما طلعت اتصلت بمطعم طلبت وجبه محابه اكل شي من اللبيت على ما وصلت للشقه وصل الطلب تغديت واخذت قيلوله حتى استعد لدوام الثاني.... بعد ساعه كعدت نشطه وتجهزت بسرعه رغم الراحه الي بداخلي لكن اكو جزء مني خايف شعور متضارب وهذا سببه عدم الاستقرار والخوف دائما من المجهول داحاول كد مابيه اتجاهل شعور الخوف مثل ما علمني د.زياد والعلاج جاي يجيب مفعوله حتى الاحلام بلشت تقل وهذا الي مفرحني بلكي تنتهي مع كل هذا ملتزمه بالتسبيحات والاستغفار يهدي النفس ويطمئن الانسان واني بهوسه افكاري فززني صوت التلفون يعلن وصول مسج فتحته

آسر: سرسعادتي الابدية عشقي الاول اعلم بان هذه الكلمات من الممكن ان تزعجكِ ولكن لا استطيع دون التعبير لكِ عن مدى حبي انني بشوق كبير كي اراكِ دمتِ سالمة

الابتسامه وحدها شكت وجهي حسيت بشعور غريب كانو كهرباء خفيفه تسري بكل جسمي قريت المسج ومارديت اخذت اغراضي وطلعت للعيادة لبسة الكمامه والنظارات شفت نفسي لاخر مره بالمرايه صفنت شوي تشجعت وقررت انزع الكمامه عن وجهي واطلع بدونها كخطوه اولي وانا افتر بالسياره بس من اوصل للعياده ارجع اخليها وطلعت بدونها حسيت كسرت قيد ممكن البعض يشوفها شغله بسيطه بس انسانه مثلي صارلها ست سنوات تخفي وجها عن الكل مجرد هيج قرار وممكن يطور بعدين هذا انجاز كبير بحق نفسي