قالوا لي ما عارفنها والله ، دخلت غرفة النوم لقيتها ماف ، لما طلعت برا لقيتها قاعده في الحوش بتعاين للسماء ، وصلتها و ختيت يديني على أكتافها ، إتلفتت علي مخلوعه ، قلت ليها دي أنا ، قاعده هنا براك ليه ؟! قالت لي ساي ، قلت ليها لا لا أكيد في شي ، قالت لي بزهج ماف أي شي و طوالي وقفت على حيلها و دخلت جوه ! في البدايه استغربت بس تاني قلت يمكن حكاية العرس دي مزعلاها و عامله ليها عقده نفسيه ! لمن دخلت جوه ما لقيتها قاعده في الصاله مع البنات ، دخلت جوه غرفة النوم اتغطت و إتلفتت على الحيطه ، ناديتها و قلت ليها أحكي لي يا منار مالك بس ما ردت علي فـ خليتها و قلت حـ اسألها و افهم منها الحاصل لمن تروق شويه ، رجعت للبنات عشان نكمل سهرتنا بس بالي كان مشغول بـ منار ، ما بحب أشوفها زعلانه ، ما بحب أشوف أي بت من بنات الميتم زعلانه أو مهمومه ، لو علي أسعدهم كلهم و أخلي الضحكه ما تفارق وشوشهم ، تاني يوم لاقيت مس نادين في الحوش ، طبعاً للحظات خفت انها تكون شكّت إنو في منوم في العصير ، قالت لي عصيرك الأمبارح سممممح خلاص ، ليه ما جيتي شلتي الجك 😏
قلت ليها خليتو ليك عشان تاني لمن أعمل عصير حـ أجي انقص ليك منو ، قالت لي النص بالنص ، قلت ليها أكيد تااااني كل ما أعمل عصير صدقيني ما حـ انساك ، قلت كدااا و دخلت جوه و أنا بضحك عليها ، سناء قالت لي مهاااوي تعالي هنا و قولي لينا امبارح عملتي شنو لـ مس نادين ؟؟... قلت ليها ولااا شي ، ليلى قالت لي كيف يعني ولاااا شي و انتِ و رماح كنتوا بتعاينوا لبعض و تضحكوا ؟! عملتوا شنو قولوا ؟!... طبعاً كويس إني أمبارح ما حكيت ليهم إنو أنا و رماح لما مشينا البقاله غشينا معانا الصيدليه و اشترينا منوم و عملت منو في العصير ، طبعاً من صحينا مشيت نبهت رماح و قلت ليها ما تحكي لأي زول بالحصل أمبارح ، قالت لي مستحيل اتكلم لأني اتورطت معاك و لو مس نادين عرفت إنو كان في منوم في العصير حـ تضبحنا و لو بابا حازم عرف ما حـ يحصل خير لأنو عملتنا دي بطاله شديد و ما سبقنا عليها زول !... طبعاً أنا اتطمنت من ناحيتها لأنها بتخااااف و مستحيل تحكي لزول بس كنت حابه اتأكد.... طبعاً ليلى كانت شاكه إنو في شي بس ما قدرت تعرف ، المهم بعد الفطور بكري الشوم جا و قال لي أستاذ حازم بناديك ، طبعاً استغربت و قلت ليهو غريبه بابا حازم الجابو شنو و هو كان هنا أمبارح و مفروض ما يجي إلا الثلاثاء الجايه !
المهم لمن مشيت ليهو في مكتبو لقيت معاهو مس نادين و واحد كدا من مدراء الدار ، قلت ليهم السلام عليكم و أنا بعاين لـ مس نادين ، ردوا لي السلام ، بابا حازم قال لي أول أمبارح انتِ كنتِ وين ؟!
طبعاً هنا فهمت إنو مس نادين حكت ليهو ! المره دي هي المشت و شكتني و قبل ما اتعشى بيها اتغدت بي ، عشان كدااا أول امبارح ما عاقبتنا و قالت لينا ادخلوا جوه ! بتردد قلت ليهو طلعت ساي كدا ، قال لي مشيتي وين و متين و استأذنتي من منو ؟!
هنا سكت سااااي ، قال لي بتكلم معاك أنا ما تسكتي قولي لي مشيتي وين !
قلت ليهو ما مشيت مكان محدد لفيت قريب من هنا و جيت راجعه ، قال لي الفتح ليك الباب منو و استأذنتي من منو ؟!... طبعاً ديك كانت أول مره يتكلم معاي بنبره حاده ، قلت ليهو ما استأذنت من زول ، نطيت بالباب و جيت راجعه بنفس الطريقة ! قال لي ما عارف أقول شنو والله!! إذا انتِ البت بتنطي بالحيط و الأبواب الأولاد الهنا و الحراميه يعملوا شنو ! الراجل المعاهو ضحك و قال لي انتِ شكلك مشاغبه ! بابا حازم قال ليهو مشاغبه شديد و متهوره كمان ! مس نادين قالت ليهو مشكلتها عنيده و ما بتسمع الكلام و قدامك حـ اقولها ليك أكتر من مره عاقبتها و أكتر من مره شاكلتها بسبب تصرفاتها دي بس كأني بنفخ في قربه مقدوده ! و طبعاً دي ما أول مره ، مها دي ياما عملت مصايب ، شي نطيط بالحيط و شي سرقة قروش و شي كسر أقفال و سرقة مفاتيح و فوقها كذب و دراما ! والله البت دي أنا مهما اتكلمت ليك عنها يا أستاذ حازم ما حـ تصدقني عشان وش البراءه الهي مركباهو دا !... طبعاً أنا بقيت اعاين ليها بغييظ وترتني و شرت غسيلي كلو قدام بابا حازم و الراجل المعاهو ! رغم إني اتوترت بس حاولت أكون ثابته ... طبعاً هي بتتكلم و بابا حازم بعاين لي كأنو بقول لي معقوله الكلام دا كلو عنك !!
