ما جت بالساهل ولا جت بالحظ مافيه فَرحه ما دفعت ثمنهاا.

البارت _6

‏﴿ وَاذْكُر رَّبَّكَ إِذَا نَسِيتَ ﴾ :-
‏- سُبحان الله
‏- الحَمد لله
‏- لا إله إلا الله
‏- الله أكبر
‏- أستغفِرُ الله
‏- لا حَول و لا قوة إلا بالله
‏- سُبحان الله و بِحمده
‏- سُبحان الله العَظيم
‏- اللهم صلِّ و سلم على نبينا محمد

| ♡︎

الساعة 4 العصر ...

جالسين بالجلسه الشعبية وقدامهم دله القهوة وصحن الحلا....

عهد : أقول راشد
راشد وهو يأكل لقمه من الحلا: هممم شتبين
عهد : شلون شفت بنات الرياض
راشد يبي يقهرها  : ياحليلهم يفتحون النفس مو مثل بنات هنا يغثون
عهد تخصرت: نعممم وش فينا حنا ياحليلنا كاملات والكامل الله
راشد : أقول اسكتي احسن اطلع الي اكلته الحين
عهود بدفشه: والشباب بعد مزاييين هناك
راشد طير عيونه فيها: وش عليك انتي
عهد بمكر: ايه يحليلهم شباب الرياض مو مثل المجاحيف الي عندنا يسدون النفس استغفر الله
امهم: أقول انتي وياه وش هالهرج استحين تقولن كذا قدام اخوكم
عهد بحنق: يمه هو بداء بالاول
راشد: أقول يمه مالك منها دعيده  أنا ان شاء الله قررت آخذ من بنات الرياض
امه: وشوو تبي تتزوج من هناك وشوله وبنات اخوالك واعمامك يا كثرهم
عهد بتحريض : اييه يمه وش بيقولون الناس ترك بنات اخواله واعمامه وراح لبنت الغريب
عهود : وعاد الله أعلم يمكن تكون داشره الله لا يبلانا
راشد : وانتي شعرفك بالدواشر
عهود بورطه: اا هاه عهد سمعتها تتكلم مع البنات كذا
راشد لف لعهد: وش هالكلام قاعدات تحشين ببنات الناس بدال ما تستروها تحشون فيها
عهد اخذت رشفه من القهوة وناظرته بغنج: وش عليك من كلام البنات وحنا نقول الي نبيه لا تحشر خشمك بشي مالك خص فيه
راشد بقرف: وجعع تكلمي عدل
امه: خلص أنت وياها غيرو سالفه ...ناظرت عهد ...وبعدين انتي متى تعقلين وتكلمين اخوك بحترام
عهد بلا مباله: بحترمه وقت يحترمني ووقت يصير عنده عيال كبري
راشد : ومن قال بتزوج قبل تتزوجين
عهد: لييه سلامات قاعده على قلبك تزوج ماحد ماسكك
راشد : هه خبل أنا أتزوج وجيب زوجتي عند وحده تسد النفس مثلك
عهد: والله عاد كيفك تزوج أو لا أنا قاعده ببيت ابوي وبعدين أنا ما راحمه غير هالبنت الي بتتزوجها  تمسي وتصبح على وجهك الشين يخخخ
راشد بفخر: تراك الشينه انتي أما أنا روحي وطوفي الديره كلها بيقولون لك أن أنا أزين واحد فيها
عهود بسخريه: واثق مرره
امهم: استغفر الله أنتم شفيكم انخبلتم كانكم اعداء اذكرو الله بلا هالهرج
راشد : لا اله ألا الله يمه ترا بنات صدق يغثون أنا بطلع ابرك لي من هالوجيه استغفر الله سدين نفسي
عهد : اييييه بعد ما أكلت صحن الحلا كله
راشد بضحكه: عوافي على قلبي هههههههههههه
قام وهو يبوس رأس امه ويطغ خواته برؤوسهم وهج لبرا وهم يلحقوه .....

عند فارس الي طلع من عند امه وتجهه لبيت ابوه تنهد وهو يشوف ابوه قاعد مثل العاده بجلسته الخارجيه قدام البيت تقدم له وهو يبتسم بضيق ...