#إبتليت_بك
:: 8 ::
ايييح عليك مسلسلات غبية .. معقولة الحياة مربوطة بشخص ؟؟ .. مانقدرش نعيش من غيرك !! .. مافيش انسان بالكيفية اهيا .. الاكسجين مش شخص لو انقطع نموتو .. حياتي قعدت خارج نطاق البشرية .. مليت من الوحدة نبي ماما وخواتي وبابا وخوتي يااارب استاحشتهم ..
( تتفرجي عليهم الباردين اهما قصدك ؟؟ )
تلفتله وابتسمت : لا والله بس كساد
جي قعمز جنبي وتكسل : تعرفي اسبوع كامل راحة مافيش .. نومة 4 ساعات ع السرير عوضتني
_ آآه ربي يعاونك .. انا درت بسبوسة تبي !!
ابتسملي وقال : شكلك فالحة في الكوجينا يابنت !!
_ انا الكبيرة وكل شي كان ع راسي
_ عندي أخت اكبر منك والله ماتعرف للكوجينا طريق ههههه
ابتسمت وقلتله: عندك خوات !!
_ عندي زوز حنان وحنين .. اصغر مني .. حنان متزوجة وحنين عانس ههههه
_ ربي يحفظهملك .. هما وين عايشين !! .. علاش مش معاك !!
_ عايشين في **** .. مش بعاد نمشيلهم كل فترة بحكم شغلي مانقدرش نقعد ديما غادي
_ انت الولد الوحيد !!
_ لا عندي خوي حازم متزوج وعنده بنوتة اسمها جنى .. فرخة ملسنة كان تشوفيها ماتعطيها عمرها
_ ربي يخليهملك .. حلوة لما تكون عندك عيلة .. انا لما نذكر أهلي نقعد نبكي
_ الله غالب .. نوعدك نحلو كل المشاكل وترجعيلهم
_ بس ياحسام انا مانبيش نرجعلهم لان سيبوني
تنهد ورجع راسه للخلف ع الكرسي وقال: كلنا عندنا مشاكل بس مع الصبر تنحل ماتخافيش
_ آمين .. ان شا الله خير وخلاص
حط ايده ع الشاربة وجبدها بالشويا لتحت وقاللي : أمل الجو سخون مافيش داعي للشاربة لانك حلالي .. اطمني مش ح نقربك بسوء تمام !!
ابتسمت ونحيتها حطيتها ع جنب وقلتله : ربي يحفظك ويرزقك ببنت الحلال يللي تسر قلبك وخاطرك
_ حطيلي بسبوسة وقهوتي نبيها صادة اوكي !!
,,,,,,,,,,,,,,,,,,,,,,,,
حسام ::
ناضت تجري للمطبخ زي الطفلة اللي فرحانة بلعبتها .. كسرت حاجز الخوف مني .. وبديت نتقربلها اكثر باش نبيها ترتاحلي وتحس بأمان الاهل اللي فقداته معاي ..
ومرت الأيام !!
أمل في الكوجينا تجهز في الغدا .. خشيتلها لقيتها لابسة بيجامة سروالها اسود وتيشرت أحمر كمها طويل .. فتحت الثلاجة وطلعت كولا نشرب فيها
_ شن درتي الغدا !!
_ أمممم درت طباهج ورز بالخلطة
_ ماشا الله هي حطيلي جعان .. وبعد العصر بنمشي لأمي نطمن عليها
_ حاضر
خليتها تجهز في الغدا وانا قعمزت ع الصالون نراجي فيها .. جت قربت مني الطاولة الصغيرة ورجعت للكوجينا وانا كنت لاهي في النشرة الاخبارية ع البلاد .. وحطت السفرة عليها وقالتلي( تفضل غداك )
_ ماتبيش تتغدي معاي !!
_ لالا صحتين .. انا شبعانة توا
حسيت بنفسيتها تعبانة شوي خليتها براحتها .. تغديت وكملت نضت بنغسل ايدي لقيتها ع اللافندينو .. تغسل في الاماعيين .. حسيت من ملامحها مضايقة وزعلانة .. حطيت ايديا جنبها بنغسلهم .. باعدت شويا وتحاول تبتسم .. حطيت ايدي اسفل فمها وقلتلها بصوت حنون شوي ( خيرها بنتي زعلانة ؟؟)
تفاجئت باللقطة وهزت راسها بعدت ايدي وقالتلي: مافي شي
شديتها من ايديها الزوز وقعمزتها ع كرسي المطبخ وقلتلها: قوليلي أمل شن في !!
ع طول نزلو دموعها .. حسيت بحرارتهم ع خدودها .. قعمزت ع ركابي قدامها .. كنت متألم لمنظرها الضعيف .. مسحتلها دموعها وابتسمت : قوليلي أمل شن مضايقك بس !!
_ انت .. انت ياحسام
استغربت وقلتلها: كيف انا !!
_ ماقدرتش تقعد شهر ع اماليك .. وانا قريب نسكر سنة ماشفت حد منهم .. انا والله بنموووت شوق ليهم .. تعبت ياحسام وانا نشوف فيك كيف تهدرز ع خواتك وامك كأني مقطوعة من شجرة .. خايفة كل مانزيد نبعد كل مايكرهوني ياحسام
وجعني موقفها .. رغم هذا ابتسمت وقلتلها: حقك عليا معاش نحكي عليهم تمام !!
_ مش هكي قصدي .. انا قصدي قاعدة تقول شغالة عندك ماعنديش أهل يسألو عليا ولا ....
ماكملتش كلامها بوستها ع جبينها ووقفت .. انصدمت للقطة وسكتت طول
_ ح ندير جهدي ونجيبلك امك شن رايك !!
_ تجيبلي ماما !! .. بجديات حسام !!
ابتسمت لفرحتها وقلت : بس توعديني معاش تبكي وتجيبي السيرة هادي بكل .. لاني حاسبك بنت ناس وعيلة ولما ندويلك ع اهلي مش معنى هدا انك ناقصة .. بالعكس انا نحكي عادي
وقفت وقعدت تنقز قدامي وشعرها الاسود يطير وقالتلي: امتى باه امتى !!
_ لا عاد مش مارد السحري انا تبيلها وقت
رجعت لكآبتها وقالت: شكرا حسام شكرا حتى لو حاولت وماقدرتش
نقزت في حضني .. ابتسمت ع عفويتها .. ودرت دورة ع روحي وطلعت للعمل توكتي اليوم .. كنت مقعمز في المقر نفكر كيف نجيبلها امها ؟ .. عماد لازم يساعدني ..
_ ساهلة نخطفو امها
_ حمار انت ؟؟ .. كيف بنخطفها بلا تسهويك نتكلم بجد
_ ساهلة والله ساهلة .. خليه الموضوع عليا امهلني الوقت الكافي هههههه
_ لا ياوقت انت .. نبيها في اسرع وقت البنت بتمووووت من الوحشة
_ باهي قطعتنا بيها
,,,,,,,,,,,,,,,,,,,,,,,,,,,,,,,,,,,,,,,,,
أمل ::
بعد يومين جاني الخبر اليقين .. قصدي انفتح الباب وكان حسام وجايب معاه أغلى ماعندي .. أغلى شي في حياتي .. جايب معاه ماما .. كنت لابسة سروال جينز واسع سماوي ومعاه بلوزة بيضا عليها فصوص في الرقبة كان كمها طويل .. كان مغطيلها عيونها واول مانحالها القماشة قال ( سامحيني خالتي ضروري من الامان )
لما فتحت عيونها شافتني .. نقزت طول لحضنها وبكيت لين دهشت ع كتفها .. بس كان حضنها بارد .. ومادارتش اي ردة فعل .. طلع حسام وسكر الباب وراه .. كانت دموعي مستمرة وهي عيونها فيا بلا ردة فعل تانية .. مسحت دموعي بكمي وقلتلها ( ماما هادي انا أمل )
ردة فعلها المرة هادي كان كف قوي ع خدي لين طحت لوطة .. وشدتني من شعري وقعدت تضرب فيا من غير ولا كلمة .. وانا قعدت نبكي ونهدي فيها بس مافيش فايدة .. ماخلتلي مكان الا وضربتني عليه بكندرتها .. وبايديها ريشتلي شعري .. وبعد ماتعبت من ضربي طاحت ع الارض وقعدت تبكي .. زحفت ووصلت ليها وقلتلها ( والله مظلومة ياماما )
دفتني من عليها وقالت: شن نقصت عليك انا يابنتي .. ياكبدي انتي .. تهربي مني علاااااش !! .. تهربي مع واحد ماتعرفي قرعة بوه منين ؟؟ .. لو جي خطبك من قال احني بنرفضوه !!
هزيت راسي نافية والعبرة خانقتني : لا والله لا .. مش هكي الموضوع .. هدا مش اللي خاطفني هدا حسام .. الضابط يللي ساعدني
ضربتني كف المرة العاشرة وقالتلي: ساعدك ؟؟.. يابهيمة لو تقوليله ترضاها لاختك يقولك مستحيل .. عارفك وحدة رخيصة هربتي معاه وخليتي سمعتنا تتبهدل بين الناس .. ربي ياخدك .. ربي ياخدك
_ اسمعيني ياماما والله ماهكي الموضوع .. انا لما مشيت بكري خطفوني كلاب الباقيرا
_ انا مش هكي تربيتي لا والله ماهكي ربيتك .. علاش قهرتيني وكسرتي ظهري انا وبوك علااااش !!
_ وحق ربي .. والله الله ياماما انا مظلومة .. خطفوني الكلاب والله خطفوني
_ انتي حامل !!
سكتت بعد هالسؤال وواطيت عيوني .. شدتني من شعري وعيطت في وجهي : قولي انتي حااااامل !!
هزيت راسي نافية .. وقفت وشدتني من شعري وقعدت تضرب فيا وانا نعيط ..
_ انتي لازم تمووووتي ياحيوانة .. حسبي الله ونعم الوكيل فيك
بعد هدت شويا طبستلي وانا نبكي وقالتلي: لو تكدبي عليا وطلعتي حامل اعرفي ان ولدك ولد حرااام ياوسخة .. ماتوقعتكش هكي ياامل عمري ماتوقعتك هكي
لميت رجليا وقعدت نبكي ونقوللها: والله انا مظلومة .. وانا عمري ماطلعت من شوركم .. حتي حسام بعد تبريتو مني تزوجني .. وبابا هوا اللي وافق ع الزواج
قعمزت ماما داهشة ع الصالون وقالتلي: قعدت شهور انا ع الفراش خايفة عليك قريب موتت في الاخير تطلعي هاربة ؟؟ .. علاش شن درنالك انا وبوك وخوتك !! .. خوك احمد قريب هبل في جرايرك وهوا يدور من مكان لمكان .. انتي تستاهلي الموت .. قلبي وربي مش راضيين عليك ياامل .. حسبي الله ونعم الوكيل فيك .. والله لو لقوك خوتك وقتلوك ماني مدافعة عليك
شربت كاس امية كان قريب منها دفعة وحدة .. وناضت فتحت الباب وطلعت ..
طحت ع الارض واغمى عليا .. معاش حسيت بشي .. الا اني في المصحة وجنبي الدكتورة ( مروة ) نفسها اللي كشفت عليا المرة الاولة .. فتحت عيوني وقلتلها ( انا وين !! )
_ حبيبتي أمل .. عندي ليك خبر مش حلو
_ قولي يادكتورة
ساعدتني وقعمزت ع السرير .. تلفتت وراها ولقت حسام مش في الغرفة قالتلي : انتي أجهضتي
_ مافهمتش !!
_ يعني طيحتي الولد اللي في بطنك
( خلونا نرجعو لهداك اليوم في المصحة )
_ وين زوجك ؟؟
_ طلع .. تو يجي في شي دكتورة ؟؟
بكل آسى قالتلي: انتي جسمك متورم هلبا وباين عليك تتعاملي بوحشية .. وحملك ضعيف ع ابسط ضربة ممكن يطيح العيل
_ انا حامل قصدك !!
_ ايه حامل وفي شهرك الثاني ماحسيتيش بروحك !!
_ انا يادكتورة والله مانعرف كيف الحمل اصلا !!
_ ياروحي عليك قاعدة صغيرة
شرحتلي الدكتورة ع الحمل واعراضه وهلبا حاجات كنت نجهلها
_ باهي ماتقوليش لزوجي اوكي !!
_ علاش !!
_ لاني نخاف يضربني .. قوليلي كيف نطيحه !!
_ يضربك ؟؟ .. قوليلي نرفع فيه قضية
_ لالا مانبيش .. بالله عليك ساعديني قوليلي كيف نطيحه !!
_ صعب ياحبيبتي .. لو طيحتي احتمال تعقمي مرة وحدة انتي جسمك صغير وكيف بادي يتكوّن
_ بس انا مانبيشي العيل مانبيشي
_ خلاص .. ح نوصفلك حبوب بس زي ماقلتلك راهم خطيرات عليك واحتمال تعقمي
هالدوة صارت بعد اسبوع من زواجي .. وحملي خاش في الشهرين معناها الولد اللي في بطني مش شرعي .. بس كان يومها حسام متعصب وماخداليش الحبوب من الصيدلية !!
( نرجعو لوقتنا توا )
ساويت جلستي وشبحت لبطني وابتسمت ( الحمد لله ياربي الحمد لله )
ابتسمت الدكتورة وقالتلي: اللي صارلك نتيجة ضربة قوية كانت ع بطنك .. بس الحمد لله ان العيل ماكانش فيه روح اصلا
_ دكتورة خللي هالموضوع بينا
_ انا والله راكبني الفضول نعرف شن صاير معاك بس !! .. من ضاربك لين مخليلك وجهك ازرق وجسمك متجرح !!
_ ادعيلي تفرج من عند ربي وبس .. وين حسام !!
ابتسمت وقالتلي: يراجي فيك البرا .. كان خايف عليك هلبا .. مش نفس هديك المرة
_ ايه كويس معاي
_ خلاص حبيبتي ح نعطيك علاج واستمري عليه تمام !!
طلعت من عند الدكتورة وكنت تعبانة .. رقدت ع باب السيارة .. فتحت عيني لقيت روحي ع البحر .. تلفتت يساري مالقيتش حسام معاي في السيارة ؟؟ .. ناديت بصوت ضعيف لاني مش متحملة نعلي صوتي اكثر ..
( حسام .. حسام )
لقيته كيف طالع من البحر .. لابس شورت قصير ويمسح في وجهه من المية .. فتح باب السيارة وابتسملي ( انزلي تفرجي البحر هادي ومليح )
ابتسمت ونزلت .. كانت مشياتي ضعيفة ومش قادرة نسرع في خطواتي .. وصلت ع البحر شبحتله
_ شن خطر عليك تجي هنا !!
_ الدكتورة قالتلي نفسيتها تعبانة مرتك خطر في بالي البحر .. يهوّن شوي عليك يابنتي
_ علاش تقوللي بنتي !! ( شبحتله ابتسم )
_ مانبيش نحط في بالي شي تاني
تنهدت ولميت ايديا ع صدري وقلتله : واللي انا فعلا بنتها ضربتني وكذبتني
_ كنت عارف هكي بيصير انتي سكرتي راسك
_ خايفة تقول لخوتي ع اللي صار
_ مش ح تقول نبهتها ماتخافيش
_ وكان عرفت المكان !!
_ مش ح تقدر تعرفه اطمني
قعمزت ع الشط .. حطيت ايديا ع الرمل وبديت نلعب بيه .. قعمز جنبي
_ تعرف تعوم !!
_ اكيد هههه .. وانتي ؟
_ لالا .. مانمشوش هلبا للبحر احني
_ علاش ؟؟
_ لان انا واختي حلوات هههههه
_ هههههه من الأحلى انتي والا اختك !!
_ انا طبعا
تلفتلي بصدمة : هادي الأحلى وهكي امالا الشينة كيف !!
ضربته ع كتفه بالخفيف: قصدك انا شينة ؟!
ضحك : مش هلبا
شديت راسي من الوجع : راسي يوجع فيا حسام !
_ نوضي نروحو
نضنا روحنا .. دخلني لداري وقاللي ( خلاص ارتاحي انا طالع مشوار وراجع تمام ! )
_ تمام
وكيف بيطلع من الدار نبهته بصوتي ( حسام )
تلفتلي وابتسم: نعم !!
_ رد بالك ع روحك <3
انفتحو عيونه فيا .. وارتبك شوي وقال ( ان شا الله ) .. وطلع
,,,,,,,,,,,,,,,,,,,,,,,,,,
حسام ::
كانت كلمتها كفيلة ان تخلي باقي يومي سعيد ومرتاح نفسيا .. مشيت لأمي اطمنت عليهم وع قد ماشدت فيا أمي نبات كنت رافض الفكرة لأن أمل بروحها
_ باهي ارفعني بنزور خالتك غدوا !
ارتبكت لما سمعت باسم خالتي .. تلفتت لحنين لقيتها تراجي في الرد وقالت: ايه بالله عليك استاحشت فطومة وفاتن
#Dudu
أنت تقرأ
إبتليت بك
Actionرواية تحكي ع معاناة فتاة ضحية حرب لا ذنب لها فيها .. تجردت من كامل انوثتها حتى امتدت اليد المنقذة لها استرجعت ماستطاعت استرجاعه .. ستواجه المصاعب لتعود كما كانت ولكن .. هيهآآت للكاتبة سندس محمد التاريخ 13/8/2018
