لمن فتحت عيوني عرفت إني في المستشفى ، اتذكرت الحصل لحد آخر لحظه غمضت فيها عيوني و الألم الحسيت بيهو ، ختيت يديني على بطني و أنا خايفه ، فجأه جات الدكتوره قاعده ، قمت و قعدت و قلت ليها بلهفه يا دكتوره أنا حامل ! طمنيني ماف شي حصل للجنين صح ؟؟ مع جملتي دي يونس جا داخل ، الدكتوره عاينت ليهو كأنها بتقول ليهو أقول ليها أنا ولا انت !... نظراتها ما طمنتني و عيوني إتملت دموعي حتى قبل ما هي تقول لي حاجه ، حركت لسانها و قالت لي للأسف انتِ أجهضتي ، اللحظه السمعت فيها الجمله دي كان إحساسي نفس إحساس الزول التعب و بنى ليهو عماره من عدة طوابق و فجأه العماره دي جات واقعه ، اتهدمت و اتكسرت و اتهدم معاها كل تعبو و آمالو! بقيت أعاين لـ يونس و أنا دموعي عشره عشره ، الدكتوره شافت الدرب و طلعت ، قلت ليهو يونس و سكت لأنو الكلام غلبني ، اتمنيتو يجيني قريب ، اتمنيت يقعد جنبي و يخليني أبكي فيهو بس ما عمل كدا ، عاين لي و طلع طوالي و بعدو حلا و أمها جوني داخلين ، حمدلو لي السلامه و طبعاً عرفو إني أجهضت ، حلا دي قعدت معاي لحد العصر بعدها رجعت مع راجلها و أمها رجعت قبليها ، بقوا معاي يامن و يونس ، يونس دا نهاي ما جاني داخل تاني بس سامعه صوتو برا لما يتكلم بالتلفون أو مع يامن ، طبعاً كلهم ما كانوا عارفين الحاصل شنو أو كيف أنا وقعت عرف دا من خلال كلام ناس حلا معاي ، قايلين بس جيت واقعه من سلم البيت ، المهم تاني يوم اتفاجأت لمن منار و ليلى جوني داخلين!
صراحة استغربت و سألت نفسي ديل لقوا بعض وين و عرفوا من وين إني في المستشفى ! طبعاً ما سألتهم عن شي ، الفيني كان مكفيني ، قالوا لي جينا نطمن عليك بعد عرفنا الحصل معاك ، منار قالت لي بالصدفه لاقيت يامن و حكى لي فـ كلمت ليلى و جينا طوالي ... قعدوا معاي حكاية ساعتين بعدها ليلى مشت بس منار قعدت معاي ، لحد الساعه 12 كدا حلا جات ، قالت لي معليش امبارح ما قدرت أبيت معاك في المستشفى ، جابت لي الفطور بعدها أدتني الأدوية ، كانت مهتمه بي شديد كأنو ما حصل خلاف بيناتنا ، منار قالت ليها الدكتور ما قال ليكم حـ تطلع متين!؟؟
قالت ليها بكرا ان شاء الله ، بعد أخدت الدواء قالت لي تاااني في واحد حـ تاخديهو بعد شويه ، يونس مشى يجيبو ، بقيت أعاين للباب و منتظره يونس متين يجي داخل ، قلبي عمل شححح لمن سمعت صوت زول بضرب الباب ، هسي حـ يجي داخل و يخليني أشوفو، مشت منار تفتح الباب ، أول ما فتحتو جاني صوت يامن ، حسيت بخيبة كبيره ! جا داخل سلم علي و قال لي حالياً حاسه نفسك كيف ؟؟ قلت ليهو كويسه الحمدلله ، ناول حلا الدواء و قال ليها خليها تبلع منو بعد شويه و خليك متابعه معاها ، قالت ليهو طيب ، لمن كان حـ يطلع قلت ليهو يونس وين؟؟
قال لي طلع قريب ، هسي حـ يجي راجع ، طبعاً أنا عارفه إنو حيكون زعلان مني و ليهو حق لأني ما كلمتو بس ما مفروض يتعامل معاي بالجفا دا و أنا في الحاله دي و محتاجه ليهو أكتر من أي وقت!
