#إبتليت_بك
:: 23 ::
( عاجل : أنباء عن مقتل **** **** الملقب بـ < الباقيرا > وجد مقتولا رمياً بالرصاص في مزرعته بمنطقة *** )
يعني هالحروف البسيطة بروحها خلت قلبي فرحان ورجع لعفويته الطفولية .. بديت ننقز ونعيط لين جت صفاء من حوشها وتغمرتني بفرحة .. بجد شعور حلو الانتصار بعد ظلم طااال .. وريتو سبحان الله ربي ياخدلك حقك ولو بعد حين .. خشيت صليت لربي ركعتين شكرته فيهم ع استجابة دعواتي وانه خدالي حقي منهم واحد ورا واحد .. موت الباقيرا مش فرحة ليا انا وبس .. كان الوطن كله يرقص فرحان بالخلاص منه .. الحمد لله حمداَ كثيراَ ..
مــرت الايـام والوطن يتزين بألوانه مضوية شوارعه ومزينة كل شي شين فيه .. الوطــن لبس حلة جديدة واسمه #النصـر .. النصر ع من عكــر صفوه .. ع من استباح النساء .. وقتــل شبابه .. ودمــــر أحلام اطفاله .. النصر ع من حطم المستقبل وخلا أصحاب النفوس الضعيفة تتمنى المــاضي وتبكي عليه .. النصر تحقيق حلم كل انسان في هالوطن عايش ومتكدر من هالعيشة الضنئة .. والحمد لله <3
الكل كان ينزل في صورة الباقيرا وهو مقتول مكتوب عليها ( نهاية كل ظالم ) .. بس لفت نظري شي غاب عن بالي للوهلة الاولة .. الباقيرا مقتول بتلات رصاصات .. حطيت ايدي قدامي وبديت نعد ( صلاح وانا وهوا ) .. ايه ايه والله .. ماعطيتش وقت لعقلي يفكر اكثر .. ع طول بعتت مسج لحسام ( انا نبيك ضروري لو تسمح نتلاقو )
راجيت ساعة تنين تلاتة مافيش رد .. رغم انه شاف المسج بس ماردش .. قطع تفكيري صفاء قالتلي ( مروة اختي اليوم جايتني تعالي هدرزي )
سكرت شيتاتي ونضت معاها للحوش .. رتبت معاها الضيافة وخليتها تهدرز مع اختها وانا كل شويا نشوف للتليفون .. حطيت صفرة القهوة وقعمزت مبتسمة قدام الدكتورة مروة
_ كنت نهدرز انا وصفاء ع حسام
تلاشت ابتسامتي وقلت: حسام !! .. خيره؟
ضحكت صفاء وقالت لاختها: شوفي شوفي الحب ههههه
واطيت عيوني متحشمة .. كملت الدكتورة كلامها : شفته اليوم في المستشفى بس مانعرفش لمن جاي والا علاش جاي ؟؟
شبحتلها بأمل: نبي نشوفه ضروري
استغربت صفاء : علاش !!
_ بالله عليكم ساعدوني نشوفه .. نبي نشوفه بجديات
مروة شبحتلي وتمعنت في النظر فيا وقالت: صعب ياأمل .. انتي عارفة امك ولاه !!
تنهدت بحسرة وقلت: ايه نعرف .. لكن هالمرة ضروري بجد والله
ابتسمت وقالتلي: اوكي خليني نعرف غدوا يجي والا لا قبل وبعدين ساهل .. ح نقولك ع خطة ياصفاء
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
حسام ::
متكي ع سيارتي وفي ايدي دخاني سارح .. وحاجز .. خبطت رجلي بالقوة ع عجلة السيارة يللي مقابلتني .. قطعني صوت تنحنيح انثوي تلفتت جيهة الصوت لقيتها صاحبة العيون الكبار .. رجعت سندت ظهري ع السيارة ونفتث دخاني لفوق .. من غير مانعطيها اهتمام .. بدت تتقرب مني بالشويا لين سمعت صوتها يللي قداش ليا خاطري نسمعه .. غمضت عيوني بوجع .. تنهدت وقلت ( شن تبي أمل ؟؟ )
جت مقابلتني : رد السلام في الأول
_ وبعدين !!؟
سندت ظهرها ع السيارة يللي مقابلتني وقالت : انت اللي قتلت الباقيرا !!
فنصت عيوني فيها .. وتلفتت يمين يسار من صدمة ماقالت .. وشديتها من ذراعها بتعصب ورخيتها بسرعة .. وقلت : بري ع حالك أمل خير مانفش غلي فيك توا
_ نعرف حسام لما يخاف يتعصب
شبحت لعيونها بصدمة : نخاف ؟؟ .. من مني بنخاف ياحلوة انتي ؟؟ .. منك يعني !!
_ ماتتوترش ياحسام .. انا قصدي خايف ع حد .. انا متأكدة انت اللي قتلته وخديت بثارك .. والدليل ثلاث رصاصات في صدره ( شدت ايدي بحنان ) وانا فخورة بالشي يللي درته حسام
رخيت ايدي منها وتعصبت : مرتي في العناية وانتي هنا تخرطي ؟؟.. روّحي امل مش وقتك بكل
سكتت وقامت عيونها فيا ببراءة وقالت: ربي يشفيها .. آسفة حسام
رجعت اطمنت ع رنا في العناية المركزة وخليت خوها معاها وروحت لشقتي .. غفيت من تعبي ونفكر في طلة امل اليوم .. كيف ياحسام انت قابلتها بالجفاف ليش تفكر فيها ؟ .. غصبت عيوني ع النوم ..
نضت ع رنة تليفوني ولقيت المتصل خو رنا .. رديت بصوت ناعس كنت فعلا تعبان ومشتاق للنوم بس يللي فيقني صدمة كبيرة .. ( رنا عطاتك عمرها ) .. علااااش بس اللي نحبها تاخدها مني الدنيا ؟؟ .. استغفر الله يارب ..
كنت مقعمز في داري نذكر ايامي مع رنا .. قداش كانت البنت طيبة وناعمة .. اذكرت احلامها ومستقبلها يللي بناته معاي ؟؟ .. توفت واللي قتلها هو الباقيرا .. بسببه طاحت القذيفة ع حوشهم وفي داره وكأن مستقصدني .. كأن ناوي يدمرني لو مش جسديا نفسيا .. يارب كون في عوني ع اللي جاي
فتحت ع صورتي انا وياها وبديت نتلمس في وجهها الناعم وعيونها الناعسات .. دعيتلها في داخلي يكون مثواها الجنة .. وتجاور نبينا صلى الله عليه وسلم .. خشت عليا امي سكرت التليفون وشبحتلها
قعمزت مقابلتني ع السرير وقالت: قريب يسكر شهر ع وفاة رنا وانت مازال حابس روحك في الدار ؟؟
ضحكت بهزوة : شن تبيني ندير ؟؟
_ نوض عاون خوك ع حوسة العرس
هزيت براسي بمعنى باه .. نضت وقفت نحيت تيشرتي وجبدت من الدولاب تيشرت تاني ولبسته .. خديت مفاتيح سيارتي شدت ايدي وقالتلي: سامحني وليدي ع اللي درته فيك
ابتسمت وبوست راسها : فداك حســام ياغاليـــة <3
ركبت سيارتي وولعتها جي طق ع الروشن خو رنا الصغير .. ابتسمتله وفتحت الروشن ( شجو يادرية ؟ )
ضحك وقاللي: نبيك في موضوع
أشرت ع كرسي اليمين وقلتله: اركب امشي معاي
ركب .. وهدرزنا في كدا موضوع وبعدين قاللي : نسيت بنقولك !!
_ آها قول .
شبحلي وقال: قبل ماتجي القذيفة ع حوشنا رنا قالتلي ع سر .. توا هيا الله يرحمها فأنا نبي نقولهولك
_ قول شنو خوفتني !!
_ قالت ان حسام اكثر من مرة ينادي فيا باسم أمل .. وكدا مرة يبعتلي مسج وفيه اسم امل .. قالتلي شكله البنت اللي كان يبيها .. انا واسيتها وقلتله مستحيل حسام نعرفه وقمت القدر بيك يعني .. بس بعدين قالتلي لو لا سمح الله كان زواجنا ظلم ليه وليها يارب مايصير منه ويرجعو لبعضهم .. شوف سبحان الله دعوتها استجابت وتفارقتو بموتها .. الله يرحمها وخيتي قداش حنينة <3
سكتت .. وكأن امية سخونة صبت فوق راسي قعدت شارد ومش مستوعب كلامه .. بعد مانزلته للمحل متعه فتحت تليفوني ع المسجات وفعلا اتضح اني باعتلها اكثر من مسج وفيه ( امل ) .. خبطت التليفون بالقوة ع الستيرسو وصرخت بوجع .. البنت ظلمتها بغبائي وبلاهتي .. ظلمتها بعقلي المراهق .. معقولة بعد اللي صار كله ومازلت نفكر في امل ؟؟ .. لالا .. ظلمتها بأني نشوف في رنا أمل !! .. يارب خودني عذبتهم الثلاثة بقلبي الساذج ..
علاش يادنيا كل مانحب وحدة تحسديني عليها وتاخديها !! .. رحاب خداها الجهل مني .. أمل خدتها الأقدار مني .. ورنا خداها الموت بقلب بااارد مني .. كلهم ضاعو مني .. كلهم مستحيل يرجعو .. مستحيل
حطيت راسي ع الستيرسو وبديت نبكي .. وثاني مرة نبكيها في حياتي ع بنت .. ظلمت امل لما حبتني بــ ( روح رحاب تلاحق فيا ) .. وظلمت رنا لما عشقتني بـ ( روح أمل تلاحق فيا ) .. آآآآه .. تنهدت بوجع .. مستحيل رحاب ترجعلي .. مستحيل رنا ترجعلي .. مافيش أمل الا في أمل <3
زعما ترضى ترجعلي بعد هذا كله ؟؟؟
,,,,,,,,,,,,,,,,,,,,,,,,,,,,,,,,,,,,,,,,,,,,,,,,
أمل ::
مضايقة من نتيجتي المزفتة .. وزدت اضايقت لما سمعت ان في عريس متقدملي .. وتيت صفرة العصير وطلعت بيها للصالة .. اول ماجت عيني في عينه جمد كل شي فيا .. قعدت معلقة عيوني في هيبته .. وعيونه الصغيرات .. وابتسامته الساحرة .. وقف وابتسملي .. ياربي شن هالابتسامة يللي تعالج كل وجع فيا ؟؟ .. شن يدير باش شوفته بس تسحرني وتنسيني كل شي مرّ في حياتي ؟؟ .. مستحيل بعد هالمدة الطويلة يرجع حسام يخطبني وبارادته .. بس خطبته كانت مقطوعة لانه جي بروحه مش معاه آي حد من عيلته .. سمعت صوت احمد يللي عكر نظراتي ( مدي العصير لخطيبك ياأمل ) .. تلفتله بتذمر وكأني نعاتب فيه ليش نوضتني من شرودي ؟؟؟ .. حطيت الصفرة وقعمزت مقابلة حسام وبلا وعي مني قعدو عيوني معلقات فيه !! ..
_ نخليكم بروحكم تحلو مواضيعكم تمام !! ( خدي تليفونه لما رن وطلع )
ابتسم حسام وشبحلي : مواضيعنا كلها تنحل بكلمة بس !!
شبحتله باستغراب .. بس ردّ نفس الابتسامة ارتبكت
قدّم وقعمز جنبي وقال : انا اسف ظلمتك ياأمل هلبا معاي .. وكنت نحساب انك ح تحبي حياتك وتعيشي مرتاحة بعد طلاقنا .. مانحسابش انا هكي عقدتك اكثر
شبحتله بتعصب :ومن قالك انا مش مرتاحة هكي ؟؟
_ قلبي <3 .. ياأمل من غبتي وانا حايس في روحي مش فاهم شي .. ومش قادر ندير شي .. حتى خطبتي لرنا كانت رغبة امي مش اكثر .. تعرفي علاش رجعتلك توا !!
_ بعد ماضمنت ان رحاب ورنا مستحيل يرجعولك
شد ايدي وابتسم .. وقال : لا .. لأني ماقدرتش نعيش من غير بنتي
_ كيف يعني ؟؟
_ انا نحبك ياأمل <3
#Dudu
أنت تقرأ
إبتليت بك
Actionرواية تحكي ع معاناة فتاة ضحية حرب لا ذنب لها فيها .. تجردت من كامل انوثتها حتى امتدت اليد المنقذة لها استرجعت ماستطاعت استرجاعه .. ستواجه المصاعب لتعود كما كانت ولكن .. هيهآآت للكاتبة سندس محمد التاريخ 13/8/2018
