إبتليت بك

Part 14

#إبتليت_بك

:: 14 ::

خشيت لداري لبست بدلة الصلاة وطلعت لقيت خليل معاه رعشت مع بعضي
( قعمزي )
جاني صوت حسام في نبرة أمر .. ولازم مانلبي أمره .. قعمزت جنب حسام وعيوني في خليل يللي كان يحاول يخفي الخبث متاعه .. ابتسامة حسام خلتني نطمن شويا
_ خليل يبي يتأسف ع اللي صار
هزيت راسي بالايجاب ومن غير مانشوف لوجهه .. بس صوت خليل اخترق طبلة اذني وأثر ع خلايا الاعصاب .. حسيت بربكة وتوتر في ذات الوقت
_ سامحيني ياأمل .. وقتها ماكنتش في وعيي
اساسا انت لهاللحظة مش ع وعيك .. كيف تتأسف ؟؟ .. هل الموضوع يللي صار مجرد كلمة ( سامحيني ) يمتسح !! .. هل اللي انكسر فيا يتصلح ؟؟ .. مارديتش عليه .. نضت طلعت من الصالون لداري .. سكرت ع روحي الباب وبديت نبكي اذكرت هداك اليوم بكل تفاصيله .. اذكرت يللي صار في طريقي لحوش حسام ؟؟ .. معقولة بالسهولة هادي ح ننسى كل شي ؟؟ .. نسامحك !! .. نبتسم في وجه الانسان يللي كان بيدمر حياتي للمرة العاشرة ؟؟ .. مستحيل هالشي يصير ولو ع قطع رقبتي .. كمية هالافكار كانت تلف وادور في راسي .. ع قد ماحركته وهزيته نبي نفتتها ماقدرتش .. كانو الدموع سيل ع خدي
( فيك شي أمل ؟؟ )
فتحت عيني باش نلقى ايد الحنون تلف ايدي .. ومبسمه يللي يخلي يومي عيد .. اكتفيت اني مسحت دموعي وابتسمتله .. هزيت راسي نافية لأوجاعي .. نافية لضيقة خاطري .. وكرهي لهالشخص تحديدا لان خبيث وبجدارة .. واحساسي هالمرة بيلعب لعبة أوسخ من اللي قبلها ومستحيل يكون أسفه مجرد توبة وصلح بين ولاد الخالة !! .. كلمات من حسام تكفيني نعيش هالدهر فرحانة وغير مبالية بللي صار .. اداوي جروحي .. تمحي آهاتي .. تواسيني في ضيقتي .. تفرحني وقت محتاجة للفرح ..
( حسام انا حبيتك )
شفت في عيونه الصدمة .. ركزت في عيونه واداركت الموقف .. اكتشفت اني خاينة وغبية .. في هالوقت بالتحديد تمنيت كلمتي اترجمت حرفيا باللاتيني .. تمنيت لو ان لغتي كانت غريبة مش نفسها لغتك باش تفهمني .. تمنيت انشقت الارض ولا سمعتها هالكلمة .. والله ماذنبي .. الذنب كله ع قلبي .. هو السريع ومش واعي لكلامي يللي طلع منه .. ماكانتش فيه بوابة تفتش ع الكلمات المحظورة
( شن قلتي !! )
تلاشت ابتسامته .. بعد ايديه وعلق عيونه في المجهول .. مسحت دموعي بكفي وقلتله : ماقلت شي
من غير آي ردة فعل .. لم روحه وطلع من الدار .. انهرت وبديت نبكي بكل مافيا .. تفجرت أوجاعي المكنونة .. حتى رجليا ماعاد تحملوني .. جثيت ع ركابي وبديت نبكي اكثر واكثر .. لدرجة كان الجو بارد البرا حسيت بالسخونة .. لوحت بدلة الصلاة وبديت نخبط ع وجهي شن قلت بس !! .. ليش بوحت بشي كان المفروض يموت قبل ليطلع !! .. هالكلمة بذات ماكانتش المفروض تولد الا في وقتها !!
بعد ثلاث أيام بالتحديد من غياب حسام عليا .. رجع وفي قلبه كمية جفاف لا توصف ليا .. مع هذا ماعاملته غير أنه ضيفي لليلة باش ماانثقلش عليه حياته .. هل هوا الغالط أم انا !! .. الله وحده أعلم !!
,,,,,,,,,,,,,,,,,,,,,,,,,,,,,,,
حسام ::
كنت تعبان وفي راسي خطة باش نحمي المقر من كلاب الباقيرا ومافكرتش بللي صار بيني وبين أمل .. لان كلام وطلع من فم طفلة ماهيش عارفة معناه .. بس مع هذا قسيت عليها شويا باش تتعلم ان مش آي كلمة تنقال !! .. بعد المغرب طلعت من داري لقيتها لاهية في الكوجينا طلعت من غير مانكلمها .. وسيارتي تحولت لطيارة في هالوقت باش وصلت للمقر ..
( مانبي حد في الحراسة حتى الليلة ! )
( علاش ياآفندي )
قدمت خطواتي للمكتب ونحيت طاقيتي ( نفذت اللي قلتلك عليه وبس )
فضيت المقر من الحراسة وخليت فيه شويا شباب ظاهريا .. والباقي خذينا اماكن متفرقة في المقر .. وانا وعماد كنا في الغرفة السرية يللي في قبو المقر .. ماهيا الا ساعات والضي هرب .. باللاسلكي نصحوني نفتح المولد بس أصريت نقعدو في الظلام .. لاني حاس بملعوب الليلة ومن خلال استخباراتي الذاتية .. كنت حاط واحد من الشباب ع المراقبة ونبهني بوجود أشخاص حوالي المقر .. ابتسمت بمكر وقلت في خاطري ( الليلة ليلتكم ياكلاب ) .. وصارت مناوشات بينهم وبين الشباب البرا .. شويا شويا بدت الخطوات تتقدم ع الحبس يللي فيه الراس وتوابعه .. أعطيت اشارة لعماد يلف عليهم من جيهة تانية .. وانا طلعت من وراهم وكان سلاحي مصوب ع راس اللي شاد القفل وبيفتح باب الحبس .. انجمد في مكانه وهمستله ( قول لجماعتك يوقفو خير ماتريح فيها !! ) .. قام ايديه فوق وهز براسه بمعنى تمام ..
خشيت للمكتب وتلوحت ع الكرسي بقوتي وتنهدت براحة
( والله انت الا زعيم )
_ كنت حاس بيهم ياعماد بيجونا .. مستحيل يفوتو هالايام ع خير
_ ايه قوللي علاش خليته يمشي الفرخ الصغير ؟؟
_ أول شي صغير واضح من وجهه حتى شنابات ماطلعوله .. تاني شي نبيه يوصل الدوة للباقيرا .. ان الدولة مش ساهلة باش يلعب فيها تسعة
_ ايه صحة ليك حسام مش ساهل هههه
_ قلنا الدولة احني ياتاعب
_ وانت الدولة كلها .. المهم ريتهم كلهم مفرخ يللي معاه !!
_ يستقطب فيهم ويدف فيهم للموت شن خاسر هوا !! .. الهم كله بيجي ع الوالدين
_ ايه والله ربي يصبرهم .. تبي تحاسبهم قانونيا !!
ولعت دخاني وشبحتله ع جنب : لو نشوفو أعمارهم نلقاهم تحت العشرين .. ع شني بنحاسب صغار مش عارفين مصلحة نفسهم !! .. يهزو في روسهم لكبار الروس وخلاص
_ يزلبح فيهم بالفلوس باش يجوه زي الكلاب
_ أصلا حتى مش مدربين .. تو هناك واحد عسكري يخش خشتهم هادي !!
ضحك عماد بالعالي وقال: والله حق خشة أغبياء
_ والله لما نخلي نهاره أسود هالكلب هذا
_ قولتك ح يسكت عليها !!
_ أعلى مافي خيله يركبه .. المهم توا لازم نغيرو مكانه هالمريض .. لان واضح عند اسرار اكبر من راسه ع الباقيرا
_ ايه وين تبينا نحطوه !!
_ نشوف مكان ونقولك .. المهم الشباب اللي شديناهم اليوم حولهم ع التحقيق وأعرف أهاليهم وكل شي عليهم وحولهم ع النيابة تعرف تتصرف معاهم
_ تمام
_ خللي انا نروح .. نتلاقو غدوا ان شا الله
_ تم يامعلم .. تصبح ع خير
فتحت باب الشقة بهدوء لان كان الوقت متأخر .. حطيت مفاتيحي ع الطاولة وخشيت لدار يللي فيها أمل .. فتحت دولابي وخديت لبسي بدون صوت .. باش ماتفيقش بيا وتصبح قصة ومسلسل درامي في هالليلة القاسية .. ومش كل شين تمنوه يصير طبعا ولو كان بسيط ..
( حسام روحت !! )
تلفتلها وابتسمت لقيتها تحك في عيونها وعلقتهم فيا
_ ايه كيف وصلت بندوش وبنرقد
بصوت مبحوح وواضح نومتها بعد دموع طويلة : بنقولك آسفة ع اللي صار !!
_ شن صار ؟؟
_ ع الكلمة يللي قلتها .. قصدي والله مانقصد بيها حاجة بس جية خليل ربكت كل شي فيا
_ بنقولك حاجة خليها في بالك .. ماتعبيش فراغك بيا .. ماتحطيش في بالك شي بعيد عليك .. أمل مازلت ع اتفاقنا انا .. وانتي لازم ماتكوني قد وعدك .. تمام !!
هزت راسها وابتسمت: تمام
,,,,,,,,,,,,,,,,,,,,,,,,,,,,,,,,,,,,
أمل ::
بعد فترة قصيرة تغيرت معاملاتنا لبعض .. بدينا نبعدو شويا ويحاول يشغل نفسه في العمل .. أما أنا بديت نتابع في مسلسل وبرامج أطوّر من نفسي شويا .. وجودي في هالبيت مؤقت فقط ولازم مانطلع انسانة واعية ومعتمدة ع نفسي في كل شي .. مرت الأيام وهذا روتيني .. مامن جديد يذكر ولا قديم يعاد ..
,,,,,,,,,,,,,,,,,,,,,,,,,,,,,,,
حسام ::
_ نبيك تتفضل لفاتحة خوي الخميس في *****
_ ان شا الله تو نشوف
_ بجد ياآفندي حكيت عليك لبوي وحاب يتعرف عليك
طلع فيصل .. سندت راسي ع ايديا وبديت نفكر في أمل !! .. نقوللها والا لا ؟؟ .. ستين فكرة في راسي ومافيش اجابة لولا وحدة منهم
_ خير !!
_ قعمز نحكيلك
وحكيتله كل شي صار
_ خلاص ربي يهنيها
_ نبي نعرف بس هل مازال تعتقد اختها ماتت !!
_ العلم عند الله وين نندري انا ؟
_ عندي خطة ليوم الخميس تسايرني فيها !!
_ قول ياهم وانت ماتملش من الخطط ؟
,,,,,,,,,,,,,,,,,,,,,,,,,,,,,,,,
أمل ::
كنت مقعمزة ع التلفزيون وقدامي صحن فوشار وقت خش حسام مستعجل .. شبحتله بطرفة عين وفوته مابيتش نتكلم معاه ونعكر مزاجي اليوم عندي يوم مميز ومش ح نقوله شن التميز يللي فيه !!
_ نوضي البسي عبايتك أمل عندنا مشوار
بلا مبالاة قلتله: ماعنديش نية نطلع اليوم
_ انا قلت كلمتي نوضي وتي روحك عندنا مشوار
_ بجد حسام مش حابة نطلع اليوم
قرب مني وعيط عليا : قلت نوضي يعني نوووضي
من غير ولا كلمة نضت نجري لبست عبايتي ووشاح لونه عنابي وطلعت وراه للسيارة .. طول الطريق كان ساكت وكل مانسأله مايردش .. المسافة كانت بعيدة وين رفعني هذا !! .. بتعصب تلفتت ع الروشن ومعاش شبحتله بكل .. وصلنا للمكان ونزلني بتفنيصة
_ حسام بالله عليك قوللي احني وين !!
كان يمشي في المبنى الكبير ومعبي موظفين بنفس الزي .. خيالي .. عندنا في بلادنا مباني حلوة هكي اول مرة نعرف !! .. تلفتت يمين يسار مالقيتش حسام .. رعشت مع بعض وخفت من المكان .. بس حسيت ايد تجبد فيا وقال ( الحقيني بلا عبط ) .. لحقته لين ركبني في صندوق طويل الكتروني وقال انه هذا المصعد .. وين ماشيين بس !!
الدنيا كانت مضوية .. تقريبا من ساعة الفندق انها الساعة 5:00 مساءا .. طق ع باب الحجرة وانا واقفة جنبه .. طلع راجل منها وسلمو ع بعض وقاله ( زي مااتفقنا ؟ ) رد عليه بابتسامة وقال ( تم .. تفضلي ) .. هذا وين رافعني ؟ .. شبحت لحسام ابتسملي وقال ( ح تشوفي شي يسرّك ) .. طلع الراجل وخلوني ع باب الحجرة .. قدمت خطواتي بالشويا لين وصلت لنهاية ممر صغير ع طول شفت السرير رعشت وقلت في خاطري ( حسام بيسلمني للراجل هذا بمقابل مادي زعما !! ) .. بس لما مديت راسي لبداية السرير شفت فعلا شي يسرّني .. دموعي تجمعت في عيوني وماقدرتش وحدة فيهم تنزل .. وقفت وكل شي مات فيا .. نقدم نوخر مش عارفة روحي شن ندير !! .. بسمة !! .. اختي قدامي وهيا لابسة الابيض وبكامل اناقتها .. قامت عينها فيا وهمست ( أمل !! )
فجاءة تحولنا لطيور .. مانعرفش كيف وصلت لحضنها وارتمينا ع بعض وبكينا بالعبرة وكل شي فينا عاش من جديد بعد هالحضن .. احضنتها بقوتي وبمرارة الايام في بعدي عليها .. حضنتها بحب واشتياق .. يارب ماتفرقنا عن بعض .. كانت تبكي وخرب مكياجها بسبب الدموع المنهارة .. بعدت راسها شويا ومسحت بكفي شوية دموع مع الالوان ممزوجة وقلتلها ( استاحشتك ياخيتي )
_ انا اكثر والله ياأمل .. ماتوقعتش نشوفك بعد هذا كله !!
حضنتني من جديد همستلها ( تخربي مكياجك يابنتي ؟ )
بعدت من عليا وقالتلي : لو كنت نعرف اني بنشوفك في عرسي راني تمنيت نتزوج من زمان
_ ياروحي انتي .. احكيلي شن صاير معاكم !!
قعمزت ع السرير وشدت كلينكس ومسحت عيونها وقالت: صارو حاجات هلبا وحق ربي كان تعرفي ممكن تموتي توا !
_ بسببي ولاه ؟؟
_ لالا ماتفكريش هكي .. اللي صارلك انا متأكدة انه غصبا عنك ومش برضاك !
_ كيف برضاي ؟
_ ماهربتيش يعني .. ع حسب ماقالو خوتك
قعمزت جنبها ع السرير وقلتلها: لا والله .. ربي يشهد ان خطفوني وصار اللي صار
_ المهم احكيلي عليك ! ( مسحت دمعتها وابتسمت ) مشتاقة نسمع لصوتك والله !
تنهدت وعلقت عيوني القدام : تصدقي اللي صار احلا شي في حياتي ممكن .. بس قاعدة متلخبطة لتوا
_ قوليلي منو اللي جابك ؟؟ .. وخلاك الوقت هذا كله عنده ؟؟
_ زوجي حسام
_ حسام اللي يحكي عليه فارس ديما ويحكي ع بطولاته راجلك انتي !!
_ ايه ريتي ؟؟ .. هههههه تزوجنا غصب ماتفكريش انه يحبني
دفتني بايدها ع كتفي بالشوي وقالت: تو يحبك ياهبلة اصبري بس
مسحت دموعي ونحيت وشاحي وقلتلها: احكيلي بابا كيف مات !!
_ آآآه .. مسكين .. بعد ماغبتي علينا قعد يدور في الشوارع يدوّر عليك .. ولما جانا شرطي وقال ع الجثة تعب ورقد في فراشه وكل يوم بدت حالته تسوء .. وفي يوم مازلت نذكره لتوا جاته ماما وقالتله بنتك ماتت جيفة وكلوها الكلاب معاش تفكر فيها خلاص .. بدي قلبه ينبض هلبا وانتي تعرفي بابا عنده القلب .. آآآه .. وسكرت عليه الدار وقعدت تدويله للآن ماحد عارف ليش دارت هكي وهيا عارفاته تعبان بالزايد .. بعد ماطلعت خشيتله نجري في شهقاته الاخيرة يقوللي ( أمل .. أمل ) ومات الله يرحمه قداش بكي عليك لما يحسابك توفيتي
_ ربي يرحمه .. وحسبي الله ونعم الوكيل في اللي كان السبب .. وانتي صدقتني اني متت !!
_ في الاول ايه لين مرة سمعت امي وخوي احمد يحكو عليك تزوجتي فوتّيهم وهكي .. وع حسب مافهمت انها قالت لبابا هكي باش مات والله اعلم
_ قوليلي كيف تزوجتي يافالحة !!
_ لما خطبني كنت رافضة هالفكرة نهائيا وعارضت هلبا .. حتي من الضرب ضربوني خوتك .. هههههه كان نحساب روحي بنشوفك راني وافقت من الاول
_ ههههه قرايتك !!
_ ايييح اما قراية بعد ماصار بطلوني خوتك من القراية اصلا
_ سامحيني بالله عليك .. كله صار بسببي فقدتي بابا وقرايتك
_ مادوري شي المهم انتي بخير وهذا اللي كنت نحلم بيه والحمد لله تحقق ههههه
_ آآآآه لو تعرفي بس شن صار فيا وقت جتني الماما !!
_ جاتك ؟؟
_ ايه و.......
قطع ع كلامي صوت حسام ( هيا أمل خللي العرسان بروحهم )
ابتسمت وتلفتت لبسمة : حبيبتي انتي ربي يهنيك ويسعدك ويعوضك ع كل شي مرّ ذوقتيه ( بوستها ع خدها ) انتي احلا عروسة تشوفها عيني <3
مسحتلها دموعها وابتسمتلي: أمل !!
ونقزت في حضني وبدت تبكي وتشهق لين طق الباب عريسها .. بعدتها من عليا وقلت ( اششش خلاص .. هي عريسك وصل )
ودعتها بابتسامة وطلعت من حجرتها بعد ماهنيت العريس عليها .. سكرت باب الحجرة وتنهدت وذرفو دموعي من جديد .. حسيت بايد مسحت ع خدودي الزوز وقربتني للصدر الحنون .. للحضن الدافي .. غمرت راسي في صدره وبكيت بهمس .. قعد يمسح ع راسي ويهمس ( خلاص عيوني ماتبكيش .. ح نخليكم تواصلو بعض ديما ديما باهي !! )
_ صغيرة ياحسام راهي صغيرة
_ حتي انتي ياروحي صغيرة .. وشفتي شي اكبر منك وانظلمتي بس هيا عاشت مرتاحة وح تعيش باقي حياتها ان شا الله مرتاحة .. انا نعرفه فارس يحبها ومش شايف غيرها
_ آآآه ربي يهنيها
سندني بايديه ونزلت انا وياه .. بعد ركبنا السيارة قال : شن رايك فيها المفاجاءة !!
ابتسمت .. قدمت راسي لين وصلت لخده وبوسته : احلا مفاجاءة
_ حي حي .. شهدرتي بينا احني في الشارع
_ مايهمني حد .. مالقيتاش الشارع جنبي وقت تعبت لقيتك انت بس
ابتسم .. وكانو شعرات طالعات من الوشاح قرب ايده ودخلهم .. ضحكت
_ جت ع الشعرات هادم بتغار !!
ولع سيارته وطلع : تصدقي حتي ع صوابعك نغار .. ع كل شي
كنت بنقول ( مايغارش الا يللي يحب ) .. بس اذكرت صداته ليا وقت نصارحه بحبي .. تراجعت .. تكيت راسي ع الروشن وكملنا دربنا للحوش .. بعد نزلنا نحيت وشاحي وقعمزت ع الصالون
_ قداش التاريخ اليوم حسام !!
كان في المطبخ يقربع تلفتلي: 7\10 .. علاش !!
_ تصدق ان اليوم عيد ميلادي !!
ضحك وقال: عارف .. انا هديتي وصلت ماتطلبي مني شي تاني ره هههههههه
_ هههه مش ع الهدايا بس والله اليوم كان يوم مميز من اوله .. ع سيرة الهدايا انت بروحك ليا هدية .. انا بندوش
خشيت لداري وازيت حوايجي وطلعت ع الدوش طول وخليته حاير في كلمتي ..
طلعت من الدوش وانا نجفف في شعري .. لقيته مقعمز ع الصالون وشاد مق قهوة .. جيت قعمزت جنبه وفردت شعري ع ظهري ..
_ حسام !!
رد عليا وهوا منسجم مع الشاشة : هممم
حركت ايدي قدامه وقلت: حساااام خليك معاي شويا
سكر الصوت وشبحلي: نعم !!
_ كيف عرفت بعرس أختي بسمة ؟؟
_ عزمني صاحبي وقتها ع الفاتحة وخطرتلي فكرة بعد ماعرفت انها اختك العروسة
_ آآآآه .. بجد شكرا
تلفت القدام وقال: مافيش داعي تشكريني مادرت غير الواجب
_ ياريت كنت حاضرة حفلتها من الاول .. وقفت معاها في تجهيز حاجاتها .. آآآه الحمد لله وخلاص
_ ايه والله
_ مامشيتش لأمك الاسبوع آهوا صح !!
_ كلمتهم اطمنت عليهم
_ آها .. تبي تتعشى ؟؟
_ لا شويا وطالع انا
_ وين بتمشي ؟؟
_ مع الولاد .. أمل سؤال تاني بنقربع راسي في الحيط
ضحكت عليه وقلت: خلاص خلاص بنوض نحددلك سوريتك تمام !!
_ احسن شي اديريه
,,,,,,,,,,,,,,,,,,,,,,,,,,,,,,,,
حسام ::
خشيت لمكتبي حطيت طاقيتي وناديت ع أشرف .. جاني يجري
_ نعم آفندي !!
_ قالولي في حد جي اليوم للمقر
_ ايه خليل ولد خالتك سأل عليك وقال يبي يشوفك ؟
_ خيره المريض آهوا مش عندي تليفون ؟؟
_ هذا اللي صار .. تبي شي !!
_ لالا .. الليلة عندنا دورية راك تنسى بس
شن يبي خليل جايني للمقر ؟؟ .. اتصلت بيه مرتين لقيته مقفل .. كلمت خالتي ماردتش عليا وعرفت انها مازال مضايقة مني ع اللي صار .. بس ولدها الغالط مهما كان .. فصلت توكتي الصبح روحت لشقتي .. رقدت
نضت العشية لقيت أمل حاطة سفرة القهوة قعمزت جنبها وخديت فنجاني
_ ترفعني اليوم لبسمة حسام !!
_ بسمة سافرت
_ الله !! .. وين سافرت خسارة؟
_ لتركيا تقريبا
_ آآآه ربي يهنيها يارب .. قداش كان خاطري نتزوج هكي بفيلو وطرحة واغاني زفة ويزفني عريسي لابس بدلة .. الله ياحسام .. ثاني يوم نسافرو لآي دولة كانت .. والا مش لازم نسافرو .. نتمشو ع الشط وفي ايدنا جيلاطي .. آآآآآه شوف كيف كانت احلامي ؟؟
تمعنت في كل كلمة قالتها .. سبحان الله طفلة مازالت طفلة .. وفي عيونها حكاية حب تبي تعيشها مع زوجها .. بس زوجها حسام !! .. وحسام مستحيل يتعايش مع انسانة مجبور عليها .. ابتسمت وفي بالي نحضنك ونقولك ( ح نعوضك اللي فات ) .. بس والله صعبة ياأمل .. روح رحاب مازالت تلاحق فيا .. رضا امي وخواتي وخوي .. صعبة مسكرة من كل الجيهات
_ ح تعيشي اصبري بس
_ بعد شنو !! .. ح نعيش صح بس مش زي مانبي .. بنعيش دمية كل واحد يلوحها للتاني .. انت اللي نشوف فيك بطلي .. ح يجي يوم وترميني في الشارع من وين ماخديتني .. حسام معاش تكدب عليا وتوهمني .. راني كبرت وبديت نفهم في الحياة اكثر .. وتعلمت ان اللي انكسر مش ح يتجبر .. انت بعد مااطلقني اللي تحط عليها صبعك توافق .. وتتزوجو وتعيشو الحياة يللي كنت نحلم بيها انا .. بس انا بنت .. في مجتمع كاره البنت منذ ولادتها .. المهم خليك مني .. بدت اقصى احلامي نتنفس هواء نظيف بس .. وانت ربي يهنيك ويعوضك خير
مسحت ايديها وخشت للدار .. انا متاكد انها تبكي .. بس شن الحل معاها !! .. مش قادر والله
فاتت الايام وبدت تتأقلم أمل مع حياتها العصية .. لا في من يشاكيها ولا يحاكيها .. بروحها في شقة .. وبين اربع حيوط .. وبين الضي اللي يجي ويهرب كانت تعد في ساعاته .. جبتلها كراسات تلوين ومذكرات خليتها تكتب وتعبر بالكتابة بالك ترتاح شويا وتزيح من عليها الغيمة المظلمة ..
في نهار من النهارات ولعت سيارتي لحوش أمي .. قداش ليا عليها مشتاق ريحتها وصوتها وكلامها وكل قصة تحكيهالي .. سلكت دربي وانا مبتسم ..

#Dudu