طبعاً لمن قالت لي حسام إتضايقت و قلت ليها عليك الله ما تذكري لي اسمو تاني ، قالت لي لو حسام خذلك و ما بقى قدر كلامو دا ما معناه إنو كل الناس حتكون زيو ! قلت ليها بيني و بينك كدا بتصدقي إنو في واحد ممكن يحب و يعرس وحده مجهولة الأبوين ! طبعاً إلا يكون زول جاي من طرف بابا حازم بس غير كداا مستحيييل ، للسبب دا ماف داعي نحلم و نعلي سقف أحلامنا بخصوص الموضوع دا ، الحب دا ما للناس الزينا ، فهمتي يا منار !المهم و نحنا ماشين بإستعجال فجأه ظهروا لينا ولدين و وقفوا قدامنا ، طبعاً منار مسكتني شديييد من يدي ، همست و قلت ليها ما تشتغلي بيهم ولااا تعايني ليهم ، خلينا نمشي مشينا ، طبعاً الشارع ما كان فاضي بس معظم الناس الفيهو كأنهم ساطلين ، أصلاً الحته دي بتاعة قهاوي و لعب كشتينه و جنبها مطاعم صغيره ، طبعاً الولدين إتحركوا ورانا ! منار قالت لي سجمنا ديل عايزين مننا شنو ! قلت ليها خلينا نجري و أول ما كنا حـ نجري حسيت بزول مسكني من يدي ، إتلفت عليهو و أنا قلبي بضرب من شدة الخوف و منار دي كانت خاته يدها على قلبها و شغاله ليهم عايزين مننا شنو !؟ الولد طلع سكين و قال لينا بصوت واطي و نبرة تهديد ما عايز أسمع حس وحده فيكم ، التاني قال لينا لو حاولتوا تتحركوا أو تصرخوا للأسف وحده منكم أو الإتنين سوا حيكون دا آخر يوم ليكم في الحياة دي ، منار قالت ليهم لاالاا عليكم الله خلونا نمشي ، منو انتوا و عايزين مننا شنو ، الشايل السكين عاين لي و قال لي جيبي الشنطه ، قلت ليهو فاضيه ما فيها شي ، طوالي جراها مني و قال لي إتحركوا قدامي ، رجعت لـ ورا شويه و منار وراي تبكي و أنا بتلفت مره أعاين للناس و مره للسكين القدامي ، فجأه كدا صرخت بصوت عاااالي و قلت حرااااميييي حرااااميييي و طوالي جريت منو الشنطه بس ما فكاها لي ، خطفها و جرى مع صحبو و الناس ياداب إنتبهت لينا و الزمن داك الولدين جروا !! جونا زي 3 رجال كدا واحد سكران و اتنين واعين و بقوا شغالين لينا في شنو في شنو !؟... طبعاً أنا الوقت داك حسيت الدنيا دي كلها لافه بي ، تلفوني إنسرق ! التلفون الإشتغلت و التعبت شديد عشان أشتريهو انسرق مني في لحظات ! قلبي وجعني وجع شديد و قربت أبكي بس مسكت نفسي لأني ما بحب أبكي قدام الناس ، طبعاً منار حكت ليهم الحصل معانا ، فـ قبل ما نمشي واحد منهم أدى منار قروش للمواصلات و قال لينا انتوا ذاتكم بتعملوا شنو هنا و زي المواعيد دي ، المهم اتحركنا و مشينا ، ركبنا مواصلات و أنا ساكته الطريق كلو ، منار قالت لي لو كان خلينا الإسمو يونس داك يوصلنا ما كان دا كلو حصل معانا ، أو لو كان ما جينا من الأساس ، الخلعه الدخلت فينا ممكن تطلع لكن تلفونك الإنسرق ما برجع تاني ، أخدت نفس عميق و قلت ليها منار أسكتي شويه و خليني أفكر ... بعد مسافه قالت لي انتِ حاسه إنو ليلى السبب في الحصل معانا ؟! قلت ليها ما بعيده ، قالت لي لكن دي حاجه ما منطقيه حـ تعرف الأولاد ديل من وين و غير كدا متين لحقت تكلمهم و تخليهم يجوا بالسرعه دي و فجأه يظهروا في وشنا يهددونا بالسكين و يشيلوا الشنطه و يجروا ! لو ليلى السبب كان ممكن عديل يقولوا لينا عايزين التلفون !قلت ليها ما حـ استغرب لو ليلى طلعت بتعرف الأولاد ديل ، لو هي ما بتعرفهم في أكيد معاذ بعرفهم ، أصلاً أنا كنت حاسه إنو في شي ما طبيعي ، مستحيل ليلى تسكت و تخلينا نرجع بالسهوله دي ! و بعدين أكيد ما حيقولوا لينا عايزين التلفون عشان نفهم إنو ليلى هي الرسلتهم ! قالت لي مع إنو حاجه زي دي ما بعيده عن ليلى بس ما منطقية و إحتمال كبير الحراميه ديل ما عندهم علاقه بـ ليلى ، قلت ليها بزهج فسري لي طيب كيف فجأه كدا هي إختفت و معاذ انسحب! بعد صورناهم سوا مستحيل ليلى تخلينا نرجع و التلفون معانا !... قالت لي خلاص خلاص يا مها ما تزهجي ، عارفه سرقت التلفون واجعاك ، و أنا كمان واجعاني والله بس نعمل شنو !المهم لمن وصلنا الدار شلت الحبل الكنت خاتاهو على جنب ، أديتو لـ منار وقلت ليها لمن أتلب بالباب و أكون في الإتجاه التاني أجدعي لي الحبل عشان أسحبك بيهو ، قالت لي تمام ... بإستعجال إتسلقت الباب و لمن وصلت فوق مسكت الحبل و نزلت بيهو في الإتجاه التاني ، منار عملت نفس الشي و إتسلقت الحبل ، لمن وصلت قمة الباب بقت تعاين تحت و قالت لي خايفه أقع والله ، قلت ليها أنزلي زي قبيل ، قالت لي صعبه والله ، طبعاً كنا بنتلفت سااااي و خايفين زول يشوفنا ، قلت ليها منار يااااخ !! خُتي رجلك هنا و يدك هناك و الرجل التانيه هنا و أمشي على الوتيره دي لحد ما تنزلي ، عملت القلتو ليها و لمن وصلت نص الباب ما لقت مكان تخت رجلها فيهو ، قلت ليها ممكن تنطي عادي قالت لي مستحيل ، قلت ليها لو كنتِ قريبه مني شويه كان حـ أخليك تنزلي على أكتافي ، نطي ياخ و خلصيناااا !! طبعاً بنتكلم بصوت واطي و الدنيا ليل و ماف أي صوت غير صوت الكلاب ، قلت ليها منار بتكلم معاك أنا ! ما تلصقي لي كدا في الباب زي الضب !! غمضت عيونها و جات ناطه ، وقعت بس ما جاتها حاجه ، لو ما سرقت التلفون واجعاني كنت ضحكت على وقعتها لأنها كانت بتضحك ، قلت ليها يلا يلا قومي سرعه خلينا ندخل ، أول ما قامت كدا ، جانا صوت بقول والله ما شاء الله !!إتلفتنا مخلوعين !!لقيناها نادين المشرفه و معاها اتنين من الحرس و ورا هنااااك البنات واقفات يتشمروا و فيهم الفاتحات الشبابيك بعاينوا بيها ، أنا و منار بقينا نعاين لبعض ، جاتنا قرييب و قالت لينا بنهره عاااليه كنتو وين زي الزمن دا ؟؟ و كمان ناطين بالباب ! بحركتكم دي ما خليتوا حاجه للحراميه !منار بقت تتمتم ليها في الكلام ، قالت ليها ما تقعدي تتمتمي لي كدا إتكلمي عديل كنتوا وين يا تافهات ! بعد مسافه قلت ليها طلعنا نشم هوا ، قالت لي تشموا الفطيس ان شاء الله ، طبعاً البنات قعدوا يضحكوا ، لمن هي إتلفتت عليهم طوالي دخلوا جوه ، قالت لينا ليلتكم دي حـ تقضوها هنا ، ماف وحده تدخل جوه ، الليله الأرض حتكون لحافكم و السما غطاكم ، طبعاً الهواؤ كان ضاااارب و في بروده في الجو ، منار قالت ليها ما حـ نعيدها تاني ، عليك الله خلينا ندخل جوه البرد شديد والله ، خلينا ندخل ![]()
![]()
قالت ليها شموا هوا كويس ، منار قعدت تحنس فيها و نادين الكريها تشيل و تضحك فيها ، ما عارفه نادين قالت شنو للحارس بس بعدها مشى طوالي و هي استمرت في تحقيقاتها معانا مشينا وين و عملنا شنو ، منار قالت ليها كنا متابعين ليلى ، لأنها طلعت و مشت تقابل واحد في مطعم ، قالت ليها كمااان جابت ليها كذب و تلفيق !! قالت ليها اقسم بالله دي الحقيقه ، ليلى مشت قابلت واحد و نحنا صورناها لكن تلفون مها إنسرق منها و نحنا راجعين ، نادين حمرت ليها كويس و قالت ليها ياريتك قعدتي و فكرتي شويه عشان تظبطي ليك سيناريو قابل للتصديق ، منار قالت ليها أقسم بالله يا مس نادين كنا متابعين ليلى و لمن صورناها هي و حبيبها و كنا راجعين ...... نادين نهرتها و قالت ليها بطلي كذب ! قلت ليها دي الحقيقه ، ربعت يدينها و قالت لي ليلى وين حالياً ؟؟قلت ليها ما عارفه لأنو الحصل.... برضو قاطعتني بنهره و قالت لي كمان لسه مصرين تكذبوا ! الحارس جا و هو شايل ليهو جردل مويه ، قالت ليهو أمشي نادي لي ليلى ، بعد مسافه ليلى جات طالعه مع الحارس و هي تتمغى و تتثائب و عامله نفسها ياداب صاحيه من النوم !!جات و قالت ليها ايوه يا مس نادين !! قالو طالباني !؟مس نادين عاينت لينا أنا و منار بحده و إتلفتت على ليلى و قالت ليها انتِ حافره ليك نفق تحت الأرض ؟؟قالت ليها كيييف !؟ ما فهمتك ! نفق شنو ؟قالت ليها لو طلعتي من هنا بتجي راجعه كيف ؟؟ قالت ليها أكيد بالباب و أصلاً أنا ما قاعده أطلع من دون إذنك ! نادين إتلفتت علينا و ربعت يدينها و قالت لينا تمام أنا صدقتكم ، أشرحوا لي طلعت و دخلت كيف و مشت جوه و رقدت من دون ما يشعر بيها زول ؟؟ ولا نطت بالباب زيكم ؟؟منار قالت ليها ما عارفين كيف بس هي كانت برا الدار ، و لو عايزا ممكن نمشي المطعم كلنا و اسأليهم إذا شافوها هناك ولا لا ، ليلى قالت لينا دقيقه دقيقه ، بتقولو في شنو انتو ؟؟ أنا كنت برا الميتم !؟ مجانين انتو ولا شنو ؟عاينت لـ مس نادين و قالت ليها لو عايزا ممكن تسألي باقي البنات إذا أنا طلعت من الغرفه ولا لا ! اسأليهم و حـ يأكدوا ليك إني كنت نايمه من قبيل !!طبعاً بعد كلامها دا انا ما قدرت أقول حاجه و ما قدرت أجادل أكتر و ما قدرت أقول إنو في شي بين بكري و ليلى لأنو ما عندي دليل و لأني عارفه ليلى دي كويس ! وحده مستهبله و ممثله من الدرجه الأولى و لأن الفيني مكفيني ، لسه عقلي شاطب بسبب السرقه الحصلت لي!مس نادين قالت لينا ما تتحركوا شبر من هنا ، شالت الجردل الجابو ليها الحارس و مشت بيهو ، بقينا نحمر لـ ليلى و هي تحمر لينا سااااي و مره مره تدينا إبتسامه مستفزه ، طبعاً عشان الحراس واقفين معانا ما قدرت اهددها و أقول ليها أصبري لي ، منار قالت ليها كل مره بتثبتي لينا انك وحده كذااابه و محتاله و ممثله محترفه ، ليلى قالت ليها أنا ما فاهمه ليه انتو مصرين تكذبوا فيني !! عملت ليكم شنو أنا ؟!طبعاً فورت دمي قلت ليها انتِ..... قبل ما أتم كلامي أحس ليك بمويه بارده على وشي !!طبعاً جسمي كلو إرتعش! الجو أصلاً بارد و فوق دا المويه كانت متلجه عديل !! ما أنا بس حتى منار ! مس نادين مشت بدلت المويه العاديه بمويه باااارده و كشحتها فينا أنا و منار و خلتنا زي الطير الداقاهو مطره !!ليلى كانت خاته يدها على خشمها عشان ما تضحك بصوت عالي ، مس نادين قالت لينا ممكن اقول إنو عقابكم بدا الآن ، طبعاً منار ترجف من فوق لـ تحت ، حتى أسنانها كانت بتضرب في بعض ، قالت ليها واااي المويه بارده شديد و هسي ملابسنا كلها بقت لينه و الجو بارد ، عليك الله خلينا ندخل جوه ![]()
![]()
قالت ليها الليله تبيتوا هنا بس ، منار قالت ليها خلاص خلينا نبدل ملابسنا بس ، ما ردت عليها ، إتلفتت على ليلى و قالت ليها انتِ لسه واقفه ، عايزا تتعاقبي معاهم ولا شنو ؟ليلى قالت ليها لا لا و طوالي مشت و هي ماسكه نفسها من الضحك....بعدها كلهم مشو و قفلوا أبوابهم و خلونا أنا و منار في نص الحوش بنرجف من البرد ! ماف مكان نمشي عليهو ، ماف مكان نحتمي بيهو من البرد ، كل الأبواب مقفوله ! طبعاً السماء كانت شايله و الهواء كان ضاااارب و في برد و رطوبه ، منار قالت لي الليله لو المطره دي جات و لقتنا برا حـ نموت بالإلتهاب ، واااي يا مها ياريت لو ما إتهورنا و مشينا ورا ليلى ، هسي هي حـ تنوم جوه مرتاحه و على سريرها و نحنا ح ننوم برا و على الأرض و تحت السماء الممكن تمطر في أي لحظه ، دا لو قدرنا ننوم أصلاً !![]()
طبعاً ما اتكلمت معاها تاني ، عقلي كان شاطب و سرقة التلفون كانت واجعاني شديد ، بعد مسااافه طويله النعاس سيطر علينا ، أول ما غمضت عيوني حسيت بحركه ، لمن فتحت عيوني شفت رسيل واقفه قدامي ، كانت شايله معاها بطانيه متوسطة الحجم أو الأصح دفايه ، مدتها لي و قالت لي اتغطو بيها ، جريتها علي و قعدت أبوووس فيها و على حركتنا منار صحت ، قالت ليها رسيييل بتعملي شنو هنا ؟؟ يا بت أمشي قبل ما الشومه ديك تجي و تشوفك ، قلت ليها رسُوووله العسل جابت لينا البطانيه دي عشان نتغطى بيها ، منار ياداب انتبهت للبطانيه ، قالت ليها والله انتِ عسل عسل يا رسيل ، تعالي تعالي خليني أبوسك ...المهم قلت ليها رسيل أدخلي بعد دا ، البومه ديك لو شافتك مشكله والله ، قالت لي حاضر ، قلت ليها اتغطي كويس ، المهم بعد ما هي مشت منار قالت لي بكرا لو شافو البطانيه دي و سألو الجابها منو ، نقول ليهم شنو ؟؟قلت ليها اتغطي هسي و الصباح رباح .... قبل ما نغمض عيونا مس نادين زي الشبح ظهرت قدامنا ، منار طوااالي نفضت البطانيه و زحتها منها ، مس نادين قالت لينا بحده الجاب ليكم البطانيه دي منو ؟!... قلت ليها جبتها أنا ... طبعاً اتخيلتها تجوووط و تعمل لينا موضوع طويل عريض و في الآخر تعاقبنا بس إستغربت و إتحيرت لمن قالت لينا قوموا خشوا جوه !! لمن قالت كدا أنا و منار بقينا نعاين لبعض بحيره !!قالت لينا لو القعاد هنا عاجبكم نوموا ساي ، طوالي وقفنا على حيلنا شلنا البطانيه و دخلنا جوه و هي ورانا ، قفلت الباب و مشت غرفتها فوق في الطابق التاني ، لمن دخلنا غرفة النوم لقينا البنات كلهم نايمين و رسيل كانت راقده على سريري ، صلحت ليها رقدتها و قعدت ، منار قالت لي مس نادين دي الليله ما طبيعيه ! قلت ليها بالجد والله ! أكيد في شي في بالها ! قالت لي خايفاها تجينا داخله هسي و تقول لينا كنت بهظر معاكم قوموا أطلعوا برا !قلت ليها عادي بتعملها الشومه دي ... المهم رقدنا و نمنا طوالي ، تاني يوم التلاتاء ، قلت لـ منار يمكن مس نادين أمبارح ما عاقبتنا عشان ما أمشي أشكيها مره تانيه لـ بابا حازم ! هي ما عايزا الشكاوي ضدها تكتر ، عايزا تحافظ على صورتها المثاليه قدام بابا حازم ! قالت لي فعلاااً ! أنا ذاتي قلت كدا ! المهم لمن إتلاقيت مع ليلى شديتها من يدها و قلت ليها رجعي لي تلفوني سرعه ، قالت لي تلفونك الخرده داك أسوي بيهو شنو أنا ! قلت ليها اسمعي هنا أنا عارفه إنو الأولاد الأمبارح الهددونا و شالوا مني التلفون انتِ الرسلتيهم ، أصلاً مستحيل تسكتي و تخليني نرجع البيت عااادي كدا مع التلفون بعد ما صورتك !! ضحكت بصوت عالي و قالت لي يعني تلفونك اتسرق !! كفاره ياخ ، قلت ليها ليلى احسن تقولي لي وديتي التلفون وين ؟! مش مشكلتك كانت الفيديو الصورتو ؟! معناها أكيد حذفتيهو فـ رجعي لي تلفوني ، قالت لي يا حليلك حالك تحنن والله، ما باقي ليك إلا تبكي و تبوسي رجلي ، طوالي فكيتها و مشيت خليتها لأنها وحده حيوانه و ما حـ تتكلم ، طبعاً لمن جاتنا داخله بقت تضحك و تقول للبنات في ناس أمبارح سرقوا منهم تلفوناتهم! رماح قالت لي صحي يا مها امبارح سمعناكم قلتو لمس نادين تلفونك إنسرق ! يعني الكلام دا صح ؟؟ السرقه حصلت ليكم كيف ؟! قلت ليها سرقه و خلاص ، ليلى قالت لي البتسوي بإيدك بغلبك أجاويدك ، و الحفره الحفرتوها لي وقعتوا فيها انتوا حبايبي أنا ، طلعتوا لفيتوا و سرحتوا و مرحتوا قدرتكم و لمن جيتوا راجعين و مس نادين قبضتكم عملتوها فيني ! قال كنا متابعين ليلى !! قلت ليها عايني عليك الله ما تكذبي أنا و انتِ و منار و حبيبك اب سكاكات داك عارفين الحقيقه ... بس أنا مستغربه فيكم يا بنات ، مع انكم عارفين إنو ليلى ما كانت موجوده بس مع ذلك سكتوا و ما جيتوا قلتوا الحقيقه ! سناء قالت لي مااالنا و مال المشاكل ، هسي انتِ ذاتك مش قاعده تطلعي بالدس و تجي راجعه ! حصل فتناك أو كلمنا ليك مس نادين !؟ قلت ليهم ليلى عشاااان ضامنه و عارفه إنو ماف وحده فيكم حـ تتكلم امبارح جات و كذبت بكل قوة عين ! بصراحه كدا انتوا بتخافوا من مس نادين ولا من ليلى !؟ رماح قالت لي غيتو أنا عن نفسي مستحيل أفتن بت مع مس نادين أو أمشي اشهد ضدها ، انتِ و ليلى بطريقتكم و مشاكلكم حلوها براكم ما تدخلونا فيها ، البنات قالوا ليها كلاااامك صاااح يا رماح ... طبعاً ليلى كانت بتعاين لي بشمااااته كدا ، قالت لي عشان حسااادتك و غيرتك دي تلفونك إنسرق !قلت ليها ماف أي مشكله بجيب غيرو ، ضحكت و قالت لي ايوه صح لأنو عندك خزنة قروش !...ما رديت عليها تاني بس بيني و بين نفسي كنت متأكده إني حـ ألقى شغل تاني و اشتري تلفون ، أصلاً الإنسرق مني دا اشتريتو مستعمل و بقى خُرده بس كنت ممشيه بيهو حالي ... إيماني بفكرة إني حـ اشتغل و اقبض قروش و أشتري العايزاه هون و خفف علي حرقة سرقة التلفون ، طبعاً اليوم داك كان يوم ثلاثاء و بابا حازم حـ يجي عشان كدا البنات بدوا يظبطوا في نفسهم ، رسيل جات و قال لي مها سرحيني ، قلت ليها طيب ، جبت المشط و بديت أسرح ليها و اتونس مع البنات ، كل وحده كانت بتحكي عن الحاجه البتتمناها ، قلت ليهم أنا ما عايزا شي غير اشتغل و أكون نفسي ، و حاسه إنو الحاجه دي حـ تحصل ان شاء الله ، بكرا حيكون عندي قروش كتيييره و أجيب أي حاجه نفسي فيها و أعيش أحسن عيشه و ما تخافوا ما حـ أفتري عليكم و حـ اشغلكم معاي ، سماح قالت لي الله على الكرم و الشهامه ، قلت ليها عفواً قصدي حـ اشغلكم عندي 
لبعوني في ضهري و قالو لي أصلك كلبه ، قعدت اضحك و قلت ليهم متخيله نفسي في بيتي المستقبلي الحـ أشتريهو بقروشي ، ممدده على السرير ، رماح و نهال بعصروا لي رجليني و سماح بتسرح لي شعري و سناء بتطبخ لي و نور تغسل لي و رؤى تكوي لي و ... و ....و الخ و منار عشان صحبتي حتكون مساعدتي ، طبعاً قعدوا يضحكوا و قالوا لي بالجد انتِ حـ تعمليها ما عليك ضمان ، منار قالت لي بعد تعبي معاك دا كلو عايزا تبقيني مساعدتك ! كتر خيرك يا زوله ما بتقصري 
رسيل قالت لي و أنا عايزا تشغليني شنو ؟؟قلت ليها انتِ ما بشغولك يا رسوووله العسل ، انتِ و مصطفى حتكونوا أصحاب البيت و حـ أدخلكم مدارس خاصه و حـ أخليكم تبقوا ناس ناجحين ، قالت لي نحنا ما عايزين نبقى ناس ناجحين عايزين نبقى ناس عندنا قروش ، طبعاً قعدنا نضحك عليها ، قلت ليها النجاح بجيب القروش ، قالت لي تاني حـ تعملي لينا شنو أنا و مصطفى ؟؟رمـاح قالت ليها يا بت يا رسيل ، مها دي سايقه بالخلا ، بتونس فينا ساي و كلامـها نـحنا ماخدنوا على أساس إنو ونسه ما حقيقه و انتِ كمان اتونسي و أحـلامي معاها زي ما عايزا و بعدها أنسي و أمشي تمي لعبك قلت ليها ما تشتغلي بكلام رماح البائسه دي ، الما عندها لا أحلام لا طموح ، رماح قالت لي أحلامي عندها حدود ما بتتخطى سور الميتم دا ، سناء قالت ليها أنا متمنيه حاجه واحده بس ، أعرس و أطلع برا للحياه دي ، خلاص الكفاله دي قطرها فات ، قلت ليها معقوله ما عايزا شي من الحياه دي غير العرس !؟قالت لي العرس دا ذاتو كتير على بنات زينا ، ياخ بابا حازم و الناس المعاهو كتر خيرهم فكروا فينا ، الواحد عمل خير لما قبل يعرس وحده مجهولة الأبوين ، قلت ليها بتقبلي تعرسي راجل أكبر منك بـ 15 أو 20 سنه ؟؟قالت لي اييوه بقبل ، لو عمرو 100 المهم أطلع من هنا و يكون اسمي مربوط بإسم شريك حياتي الحـ يكون مسؤول عني ، العرس حـ يفتح لي أبواب كتيره ، وحده اسمها سجى قالت لي ما معروف ! يمكن ما يجيها راجل كبير ! و لو جا حـ ترفضو عادي الموضوع ما خطير ، بنات كتار من الميتم عرسو رجال زي الورد و ساقوهم من هنا و هسي أكيد عايشين عيشه هنيه ، قلت ليها ماف حاجه بتضمن أو بتأكد ليك إنو العرس هو منقذك الوحيد ، البنات الطلعوا من هنا نحنا ما عارفين شكل حياتهم عامل كيف ، مبسوطين ولا لا ، خاصة إنهم مجهولات الأبوين ، فأكيد حـ يعانوا ، يعني إذا الراجل قبلها هل أهلو و المجتمع حـ يقبلوها !؟ متأكده لو ما عانوا من رجالهم حـ يعانوا من نسابتهم و باقي المجتمع ، منار قالت لي برضو ما مشكله ، مشاكل النسابه دي ما حاجه جديده ، و الناس بتتكلم و تسكت ، المهم انهم طلعوا من هنا و بقى عندهم رجال و أكيد حالياً بقوا أمهات و نجحوا في إنهم يكونوا أسر ، سناء قالت والله نفسي أجرب الإحساس دا ، نفسي أعرس و يكون عندي أطفال ، أحميهم و ألبسهم و أطبخ ليهم و لـ أبوهم ، اخخخخ بس ، جات مس نادين داخله و قالت لينا كل وحده تقوم تجهز نفسها ، منار قالت ليها الفي بالي مش !!
قالت لينا اتنين منكم حـ يتخارجوا من هنا ، دا طبعاً لو عجبتوهم ، عاينت لينا من فوق لـ تحت بغيظ و مشت ، طبعاً البنات اتكبكبوا و فرحتهم ملت المكان ، كل وحده جرت على إتجاه و بقوا يجهزو في نفسهم ، غيرو لبسهم و سرحوا و عملوا ميك اب ، غيتو اجتهدوا و طلعو زي النجفه ، طبعاً أنا من مكاني ما إتحركت ، رسيل كانت قاعده معاي و بنعاين ليهم ساي ، لمن خلصت تسريحها قلت ليها أرح نشوف مصطفى ، قالت لي آي أرح ، المهم سقت رسيل و مشينا نشوف مصطفى في حوش الأولاد .... لاقيت هيثم قاعد في المسطبه قال لي كتكوتك اتعوق أمشي شوفيهو ، قلت ليهو شنووو ؟! مالو الحصل عليهو شنو ؟ قال لي الشلاقه ما بتخليهو ، ركب الشجره زي القرد و جا واقع ، قلت ليهو هسي وين هو ؟؟قال لي قاعد جوه ، طوالي دخلت المبنى حق الاولاد و رسيل وراي ، أول ما دخلت شفت مصطفى قاعد على الكرسي ببكي و حوليهو كم نفر كدا ، مشيت عليهو و قلت ليهو مصطفى وقعت كيف و هسي رجلك مالا ، واجعاك ؟؟قال لي آي واجعاني شديد ، فجأه في واحد إتلفت علي و قال لي طبيعي رجلو توجعو لأنو وقع عليها بس إتطمني ما إتكسرت ، طبعاً ياداب انتبهت ليهو ، كان شاب كدا أول مرهـ أشوفو ! ختيت يدي على رجل مصطفى و بقيت اتحسس فيها ، قلت ليهو رجلك دي ورمت ، ان شاء الله ما تكون اتكسرت ، الولد قال لي شكلك ما بتقتنعي بكلام زول 
قلت ليهو ما كدا بس ماف زول هنا دكتور ، قال لي أنا ما دكتور بس الرجل دي واضح انها ما مكسوره و دا رضخ و زي ما قلت ليك طبيعي تورم ، شويه كدا جا واحد من الأولاد جاب مويه دافيه و قطعة قماش ، الشاب قال ليهو اتأخرت يا حبيب ، شال منو قطعة القماش و غمسها في المويه الدافيه و بقى يمسح بيها على رجل مصطفى و مصطفى يتوجع ساي ، قلت ليهو براحه ياخ ! عاين لي بس ما رد ، لمن مصطفى تاني إتوجع و قال اخخ ، قلت ليهو ياخ انت ليه بتضغط عليها و.... قاطعني و قال لي تعالي أعمليها ليهو انتِ ، طوالي شلت قطعة القماش و بقيت أمسح بيها على رجل مصطفى بـ رفق و مع ذلك مصطفى كان بتوجع و شغال لي اخخخ و مره يقول لي براحه يااااخ !! الشاب قال لي اقتنعتي إني كنت عامل حساب و بمسح ليهو برفق ولا لسه !؟ سكت سااااي و ما قلت ليهو حاجه ، قال لي زولك دا خواف ساي و ما بتحمل اللمسه ، قلت ليهو عادي عشان هو شافع ! سكت بس و بعدها مشى ، المهم بعد خلصت ، دخلت مصطفى لـ جوه و قلت ليهو نوم بعد دا ، قال لي عايز مويه ، مشت رسيل جاب ليهو مويه و قالت ليهو تاني ما تركب في الشجره ، قلت ليهو خلي شلاقتك دي يا مصطفى !! ما معقوله كل مره حاصله عليك حاجه !! قال لي خلاص عرفت ، قلت ليهو مشكلتك ما بتسمع كلامي يا مصطفى ! هسي لو بقيت زي رسيل دي مالك !؟ قال لي يعني عايزاني أبقى بت !؟ كويس بكرا بلبس طرحه و بجيب لي منكير ، ضحكت و قلت ليهو خلي الإستهبال ، المهم هسي نوم و تاني ما .... قاطعني و قال لي ما تركب في الشجره ، قلت ليهو عارف الغلط و بتعملو ، المهم أنا حـ أمشي و أجيك بعدين ، طلعت مع رسيل ، لقينا الشاب داك برا بتكلم مع أولاد الميتم ، لمن جيت ماره بجنبهم قال لي الولد الهسي دا أخوك ؟قلت ليهو يعني أمي بعد رمتني هنا ، انتظرت سنوات لحد ما أنا كبرت قامت ولدت تاني و جابت الولد الهسي دا و ختتو جنب الميتم و كتبت عليهو دا اخو البت الجبتها هنا قبل سنوات ؟؟طبعاً الأولاد قعدوا يضحكو ! حسيت الولد اتغاظ بس كتم غيظو و إبتسم و قال لي ما تكوني إنسانه حاده و سغيله كدا ، قال كدا و مشى ، الأولاد قالو لي أحرجتيهو ، هيثم قال لي تاني حـ يفكر ألف مره قبل ما يسأل بت و يحاول يفتح معاها موضوع قلت ليهو ما قاصده أحرجو لكن سؤالو بايخ ، نحنا هنا في الميتم كل فرده من بلد ، المهم أنا و رسيل رجعنا الصالون ، بقينا قاعدين براااانا ، طبعاً البنات مشوا يعرضوا نفسهم للعرسان ، شويه كدا جات نجمه أصغر من رسيل بـ سنه ، نادتها و قالت ليها تعالي ألعبي معانا ، رسيل مشت و بقيت قاعده براااي ، دخلت غرفة النوم طلعت ورقي و ألوان و بديت أرسم لحد ما سمعت صوت صريخ جاي من الطابق الفوق ، استعجلت و مشيت الحضانه ، افتكرت الأطفال الرُضع ماف زول معاهم بس لقيت مشرفتهم و المرضعات قاعدين معاهم ، و عرفت منهم إنو في طفل عيان و كان نايم و هسي صحى و بدا يبكي و يصرخ ، قالوا حـ يجيبوا ليهو دكتور و بالمره يكشف عليهم كلهم ، بعدها نزلت تحت لقيت نجلاء في وشي قالت لي انتِ و ليلى و نهال قالو ليكم تعالوا ! قلت ليها منو و لـ شنو ؟؟قالت لي ما عارفه بس بابا حازم طالب حضوركم ، أصلاً هو من البدايه نادى البنات كلهم و انتوا ما جيتو ، قلت ليها طيب جاين ، دخلت جوه و كلمت ليلى و نهال ، طبعاً نهال ما طلعت لأنها كانت عيانه و ليلى بـ زولها عشان كدا ما شغاله بالموضوع دا ، و أنا كمان ما شغاله بيهو بس بما إنو بابا حازم طالبنا معناها في شي ضروري ، ليلى قالت لي عايزين مني شنو ؟ عرسانكم ديل ما بنفعوا معاي ، قلت ليها اتطمني انتِ ذاتك ما بتنفعي معاهم ، المهم خلونا نطلع ليهم و أصلاً ماف زول بقدر يجبرنا على حاجه ، قالت لي من وين جايبه ثقت إنهم حـ يعاينوا ليك أصلاً و يقولوا عايزنك 
قلت ليها كل الثقه بس الموضوع ما هاميني كتير 
نهال قالت واي أنا مصدعه قلت ليها إذا تعبانه شديد ما تمشي و أنا بكلم بابا حازم انك عيانه ، قالت لي لا أرح ، المهم طلعنا و مشينا ليهم نحنا التلاته ، كانو قاعدين في الحوش ، راصين سراير و كراسي ، البنات جزو قاعدين على السراير و جزو واقف و الضيوف قاعدين في الكراسي ، طبعاً كلهم قعدوا يعاينوا لينا لحد ما وصلناهم ، طبعاً أنا استغربت هم بعاينوا لينا كدا ليه !!فجأه جاني صوت بقول أيوه دي ....لمن إتلفت شفت الشاب اللقيتو قبيل و كان مؤشر علي ، قلت معناها شكاني لـ بابا حازم ، جا قريب و قال ياها ذاتا ، عاينت لـ بابا حازم و قلت ليهو ما عارفه هو قال ليك شنو ، بس الحصل ما بستحق إنو يجي و يشكيني ليك ، احتمال كبير إنو الكلام القالو كلو كذب و تأليف من عندو ، طبعاً الولد قعد يضحك ، قال لي ليه انتِ دائماً مستعجله كدا !؟ و بعدين نحنا شفع عشان أجي أشكيك ؟!!قلت ليهو طيب ليه أشرت علي ؟عاين لـ بابا حازم و قال ليهو أنا عايز البت دي ، طبعاً حصلت صنه غريبه كدا و كل الأنظار إتوجهت علي!! ، قلت ليهو و أنا ما عايزاك ، طبعاً ولا اشتغل بي ، كان بعاين لـ بابا حازم كأنو أنا رأيي ما مهم ، بابا حازم قال ليهو زي ما سمعت يا خالد البت قالت ما موافقه ، و كلكم عارفين إني ما قاعد أجبر وحده من البنات ديل على حاجه ، خالد قال ليهو لكن .... بابا حازم قال ليهو الموضوع دا منتهي بالنسبه لي ، طبعاً انبسطت شديد من بابا حازم ، دائماً واقف معانا و داعمنا ، بعدها قال لينا بتقدرو تمشوا بعد دا إلا سجى خليك قاعده ، المهم كلنا مشينا دخلنا جوه و جزو كبير من البنات كانو زعلانين ، رماح قالت بعد التعب دا كلو اختاروا سجى و.....عاينت لي و سكتت ، و بعدها قالت شكلنا حـ نبور و نعفنا في المكان دا ، وقفت على حيلي و قلت ليهم يا بناااات يا بنااااات اسمعوني ، ماف حاجه بتزعل ! كلكم عارفين انهم حـ يختاروا اتنين بس صح ولا غلط ؟!هـنا كـلنا أخوات و بنتمنى الـخير لبعض ، يعني لـمن يـختارو صحبتك يـلي هي زي أخـتك كأنو اختاروك انتِ ، لازم نـفرح لبعض و نحـب لغيرنا البنحبو لـ نفسنا ، اليـوم اختاروا سجى و بكرا أكيد حـ يختاروا غيرهـا لحد ما تكملن كلكن فـ إرتاحـن و إتطـمنن ما حـ تبورن يا السمحاترماح قالت لي ما عارفه اضحك ولا أبكي بسبب كلامك دا ، قلت ليها الإتنين ، سماح قالت لي خليك من دا انتِ خالد دا بتعرفيهو من وين لمن قال عايزك ؟؟سناء قالت ليها ما تعبت في نفسها ولا ظبطتها زينا و مع ذلك الولد قال عايزها !! لقاك وين ؟قلت ليهم و انتوا لمن يقولوا عايزنكم معناها بعرفوكم قبل كدا ؟؟فدوى قالت لي جا و قال إنو إختار ليهو بت من هنا بس ما عارف اسمها ، بابا حازم قال ليهو ياهم كل البنات قدامك ياتا فيهم ، قال ولا وحده لأنك ما كنتِ معانا عشان كدا بابا حازم قال لو لسه في بنات جوا نادوهم ، المهم من بين كل الناس قال عايزك انتِ و هو لقاك وين أصلاً ؟ سماح قالت لي يعني لو كنتِ واقفه معانا و اختارك ماف مشكله بس انتِ ما كنتِ موجوده فكيف واحد يقول عايز وحده ما شافها ؟؟ قلت ليهم أهدوو و حكيت ليهم هو عرفني كيف ، قلت ليهم الزعلانات بسببو دا رفضتو ليكم و أصلاً موضوع العرس دا ما هاميني ، و الولد دا ذاتو كريه من شفتو ما ركب في راسي ، فدوى قالت لي يخسي عليك هسي عيبيهو لي في سطر ! ما شاء الله ظاهر عليهو محترم و راقي و لبق في الكلام ، ياريتو أختارني أنا ، قلت ليها الجايات أكتر من الرايحات ، فجأه كدا سجى جات داخله و هي عايزا تطير من الفرح ، كل البنات مشوا اتلمو فيها باركوا ليها و بقوا شغالين ليها بختك والله ، قالت ليهم واااي يا بنات ما مصدقه عقبالكم كلكم ، قالوا ليها تعالي أقعدي و أحكي لينا الحصل شنو بعد ما نحنا مشينا ، قالت ليهم بابا حازم خلانا برانا و قال لينا اتعرفوا على بعض أكتر ... المهم سجى بدت تحكي لينا عن الولد الإتقدم ليها و الحكى ليها عن نفسو و حياتو ، لمن خلصت البنات قالوا ليها حظظظك والله و ربنا يتم ليك على خير ، قلت ليها هو ما قال ليك ليه خلى البنات البرا ديلك كلهم و جا الميتم عشان يعرس ؟؟طبعاً في اللحظه ديك كل البنات عاينو الي و صروا لي وشوشهم ، سجى قالت لي لو انتِ حاسه بعقده أو نقص و إنو وجودك في الميتم معناها انتِ أقل من غيرك و ما بتستاهلي السمح فـ معليش أنا عكسك و ما حاسه بالدناءه و الإنحطاط الإنتِ حاسه بيهم !طبعاً استغربت فيها ! سجى دي ما كانت بتتكلم كتير أساساً ! معظم الوقت بتكون ساكته !! قلت ليها ما قصدي كدا بس.... قاطعتني و قالت لي عليك الله يا مها ما تعكري لينا مزاجنا ، رماح قالت لي لمن لقيتي شغل و مشيتي اشتغلتي في وحده فينا أحبطتك و قالت ليك كيف يقبلوا يشغلوا وحده زيك مجهولة الأبوين !؟ في وحده قالت لي انتِ بت ميتم فكيف تقولي عايزا تتوظفي و تجيبي قروش و بيت ؟! ليه انتِ بتشوفي إنو من حقك تعملي العايزاهو و تعيشي زي الناس و نحنا لا ! ليه بتستكتري علينا أي حاجه سواء كانت بسيطه أو كتيره ؟؟قلت ليهم بما انكم بقيتوا تفهموا كلامي غلط و تضايقوا ماف داعي اقعد معاكم أكتر ، طوالي قمت منهم و طلعت برا و أنا زعلانه ، رسيل جات لاحقاني و قالت لي ديل حقارات ساي ما تشتغلي بيهم ، قلت ليها كلامهم بزعل بالجد ، محسسني إني حاسداهم !....المهم بليل زي الساعه 9 كدا ، كنا فاتحين التلفزيون بنحضر في فلم ، أو خليني اقول أنا الكنت بحضر لأنو البنات قاعدين في زاويه براهم مع سجى و شغالين يتكلموا عن الحب و الزواج و هي بتتكلم ليهم عن مستقبلها و مخططاتها بعد الزواج ، لمن قمت مشيت و قعدت جنبهم سكتوا ، قلت ليهم انتوا متخلفين ولا شنو !؟ خلااااص عايزين تقاطعوني بسبب موقف قبيل !! كوووويس نشوف الحـ يعمل ليكم حفلات ما قبل الزواج منو ، سجى جرتني عليها و قالت لي غيتو انا ما زعلانه قلت ليها من قبيل صاره لي وشك و بعد دا كلو ما زعلانه ؟! قالت لي زعلي راح في وقتو ، أصلاً أيامي معاكم بقت معدوده ، البنات قالو ليها حـ نفقدك و نشتاق ليك كتير والله ، قالت ليهم و أنا كمان والله ، طبعاً حسيتهم شويه كدا و حـ يبكوا ، قلت ليهم خلاص بطلو دراما و تراجيديا ، أصلاً دا العايزاهو سجى و دا الكلكم عايزنوا يا بايرات ، لبعوني في ضهري و قالو لي بايره براك ، قلت ليهم رايكم شنو اليوم نساهر ؟؟اتخيلوا معاي ، ليلة خريفيه بارده و إضاءه خافضه و تلفزيون و شاي لبن و فشار و مكسرات و عصير ، يعني خلونا نصنع لينا ذكريات جميله مع سجى في آخر أيامها معانا ...قالوا لي ديل كلهم حـ تجيبيهم من وين يا السمحه ؟ قلت ليهم الخريف موجود ، التلفزيون موجود ، حـ نخفض الإضاءة و باقي الحاجات المطبخ موجود ، سناء قالت لي نادين الشومه طبلت المطبخ من قبيل و صدقيني تاني كان ركعنا ليها ما حـ تفتحو لينا !قلت ليهم خلوها علي ، المهم رتبو المكان دا و فرشو الأرض و جدعو فيها مساند و خليكم جاهزين ، قالو لي يا سلااااام ما عارفين من دونك كنا حـ نعمل شنو ، قلت ليهم عارفه نفسي غاااليه و صانعة أيامكم و سعادتكم ، سماح قالت لي انزلي انزلي من برج الغرور الركبتي فيهو دا بسبب كلامنا المهم خليتهم و مشيت فوق ، وقفت في الممر و بقيت أتلفت يمين شمال ، فجأه كدا منال المشرفه تبع الأطفال الرُضع جات طالعه من الحضانه ، قلت ليها مس نادين وين ؟؟ في غرفتها ؟؟قالت لي والله ما عارفه ، بس قبل شويه شفتها حايمه هنا ، بتكون في غرفتها شوفيها ، قلت ليها تمام ، طبعاً كنت عايزا اتأكد هي وين تحديداً عشان أدخل غرفتها ، غيتو في إحتمال كبير تكون في غرفتها ، مشيت وقفت جنب باب الغرفه و لصقت أضاني مع الباب بس ما سمعت حركه ، إتهورت و ضربت الباب و لمن ما جاني رد طوالي فتحت الباب ، لقيت الغرفه فاضيه و لو كان لقيت فيها مس نادين كنت حـ اتصرف ، إبتسمت و قلت حظي حلو و الآن حـ ابدا أفتش المفتاح ، أول ما إتحركت كدا سمعت صوت حركه و بعدها صوت باب الحمام ، إتوترت طبعاً و بإستعجال دخلت تحت السرير ، شايفاها من تحت مشت على الباب وقفت و جات راجعه فتحت الدولاب و الدرج ، وقفت مساااافه بعدها طفت الإضاءة و جات رقدت على السرير ، طبعاً كدا صعبت علي الموضوع ، بس إحساسي قال لي إنو المفاتيح يا في الدرج يا في الدولاب ، بما إنها مشت فتحت الباب و وقفت جنبو مسافه و كذلك جنب الدولاب و الدرج معناها لمن أنا ضربت الباب هي من جوه الحمام سمعت الصوت عشان كدا حبت تتأكد إنو كل شي في مكانو ، اتحركت بهدوء و أنا بحبي على الأرض لحد ما طلعت بالإتجاه التاني للسرير ، قصاد الدولاب و الدرج ، بس كيف أفتحهم من دون ما هي تحس ! في الضلام داك قربت من الدولاب و أنا قاعده على الأرض ، براحه مديت يدي عشان أجر ضلفتو بس ما فتح و الدرج كذلك و زي ما إتوقعت قافلاهم بمفتاح !! ياخ الإنسانه الشومه دي حياتها كلها مفاتيح !!وقعت في ورطه كبيره ! بقيت أحبي لحد ما وصلت الباب ، قلت لو طلعت قافله باب غرفتها بمفتاح برضو حـ تكون بالغت والله ! وقفت على حيلي و بـ هدوء حركت مقبض الباب و أنا بتلفت ساي مع إنو الدنيا ضلام شديد لأنها قافله الشبابيك و منزله الستاير ، فتحت الباب على الضيق و طلعت براااحه و قفلتو بكل هدوء ، طبعاً كنت خاته يدي على قلبي و ما مصدقه إني طلعت من غرفة البومه دي من دون ما تحس بي !نزلت تحت للبنات لقيتهم جهزو المكان ، قالوا لي هاااا وين المفتاح ؟؟ ليلى قالت ليهم وه ما قدرت تجيبو ، شيلوا الفكره دي من بالكم و أمشوا نوموا نومكم ، طبعاً البنات حسوا بخيبه بعد ما كانو متحمسين ، قلت ليهم حـ اجيب المفتاح بس أعملو الحـ اقولو ليكم ، قالو لي اها ......رجعت فوق تاني و وقفت في حته قريبه من غرفة مس نادين ، شويه كدا سناء جات جااااريه و بقت تخبت على باب غرفتها ، بعد مسافه الشومه فتحت الباب و قالت لـ سناء مالك في شنو ضاربه الباب دا كدا ، الزول معاكم أصلو لا ينوم لا يرتاح! قالت ليها يا مس نادين تعالي شوفي منى و فدوى بتشاكلو ، قالت ليها مالهم صغار هم ! قالت ليها الشكله كبيره يا مس نادين و احتمال وحده تقتل التانيه ساعتها حـ تقولي شنو لـ بابا حازم ، قالت لي حيييا أنا منكم ! ياهو الفضل أجي و احجزكم ! أول ما مس نادين مشت مع سناء أنا طوالي دخلت غرفتها و بقيت أفتش على المفاتيح بسرعه ، طبعاً بفتش و بعاين في الباب ، رفعت اللحاف لقيت مفاتيح ، مشيت بيهم على الدولاب ، فتحتو و فتشتو ضلفه ضلفه بس ما لقيت أي مفتاح !! برضو فتحت الأدراج و قلبتها فوقاني تحتاني بس ما لقيت شي !! غضبت غضب ! رجعت لـ ورا و قلت الشومه دي داسه المفاتيح وين ! طبعاً مع رجعتي دي ضربت الدرج و فوقو كان في مزهريه و مع ضربتي إهتزت و مالت بالجنبه و كانت حـ تقع بس إستعجلت و مسكتها و عدلتها و مع عدلتي ليها دي سمعت صوت مفاتيح جواها !! طوالي زحيت الورود الصناعيه الفيها و قربت أزغرد لمن لقيت المفاتيح !.... شلتهم و شلت شويه من القروش اللقيتهم في الدولاب ، رجعت كل حاجه لـ مكانها و رتبت الغرفه و بقيت مارقه ، طبعاً ما نزلت تحت إلا لمن شفتها جات راجعه و دخلت غرفتها ، لمن جيت نازله البنات كانو بعاينوا لي ومنتظرني أبشرهم ، رفعت ليهم المفاتيح و قلت ليهم نجحناااا ، قعدوا يصرخو قلت ليهم هسسس هسي حـ تجينا راجعه ، طبعاً دي كلها كانت خُطه مني ، خليت فدوى و منى يمثلوا إنهم اتشاكلوا شُكله كبيره ، ليلى قالت لي قفلت منكم التلفزيون و ريحتكم و قالت ماف وحده تفتحو ، يعني عملتو خطه عشان تجيبو المفاتيح بس قفلو منكم التلفزيون 
قلت ليها قفلتو بـ مفتاح ! أكيد ما حـ نسمع كلامها و حـ نفتحو ! رماح قالت لي لكن يا مها هي شددت و نبهت علينا و قالت ماف وحده تفتح التلفزيون و قالت لينا لو جيت فجأه كدا و لقيتكم صاحين و التلفزيون فاتح حـ تتعاقبو كلكم و قالت التلفزيون حدو الساعه 9:30 بعدها يتقفل طوالي !! سكت مسافه بعدها قلت ليهم حـ نعمل العايزنو ، اتهورت و من دون ما اتأكد جريت ليلى على جنب كدا و قلت ليها على فكره أنا عارفه ليه بكري بخليك تدخلي و تطلعي على كيفك من دون ما زول يشوفك ، عارفه البير و غطاها ، طبعاً إتخلعت و ملامح وشها اتغيرت ، عاينت حولينها و قالت لي بتقولي في شنو انتِ !؟ إبتسمت و قلت ليها أنا ماف حاجه بتفوت علي في الميتم دا ، و عشان اختصر ليك يا تساعديني يا تساعديني لأنو لو قلتي لا حـ أختك في راسي و أفضح الداساهو لـلكل ، فكت يدها مني و قالت لي بطلي هبل ، قلت ليها كويس ، أمشي نومي هسي عشان بكرا يومك حيكون طويل و مليان عقوبات و تحقيقات مع مس نادين ، غمضت عيونها بغضب و قالت لي قولي عايزا شنو !؟طبعاً كدا ياداب أثبتت لي إنو فعلاً في شي بينها و بين بكري الحارس ! قلت ليها عايزا أمشي البقاله ، كلمي بكري يخليني أطلع ، قالت لي فترتي من النط ؟! ما كنتِ عامله فيها سبايدرمان !! قلت ليها بما إنو لقيت طريقه ساهله و مختصره ليه أتعب نفسي و أقعد انطط بالباب !! المهم مشيت فتحت المطبخ و شفت الحاجات الناقصه ، قلت للبنات ماشه البقاله و جايه ، رماح قالت لي حـ أمشي معاك ، قلت للباقين اعملوا الشاي و باقي الحاجات الموجوده و اعملو حسابكم نادين ما تشوفكم لحد ما أرجع ....المهم ليلى مشت كلمت لينا بكري و هو زي الشاطر فتح لينا الباب ، مشينا و جينا ، لقينا البنات جهزوا نص الحاجات ، عملت عصير شلتو و قعدت بيهو في الصاله ، فجأه مس نادين جات نازله و البنات خافوا و اتكبكبوا ! جات وقفت قصادي و قالت لي دا شنووو دا !!؟ قلت ليها عصير 
نططت عيونها و قالت المطبخ !! المفاتيح !!؟طوالي جرت على المطبخ و لقتو مقفول ، جرت غرفتها و لقت المفاتيح موجوده ، جات نازله و قالت جبتو العصير دا من وين ؟؟قلت ليهو عملتو أنا , و العصير ما إلا يتعمل في المطبخ ، قلنا نتونس و نشرب عصير ، قالت لي تشربوا السم ان شاء الله جيبي الجك دا ، طبعاً شالتو و شالت معاهو الكبايه و مشت بيهم غرفتها ، البنات بقوا يعاينو لـ بعض و هم ما فاهمين حاجه ، لمن رماح جات نازله من فوق قعدنا نضحك و ديل ما فاهمين شي ، سناء قالت أنا زهجت و فترت لو كان مشينا و نمنا نوم ينفعنا كان أحسن ، قلت ليها حـ تفوتك حلااااة سهره ، قالت لي انتِ بتحلمي يا مها !؟قلت ليها لا ، ثواني بس ...قمت من مكاني و مشيت فوق لـ غرفة مس نادين ، دقيت ليها الباب شديد ، جات فتحتو بزهج و قالت لي أكسريهو عليك الله أكسريهو !! شوفي انتِ و المعاك ، والله تجو تاني و تضربوا لي الباب دا إلا أسود عيشتكم ، قلت ليها آسفه بس عايزا العصير ! أنا خلطتو من قبيييل و جهزتو عشان نشربو زي الزمن دا و بمزاج ، المنقا دي نحنا دقينا ليها شير عشان نجيبها و نخلطها ، عشان كدا ممكن أدخل أشيلو ؟! ضيقت عيونها و قالت لي متين طلعتو من هنا و مشيتو جبتو المنقا دي !؟ قلت ليها رسلنا بكري الصباح ، دخلت جوه و جات راجعه و هي شايله الجك ، قالت لي شربت نص و باقي لي نص الله يقدرني عليهو ، كبت منو في كبايه و شربتو قدامي و قالت لي حق الناس دا سمح سمااااحه و قعدت تضحك ، قالت لي تعالي الصباح عشان تشيلي الجك ... و هو فاضي .... طبعاً حسيتها حتموت من شدة الضحك ، أنا ذاتي كنت عايزا اضحك بس مسكت نفسي ، قلت ليها الله يسامحك يا مس نادين ، قالت لي اتخارجي منها ، والله لو صحيت تاني و لقيتكم لسه قاعدين في الصاله حـ انومكم برا في الحوش و في عز البرد دا برد الينشفكم وحده وحده ....إتحركت من جنب غرفتها و هي قفلت الباب بس ما نزلت تحت ، انتظرت زي 10 دقايق كدا بعدها مشيت دقيت ليها الباب بس ما فتحت ، ضربتو شديد بس برضو ما فتحت ، حركت المقبض بس شكلها قفلتو من جوه ، ضحكت و مشيت نزلت تحت و أنا بضحك ، قلت ليهم حان وقت الإحتفااااال 
منى قالت لي دقيقه أنا ما فاهمه شي ! قلت لـ رماح ما حكيتي ليهم !؟ قالت لي سمح الكلام من خشم سيدو ، قلت ليهم 10 جات و 11 قربت خلونا نستمتع بباقي الليل دا قبل ما تطلع لينا مصيبه جديده و بكرا بفهمكم الحصل ....المهم جبنا مكسراتنا و شاي اللبن و الفشار و باقي العصير ، طبعاً ما كبيتو كلو في الجك عشااان عاااارفه الشومه ديك حـ تجي تشيلو ، فتحت التلفزيون و طفيت الضو و إتلمينا كلنا و قعدنا على الأرض و جبنا mbc2 ، سناء مشت جابت لينا أغطيه و جات عشان البرد ، فجأه كدا إتلفت و قلت ليهم يا بنات ! منار وين ؟؟يتبع......
