إبتليت بك

Part 4

#إبتليت_بك

:: 4 ::

_ قوليلي سموحة .. في شي بينك وبين حسام ولد خالتي ؟؟
ارتبكت واطيت عيوني .. جبد كرسي وقعمز جنبي والمنشفة ع رقبته
_ أنا حاس بأن الموضوع كبير .. الموضوع مش موضوع أمك متوفية ومرت بوك ووو
نضت وقفت وقلتله : لو سمحت ماليكش علاقة
وخشيت نجري للحوش وخليته واقف مصدوم في ردي .. لقيت فاطمة كيف طالعة
_ خيرك مخلوعة ؟؟
_ شي .. بس نبي نصلي
خشيت صليت الظهر وقعدت ندعي ان ربي يحميني من هالخليل هذا يللي وجودي في نفس مكان وجوده مش مريحني ..
,,,,,,,,,,,,,,,,,,,,,,,,,,,,,,,,,
حسام ::
_ مازال ماحددتش عرسك ؟؟
_ مازال .. خللي نكمل الاثاث الاساسي بعدين ساهل !!
شربت شويا من القهوة وسرحت .. طبطب ع كتفي وقاللي ( العقبة ليك )
_ وين ياراس بعد تزوجت طارت النية من الزواج بكل
_ شن مافيش غيرها بنت في هالبلاد والا كيف ؟؟
_ في هلبا .. لكن زيها مافيش .. ربي يهنيها وين ماكانت
_ انت حاول تنساها بعدين نخطبلك انا سيدة سيدتها
_ ان شا الله خير
_ قوللي وين البنت حطيتها ؟؟
_ عند خالتي .. خليها غادي اضمن ليها وليا
كملت السهرة انا وعماد .. روحت لحوشي رقدت ..
,,,,,,,,,,,,,,,,,,,,,,,,,,,,,,,,,,,,,,,,,
أمل ::
فرشت فراشي وكنت خايفة من خليل وبديت نشوف في طيفه كل لحظة .. خطرلي شي  .. ترددت بعدين حطيت حد لخجلي .. وقلت لازم ماندير حل قبل ماتصيرللي حاجة منه ..تلفتت لفاطمة وفاتن لقيتهم راقدات ناديت عليهم ماردوش فرحت .. لقيت تليفون فاطمة ع كمادينو خديته وطلعت من الدار بعد لبست الوشاح مع البيجامة .. تلفتت يمين يسار مالقيت حد .. طلعت للحديقة .. دورت بين الارقام لقيت اسمه .. ضغطت عليه .. نادى .. نادى .. ماردش عليا .. عاودت الاتصال مرتين تانيات وشي ماردش .. يأست منه يرد عليا .. بعتله مسج ( رد عليا ياآفندي انا امل ) .. ماتسألوش كيف عرفت الرمز لانها كانت تعطي فيا كل شويا نغير في جوي بيه لما تبدا مشغولة عليا .. بصوت مسموع قلت ( آووووف رد ياحسام ارجوووك )
حسيت بحركة وراي .. اقشعر جسمي لما حسيت بالنفس قريب مني تلفتت لقيتها فاطمة
_ وووه خلعتيني
_ هههههه شن اديري بتليفوني ؟؟
_ ءء .. شي .. هاك
خداته مني فتشاته لقت المسج .. لاني غبية مامسحتاش
_ شن كنتي تبي منه حسام في هالوقت ؟؟
_ شي .. كنتي نبي نطمن ع خوتي بس
استغربت في كلامي وحسيتها مش مصدقة : توا تبي تتطمني ؟؟ .. الساعة 3 توا مش ح يرد اصلا اكيد راقد
_ ايه ممكن .. تصبحي ع خير
ندبت ع حظي المعوج .. هكي خليت موقفي ضعيف اكثر .. وحولت عيون الشك عليا .. رقدت بس مش بالنوم لاني كنت نفكر في روحي مع العيلة الكريمة .. كيف نقدر نطلع بعلة باش نرتاح من خليل وتلميحاته ؟؟ .. يارب خلاص كرهتها حياتي .. مش ح تتعدل يارب لو مازال ح نتعذب خودني عندك يارب ..
,,,,,,,,,,,,,,,,,,,,,,,,,
حسام ::
نضت الصبح ع مكالمة من الآفندي حفيظ خبرني فيه أن لقو جثة في واحد من المزارع .. مقطوعة الراس .. ياعليك اخبار سودة في هالبلاد .. استغفرت ربي وخبرته بأني جاي مسافة الطريق بس ..
لبست بدلتي العسكرية بعد لفتي ع روحي .. فتحت تليفوني بس تسكر من الشحن .. حطيته في جيبي وطلعت نجري للمقر .. طلعت انا وبعض من العسكريين للمزرعة المطلوبة .. رفعنا طبيب شرعي .. وحدد فترة الوفاة وكيف مات .. بس يللي ماتحددش لمن الجثة هادي ؟؟
قعمزنا في المقر بعد مارفعو الجثة للمستشفى للتحليل .. اللي خطر في بالي لحظتها .. القصة يللي حكتهالي أمل .. كيف بنتصل بخالتي بس الهاتف فاصل شحنه .. حطيته في الشحن وطلعت للمستشفى بنشوف شن صار مع الجثة انا وشويا عساكرة ..
,,,,,,,,,,,,,,,,,,,,,,,,,,,,,,
أمل ::
عيون فاطمة معاش تحولو مني .. والرمز غيراته بسبب شكها فيا .. قعمزنا العشية نشربو في قهوة .. درت انا الكيكة وعجبت عمي ( محمد ) أب فاطمة ..
_ انا في حياتي ماذوقت زي هالكيكة
ابتسمت انا بخجل .. فاطمة قالتله بفخر : هادي أمل دارتها .. عجبتني محلاها حتي انا
خليل تكلم بتلميح: خسرك بوك ياامل .. كل شي اديري فيه ابداع
خالتي حميدة: البنية كلها ع بعضها عسل .. ربي يحفظها وترجع لاهلها
_ ربي يهديهم يابنتي .. انا نقول إن لازم ندخلو باش تنحل المشكلة
انفعلت وقلت: لالا .. بالله عليك
فاتن استغربت وقالت: خيرك مخلوعة العفو ؟؟ .. اماليك هادم والا انتي لقيطة ؟؟
ضربها خوها خليل كف بسرعة البرق صار الموقف .. ناضت تبكي لدارها
فاطمة قالت: خيرك خليل اول مرة تضربها ؟؟ .. شن صارلك ؟
خليل: قليلة ادب ولازم تتربى .. البنت هادي أمانة عندنا
ناض خليل وخش لداره .. انا قعدت مصدومة من الموقف وواطيت راسي وقلت بصوت أشبه بالهمس ( انا آسفة )
خالتي: معليشي يابنتي الغلط مش منك
ناضت لحقت بنتها .. تلفتتلي فاطمة وقالت: معليشي المهم كيكتك حلوة
ماكانش حد مهتم بجرح كلمة ( لقيطة ) .. فاتن كان نص كلامها صح .. أهلي كيف تبرو مني وخلوني هكي ؟؟ .. حسام ؟؟ .. معاش سأل عليا ليا أسبوع هنا .. يارب الصبر بس
غسلت الاماعيين ورتبت الكوجينة .. خشت عليا فاتن وسكرت وراها الباب .. تلفتلها وابتسمت
_ سامحيني فاتن بسببي انضربتي
من عيونها واضح الشرار .. بس ابتسامتي استمرت .. خدت كاس امية ولوحاته ع الارض تكسر .. تفاجأت من الموقف .. شبحتلها وقلت : خيرك فاتن ؟؟
شبحتلي وكلها حقد وكره ليا : حويناك عندنا وقلبتي خوي عليا .. تعرفي انتي عمره مامد ايده عليا .. بس شكلك مش ح تفهمي الباين خوتك صبح وليل طريحة هدا علاش ؟
_ علاش تكلمي فيا هكي ؟؟
_ لانك وحدة واطية .. مانعرفو اصلك من فصلك .. انتي من اليوم شغالتي وبس
وكيف بتضربني شديت ايدها وقلتلها: لهنا وبس .. انتي اللي غلطتي فيا ومع هذا انا تأسفت
فكت ايدي منها وعيطت بالعالي .. لين تلقطو العيلة علينا في المطبخ مشت تجري لبوها تغمراته
_ هالكلبة تبي تضربني
شبحلي عمي محمد وقاللي : خيرك عليها ؟؟
سكتت وواطيت عيوني ..خالتي شبحت لفاطمة وقالتلها : خودي اختك للدار
طلعوا لزوز شبحلي عمي محمد وقال: لا حول ولا قوة الا بالله
تنهد وطلع من المطبخ .. تلفتت للخالة وقلتلها: والله مادرتلها حاجة تأسفتلها تفجرت فيا
_ معليشي يابنتي .. فاتن معروف عليها غيورة وانتي ليك فترة قصيرة عندنا وحباتك العيلة كلها بدت تغار .. معليشي سايريها
سكتت .. ودمعتي في عيني .. ديما الضعيف حقه مهضوم .. طبست نقيم في المرش .. خشت فيا مرشة جرحتني .. عيطت بالخفيف ونضت غسلت ايدي .. حسيت بايد شدت ايدي المجروحة .. تلفتت لقيته خليل باعدت من عليه وساويت وشاحي
_ بسيطة مافيا شي
قرب مني وانا كنت نبعد .. لعند حط ايده ع خصري دفيته بقوتي ع اللافندينو المطبخ .. شدني من ايدي بسرعة وقوة في نفس الوقت .. شلّ حركتي بالكامل .. قلبي قريب يطلع من مكانه
_ معاش تحاولي تصديني والا تشوفي شي مش ح يعجبك
_ شن تبي مني ؟
_ نبيك انتي .. من جيتي وانا مش قادر نحولك من بالي
شدني من خصري بقوة ولصقني فيه .. وكيف بيقرب مني ضربته كف .. ووخرت من عليه .. شد خده .. بعدين ضحك وقال ( مش ناسيهالك )
هربت من المطبخ نجري .. خشيت للدار لقيتها فاضية .. قعمزت في تركينا لميت رجليا في بعضهم وبكيت .. فعلا بكيت ع اللي رخصني وخلاني هكي .. كل من يسوا والا مايسوا يحاول يلمسني .. حسبي الله ونعم الوكيل .. بكيت بالعبرة .. قررت أني نكلم حسام يرفعني من هالمكان الوسخ .. بس آي سبلة نقولها ؟؟ .. خالتي وعمي محمد وبنته فاطمة كويسين معاي .. لو نقول لخالتي مش ح تصدقني ع ولدها .. قررت أحسن شي أني نباعد روحي بروحي .. نحمي روحي بروحي .. حسام اكيد يعرف طبع خليل ومع هذا سلم فيا ..
,,,,,,,,,,,,,,,,,,,,,,,,,,,,,,,,,,,,,,
حسام ::
في الليل باش فضيت لتليفوني الملوح في المكتب .. فتحته لقيت رسالة من فاطمة .. ومكالمات منها الساعة 3 في الليل شن يللي خلا أمل تتصل في هالوقت ؟؟
اتصلت بيها .. ردت عليا فاطمة
_ بحداك أمل ؟؟
_ ءء .. أمل راقدة
_ آآه .. قوليلها حسام دورك تمام !! .. تصبحي ع خير
حسيت من صوتها مرتبكة .. بس قلت بالك محتاجة التليفون وماتبيش تشغله بمكالمتي لأمل .. رقدت وانا تفكيري في مصيبتي ؟؟
( ياآفندي عندنا دورية توا )
سكرت الاوراق اللي قدامي وابتسمت لأشرف وقلت ( تمام جاي )
طلعنا دورية بعد الساعة 12 في الليل لفة حول المنطقة بالسيارة .. سألت أشرف ( عرفتو من صاحب الجثة ؟؟ )
_ اللي مسؤول ع قضايا المجهولين هوا الآفندي حفيظ .. ماقال شي لتوا
_ لوين ماشية البلاد بس ؟؟
_ ايه والله ضاع شبابنا واعمارنا اللي ماقتلاته الحرب قتلاته النفسية
_ هههههه بالزبط
وقفنا عند حوش أشرف .. نزل جابلنا قهوة ورجعنا بلفتنا للمقر ..
_ سمعت ياآفندي حسام .. غدوا قالو في سيولة في المصارف
_ باهي كويس جت في وقتها .. اقسم بالله الحكاية ع الحديد ههههه
_ انا اللي نحصله نعطيه لبوي باش يتعالج
_ ربي يشفيه .. تبي آي شي مايردك كان لسانك تمام !!
_ نفكر نرفعه لتونس .. داس شويا فليسات مع اللي بنسحبهم غدوا ممكن نوصل لمشية وجية كشف وشوية علاج شن رايك ياآفندي ؟؟
_ عادي ونساعدك انا بللي نقدر عليه
_ نبيك تمشي معاي !!
_ في ظرف زي هذا صعب ؟
_ ليش ؟؟ .. لو كان ع البنت انت مطمن عليها عند خالتك .. يعني وين المشكلة ؟؟
_ يستر الله
رفعني فكري ليها .. مطمن عليها عند خالتي فعلا .. بس هل هيا مطمنة ؟؟ .. ان شا الله خير !!
,,,,,,,,,,,,,,,,,,,,,,,,,,,,,
أمل ::
لا والله ماكنت مطمنة .. ولا جايني نوم في جرة خليل الكلب .. كرهني في عيشتي الفترة هادي كلها نتهرب منه من مكان لمكان ونحاول نتفاداه .. مافيش حد ملاحظ تصرفاته الوقحة معاي .. كنت مقعمزة في البلكونة معاي فنجان قهوة ماكنتش مدمنة بيها الا الفترة هادي راسي معاد يتعدل الا بيها .. طبست راسي لوطة لقيت فاتن نازلة تجري من سيارة بوها .. قابلت بوها ع وجه السيارة وتغمراته بقوة .. وشعرها العسلي كان يتطاير يمين ويسار من الفرحة .. كانت لابسة شورت لتحت الركبة أزرق واسع وتيشرت وردي عليه قطة سودا .. ابتسمت لما جت عيني في عينها بس هيا ردت عليا بنظرة حارقة .. وخشت للحوش .. حطيت الفنجان ع الطاولة وخشيت .. نحيت بدلة الصلاة ..وقعمزت ع السرير ولميت رجليا لصدري وحطيت راسي بينهم هادي وضعيتي الايام هادي كلها لما نبكي .. فتحت الباب بالقوة لين انخلعت .. شبحتلها باستغراب .. لوحت قدامي تلات ورقات مافهمتش محتواهم لاول مرة نشوفهم
_ عارفاتك غبية .. هادم تذاكر سفر لأوروبا
ضحكت وقعمزت ع السرير مقابلتني : نبي نشكرك ع الكف آهو بنغير جوي في اوروبا وانتي بتقعدي هنا زي الكلبة هههههه
ابتسمت ومارديتش عليها .. وقفت وقلتلها بصوت هادي : مبرووك .. وسفرة سعيدة
وكيف بنبعد عليها شدتني من ضفرة شعري .. وجعتني تلفتلها بصرخة صغيرة
_ من يوم ماجيتي وانا كارهاتك
رخت شعري .. شديته بألم وقلتلها: علاش ؟؟
_ لانك عاهرة وانا متأكدة
تماسكت ع الكلمة يللي قالتها اكبر من وصفي واكبر من عمرها .. عطيتها بظهري وقلت : صغيرة وماتعرفيش معناها .. مانلومكش
_ مافيش حد معجب بيك ياغبية .. زي حسام زي خليل زي غيرهم .. كلهم ساخفين عليك ويشوفو فيك رخيصة هلبااااا .. لانك لو غالية مالزوك اماليك باش ترقدي في حوش العزارة
انفتحو عيوني بكبرهم .. كيف عرفت أن اهلي تبرو مني ؟؟ .. وكيف عرفت ان قعدت في حوش حسام أيام ؟؟ .. من حجم الصدمة انهديت ع السرير وقلت بصوت أشبه بالهمس ( حسبي الله ونعم الوكيل )
_ حسام ولد خالتي ونعرفه .. مش كان ضابط معناها لازم يدافع عليك ويحميك يابنت وطنه ع قولة ماما .. يقدر ياخد منك مايبي ويلوحك للكلاب
_ لا حسام وعدني ياخدلي حقي
طلعت مني الكلمات بلا رادة .. ماكنتش واعية .. نزلت راسها ليا وقالت : حقك من منو ؟؟ .. بعد ماخطفوك من مازال يرضا بيك ؟؟
_ خبيثة انتي يافاتن .. كيف عرفتيني مخطوفة ؟؟
_ هههههه مافيش شي يندس عليا في هالحوش .. وح تشوفي أيام سودا مني
وكيف بنتكلم بندافع عن نفسي خشت علينا خالتي وقالت لفاتن : انتي هنا ؟؟ .. فاطمة تراجي فيك تبيك تطلعي معاها
بكلمة ( حاضر ) منها وطلعت تجري .. جت قعمزت جنبي خالتي وحطت ايدها ع كتفي
_ معليشي يابنتي عارفتها صعبة عليك تقعدي بروحك .. بس انا معاك قاعدة
_ علاش بروحي ؟؟ .. من بيسافر غير فاتن ؟؟
تمنيت تقول خليل وفاتن .. أشر ناس شفتهم في حياتي بعد الخمسة
_ فاطمة وعمك محمد معاها
_ علاش مايسافرش خليل ؟؟
_ هههههه مايحبش يسافر مع العيلة .. هداكا يسافر بروحه بس
ابتسمت .. ودعيت في داخلي لربي يجعل ايامي أحلا الجايات
_ نخليك ترتاحي توا
فات اليوم هذا ع خير .. تاني يوم نضت ع دوشة فاطمة وفاتن يفركسو في دواليبهم يطلعو في دبشهم .. سفرتهم ح تكون العشية لتونس حسب مافهمت ومن تونس الي اوروبا ..
_ صباح الخير
تلفتتلي فاطمة بابتسامة : صباح الورد هي نوضي ساعدينا
ضحكت وقلتلها : نوتيلكم الفطور انا تمام !!
نضت بتكاسل .. خشيت لحمام دارهم دوشت وبدلت حوايجي .. لبست قفطاني العنابي نفسه مافيش غيره .. ونزلت بوشاحي الاسود .. وتيت السفرة من كل مالذ وطاب .. ناض عمي محمد مبتسم ( صباح الخير .. كيف صبحتي اليوم ؟؟ )
ابتسمت وقلتله: الحمد لله بخير
حط ايده في جيبه وطلع منها فلوس ومدهالي .. رديت باستحياء: لا ياعمي مش محتاجة
شد ايدي وحطهملي وقاللي: تحتاجيهم مرات .. طالع انا والبنات اليوم للسوق مانبيش نمدهملك قدامهم
_ مافيش داعي نطلع معاك
_ لا في داعي .. ماعندكش لبس واحني مسافرين من بيرفعك ؟؟
كان طيب نوعا ما معاي .. ابتسمت .. جهزت السفرة ع الطاولة وناديتهم .. قعمزنا ع الطاولة .. خديت توست درت فيه جبنة ووقفت
خليل : وين ماشية بيه ؟؟
ارتبكت وقلت: للحديقة .. انتم خودو راحتكم في الهدرزة
نضت طلعت للحديقة .. قعمزت ع الكرسي .. جتني قطوستهم السيامي واسمها ( تامي ) ع اسم الدلع لفاطمة .. قعدت نلعب فيها ونحكيلها بهمس ع حاجات امنيتي تصير توا .. كنت مطمنة ان خليل مع اماليه مش ح يقربني .. فجاءة انفتح باب الحوش الكبير وكان حسام وراه .. لما شفته وقفت ابتسمتله .. قدم لين وصل فيا وقال ( صباح الخير )
_ صباح النور .. تفضل
ضحك وقعد يشبحلي: تعزمي فيا ع حوش خالتي
واطيت راسي .. خش الداخل وانا قعدت نلعب في القطوس ونفكر في اللي بيقوله ليهم .. بعد نص ساعة تقريبا طلع حسام ومعاه خليل .. ابتسملي وقال ( انتي مرتاحة هنا ؟؟ )
شبحت لخليل يللي كان يلمحلي بان لو قلت شي ح يصير شي تاني بكل !
_ ءء .. ايه مرتاحة الحمد لله
ابتسم حسام .. حط خليل ايده ع كتف حسام وقاله : كون هاني البنية زي وخيتي الصغيرة
كان خاطري نقوله كذاب .. اختك مستحيل تحاول تعتدي عليها !!
حسام: انا عارف والله ماتقصروش
تكلمت بعفوية: انت جيت بترفعني لأهلي ولاه ؟؟
شبحلي حسام باستغراب : انتي تبي تمشي توا ؟؟
هزيت راسي بمعنى ايه وقلت بصوت عالي : نبي ايه
خليل: لا خليها يوم تاني .. اليوم بوي بيرفعهم للسوق خللي تشري دبش مع خواتي
كنت رافضة الفكرة تماما .. بس سكتت \
حسام: خلاص أمل خليك اليوم غدوا نجي نرفعك تمام ؟؟
ابتسمت لطيبة قلبه وماقدرتش نرده وقلت: شكرا
حسام: هي امالا خليل رد بالك عليها .. السلام عليكم
طلع حسام من الحوش .. قدملي خليل وكنت نرعش مع بعضي واطيت راسي : لو جربتي تقولي شي ع اللي صار ماتلومي الا نفسك
ضحك بهزوة وخش ..

#Dudu