إبتليت بك

Part 5

#إبتليت_بك

:: 5 ::

ضحك بهزوة وخش ..
,,,,,,,,,,,,,,,,,,,,,,,,,,,,,,,,,
حسام ::
خبرت خالتي ان ماشي لتونس لمدة اسبوع مش اكثر علاج لأب أشرف ربي يشفيه صاحبي ومانقدرش نخليه .. طلبت من الآفندي حفيظ اجازة ووافق عليها ليا ولأشرف .. رتبت وراقيا .. ومشيت للمدينة يللي فيها اماليا نطمن عليهم ومنها نخبرهم
_ وينك ياوليدي هدا كله فقدتك !!
تغمرتها وبوست راسها وابتسمت : والله عمل .. تعرفي انتي عاد المشاكل ماتمش بكل
جتني حنين أختي الصغيرة بطاسة عصير بارد وقالتلي: تفضل برد ع قلبك المسافة الطويلة
_ ايه والله
شربت الطاسة دفعة وحدة .. وقلتلها : بالله داري قاعدة ولاه ؟؟ .. بنرقد
ضحكت حنين وقالتلي: لما تجينا حنان تبات فيها ههههه .. برا ارتاح
خشيت لداري .. كانت ليا انا وحازم خوي قبل مايتزوج .. بني فوق اماليا واستقر في شقته مع مرته وبنته جنى .. اول ماحطيت راسي ع المخدة غصت في نوم عميق مريح
مع الساعة 6 العشية فقت .. شبحت تليفوني مالقيتش فيه مكالمات من حد .. في دوش دافي ريحت عظامي ونشطت شويا.. لبست شورت جينز اسود وتيشرت زرعي ( أخضر الهادي ) .. جففت شعري بالمنشفة وطلعت لقيتهم حاطيين سفرة القهوة
خلوني نحكيلكم ع عيلتي شويا
(( احني عيلة بسيطة متكونة من بنتين وولدين .. حازم الكبير ومتزوج ليه 4 سنين وبعده انا .. واختي حنان ليها سنة متزوجة وحنين الصغيرة .. بوي الله يرحمه خداته الحرب .. بتقولو كيف ؟؟ .. كان طالع بيدورلنا خبزة وقت كنت ماسك في العمل وخوي مشغول .. جاته رصاصة وكانت من قوات الباقيرا ومن هداك اليوم وليها سنتين هالدوة وانا مازلت ندور في الباقيرا بناخد ثاري منه وثار بلادي كلها .. حنين تقرا في الجامعة سنة ثالثة بشري .. وحنان متخرجة من كلية الفنون قسم الديكور .. كنا نسكنو في العاصمة بس حولنا بعد وفاة بوي واستقرينا هنا .. أما أنا خديت حوشنا يللي كنا فيه وهوا عبارة عن شقة متكونة من 3 ديار ومطبخ وحمامين بس .. والحوش يللي توا فيه كان ارضي بسيط .. امكانياتنا محدودة ماقدرنا نوسعو او نكبرو فيه .. سكن حازم فوق منا في شقته الصغيرة .. وحنان تزوجت واحد حالته المادية كويسة والحمد لله تهنينا عليها .. حنين كانت ترفض في العرسان لين تكمل قرايتها ))
قعمزت جنب أمي بوست راسها .. ابتسمت وقالتلي: ربي يرضى عليك ياولدي وربي يوفقك ويحميك
_ آمين يارب العالمين
شويا وسمعت الباب يطق .. ناضت حنين فتحت لقاته حازم وزوجته وبنته .. خشت تجري تغمرتني
( عمو .. عمو )
أحلا كلمة نسمعها اليوم منها.. ابتسمت وبوستها .. سلمت ع مرت خوي ( دانية ) وكانت طيبة وكويسة معانا الحق .. رحب بيا خوي وقعمزنا كلنا ع جلسة ارضية بسيطة .. تربينا ع البساطة وكنا في قمة السعادة الحمد لله ..
حازم: باهي اللي شرفتنا ليك شهر غايب
حسام: والله العمل مايرحم والحمد لله
باستني جنى الصغيرة وقالتلي: عمو عاش تمسي خليت هنا
ضحكت ع كلامها الصغير وقلتلها: شن رايك انتي تمشي معاي غادي ؟؟
_ ماما عادي نمسي مع عمو ؟؟
ابتسمت دانية وقالت : قوليله تزوج وتعالا انت معانا
لما ذكرت الزواج .. تلاشت ابتسامتي نزلت جنى من غمري وخطرت في بالي .. ربي يهنيك ويسعدك .. تنهدت قاللي حازم : ايه لامتى بتقعد عزابي هكي ؟؟
_ لين ناخد ثار بوي
دانية : ربي يرحمه ويجعل مثواه الجنة
حنين: آمين .. اسمع حسام ماما لقتلك بنت ماشا الله عليها
ضحكت وقلتلها: بنت منو ؟؟
أمي: ريان بنت صالحة جارتنا هنا ماشا الله زين وعقل وفلاحة
حسام: ربي يبعتلها نصيبها .. لما نقرر نتزوج تو نقولك
حازم: اقعد عانس زي انت زي حنين هههه
حنين: انا نبي دكتور زيني .. لما يجي الدكتور قوللي ههههه
دانية: الفايدة في الهني .. آهو خوك دكتور ومهبلني في جراير مواعيده ومشاغله
جنى: حلام عليت بابا ديما يلعب معاي
حازم: ايه قوليلها ياجنى مسمومة امك
حسام: تتذكر حازم لما كنت تكره القراية وتلبد ورا الباب لما يجي وقت المدرسة
ضحكنا كلنا من ضمنا هوا .. بعدين قال: وانت تتذكر لما تهرب منها هههههه ع الاقل انا كان مشيت خلاص معاش نطلع اما انت شنو ؟؟
امي: من يومه حسام هوا في جيهة والقراية في جيهة
حنين: صار فرح لما خدي الاعدادية باش يخش كلية عسكرية
_ ههههههه خديتها بالهزايب
حازم: من يومه دماغه عسكري .. كان نبي فلوس من بوي نمشيله هوا يروبن تروبين ههههه
حسام: نتذكر مرة بيعطيني دينار وانا كنت نبي 10 بنطلع مع الشباب .. ريحتله نظارته باش معاش يقدر يزبط الخمسة من العشرة .. وقعد يطلع في الفلوس ويمدلي هدا كم ؟ .. ونقوله بالكذب وهكي لين وصل للعشرة قاللي كم ؟ .. قلتله دينار .. مدهولي فرحت بيها وتزردت مع الولاد وكنت البدخ فيهم ههههههه
دانية: ههههه الله يرحمه عمي كان ع نياته
حازم: ايه حسام الخبيث هههههه
أمي: بوكم في صحته كان صعب بسلامته .. لما يكون عندي مشوار نحجز قبلها بفترة ومش هكي بس .. لما نمشي بشيااااط الريق في قولة هيا هيا .. وين نوصل غادي يقوللي ساعة ونجيك .. في مواعيده والله مايعرف .. فعلا اطق ساعة نلقاه ناصب السيارة قدام الخيمة ويجلي الرجالة كلهم لين نطلع هههههه
حنين: حزاار عليك ياماما هدا هههه
أمي: ملا حزارة قريب يخنقني بيها
دانية: وانا نقول حازم لمن طالع ههههههههه
حازم: ياسر ياسر .. امالا تبيني نخليك تطلعي طاووس ونقعد نتفرج حلوة والله .. انا راجل رااااجل
حسام: هههه فهمنا خلاص وانت قريب تقتلها بعيونك
حنين: شافها في الشط وعجباته .. ويقول انا راااجل وحزار .. لاش تشبح امالا غض بصرك يارجل ههههه
دانية: علينا ومش عليهم هادي النوعية ههههه
امي: خلاص ياسر يابنات نوضو وتو العشي هداك هوا قريب المغرب يأذن
ناضو البنات وقعدت جنى معاي .. نلعب فيها ..قلتلها: قولي لماما عمو يبي مكرونة صالصة
قالتلي( حاضر ) ومشت تجري لامها للمطبخ .. تلفتت لامي ومعانا حازم وقلت: انا مسافر بعد غدوا لتونس مع صاحبي
حازم: علاش ؟؟
حسام: بوه تاعب شويا .. بنطلعو الفجر ان شا الله
حازم: خيره شن في؟؟
حسام: كشفو عليه هنا وقالوله خبيث عفانا الله واياكم .. بيعاودله الكشف في تونس .. وان شا الله يطلع مافيه شي
حازم: مااعتقدش تتغير النتيجة بس قول ان شا الله .. امتى بنوثقو في الطب الليبي بس ؟؟
حسام: آآآه ربي يصلح الحال هدا احسن شي
امي: ربي يشفيه ويعافيه ماتخليشي بروحه .. عاونه بللي تقدر عليه .. عندي حديدة ذهب بيعها وعطيه حقها
حسام: لا يمة خلي ذهبك تحتاجيه
امي نحت حديدتها من ايدها وقالتلي: المريض أولى .. ربي يعافيه ويطلع مابيشي
بوست راسها: امين يارب <3
,,,,,,,,,,,,,,,,,,,,,,,,,,,,,,,,,,,,,,
أمل ::
كنت فرحانة باللبس يللي شريته .. سافرو فاطمة وفاتن وعمي محمد .. والدار خلتلي ليا انا ولبسي واشيائي فرحت هلبااا بالشي هذا .. واخيرا بنحس شعور البنات الطبيعيات .. رتبت لبسي في الدولاب .. وطلعت للبلكونة مع الساعة 9 في الليل .. محلاه المنظر من العالي
طق عليا الباب واستاذن بالدخول .. وكانت خالتي حميدة .. حطت تليفون ع السرير وشبحتلي مبتسمة .. خشيت وسألتها ( لمنو هذا ؟؟ )
_ ليك انتي يابنتي .. مرات تحتاجيه
ابتسمت وقلتلها: بارك الله فيكم .. اللي درتوه معاي مش ح ننساهولكم
_ خير ربي يابنتي .. وانتي امانة من الغالي حسام ربي يحميه
قعمزت ع السرير شديت التليفون وقلتلها: ممكن تخزنيلي رقم حسام !!
_ ايه عادي .. هاتيه نخزنهولك ونجيبه
وكيف بتطلع من الدار وقفتها بكلمتي : خالتي ممكن تقعمزي شويا
تلفتت وابتسمت .. رجعت جابت كرسي المكتب وقعمزت: تفضلي يابنتي
_ انتي عارفة قصتي الحقيقية ؟؟
_ ايه يابنتي قاللي حسام كل شي
_ ياريت ماتقوليش لحد عليها .. انا خايفة من يعرفوا اماليا مكاني ويقتلوني
_ لا ماتخافيش .. وبعدين تو يرضو عليك الاهل مستحيل يقسو
_ فترة طويلة اللي قعدتها ومااعتقدش يسامحوني .. ونعرف لسان الناس مش ح يرحمني .. ولو سمعو اني مغتصبة ح تتعقد الامور اكتر .. انا نبيك ....
قطعت ع كلامي وحطت ايدها ع فمها وشهقت.. وقالت: مغتصبة ؟؟
شكلني فضحت روحي وماكانتش تعرف .. فتحو عيوني فيها ..
_ ماقاليش حسام هكي
_ ءء .. شن قالك امالا؟؟
سكتت وناضت تجري وسكرت وراها الباب .. مانعرفش شن بدير ؟ .. ندبت حظي مرة تانية ودعيت ع لساني ياريته انقطع ولا طلعت هالكلمة .. حطيت التليفون ع جنب وغصت في نومة محيرة اكتر من قبل !!
,,,,,,,,,,,,,,,,,,,,,,,,,,,,,,,,
حسام ::
_ من قالك انتي !!
_ هيا قالتلي ؟ .. معقولة ياحسام تحطني في هالموقف .. بالله عليك شن ضمنك انها مخطوفة مش هاربة مع واحد !!
_ خالتي خلاص بالله عليك .. انا ضامنها ماتخافيش
_ حسام من اليوم دور وين تحطها معاش نبيها عندي مانتحملش مسؤوليتها انا
_ ياخالتي انا ماشي لتونس بعد غدوا خليها لين نروح ويصير خير
_ باهي باه
سكرت في وجهي خالتي وكانت متعصبة ع الاخر .. ليش ياأمل قولتيلها بس .. طلعت سهرت مع اماليا وجابتلي حنين حصتي من العشي لاني طلعت مع الولاد بكري ..كليتها بس مش زي ماكنت متوقعها .. أمل ايديها ابداع في التطييب .. ابتسمت عفويا .. شبحتلي حنين ( ان شا الله ديما هههه )
فنصت فيها وكملت ماكلتي وتفكيري في أمل فعلا !!
,,,,,,,,,,,,,,,,,,,,,,,,,,,,,
أمل ::
لما نضت الصبح حسيت خالتي تعامل فيا معاملة بايخة .. وكلامها بالرسميات معاي ونبهتني اني معاد نطلع من الدار .. كأنها سجن ليا .. رجعت للدار وقعدت فيها ..
ساعة تفوت كأنها سنة .. مليت من الوحدة .. سمعت الباب يطق جابتلي غداي
_ سامحيني خالتي .. بس ياريت تكلمي حسام يجي يرفعني
ضحكت بهزوة وقالت: وتحسابيني ماكلمتاش ؟؟ .. انا لو كنت نعرف من الاول راني مااستقبلتك
_ اللي صار مش بارادتي ياخالتي وماتقدريش تحكمي ع شي انتي مش فاهمتيه
_ كولي كولي غداك .. نشوف اخرتها معاه حسام اهوا
مغتصبة ! .. معناها شي صار غصبا عنك ليش يحاسبوك عليه ؟؟ .. تمنيت الموت في هاللحظة فعلا .. فات الوقت طوويل اصعب من وقتي يللي كنت فيه مخطوفة .. خدتني عيني ورقدت .. وحسيت بايد تلامس رجلي .. انخلعت .. عيطت رجعت للخلف وقلتله( من سمحلك تخش هنا ؟؟ )
_ هذا حوشنا واندير مانبي
وقفت وهربت جيهة الباب .. حاولت نفتحه لقيته مسكر .. تلفتله نحى تيشرته وقاللي: الباب مسكر والحوش فاااااضيلنا احني وبس
_ حرام عليك .. تلقاه في خواتك ره
_ خواتي مايهربوش ياحلوة .. انتي ممسوسة من قبل ليش خايفة يعني ؟؟ .. ماديريش جو شريفة ونظيفة
_ بعد عليا .. بالله عليك بعد وخليني .. اللي صار غصبا عني
بس للي صار انه اقوا مني .. طيحني ع السرير بقوته .. عيطت .. مافيش المنقذ غير ربي سبحانه وتعالى .. انقدني منه ان الفازة فوق الدولاب طاحت وتكسرت .. تلفتلها .. في اللحظة هادي دفيته برجلي بقوتها .. لما وخر .. نضت نجري خديت تحفة ضربته ع راسه بيها .. أغمى عليه .. في اللحظة هادي فرحت وحسيت بالانتصار عليه .. فتشت جيوبه لقيت المفتاح .. فتحت الباب وطلعت .. الحوش كان فاضي وخالتي حميدة شكلها مهناش .. انا لو نقعد نحلف لغدوا انه المعتدي مش ح تصدق .. وخاصة بعد سمعت بأني مغتصبة .. كنت لابسة سروال مخطط ابيض واسود ومعاه تيشرت عنبري .. مافيش وقت باش نلبس وشاحي .. لقيت شاربة قصيرة لونها بني قاتم خديتها وطلعت نجري برا الحوش الوسخ كله ..
بين الطرقات قعدت نجري مانيش عارفة وجهتي وين .. المهم بعيد عن خليل الواطي .. اساسا ماكنتش عارفة روحي وين ماشية ؟؟ .. واما مكان انا فيه ؟؟ .. كانت الدنيا مازالت ضاوية كنت نتمشى وكان في شويا معاكسات لما نخطم ع مجموعة شباب .. بس تجاهلتهم لان مصيبتي اكبر واعظم .. دعيت ربي يجبر خاطري ويوصلني لبر الأمان لاني فعلا تعبت من حياتي الوسخة والناس الوسخة !!
,,,,,,,,,,,,,,,,,,,,,,,,,,,,,,
حسام ::
_ كيف هربت فهميني ؟؟
_ قلتلك انا وحدة امسخة هالبنت لعبت ع خليل وضرباته .. انا توا في المستشفى معاه
ماكانش تفكيري في خليل .. كان تفكيري امل وين مشت بس ؟؟ .. لو وصلت لمركز الشرطى ح يستجوبوها واحتمال يرفعوها لاماليها يقتلوها ؟؟ .. ويرفعو فيا قضية زور وخاصة بعد ماعرف بوها اسمي بالكامل وشاف بطاقتي .. بين الطرق لفيت بالسيارة قريب من حوش خالتي .. بس كأن فص ملح وذاب .. كنت مقرر نروح لحوشي نرتاح تاني يوم وراي سفرة لتونس .. بس تأجل كل شي في الوقت الحالي لين نلقى أمل .. رجعت لحوش خالتي في الليل لقيتها مع ولدها كيف وصلو للحوش .. خشيت نجري وانا متعصب .. شديت خليل من ياقة سوريته وعيطت في وجهه
_ شن درتلها البنت ياكلب ؟؟
خالتي حزت بينا وقعدت تقوللي: هيا حقيرة ولعبت عليه
دفيته بقوة لين طاح وقلتلها: ولدك واطي وانا نعرفه بس ماتوقعتش تتعدى حدودك لهالدرجة .. توصل في بنت الناس وهيا بين اماليك !!
شد راسه جيهة النزيف وقال: عاهرة وانت تحمل مسؤولية غلطها فيا
بصبعي السبابة رفعته في وجهه: اياك ثم اياك ترفع فيها قضية اعتداء .. والا والله تشوف شي عمرك ماشفته .. والا نقولك نفتح الموضوع المدسوس
شبحلي وفنص فيا وقال: ماقلتش بنرفع قضية
خالتي قالتلي: شن الموضوع ياحسام !!
قلتلها بهزوة : خللي ولدك الطاهر يحكيلك
وطلعت من حوشهم نجري .. ندور عليك ياأمل وين مشيتي بس !! .. صغيرة والحياة كبراتك ؟ .. الساعة كانت 2 في الليل ومافيش أثر ليها بكل .. قررت نرجع لحوشي خايب .. درست السيارة قدام العمارة وركبت درجة .. درجة .. وحيلي انهد في البحث عليها .. ولما وصلت لنهاية الدروج تنهدت ورفعت راسي فوق وغمضت عيوني وقلت بصوت واضح ( يااارب <3 )
ولما فتحت عيوني .. لقيتها قدامي .. والله أمل قدامي ؟؟ .. حكيت عيوني وقلت اكيد نتخايل .. بس فعلا هيا أمل .. طبست عليها لقيتها راقدة وضامة رجليها لصدرها وراسها بين رجليها .. رجليها كانو متحمرات ومتجرحات شكلها هربت حفيانة .. حطيت ايدي ع كتفها وقلت بصوت هادي ( أمل )
فاقت بيا .. نقزت في حضني طول وقعدت تبكي ..

#Dudu