إبتليت بك

Part 7

#إبتليت_بك

:: 7 ::

( السلام عليكم يابنتي )
من الصوت واضح راجل كبير .. شن يبي مني !! .. ( بنتي ) انتم درتولي قدر باش توصفني بأغلى ماعندك ؟؟
_ أمل .. هذا الشيخ صالح ماتخافيش .. جاي بياخد موافقتك
بصوت مرتبك شوي : موافقتي ع شنو !!
_ تفضل ياشيخ فهمها مابين ماجبت الشهود
_ ان شا الله .. ماتعطلش ياولدي
كنت نسمع من ورا الباب .. سمعت باب الحوش تسكر .. فتحت باب الدار لقيت الشيخ عاطيني بالظهر .. قلتله بصوت مجروح: عمي انا نبي نمشي لأهلي .. الولد هدا حاول يعتدي عليا والله
_ يابنتي اسمعيني .. انا نبصملك بالعشرة ان الولد رايدلك الخير .. وسمعته مسك بين الناس .. الشي يللي بيديره هوا زين العقل طالما أهلك بيقتلوك وهالشي مايرضاش بيه حد .. وانا مشيتلهم وحكيتلهم القصة وكان ردهم قاسي .. يابنتي في هالوقت مافيش الا الحل هذا وان شا الله مع الايام ترجعي لأهلك معززة مكرمة .. حسام طالب يتزوجك ع سنة الله ورسوله والحل هذا الامثل .. افضل من انك تقعدي مع شخص مش محرملك !! .. جاي نبي نسمع موافقتك ؟؟
ارتبكت .. ونزلو دموعي بغزارة : يعني اماليا تبرو مني خلاص؟؟
_ وبوك موافق ع زواجك وانا اللي سمعتها الموافقة المهم قال انك تبعدي عليهم لان انتشرت الشائعة انك توفيتي يابنتي
_ قتلوني وانا حية ؟؟ .. حرااااام والله حراااام
عيطت بصوت عالي وبديت نبكي .. بس الشيخ كان صلب قدامي وعاطيني بظهره وقال بنبرة واثقة : ولي أمرك موافق .. مازال موافقتك وبس !!
طحت ع ركابي من هول المصيبة .. معقولة هكي بتكون نهايتي نتزوج واحد مانعرفش اصله من فصله .. وزيادة حقير حاول يعتدي عليا !! .. معقولة هكي بتكون ليلة عرسي ؟؟ .. وأهلي سلمو فيا !!
_ الشهود وصلو ياشيخ
خش حسام وكانو معاه زوز شباب .. تعلقو عيوني في عيون حسام وكنت نحاول نوضحله اني مش موافقة عليك ولا ح نوافق
_ أمل .. انا مضطر ندير هكي .. لعند مانوصلو لحل ان شا الله
الشيخ: عندك شروط يابنتي !!
مسحت دموعي ووقفت .. وشبحتله بنظرة ثقة ووضوح: شرطي انه يكون راجل
,,,,,,,,,,,,,,,,,,,,,,,,,,,,,,
حسام ::
هالكلمة نزلت زي الصاعقة ع راسي .. خنجر وخش لصدري وتعمق وخلاه ينزف اكثر من قبل .. ( شرطي يكون راجل ) .. شبحت للشيخ لما ابتسم وقال : هالشي انا نضمنه باذن الله
قالت امل ودموعها في عيونها : انا موافقة
سمع الشيخ الموافقة .. تلفتت لأمل وابتسمت .. كملت طريقي للصالة وين ماكان يراجي فيا عماد وولد الشيخ جارنا وعدوني ان العقد القران يتم بالساكت ومايوصل لحد من اهليتي خاصة .. ح نحاول نحفظ السر لوين نلاقي حل .. تمينا كل شي ع بركة الله .. واستملت العقد .. وسقدتهم للباب ..
خشيت تفرجت ع العقد وطبقته في جيبي .. ماكنتش متخايل ان زواجي يتم هكي ؟؟ .. ولا كنت متوقع اني نتزوج غير حبيبتي الاولة ؟؟ .. بس الحياة تعطيك دروس تخليك تفيق ع غبائك وتعطيك دافع تستمر .. ومش كل شي نتمنوه معناها خير علينا .. كل شي بمشيئة الله ساير !!
خليتها تتقبل صدمتها وواقعها بروحها .. قربت من داري نسمع فيها تبكي .. طقيت الباب ماردتش عليا .. فعلا صعب ع البنت عرس زي هدا .. عرس شنو ؟؟ .. زواج ساكت !! .. وأهل باعو ؟؟ .. فتحت الباب وخشيتلها .. لصقت في الحيط وشادة الشاربة بقوة .. ابتسمت قعمزت ع السرير جنبها
_ أنا آسف أمل .. ماكنتش نبي هكي يصير بس الله غالب اللي صار صار
تلفتلها وقلتلها : شوفي أمل انا نبيك تنسي كل شي صار .. أنا توا زوجك شرعا .. ومادامك وليتي مرتي فـ من حقي نقولك شروطي .. مانبيكش تقري ولا تطلعي الا معاي .. آي شي يصير معاك قوليلي .. انا عارفك صغيرة وتبي تتزوجي شاب صغير زيك مش شباني زيني .. زابط تفكيركم كيف البنات .. بس نوعدك مانقربك ولا نمسك لعند تطلعي من حكم القاصر وتنحل كل مشاكلك وقتها انا بايدي نسلمك لعريسك ومافي قلبي عليك شي .. اعتبريني توا بابا ليك لين يحلها ربي .. سامحيني أمل بس مافيش حل تاني نقدر نديره .. اعتبري هالحوش ملكك واللي تبيه ديريه .. وانا ح ناخد الدار التانية نبات فيها .. وطول مانا معاك مانبيكش تخافي من شي .. اللي يخوفك قوليلي عليه بس .. واللي يضرك يضرني .. أمل .. سامحيني
وقفت .. شبحتلها لقيتها مازالت تبكي .. ابتسمت .. مسحتلها دموعه بصبعي السبابة بالخفيف وقلتلها : صدقيني من لما شفت دموعك أول مرة عرفت انك بنت أصل .. تصبحي ع خير
سكرت عليها الدار .. وخشيت للدار التانية فرشت مندار خفيف ولوحت روحي عليه .. وبكيت .. فعلا بكيت أحر من دموع أمل بمليون مرة .. فتحت تليفوني ع رقم حبيبتي الراحلة .. وقلت بهمس ( سامحيني خونتك اليوم .. سامحيني ماكنتش نبي نتزوج غيرك .. بس الأقدار غيرت التوقعات .. سامحيني حبيبتي .. ح تقعدي انتي حبيبتي للأبد )
,,,,,,,,,,,,,,,,,,,,,,,,,,
أمل ::
فاتو يومين كنت مش متحملة فيهم وجه حسام .. راقدة في الدار ونبكي وبس .. كان صلب معاي طلع من الشقة مارجعلهاش بكل هاليومين .. متمسكة بالمخدة ونبكي .. فجاءة حسيت بوجع قوي في بطني .. نضت نجري للحمام .. رجّعت هلبا حشاكم ومازال الوجع متواصل .. بديت نعيط بالصوت العالي معاش قادرة نتحمل بكل .. ماقاومت وقدرت نطلع من الحمام الا بستين حكمة .. رجعت للدار واتكيت خداني النوم ..
تاني يوم الصبح غليت شوية نعناع وقرفة وليمون وشربتهم سخان .. قلت اكيد بردة وح تمشي بعد هالمشروب .. سمعت الباب انفتح .. لبست شاربتي .. خش حسام وقاللي ( صباح الخير )
_ صباح النور
قعدت نراقب فيه يدور ع حاجة ومش لاقيها .. بعدين طلع من المطبخ .. كيف نضت لداري .. تقابلت انا وياه طاح مني المق وطحت حتى انا ع الارض زاد الوجع اللي في بطني صيحت
_ امل فيك حاجة !!
طبس قامني من ذراعي وانا شادة بطني نصيح ( بطني .. بطني خلاااص )
_ انزلي نعاينك
فكيت ذراعي منه وقلتله : مادخلكش فيا انا نبي نموت
قامني في غمره ونزل يجري بيا في الدروج ركبني السيارة وانا نتؤه من الوجع .. لعند وصلنا للمصحة .. نزل بيا وراجينا دورنا عند دكتورة النساء .. وصل مسج لتليفون حسام .. ناض من جنبي وشاد تليفونه .. شبحلي شبحة حرقتني استغربت فيه .. كيف كان طيب معاي شن صار وقلبه ؟؟ .. وطلع من غرفة الانتظار بسرعة
,,,,,,,,,,,,,,,,,,,,,,,,,,,,
حسام ::
( تأكد من المدام بالك حامل بواحد من صغارنا هههه )
هذا المسج اللي وصلني .. خلاني قريب طرت من الاعصاب .. اتصلت ع الرقم عطاني غير مستعمل .. هالكلب مافيش غيره باقيرا .. وين نلقاه بس .. وكيف عرف اصلا تزوجتها البنت اللي كانت عنده .. ورطت روحي توريطة مالقيتلها حل .. كيف ندير فيها هالبنت .. تفجرت من الغضب .. وصلت ع البحر بديت نعيط بعلو صوتي .. خبطت كل شي جي قدامي .. دخنت قريب كملته الباكو .. ماهونش عليا حتي شوي .. تكيت كرسي السيارة وكنت نتنفس بسرعة ونبضات قلبي نحس فيها بتوقف من كثر الاعصاب .. خدتني عيني وقتها .. ومعاش حسيت بشي ..
فتحت عيني لقيت الدنيا قريب اظلم .. تفكرت أمل .. تعوذت من الشيطان الرجيم ورجعت للمصحة .. لقيتها واخدها النوم ع كرسي الانتظار .. هزيتلها كتفها بقوة ( نوضي للسيارة )
جتني الدكتورة وكانت طالعة بتروح وقالتلي : انت زوجها !!
شبحتلها بتعصب وقلت : ايه فيها شي !!
_ ممكن تتفضل معاي شوي ؟
خشيت معاها للغرفة وخليت أمل تراجي البرا .. قعمزت وفنصت فيها : شن فيها !!
_ انت تعامل فيها مرتك بوحشية وجسمها كله متزرق .. والبنت قاعدة صغيرة و.....
كيف بتكمل كلامها خبطت ع الطاولة وقلتلها: يعني مش حامل هيا ولاه !!
شبحتلي باستغراب ووقفت وكان باين عليها الخوف: انت هذا اللي هامك !!
لوحت السيجارة ع طول ايدي وقلتله : ايه
_ لا البنية مش حامل
_ تمام
وقفت وطلعت من الدار شديتها من ذراعها وقعدت نشح فيها للسيارة .. ركبتها للشقة وكانت ساكنة لا حركة ولا صوت .. لوحتها ع طول ايدي ع سريرها وقربعت الباب وحبستها فيها .. خشيت لداري رقدت ..
,,,,,,,,,,,,,,,,,,,,,,,
أمل ::
تصرفاته غريبة .. ليش هكي يعامل فيا !! .. قالتلي الدكتورة ان جسمي مااستوعبش الصدمات يللي صاروله .. ولازم ناخد راحة كافية باش يرجع يلتم الجرح من جديد .. ونقدر نجيب صغار ؟؟ .. ليش بنجيب صغار مع هالمتوحش الغبي .. لميت ركابي لصدري وبكيت لين خداني النوم .
( لولوووووولي .. محلاك أمولتي طالعة اليوم قمممر والله قمر  .. صحيتي ماما ربي يخليك ليا وين بسمة تجي تشوفني .. مشت بتنادي المصورة باش تصورنا مع بعض )
محلاااه الحلم يللي كنت فيه ليش ماكان واقع حلو زيه .. نضت مبتسمة بعد اللي صار امس .. فتحت الباب لقيته مفتوح .. لبست شاربتي وطلعت للمطبخ .. لقيت حسام واقف ع البلكونة يدخن .. مابيتش نكلمه .. وتيت الفطور ومشيت بناديه .. بس تعرفو خطرلي كلامه ليلتها .. وقلت لازم مانعاقبه ع أمس
_ بابا .. بابا
ماكانش منتبه في الاول عاودت الكلمة من جديد .. تلفتلي مستغرب : تشوفي فيا راسي شايب وظهري مقوس باش تقولي بابا ؟؟
ابتسمت بعفوية وقلت: انت قلتلي اعتبريني بابا
دفني بعيد وقال: حولي من قدامي ترا
مش بعيد بيكون مريض نفسي وعنده تناقض هالولد .. خدي السفرة وقعمز ع الصالون قرب الطاولة جيهته صب طاسة شاهي وقاللي : تعالي افطري
_ الحمد لله افطر انت
ماأصرش حتى عليا .. بدي في الماكلة من غير مايشبحلي .. قعمزت قريب منه وقلتله : ءء .. عادي نسألك !!
شبحلي ببرود: شني !!
_ شن اللي غيرك عليا ؟؟ .. قصدي شن صارلك امس ؟؟
لوح السفرة ع طول ايده لين عيطت ووخرت التالي .. وقف زي المجنون شدني من رقبتي بقوة لين خنقني وقال: شن متوقعة نجاوبك ؟؟
قعدت نرعش ونهز براسي نافية لين طاحت الشاربة من ع شعري .. رخاني وقال: ماتخلينيش نتورط فيك اكثر .. فاهمة ولاه !!
ودفني لين طحت ع الارض .. قعدت نزحف لين وصلت للحيط وانا مصدومة فيه .. قرب مني وطبس عليا : أمل ردي بالك تفتحي هالموضوع مرة تانية فاهمة ولاه !!
كانت ريحة فمه دخان معاش قدرت نتنفس منها .. ركزت في عيونه معبيات شرار ونار .. شن درتله انا وشن كان سؤالي باش يستاهل هالتعصب كله .. واطيت عيوني وقلتله بهمس: آسفة
طلع من الشقة متعصب .. اول ماسمعت الباب تسكر قعدت نبكي بحرقة ..
,,,,,,,,,,,,,,,,,,,,,,,,,,,,,,,,,,
حسام ::
صارت أحداث جديدة في البلاد والباقيرا هاجم بسلاحه الثقيل ع أحد المناطق الضعيفة .. كنت طالع طوارئ لمدة اسبوع كامل .. كنا متجندين لآي ظرف يصير .. كل جيهة حمت منطقتها منه هالكلب طامع في البلاد ورزق العباد .. لعب في البلاد الفساد وراحو ضحايا فيها .. بعد رحلة طويلة وكر وفر رديناهم كيلومترات التالي .. وحددنا الاستراحة يللي كانو يضربو منها .. ومشينا فتشناها .. الحاصل لقينا بطاقة تعريف لواحد من رجاله .. وبهكي قدرنا نوصلو لراس الخيط .. عممت الصورة ع الشباب وقررت ندير بوابات في هالمنطقة وكثفو الجهود لان أكيد هالولد بيرجع لحوشه .. لانه ولد هالمنطقة .. رجعت للمقر تعبان ومش قادر نشوف شي من الارهاق اسبوع كامل انا والشباب اللي معاي ماغمضتلنا عين .. مراقبات مداهمات وضربات وحماية للمواطنين .. اتكيت ع طاولة المكتب خداني النوم .. تقريبا ساعتين رقدتهم .. فقت ع صوت عماد
_ ماحد يلوم عليا انا اللي كنت راقد في عتبة المقر .. ع الاقل انا عزري اما المتزوج وراقدلي هنا شن يقولوله ههههه
حكيت عيوني وثاوبت .. ورديت عليه بضحكة مسايرة: متزوج بالاسم وبس
_ نجيبلك قهوة ؟؟
_ لالا بنروح نرتاح في الحوش .. تو نرجع في الليل
_ اليوم توكتك ؟؟
_ ايه .. شن صار في الكلب حصلتوه ؟؟
_ درت لفة قبل نص الساعة ع الشباب غادي وماحد جابه
_ آآآخ لو نحصل عليه والله لما نفترشه
_ وسع بالك ههههه .. ثارك مع الباقيرا مش يللي معاه
_ ثاري مع آي واحد كلب بيخرب البلاد .. تو بالله عليك من يضربو هادم ؟ .. ماهو ولاد بلادهم وخوتهم وضنا عمهم ؟؟
_ صح والله .. كل مانقولو آهي البلاد بتروق يجو يعقدوها .. لعنة الله عليهم
_ هي كان صار شي جديد قوللي .. خللي نروح
_ تم يامعلم 
كنت دايخ من قلة النوم .. فتحت باب الشقة .. كيف عتبت باب الحوش جت أمل تجري حضنتني وتبكي .. كانت متمسكة فيا وكأني شي بيضيع منها قريب .. حطيت ايديا ع شعرها يللي كانت معرياته قدامي لأول مرة قصدا منها .. وقلتلها بهمس ( خلاص أهدي .. شن في !! )
بعدتها شوي ع الباب وسكرته وراي .. وكانت مازال متمسكة فيا .. ايديها مغروسات في ظهري .. وراسها ع قلبي بالزبط .. لفيت يديا ع ظهرها وحضنتها بلطف .. واعتبرتها كأخت ليا في هاللحظة .. كانت تبكي بغزارة وانا كنت متجمد في مكاني ولا حركة بدرت مني .. بعد تقريبا 10 دقائق بعدت من عليا وقالتلي ( وين كنت انت وين ؟؟ ) .. وضربتني ع صدري بقبضة ايدها .. ابتسمت وحطيت ايدي ع خدها الايمن وهمستلها ( خفتي بروحك ؟ ) .. قامت عينها فيا .. وبعدين نزلتهم بخجل .. وجهها استحمر وقالت كلماتها الطفولية ( خفت عليك )
ضحكت بالعالي وقلتلها: ياساتر
خشيت للصالة وقعمزت ع الكنبة وقلتلها: انا تعبان مافيش شي ناكله
_ صار ضرب هلبا هنا قريب الرواشن تكسرو وانت تقوللي نبي ناكل ؟؟
_ الضرب في البلاد كلها مش غير عليك
_ بس كل الناس مع اهلهم الا انا قعدت بروحي
_ والحل برايك ؟؟
جت قعمزت جنبي وعلقت نظرها بعيد عليا وقالت: ارفعني معاك .. والله خفت هلباااا
_ هههههه حلوة اهيا وين تبيني نرفعك ان شا الله ؟؟
_ خلاص خلاص .. تو نجيبلك غداك
خشت للكوجينا .. وانا نضت لداري طلعت حوايجي ودوشت .. جففت شعري وعاودت السيناريو يللي من ساعة صار .. وقعدت نفكر في كل كلمة قالتها ؟؟ .. انا قسيت عليها ببرودي .. خليها تعرف يللي بينا نتيجة الظروف مش أكثر .. وانا مش مستعد نكوّن اسرة معاها وندير صغار وتكون مرتي فعلا في يوم من الايام .. مسحت ع لحيتي الطويلة وهمست لنفسي ( لا تبي حلاقة انت مولي زي القرد ههههه ) .. طلعت ولوحت المنشف ع الصالون وخديت السفرة وتغديت بروحي .. وهيا كانت في دارها .. حطيت السفرة في المطبخ .. وماشي لداري نسمع فيها تتكلم .. قربت من دارها وحطيت وذني ع الباب .. معاش سمعت صوتها .. قربت اكثر ونفس الشي ماسمعت شي .. فجاءة انفتح الباب وقريب طحت لأن كنت راخي روحي ع الباب .. ضحكت في وجهي ضحكة قوية وطووويلة لين وجهها استحمر ودموعها نزلو من الضحك
_ خلاص سكري فمك الحق فيا اللي انشغلت عليك
وقاعدة مازال تضحك .. شديتها من ايدها بقوة : خلاص قلنا اسكتي بلا برادة بايخة
_ شفتك من شق الباب .. وووه منظرك يضحك حسام هههههه
_ كخ كخ بايخة ياسر هي .. شن كنتي تقولي !!
شدتني من كفي ودخلتني للدار قعمزتني ع السرير وقالتلي : تعالا نوريك شن كنت ندير
ربعت رجليها ع السرير وقالت: كنت نرخي في اعصابي .. يعني اليوقا
شبحتلها بعبط: يوقا شني ياهبلة !!
_ انا الفترة اللي فاتت كلها اعصابي مشدودة وشفت في التلفزيون امبكري اليوقا ترخي الاعصاب .. ماتعطلش ربع ساعة بس
_ والله نقعد زي العبيط مقعمز هكي ربع ساعة ؟؟ .. مريضة انتي !!
وكيف بنوقف لقيتها مغمضة عيونها وتتنفس بعمق .. وتتنهد وتبتسم .. ضربتها بالخفيف ع جبهتها
_ ياغبية انتي .. شن بتستفيدي من هالهبال هدا !!
_ شوف حسام لما تغمض عيونك تقعد تتخايل حاجات حلوة وسعيدة وتخلي عقلك الباطني يستوعب الحلم وبهكي تعيشه وتبتسم رغم الضغوطات
_ آهيا .. نعرف حديث للرسول صلى الله عليه وسلم يقول ( تفائلوا خيرا تجدوه )
_ نفس الشي .. غير جربه في ربع ساعة هدوووء من غير ماحد يسمع صوت حد
_ تمام
بكل عبط قعمزت زيها .. وقعدت نتخايل في الحاجات الحلوة يللي خاطري فيها تصير فعلا .. مانعرفش شن كنت نفكر بالتحديد بس المهم حياة وردية ههه .. او سماوية لون رجولي شويا ..
,,,,,,,,,,,,,,,,,,,,,,,,,,,,,,,,
أمل ::
بعد وقت قصير فتحت نص عين لقيته منسجم في التقعميزة .. فتحت عيوني وركزت في ملامحه الرجولية كان يهبل بمعنى الكلمة .. جسمه ضعيف شويا وطوويل هلبا .. ولحيته سودا وكثيفة وحواجبه كذلك مقرونات وبشرته حنطية أغمق مني بشوي ممكن تأثير الشمس عليه .. عيونه الناعسات وخشمه الواقف .. وشعره شبه مبلول ونازل ع جبهته شعرات صغيرات .. ابتسمت لمنظره الجذاب .. حسيت بيه سعيد بالشي اللي داره توا .. كان يبتسم .. رجعت لوضعيتي الاولة وبديت نتخايل في حياتي معاه .. ليش معاه !! .. لاني حسيت بشوي اعجاب اتجاهه ..
,,,,,,,,,,,,,,,,,,,,,,,,,,,
حسام ::
كنت حاس بيها تشبحلي ماكنتش سارح ولا منسجم في اليوقا العبيطة هادي .. لان نوعي نرتاح وقت مانبي مش بشي عبيط زي هذا .. ونرخي اعصابي وقت نلقى الراحة النفسية وبس .. ابتسمت لان حسيت عيونها ع تفاصيلي .. مش جذاب ولا جميل .. شاب اسمر عادي .. لكن الراجل القوي ديما زين <3 .. ماركزتش عليا لما فتحت عيني ربع فتحة باش نشوفها رجعت لوضعها والا مازال .. لما رجعت .. فتحت عيوني ومديت ايديا فوووق وتنهدت بأعلى صوت ( آآآآآه ) .. تلوحت ع السرير وعدلت جسمي عليه وغمضت عيوني .. كنت فعلا تعبان ومحتاج للسرير نرقد عليه يريح عظامي مش فراش رقيق تعب ظهري منه ..
,,,,,,,,,,,,,,,,,,,
أمل ::
خلعني لما تنهد .. تلفتله لقيته متلوح ع السرير وواخده النوم وهوا مبتسم .. فهم غلط العبيط بعد اليوقا تنشط مش ترقد !! .. ساويت شاربتي .. وغطيته وولعت المكيف عليه .. طلعت سكرت وراي الدار ..
( بس أنا مابدي غيرك ) ( وانا كمان مافيني عيش من غيرك )
ايييح عليك مسلسلات غبية .. معقولة الحياة مربوطة بشخص ؟؟ .. مانقدرش نعيش من غيرك !! ..

#Dudu