الجزء الرابع :🔥🔥 #ولادة_الامبراطــور🔥🔥
الكاتبة :👑 Fatima Z-F 👑
الفصل 58..
مكان بعيد من المدينة كيتواجد مجمع سكني اشبه بالقصر ومن وراه اسطبل للأحصنة مع مسبح كبير كأنه بحر واخد منطقة كبيرة فالمساحة و فجوانبو باركينغ طويل مليئ بالسيارة من مختلف الأشكال و كيحملو اسم "BOSS"..
شكل تصميم القصر مع الباحة و جردة عطاتو منظر خلاب لا متيل له واضح ان مولاه من الشخصيات لكبار في مجال الأعمال و وزنو تقيل ومكانتو عالية ...
امام الباب الرئيسي كيتواجد اسم "العاصمي" محفورة على رخامة وقدامو غابة كبيرة مليئة بشجر الأرز وبعد ما كتفوت لغابة كتلقى جردة معمرة بالورد وكتوسطهم ضاية ديال لما فيهم سمك صغير ملون من الاسمام المعروفة فاليابان ..
واقفين ثلات اشخاص حداها كيتفرجو فالسمك و كيتكلمو واخدين راحتهم فالكلام..
كمال حاط يدو تحت راسو وكيشوف فشهد..
-هي صافي نويتي ؟؟...
شهد جالس مشبك يدو لوسط هز كتافو من سؤال كمال و قال...
-31 عام ما بقا ليا فين نزيد و الواليدة باغية تشوف ولادي ...
كريم جالس وسط منهم كيلعب فكاسو..هز صبعو فإتجاه قلب شهد..
- حنا مكنهضروش على زواج كنهضرو على داكشي لي فقلبك ماشي دير لخاطر لمك وتبقا نتا بلا خاطر ...
شهد تبسم : شكون قال ليكم ماشي بخاطري...
كمال هز حجبانو : زعمة بخاطرك.. واش كضحك علينا ولا كتفلا على راسك...
شهد بصراحة : كنهضر معاكم من نيتي غادي نتزوج بلي ختارت لواليدة...
كريم جاه نيشن : وموافق تزوج بوحدة اخرا من غير رغد...
شهد ملامحو تخربقو وتزير..
- اش بيني وبين هاد رغد باش دخلها فالهضرة ..
كمال هز راسو كيضحك : لا بلاتي اصاحبي واش كتصحابنا ولاد لبارح ولا عاد انعرفوك ليوم راه عارفينك من نهار شفتيها ونتا طايح فيها بلا ما تبقى تمتل علينا وتنكر .. راه كاملين عندنا جرح واحد و مصيبة وحدة هما العيالات خارجين فديلمنا كيف جنون ...
شهد حط لكاس فوق طبلة وجمع لوقفة وقال .
- لقلب يبغي و يتمنى و الواقع يضرب ويفرق ...انا ورغد مشي ديال بعض وزيد مكنبغيهاش ..
جمع الوقفة رجع لقصر وخلاهم بوحدهم كيشوفو فبعض..
كمال : شفتي هادا اقسم بالله تا طايح فيها وكيبغيها نيت غير مباغيش يبين ...
كريم كيحك لحيتو : علم الله اش وقع بيناتهم هو كان ديما شاد ليها الخاطر وخا قبيحة لكن كانت كتعجبو شخصيتها اما دابا شفتو مابقاش عندو تا صبر باش يهضر معاها كيدير شي تصرفات معاها بحالي مكيعرفهاش..
