إبتليت بك

Part 12

#إبتليت_بك

:: 12 ::

ماردش عليا بحرف .. طلعت سكرت وراي الباب .. خشيت للكوجينا معاش عرفت شن اندير ؟؟ .. انطيب غدا او نفوته الولد مريض ؟؟ .. لازم ياكل باش يبرا خللي ندير آي شي .. تكيت ع الطاولة خداني النوم .. فقت ع صوت باب الدار تسكر .. فتحت عيني لقيته حازم طالع مشيتله نجري
_ انت خوه الدكتور صح !!
تنهد .. خش للصالون وقعمز : انتي مش رحاب !!؟
_ لالا انا أمل
_ شن اللي جيبك هنا ؟؟ .. شن اللي خلاك تتزوجي حسام بالسر ومن غير شورنا تزوجك ؟؟ .. من تكوني انتي !!
ماقدرتش نرد عليه بحرف .. غير ان دموعي نزلو زي المطر وحرقو خدودي .. شبحتله بحسرة وقلت: قصة طويلة
تلفتلي باستغراب : نبي نسمعها .. وتوا !
تلفتله وقعمزت مقابلاته وبديت نحكي في قصتي من اولها لأخرها .. في النهاية خوه عرف كل شي .. انا متاكدة ان خالته قالتله عليا .. ماكذبتش عليه بحرف .. وديما يحكيلي حسام ان خوه طيوب ومتفاهم .. اكيد بعد يسمع قصتي ح يعذر خوه اللي ورطته معاي 
,,,,,,,,,,,,,,,,,,,,,,,,,,,,,,,,,
حسام ::
فتحت عيني لقيت روحي فوق السرير وفي دار أمل .. تلفتت يساري مالقيتش أمل فرحت .. نضت حكيت وجهي بايديا .. لقيت فيهم ابرة التغذية .. وفي جنبي كيس معبي ادوية .. عقدت حواجبي وحولت ابرة التغذية بقوة .. ونزلت من السرير راسي دايخ وجسمي تعبان .. فتحت الباب واتكيت عليه ( أمل .. ياأمل )
جتني تجري وقالتلي: صحة النوم
شديت راسي بايدي وقلتلها: مني اللي دار هذا كله ؟؟
أشرتلها ع الادوية وكيس التغذية اللي معلق .. ابتسمت وقالت: خوك حازم
_ حازم ؟؟
دفيتها من قدامي وطلعت ع الصالون لقيته مهناش .. لمحت الروشن لقيت الدنيا مظلمة .. تلفتلها: وين مشي !!
_ قال بنجيب شوية قضية لحسام لانه ناقص تغذية ( قالتها وتعلق ع حازم كيف يتكلم وبعدين ضحكت ) .. ايوااا احني خونا الكبير يخاف علينا ههههه
ضحكت وقعمزت ع الصالون : كيف صار تعالي احكيلي !!
قعمزت جنبي وحكتلي كل شي صار من اول ماجي وشافني لعند توا ..
_ زعما خوك قال لأمك !!
_ كان خالتي اللي قالتله معناها حتى امي عرفت .. بس ماتخافيش مش ح يصير شي
_ قلتله انك مطلوب من الباقيرا كان يبي يرفعك للمصحة
_ آهااا
_ تو الباقيرا مايعرفش سكنتك ؟
_ لالا منين بيعرفها ؟؟
قطع ع كلامنا طق الباب وكان حازم .. تلفتت لأمل : نوضي البسي وشاحك
ابتسمت وناضت تجري .. تلفتت ع الباب وقلت: خش ياحازم
خش حازم وشبحلي وابتسم : ماشا الله نقزتها الموت هههه
_ ايه بفضل الله وبعدين انت
حط شويا فاكهة قدامي ع الطاولة وقال: ياولد بتقتل روحك !!
_ ههههه مشاغل ياسي
طبطب ع كتفي وقال: صحتك أهم وانت عارفني كيف ع الصحة ولاه !!
_ دكتور طبعا ههههه
تلفت يساره كأنه يدور ع شي .. همستله : في شن ادّور ؟؟
_ وينها البنت ؟؟
_ خشت الداخل .. قالتلي ع اللي صار
تلفتلي : نبي نسمع منك !!
,,,,,,,,,,,,,,,,,,,,,,,,
أمل ::
جهزت سفرة القهوة .. وقمتها بايديا ولما قربت ع الصالون سمعتهم يحكو وشد انتباهي ان اسمي وسط حديثهم .. وقفت !!
حازم : تأكدت منها البنت ع المزبوط ؟؟
حسام: ايه تأكدت
حازم: يعني مش حامل !!
حسام: لالا .. وهذا اللي خلاني نتزوجها ونخليها عندي لين تنحل الامور
حازم: وبعد ماتنحل الامور !!
حسام: بنردها لاماليها اكيد
حازم: بطلقها يعني !!
حسام: امالا بنتزوجها رسمي ؟؟ .. خيرك انت مستحيل هالشي يصير !!
حازم: ايه احسن حتى امك مش ح ترضى بيها
حسام: اول شي صغيرة وتاني شي شن ذنبي نورط روحي فيها !!
حازم: ايه والله .. ربي يستر عليها وخلاص
حسام: انا واجعتني وبس .. مانقدرش نخليها ضحية شي ماليهاش علاقة بيه .. بعد ينحل كل شي هيا ترجع لمكانها وانا لمكاني .. نبيك تحافظ ع السر حازم تمام !!
بعد سمعت هالحديث كلها خنقتني العبرة .. ودمعتي حصلت بين رموشي .. اللي كنت نسعى نوصله مستحيل نسعاله في الجديد .. استاذنت وخشيت بالسفرة .. حطيتها بينهم وقلت ( تفضلو ) .. ابتسملي حسام وتلفت لخوه : ريت مرتي فالحة مش زي مرتك ههههه
ابتسمت باصطناع وقلت في خاطري ( لو كنت فعلا مرتك راهو ماقلت اللي قلته لخوك توا ) .. مدّ حازم يده ع طرف الكيكة وقاللي : الله يبارك مبدعة في الحلو شكلك
كان خاطري نضربهم الاثنين كف .. ونقوللهم ( ليش تنافقو بس !! .. راني سمعت كل شي ) .. بس تراجعت عن تخايلاتي بعد ماحسام أشر بايده ع وجهي
_ وين رحتي ؟؟
ابتسمت: قاعدة .. انا نستاذن بنخش نرقد لو احتجتو شي نادوني
خشيت لدار حسام يللي يرقد فيها قبل وخليتله السرير والدار الاساسية .. سكرت ع روحي بالمفتاح واتكيت ع الفراش يللي كانت ريحته عالقة فيه .. غمضت عيوني خطر في بالي كل شي صار حلو بيني وبين حسام .. في الاخر بيتنازل عني بسهولة .. غفت عيني باطمئنان والحمد لله ..
ثاني يوم الصبح سمعت صوت حازم يسلم ع خوه وانه راجع لمدينته .. فتحت الروشن لقيته راكب سيارته ودعه حسام بايده وركب للعمارة .. ضميت الفراش ورتبت كل شي .. ولما خشيت للكوجينا لقيت حسام يشرب في قهوته .. ابتسم وقاللي ( صباح الورد )
رديت عليه الابتسامة : صباح النور
_ ناشطة اليوم !!
_ ايه قلت نلحق نطيب الغدا بكري
_ آها .. ماتحسبنيش في الفطور طلعت مع حازم فطرنا البرا امبكري تمام !!
_ تمام
طلع من الكوجينا رتبتها .. ورتبت كل شي في الشقة ..
( انا بندوش تمام !! )
سمعت صوته في داره .. ابتسمت بمكر وقلت ان حان وقت خطتي ولازمها تنفيذ .. بعد مااطمنت انه خش للدوش .. لميت حوايجي في شنطته الصغيرة متاع السفر .. وكل شي يتعلق بيا .. خديت ورقة وكتبتله ( حسام .. انا مش مستعدة نتحمل اهانات اكثر منك ومن اقاربك .. قررت نخليك تاخد البنت المصونة يللي تسرّ قلبك وخاطرك وتعيش معاها برضاك .. تتزوج بنت نظيفة في نظرك وماقربها حد قبلك .. انا كنت نتمنى ترضى بيا ولو 1% بس هذا قدري ونصيبي .. انا يشهد الله اني معجبة بيك وبشخصيتك وخدمتك بقلبي وعيوني .. كنت نتمنى تكون زوجي فعليا ومايهمنيش فارق العمر يللي بينا لان مايشكلش آي عائق مع الحب .. سامحني حسام وربي يحفظك ويرزقك البنت الباهية معاش ادور عليا لاني ح نبعد من هنا  ومش ح تشوفني مرة تانية ياريت اطلقني وتبعد عن حياتي .. انا راجعة لأهلي واللي يصير يصير .. سلام ) .. طويت الورقة وحطيتها تحت الجّل تبعه .. ولبست وشاحي وكريت شنطتي وطلعت الى غير وجهة ..
,,,,,,,,,,,,,,,,,,,,,,,,,,,
حسام ::
بعد المرض المتعب واللي صار امس .. ارتحت شويا ونشطت قررت ناخد أمل ونغيرلها جوها ع البحر شويا .. ناديتها مرتين ماردتش .. خشيت لداري وانا نجفف في شعري بالمنشف ونغني ( انا مانويت نغدر ولا كنت نفكر .. غلطانة لكن بعد ندامة ) .. شفت شكلي في المرآية جري فيه الدم .. ضحكت بناخد الجل لقيت ورقة تحته فتحتها .. وهنا كانت المصيبة .. وين مشت هالبنت لوحت الورقة ع طول ايدي وطلعت نجري بشورت قصير وكت ابيض .. لبست شبشبي ونزلت نجري من العمارة حتى قابلني جارنا قال ( صباح الخير ) .. كيف بنطلع من العمارة وليتله ( عمي ناجي ماقابلاتكش بنت طالعة وانت ماشي للكوشة ؟؟ )
( ايه ايه مشت يمين )
من غير مايكمل النعتة طلعت نجري ع اليمين .. بين الطرقات اندور تي وين غابت هالهبلة ؟ .. اما حوش اهل بتمشيله ؟؟ .. بوها مات والخوت هجو من سيرتها !! .. والله لو شافها حد من الجيران لما يثبت عليها الدوة ..
وقفت قدامها بعد لقيتها في طريق رملية .. جثيت ع ركابي نحاول نلقط انفاسي من الجري ..
_ علاش لحقتني !!
بصعوبة تكلمت: هبلة انتي ؟؟ .. وين ماشية بالله عليك !!
_ لحوش أهلي .. انا معاش نبيك تتعذر لكل واحد ع زواجك مني .. برا ع حالك حسام
_ كلها محلولة لكن مش هكي .. روحي معاي
_ مانبيش .. طلقني توا خليني في حالي
حطيت ايديا في نصي وتنهدت : اسمعي انا مش مستعد نتحمل عناد المفرخ بتروحي يعني بتروحي
_ بس انا مانبيش نروح معاك .. نبي نمشي لبابا وخليه يذبحني
قلت بنفاذ صبر: بوك مات .. وين بتروحيله ؟؟ .. تسمعي فيا !! .. مااااات
انصدمت وقعدت تشبحلي من غير ولا ردة فعل .. وقفت الشنطة وقعدو عيونها معلقات فيا
_ روحي معاي تربحي أمل .. مش وقته اللي اديري فيه
فقدت توازنها لين وصلت للحيط سندها وقالت بصوت مبحوح: مات بسببي !!
واطيت عيوني مارديتش عليها ..
_ بابا معاش بنشوفه يعني !! .. بابا هذا ياحسام باااااباااااا
وقعدت تخبط ع صدري وتقول : كذاب كذاب .. تكذب عليا تبيني نروح معاك
,,,,,,,,,,,,,,,,,,,,,,,,,,,,
أمل ::
فتحت عيوني لقيت روحي في الشقة راجعة .. وانا في السرير وحسام معاي في نفس السرير .. شهقت وبعدت من عليه
_ شن جابني هنا !!
_ اهدي ياأمل اهدي
نزلت من السرير .. وهمت نفسي ان اللي صار حلم لولا الشنطة يللي لقيتها قدام باب الشقة .. رجعت للدار لقيته في نفس الوضعية .. قعمزت ع السرير وعطيته بظهري
_ حسام .. قوللي كذب يللي صار !!
قرب مني .. وقعمز جنبي : تقريبا ليه شهر متوفي .. مابيتش نقولك
_ علاش باه !! .. حرمتني من شوفته ؟
_ ادعيله بالرحمة توا .. معاد ينفع اللي اديري فيه !!
قعدو دموعي ينزلو بغزارة ع الساكت .. تنهدت وقلت: هالشي مايخلينيش نتراجع عن قراري اللي درته
_ كيف يعني !!
_ خليني نمشي للغابة ونعيش بين الحيوانات بلا وجهة ولا هدف .. ( ضحكت بهزوة ) زي ماوكلي يعني
_ ماوكلي قدر يتفاهم مع الحيوانات وعاش وسطهم زي ولدهم .. أما انتي تقدري تعيشي مع الحيوانات البشرية وتنهش لحمك وكل واحد يشوفك الفريسة المرجوة !!
رجعت راسي للخلف شويا وتمسكت شويا بحيث حسرتي ع بوي ماتطلعش صرخات .. خاطري يطلع كذب يللي صار ؟؟ .. بابا خلاني في وسط هالدوشة كلها ؟ .. من مازال بيوقف معاي ويساندني ؟؟ .. انا متأكدة انه مات بسببي .. مات من حسرته عليا .. واكيد ماما قالتله شي صار وشي ماصارش وزادت قهراته في عمره .. حسبي الله ونعم الوكيل .. يااارب خود حقي من كلاب الدم ..
حسيت بايد حسام لفت ع ظهري .. وصلت لكتفي .. تلفتله ابتسم وقاللي: انا متأكد انه راضي عليك
_ كيف عرفت ؟؟
_ انا نزبط .. ارتاحي ومعاش تفكري في شي
قربني لصدره .. تعمق راسي في حضنه .. وهالشي لامس دموعي وخلا شهقاتي تطلع .. بكيت في حضنه وكان يطبطب ع كتفي ويواسيني بلمساته ع شعري .. حسيت بالامان في حضنه .. حسيت بشي داخلي لامسني .. شعور عمري ماحسيته .. لفيت يديا ع ظهره وتعمقت بين ضلوعه .. بين دموعي كنت انقول ( ياريتني متت قبلك يابابا .. ياريتني متت ولا عشت هاليوم ) ..
,,,,,,,,,,,,,,,,,,,,,,,,,,,,,
حسام ::
طفلة وغدرت بيها الحياة .. في حضنها لامست كل شي برئي وطفولي .. داعبت العفوية بايديا ع شعرها .. رقدت ع صدري من كتر مابكت اليوم .. رجعت بجسمي للخلف وخليتها راقدة بارتياح ع صدري .. كانت كل شويا تشهق في نومها ودموعها ماوقفو من البكي .. وكنت كل مانباعدها من عليا باش انوض تتمسك في ايدي وتقوللي ( خليك جنبي بالله عليك ) .. كيف ماضحت بحياتها وروحها وكل شي فيها ليا وماكسرت كلامي ولا عمرها غدرت بيا للأن .. مستحيل نخذلها اليوم .. وفداها اليوم كله ليها .. فداها حسام الليلة معاها .. سهرت في مرضي .. تعبت لتعبي .. وعانت الظروف القاسية .. وعانت من عصبيتي وضرباتي هلبا .. خليتها ع صدري وتمنيت لو توقف الساعة والزمن وكل شي في هالدنيا ع هاللحظة .. كنت نمسد ع شعرها كل شوي .. كانت متمسكة فيا بايديها وهادي ثاني مرة تصير معاي .. المرة الاولة كانت خوف وهالمرة ؟؟ .. كانت حتى هيا خوف .. الشي اللي خايفة منه صار .. مات بوها واغلا البشر عليها .. خوف من هالدنيا من غير أب صعبة هلبا .. نتفكر لما توفى بوي كنت كبير وواعي ومستعد نواجه الدنيا كلها بقوتي .. كنت نعتقد اني قادر نعيشها حتى من غير بوي .. بس هيهآآآت .. بعد موتة بوي انكسر ظهري .. وكل الشجاعة فيا تلاشت .. وعشت ع تخايلات لبوي .. عشت ع صورته في ذاكرتي .. وع حروفه في وذاني وبس .. يابالك هي صغيرة وماشافت شي من الدنيا باش هيا توريها غياب الاب كيف شكله .. ربي يرحمهم يارب
فتحت عيونها .. وهمست : حسام .. كذبت عليا صح !!
ابتسمت وقلت: مانقدرش نكذب في حاجة زي هادي أمل
بعدت راسها من عليا وشبحتلي بعمق: بس انا محتاجاته توا يوقف معاي .. انا متاكدة ان الوحيد يللي ح يصدقني ياحسام
مسحت دموعها بكفي وقلتلها: خلاص أمل ماتصعبيهاش عليا بالله عليك
لمت شعرها فوق وسحبت روحها لأخر السرير : نبي نمووت انا نبي نموووت ياريتك خليتني نمشيلهم المرة الاولة ياريته قتلني ولا صار هذا كله .. ندمت ياحسام ندمت
وبدت تخبط ع وجهها وتعيط .. والدموع ينزلو بغزارة منها .. شديت ايديها وقلتلها: خلاص أمل خلاص
( آآآآآآآآه يااااربي آآآآآآه )
رجعت أغمى عليها من جديد .. نضت نجري جبتلها امية وعطر .. بخيتها بمية وشممتها العطر فاقت بيا .. وجهها تورم من كثر الضرب عليه والدموع
_ أمل ماديريش في روحك هكي .. لو تبيه يرضى عليك ادعيله ماتعذبيش روحك
_ خليني نبي نرتاح
_ اوكي براحتك
غطيتها .. وطلعت سكرت الباب عليها .. قعمزت في الصالون .. لاحظت أني ماشفتش تليفوني اليوم بكل .. خشيت لداري لقيته ملوّح ع الفراش .. خديته ورجعت للصالون .. لقيت مسج رحاب قاعد معلق .. فتحت عليه لقيتها فاتحة مازال .. كتبت المسج وكان من قلبي هالمرة وبجد مافيشي خذلان ..

#Dudu