إبتليت بك

Part 24

#إبتليت_بك

:: 24 ::

_ انا نحبك ياأمل <3
ماكانش فيه ردة فعل مناسبة لهالموقف في هداك الوقت غير انصدمت وعيوني انفتحو .. نضت من جنبه ع طول بعد سمعت ضحكته المعتادة .. خشيت لداري وحطيت ايدي ع قلبي
( مابك ياقلب تنبض تكاد تخترق ضلوعي .. هوّن عليك فلا قدرة لي على التحمل )
حطتلي المزينة التاج فوق راسي وقالت : ربي يهنيكم ببعض الباين عليك فرحانة هلبا
شبحتلها وابتسمت: فوق ماتتصوري .. هدا حبيبي وطليقي وتوا عريسي من جديد !!
شبحتلي مستغربة .. شديت ايد ماما وقلتلها: ادعيلي ماما
قالتلي : ربي يواتيكم الوقت الطيب
وفعلا تزوجته حسامي .. تزوجت الايد يللي وقفتني لما طحت .. تمسكت في ايده لما زفونا .. الحفلة كانت بأقل تكاليف .. والمعازيم شويا .. رغم هذا حاسة انه زفاف ملكي اسطوري .. مستحيل يتكرر .. تلفتله وابتسمت ردّ عليا ابتسامته الناعمة وهمسلي : طالعة حلوة ولّا وصار منك هههههه
ع باب الشقة واقفة ماما توصي في حسام عليا .. ضحكت خفية وقلت ( كأنه عريسي لأول مرة ) .. سمعت الباب تسكر تلفتله .. نحى جاكيت البدلة وقرّب مني .. مسكني من كتافي
_ ربي يباركلي فيك ياأمل ويخليك ليا طول العمر .. والله انا حبيتك يابنت الناس بس ماكنت مصدق قلبي .. كنت نقول يوهم فيا زي ماوهمني مع رحاب .. الحب معاك والله غير
فكيت ايدي من ع كتافي وخشيت في حضنه .. تنهدت وقلت : لو نقعد هكي طول عمري مش ح نشبع منك ولا نقدّر نوفي حق شوقي ليك طول هالمدة .. ولا نقدر نكفي قلبي من الحب .. لو انا حبك غير .. انت حبي الأول والأخير .. لو يعطوني مال قارون مستحيل نرضى غير بيك <3
_ أمل ( باعدني عن حضنه وابتسم ) ربي مايغيبك عليا حبيبتي والله <3
خديت فكرة عن الرجال مايعرفوش يعبرو عن حبهم بالكلام .. بس افعالهم توضح عمق الحب يللي فيهم .. والرجال صعب يحبو .. ويكابرو في اشتياقهم .. والنسوة هادي مستحيلة .. حسام رغم انه يحبني وتزوجني لانه فعلا يحبني .. بس مستحيل نقدر ننسى نظراته ليا لما يذكر رحاب .. يقعد سارح .. وانا كبر عقلي ونضج هالفترة هادي كلها .. واعتبرت رحاب حبه المراهق .. وماحاولتش نبين غيرتي ليه بتصرفات طفولية .. لا .. المرآءة القوية لا تغار من ذويها .. لاني نعرف حجم حبي في قلب حسام .. وح نقدر انسيه فيها ولو بعد حين .. جبت صحن فواكه وقعمزت جنبه لما كان يتابع في مباراة كرة القدم
مديتله برج تفاحة لفمه .. كلاها مني وابتسم .. قربني لحضنه وقال : كأنه في كلام تبي تقوليه امولتي <3
ابتسمت بخجل وحطيت ايدي ع بطني .. وقلتله: ح يجينا صلوحة حسام !!
تفاجئ وقف وقال بدهشة: صلوحة ؟؟ .. انتي حامل !!
هزيت راسي بمعنى ايه .. قامني في حضنه وقعد يدور بيا فرحان .. بعد دهش حطتني ع الصالون وقال : قداش تبي باش تجيبيه ؟؟
_ ههههه قوية قداش تبي باش تجيبيه ؟؟ .. نبي 7 شهور تقريبا
_ وانتي ياصغيرة كيف عرفتي بشهرك ؟؟
_ شكلك نسيت ان الدكتورة اخت مرت خوي !!
باسني ع خدي وقال: وأخيرا بعد 35 سنة بيجيني وليد .. يارب
مثلت اني زعلانة وقلت : يعني تبيه وليد ؟؟. . لو جي بنية ؟؟
ثني ظهره القدام وبصبعه السبابة ناشب خدي وقال: اللي يجي من ربي يامحلاه .. المهم منك انتي ياعسلي
وفعلا جانا صلاح الدين .. شالني حسام ع كفوف الراحة والحمد لله الزوج الصالح نعمة والله .. وقت جي خطبني هبلتني بسمة بكلامها ( كبير عليك .. 13 السنة مش شويا وح تندمي خوديه شاب صغير زيك يفهمك وبنفس تفكيرك وجيلك .. والله احسن شوفيني انا مع فارس ؟ )
هيا مرتاحة مع فارس وهادي حتى هيا نعمة .. بس الراجل الكويس واللي يفهم عليك ويحبك ويقدّرك مش بعمره .. ان كان كبير او صغير او نفس عمرك لو رايدك فعلا وانسجمتو مايوقفش العمر عائق بينكم .. وربي يهني كل بنية مع غاليها
المهم ::
كنت نرضع في صلوحي لما خش عليا حسام بكيسة فيها فواكه وقال : راقد !!
هزيت راسي نافية وابتسمت: لالا .. قوللي بتمشي لامك ؟
شبحلي متأثر وواطى عيونه وقال: أمل بالله عليك سامحيني
_ علاش شن درت ياحسام ؟؟
_ قصدي مادرناش أسبوع لصلاح وامي ماجتش شافاته .. انتي تعرفي دماغها كيف !!
ضحكت وشديت ايده : عادي سيورها ترضى وانا مش مضايقة منك والله
ابتسم وباسني ع خدي وقال: ربي يخليك ليا غزالتي <3
فتح الكيسة وقال: شوفي جبتلك فراولة اللي تحبيها
شديت ايده وبوستها: ربي يخليك ليا .. تعيش وتجيب حبيبي
ابتسم : امولتي انا ماشي عندي مشوار مش معطل لو تبي شي كلميني اوكي !!
_ حاضر .. في أمان الله
,,,,,,,,,,,,,,,,,,,,,,,,,,,,,,,,,,,,,,
حسام ::
فتحلي الباب وانصدم وقال بدهشة : حسام !!
ابتسمت بمكر وقلت: زيارة غير متوقعة ..( تلفتت يميني ويساري ) شني مافيش تفضل !!
ابتسم باستغراب وقال: آه تفضل
خشيت وقعمزت في الصالة وقلت باستغراب : شني امالا خالتي مهناش !!
هز راسه خليل بمعنى ( ايه ) : طلعو ليهم ساعة تقريبا
_ وهذا اللي نبيه انا
تلفتلي مستغرب: مافهمتش !!
_ أمس احمد كان عندي .. خو أمل اكيد عرفته ولاه !!
ومازالت ملامح الارتباك مسيطرة ع وجهه : اكيد .. شن كان يبي منك !!
طلعت سيجارة ولعتها وضحكت ع جنب : انت عارف !!
واطى عيونه وقال: مانقدرش نوافق .. اول حاجة انت عارفه مش مستوانا يعني وثاني شي اختي ماتبيشي أصلا خديت رايها
_ ولو قلتلك اختك موافقة وانا اللي كلمتها ؟؟
وقف متعصب وقال: تي والله نقتلها
وكيف بيطلع من الصالة طلعت سلاحي من خصري وقلتله: لو حاولت تقربها انا والله لما نقتلك وتوا ( لما سمع صوت السحب تلفتلي ) .. هآآ شن قلت خليل !!
شبحلي بصدمة .. وقفت وبادلته ابتسامة استفزاز
_ اختي هادي ومن حقي نرفض ونوافق المهم في مصلحتها
_ وانت من امتى يابرو تفكر في مصلحة غيرك !! .. من يومك اناني
رجع قعمز مكانه وقاللي: مش معقولة ع خاطر رفضت نسيبك بتقتلني !!
حطيت السلاح جنبي وقعمزت : لا مش هذا السبب ( طلعت تليفوني من جيبي وفتحت صور السكرين شوت ومديتهوله ) هذا السبب ياولد خالتي .. ياعزوتي
ركز في الصور وانصدم وارتبك وقال: كذب والله يكذبو عليك ياحسام .. ( شد تليفوني فكيته منه بقوة ) يبو يورطوني والله .. تركيب الصورة تركيب
_ الصورة تركيب والرسائل والمكالمات حتى هما تركيب ؟؟ .. اوكي تبي نجيبلك شهود يعني !!
حط ايديه ع راسه وقاللي : حسام كنت مجبور
رديت التليفون في جيبي وقلتله: كنت طماااع وأناني .. وحبيت تغدر بيا وتكسر ظهري لكن سبحان الله كل ولّا عليك ياولد خالتي .. تصدق لما شفت المكالمات في تليفون الباقيرا كذبت مرة وعشرة لكن الرقم هوا هوا .. وطلعت غبي وأهبل لما وثقت في كلاب زي هادم صورت معاهم بثقة واضحة .. والرسائل اللي بينكم توضح قداش كنت كارهني وتتمنى موتي علاش ياخليل !! .. قصدي شن يللي يخليك تكرهني ؟؟ .. فـ شن غلطت معاك انا !! .. اقسم بالله كسرتني .. صبرت وتحملت نشوف اللي باعني قدامي واقرب الناس ليا كان ومش قادر ناخد ثاري منه .. شوف سبحان الله بعد هالمدة الطويلة طلع الحق ليك انت وبس حتى صاحبي ماعنداش علم تعرف علاش !! .. نتحشم نقول ولد خالتي اللي تربيت انا وياه اللي كنا رفاق من واحني صغار لين كبرنا .. باعني للغريب .. انت مش غير بعتني ؟؟ .. انت دمرت مستقبلي طردوني من العمل بسببك حياتي قعدت من قهوة لقهوة ومش قادر نلحق ع مصاريف الحوش وانت تشوف بروحك في المعيشة كيف ولت !! .. كسرت ظهري وكسرت قلب خالتك عليا .. خليتهم يدفعو دم قلبهم للباقيرا الكلب وانت تاخد في نسبة منهم .. علاااش !! .. قادر توا نقيم سلاحي ونكمل عليك وانوض ولا كأن صار شي .. كلب وطاحت عليه طابية .. لكن نفكر في خالتي شن ذنبها تبكي ع ولدها الوحيد ؟؟ .. شن ذنب عمي محمد يخسر سنده ورافع راسه ؟؟ .. شن ذنب فاطمة تنكسر فرحتها بأحمد ؟؟ .. شن ذنب فاتن تقعد من غير أخ ؟؟ .. آآآه
فتحت سلاحي وابتسمت ع جنب ومديتهوله: ماتخافش مش ح نتهور لان أصلا مافيشي رصاص .. تعذبت في جرتك سنين .. وتوا نقولك انا مسامحك لو وافقت ع احمد يتزوج فاطمة
وقف من الخوف قعد يهز في راسه بمعنى ( باه ) .. حطيت سلاحي في جيبي وطلعت من حوش خالتي .. ركبت السيارة وقدمت بيها وكنت مرتاح ضميريا بعد ماوضحتله اني عارف كل شي بس ساكت لعيون خالتي يللي راعتني زي ولدها واكثر .. لعيون احمد نسيبي الغالي أفشيت السر يللي كتمته هلبا باش يرتاح ونشوف في عيونه الفرحة .. كلمتني امل بعد تقريبا ساعتين من الموقف
_ حبيبي تصدق خليل وافق ع احمد يجي يتقدم رسمي لفاطمة
فرحت لفرحتها بوخيها .. سكرت الخط وقررت نفرحها اليوم بشي تحبه .. خشيت لمحل ملابس نسائية مافهمت شي ؟ .. شن هذا الوان اشكال عيوني ادغدشو .. شديت سورية لونها احمر وبديت نقلب فيها نشوف مقاسها  .. خطر في بالي مرة موقف بيني وبين أمل بعد زواجنا
( كنت متكي ع السرير وسارح .. جت تمسح في ايديها من أثار الكريمة الليلية وقعمزت ع السرير وتلفتتلي : تفكر فيها !!
تلفتت وابتسمت وقلت: نفكر فيك
ابتسمت بثقة وقالت: عادي مش ح نحبس تفكيرك نخليك انت تحبس كل شي فيك ليا هههه
ضحكت وشديت خصلات شعرها وباعدتهم عن وجهها : في حد قبل قايلك انتي قمر !!
هزت راسها بمعنى ( ايه ) .. تعصبت ولوحت خصلاتها بقوة نقزت ع طول في حضني وقالت ( مافيش غيرك شافني قمر .. ومافيش غيرك ملك هالقمر ياروح القمر انت ) )
رديت السورية في مكانها وقدمت خطواتي للمحل لين وصلت لجيهة الاكسسورات .. لقيت سنسلة من فضة معلق فيها قمر .. عجبتني شديتها وبديت نتلمس فيها لو نعرفها لأمل تفرح بيها اكثر من آ يشي متأكد انا
_ بكم هادي ياخوي !!
( ب 120 دينار )
_ آووووف علاش هذا كله !!
( هادي فضة ياخوي و .. )
وبدي يسرد في مزاياها وانا سارح في السنسلة وحطيتها في بالي خلاص .. روحت للحوش لقيت أمل راقدة غطيتها كويس واتكيت في داري نفكر كيف ح نجيب حقها السنسلة .. صعب والله 120 دينار وانا يوميتي نصرفها وقتي !! .. لأمتى بتقعد هكي ياحسام !!
طلعت تليفون وع رقم صحيبي طول ( عماد ماتعرفش محامي شاطر ؟؟ )
نضت الصبح مستعجل .. دوب مافتحت عيونها امل قالتلي: خيرك داهش !!
_ بنمشي لمكان ضروري مش معطل
حكت عيونها وقعمزت شافت صلوحة راقد باساته ورجعت نظرها ليا: نبيك ترفعني لحوش ماما بعدين باهي !!
لبس شخشيري وقلت: حاضر .. سلام
رفعت معاي وراقيا من الطبيب الشرعي يللي حدد نوع المخدر اللي كانو يتعاطولي فيه ..وتلاقيت مع المحامي حكيتله أني بنقدم رد اعتبار ليا للجيش الليبي بعد تهموني بالخيانة وانا تحت التعذيب .. تفاهمت معاه انه يسلط كل تفكيره في القضية هادي لازم نرجع للجيش وراسي مرفوع .. ولد صلاح الدين مستحيل يكون خوّان

#Dudu