لما إتلفت وراي شفت مجتبى المدير ! قال لي انتِ يا مها جايه هنا تشتغلي ولا تتونسي ؟! قلت ليهو ما كدا بس.... قال على شغلك !
طوالي مشيت و انا بنبذ في نفسي ، يعني ما معقوله من تاني يوم لي أعمل مخالفه و أخلي المدير ينبهني ! ياخ كلو بسبب الإسمو يونس دا ! لااا كلو بسببي انا لأني أديتو فرصه و قعدت آخد و أدي معاهو في الكلام !
امبارح القريبه دي كنت بقول للمدير أديني فرصه و ما حـ تندم و شنو ما بعرف و قعدت اتكلم ليهو بكل ثقه و اليوم مضيعه قريب النص ساعه في الكلام الفارغ !!
المهم واصلت شغلي و كنت حريصه إنو ما أغلط تاني و ما اضيع زمن ، طبعاً دوامي من الساعه 7_3 المهم لما خلص الدوام مشيت بدلت ملابسي و شلت شنطتي و مشيت مكتب المدير ، ضربت الباب و دخلت لمن أخدت إذن الدخول ، لقيت معاهو واحد من الموظفين ، قلت ليهم السلام عليكم ، قالوا لي و عليكم السلام و طوالي الولد المعاهو طلع ، قلت ليهو جيت عشان اعتذر بسبب الحصل قبيل ، صدقني أنا ما مهمله و لا بحب اضيع زمن و الحصل ما حـ يتكرر تاني ، قال لي حالياً انتِ في مرحلة إثبات النفس و لحد ما فترتك تنتهي أنا ما حـ أقول ليك أي شي ، لما ينتهي الشهر بعدها حـ اقول ليك إذا بتقدري تواصلي معانا أو لا .... طبعاً كلامو ما طمني خالص ! قلت ليهو أستاذ مجتبى أنا بالجد آسفه!! هز لي راسو بس ، طلعت منو و أنا حاسه بالإحباط ! لحد ما وصلت الميتم هونت على نفسي و قلت الحصل ما حـ يتكرر تاني و لحد ما ينتهي الشهر حأكون قدرت أثبت نفسي لأستاذ مجتبى ، طبعاً جبت للبنات معاي حاجات بسيطه زي الخواتم و السلاسل و الباندات و الحاجات دي ، وزعتها عليهم و رغم بساطتها فرحوا بيها و شكروني ، ليلى الشومه ذاتا جبت ليها مرآيه عشان هي بتحب نفسها و مهووسه بجمالها ، قالت لي لقيتيها بـ 100 جنيه صح ، و الحاجات ديل كلهم ما أظن فايتات الألف لأنهم من أماكن رخيصه ، قلت ليها يا سلاااام محسساني انك قاعده تشتري من مول !! رماح قالت ليها مها بالجد ما قصرت يا ليلى ، حتى انتِ اشترت ليك فماف داعي لكلامك دا!
المهم منار كانت قاعده جوه في غرفة النوم ، مشيت ليها و قعدت جنبها ، كانت حـ تقوم و تمشي بس منعتها ، مسكتها من يدها و قعدتها ، قلت ليها انتِ عارفه كويس إني ما بحب الخصام ، و ما بحب أزعل زول مني أو أجرحو ، بالذات لو كان الزول دا قريب مني ، إذا في حاجه في الدنيا دي اسمها لوم أو عتاب و صريخ و شكل و ضرب فـ ليه الواحد يختار يسكت و يحير الطرف التاني ؟؟
غلطت عليك تعالي قولي لي ، عملت تصرف ضايقك واجهيني ، زعلتك عاتبيني بس ما تسكتي و تدخليني في متاهه ، أنا بعد ما اتأكدت انك ما زعلانه من زول غيري بقيت كل مره اسأل نفسي أنا عملت ليها شنو !! كل مره براجع نفسي و تصرفاتي عشان اتذكر أنا عملت شنو يضايقك و يزعلك مني بس ما اتذكرت ولا موقف ممكن يكون السبب في زعلك مني !
سكتت ما قالت حاجه ، قلت ليها ما تسكتي ، السكات دا أسلوب واحد جبان عارف إنو ما ليهو حق يزعل بس عايز يزعل و خلاص !
