إبتليت بك

Part 10

#إبتليت_بك

:: 10 ::

باستني ع خدي لين رعش جسمي كله منها وفنصت فيها .. ضحكت بعفوية وقالتلي: عادي البنية تبوس بوها مش حرام هههههه
خدت السفرة وطلعت .. ضحكت ع عفويتها .. تنهدت واذكرتي همومي لين خذاني النوم ..
بعد كملت صلاة العصر .. طلعت من الدار للصالون لقيتها فاتحة التلفزيون ع برنامج رقص زومبا تقريبا ومنسجمة معاهم .. جيت نجري نقزت فوق الصالون وعيطت ( فار .. فار )
_ واااااااك .. وينه وينه !!
نقزت فوق الصالون وقعدت تعيط .. من الضحك لين طحت ع الارضية ودموعي في عيوني .. نزلتلي تجري ضربتي ع كتفي وتقولي ( بارد ره )
_ منظرك يضحك هههههه
_ علاش هكي رعشتني !!
قعمزت ع الصالون وشادة قلبها : انت مش كنت راقد ؟؟ .. شن نوضك رعشتني !
_ تو انتي من عقلك راجل يخاف من الفيران .. ولا مش هكي وبس ضابط زيادة ههههه
_ اييح بنلحق نفكر فيه هذا كله انا ؟؟ .. معاش مشيت لأمك !!
_ بنمشيلها توا غير قلت نغير جوي بيك هههههه
_ لعبة انا !!
ضحكت ع جنب وغمزتلها : وأحلى لعبة
وجهها ولا أحمر وواطت راسها .. جيت قمتها بصبعي من فكها وقلت: مانغازلش فيك ره ياجولييت ههههه
نحتلي ايدي وضحكت : نعرف تتسهوك عليا .. حسام !!
مسحت ع وجهي بكفي وقلتلها: عيونه
_ نبي نطلع .. نبي نشم هواء نظيف
_ ايه حااااضر .. غير نكمل القضايا كلها ونطلعك وترتاحي من هالحوش بكل
لبست السبيدرو ولوحتلها بايدي بمعنى سلام .. وطلعت سكرت وراي الباب ماعنديش القدرة نشوف ملامح وجهها بعد كلامي الجارح .. بس غصبا عني هذا مانبيهاش تتعلق بشي مستحيل .. وتجري ورا المجهول ..
,,,,,,,,,,,,,,,,,,,,
أمل ::
بعد ماقال كلامه دمعت عيوني .. اللي انا فيه مسألة تعود عليه مش أكثر انا متاكدة أن هذا مش حب .. نضت نجري لروشن الدار لقيته واقف تحت العمارة ومتكي ع سيارته .. آآآه شن كان صار لو كنا زوجان برضانا ورضا أهلنا علينا !! .. ايييه انا وين وهالشي وين ؟؟ .. معقولة يصير مني نكون زوجته فعليا !! .. لا نحس فيها بعيدة .. ضربت وجهي بالخفيف وهمست لروحي ( راك تنسي روحك ياأمل انتي شنو !! .. مستحيل يرضى بيك )
بعد كملت حوسة العشاء لان اليوم ماعنداش عمل .. قعدت نلف في الشقة ونتعرف عليها من أول وجديد وقررت نرتب كل شي فيها .. من اكبر شي الي اتفه شي .. وصلت لدولابه الخاص فتحته ولقيت شي رجعني للماضي .. نتفرج وانا في قلبي ستين غصة وغصة ..
,,,,,,,,,,,,,,,,,,,,,
حسام ::
_ بتقول اللي قلنالك عليه حرف زايد ح يودرك واعرف ان حياتك بينك وبينها أقل من سنتيمتر
هز راسه وكله رعب .. خدي تليفونه واتصل بالملقب بالراس .. وراجينا ثواني بين مارد .. كان البلجيكي ع راسه ..
_ آلو .. مية مية .. انا جايك بموضوع .. ايه ايه يخص قروبنا .. نبيك تجيني في *** .. ياراجل الموضوع فيه فلوس وتهريبات .. اطمن بيني وبينك .. مش ح يسمع صدقني .. ههههه انا الاول متضرر منها الصفقة اهيا لو سمع بيها الباقيرا .. خلاص مية مية .. تم ياراس تشاو
تنهد بعد هالمكالمة الطويلة .. خدي عماد منه التليفون وشبحلي وابتسم ابتسامة نصر ( هانت قريب نوصلو ) .. رديت عليه بابتسامة .. طلعت انا وياه وسكرنا باب الدار بالقفل وخلينا عليها الحرس ..
_ اعطوه ماياكل بس ردو بالك منه لانه خطير تمام !!
( تمام آفندي )
خشيت للمكتب ووراي عماد ..
_ كيف نديرو نسكرو تليفونه توا !!
شبحتله وولعت دخاني : لا خليه مرات لو تسكر ح يشك
_ آآآخ لو نحصل عليه الراس اهوا بس .. لما نوريه فيديوات الفتنة يللي ينزل فيهم كيف شكلهم ؟
_ بالشويا بالشويا ح نوصله الباقيرا .. والله لما نشبع فيه ضرب وحق بوي وبلادي لما ناخده منه
_ ربي يرحمه الآفندي صلاح كان قمة في الوطنية ( خدي مني سيجارة وولعها وكمل ) أمتى مروح ؟؟
_ شويا تانية .. اليوم ماعنديش توكة
_ تمام انا بنوض نروح .. عازمني نسيبي ع العشي هههههه
_ ايييح كبيرة صار .. بالك عازمني تأكد منه ههههه
_ قلتلك انا خود اختها .. شهادة لله ناس أصول ويقيمو القدر
_ كم عمرها ؟؟
_ تقريبا 19 السنة
شبحتله مستغرب : شن فرقت ع أمل بالله عليك !!
_ في فرق .. هادي حتى لابسة النقاب وبنت الله يبارك
_ قنينة ؟؟!
_ نقولك لابسة نقاب وين بنشوفها انا !!
ضحكت وطفيت دخاني : ربي يحفظها وكان فيها النصيب تو ربي يجيبه
_ انت أنسالنا هالرحاب اللي واكلة دماغك ومني انا العروسة
ضحكت بصوت العالي .. وقفت نحيت طاقيتي وقعمزت مقابله ع الكرسي : صعب ياصاحبي .. انت ماجربتش هذا علاش !!
_ هوا صح صعب .. لكن مع الارادة كل شي يتسهل
_ والله جربت .. لتوا كل مانسمع اسمها نحس اللي صار كأنه أمس .. ممكن في أي لحظة ترجعلي .. مش سنة والا تنين ياصاحبي .. عشرة عمر
_ بس توا ليها سنين بعيدة عليك وممكن عندها صغار بيخشو للمدرسة
واطيت راسي .. وحسيت بطعنة في قلبي .. تنهدت .. طبطب ع كتفي وكمل كلامه
_ الدنيا ماتوقف ع حد .. وانت قريب تخش لمرحلة العنوسة لو قعدت هكي ههههههه
_ والعشرة ماتهون الا ع ولد الكلب
_ هادي في حالة هيا قاعدة جنبك وماتزوجتش .. لكن هيا تزوجت ياحسااام .. اعتبرها ماتت ياسيدي هي
حطيت ايدي ع راسي وحكيت جبهتي بتعصب وقلت في نفسي ( بعيد السو عليها )
_ والله عمري ماريت واحد مكبد زيك ههههه
_ يلا المهم خليني نفرح بيك انت الاول وبعدين انا تزوجت قبلك اصلا ههههه
_ تزوجت جهامة وبس .. قلبك يهيج في دبي
_ ههههههه نوض روح
_ تمام .. نتلاقو يامعلم
ولعت سيجارة من جديد .. رجعت بيا الذاكرة لسنين الخلف ..
( كنت نكلم فيها الساعة 2:00 في الليل .. تحت حوشهم وقتها كنت في مرحلة ضعف قوية .. وفي غير وعيي .. كلمتها وكان صوتي واضح مش طبيعي
_ ياحسام مانقدرش خيرك انت !!
_ نبيييك انا .. افهميني انا نحبك مانقدرش نعيش من غيرك .. انزليلي رحاب
_ كيف تبيني ننزلك بوي وخوتي اهنا !!
_ انزلي واهربي معاي .. نمشي بيك بعييد والله مايقدر يوصل فيك واحد حتي بوك
_ حسام .. خلاص ليا 3 شهور مخطوبة موضوعنا تم
_ لانك كلبة وتبي الفلوس .. عمرك ماحبتيني تجري ورا الدنيا .. تعرفي لو ماتنزليش انا نركبلك ونجيبك من شعرك ونهرب بيك الله
_ حسااام بالله عليك خلاص .. انا عرسي قريب مانقدرش والله مانقدر .. روّح حسام روّح
_ مانييش مروّح لين تجيني .. خيرك انتي ؟؟ .. تخليني نحبك هكي وبعدين تبيعيني ع خاطر ورق !!
_ مابعتكش والله مانبيعك انت .. هادي الدنيا وهدا نصيبنا فيها
سكرت عليها الخط ولوحت التليفون .. تكيت راسي ع الستيرسو وبديت نبكي .. من قال الراجل مايبكيش ؟؟ ))
_ ياآفندي !!
فتحت عيني يللي كانت معبية دموع : آها
_ تقدر تروّح ترتاح .. باين عليك تعبان !!
_ ايه ايه .. بالله هنيني عليه هالكلب
_ اطمن كل شي ح يكون تمام
_ منور ياولد عمي .. سلام
نضت روحت للشقة .. فتحت الباب وكنت مضايق هلبا وتعبان .. ناديت أمل ماسمعتش صوت .. عليت صوتي شوي قالتلي ( انا هنا تعالا في دارك )
خشيت لداري لقيتها طارحة صور قديمة ومقعمزة بينهم .. ابتسمتلي وقالت بصوت هادي ( الحمد لله ع سلامتك ابن عمي ) .. طبعا بلحن شامي .. ضحكت
_ قلتلك معاش تتفرجي ع الوهم انا ولاه !!
_ غير تعالا شوف معاي صورك وانت صغيرون
دفيت شوية صور برجلي وقعمزت مقابلها .. مدتلي صورة وقالتلي : مني هدا !!
ضحكت ع الصورة وقلتلها: هذا الآفندي حسام هههههه
شدت الصورة وقعدت مركزة فيها وقالتلي: محلاك
_ أما أحلا توا والا قبل !!
_ آممممم ( حطت الصورة ع جنب وابتسمت بخجل .. خدت صورة تانية ) وهذا مني !!
_ هذا بوي الله يرحمه .. وهذا جدي الله يرحمه ( شديت صورة جماعية لعيلتنا كلها وبديت نأشر بصبعي ) وهادي حنان .. وهادي حنين المشفشفة وقتها كان عمرها سنة تقريبا .. وهذا حازم وأمي .. شوفيني انا كيف كنت أنيق ههههه !!
ضحكت وقالتلي : ايه محلاه شعرك كيف ملوي
_ هذا علاش مانطولش فيه نا هههههه
شديت صورة ليا انا في مصر وقلتلها: هادي أخر سفرة مع بوي الله يرحمه
شدت الصورة وقالت: انت تشبه لبوك هلبا .. عكس حازم لأمه
_ ديما هكي يقولو .. ونتمنى نطلع زي بوي في كل شي
_ قدوتك يعني !!
_ في كل شي والله
ثنيت ركابي لصدري واتكيت ع الحيط وتابعت كلامي : كل مانذكر كلامه وقت خشيت للعسكرية نتوجع .. بس نحمد ربي أني كنت السند ليه لأخر لحظة في حياته .. ديما يقوللي المفروض سميتك صلاح الدين بعد ماتحرر ليبيا حرر فلسطين هههه .. قداش كنت فرحان بيه كلامه .. بعد بوي ضعفت هلبا .. تشوفي في جسمي من حسرتي ع بوي .. عاهدت نفسي مانرجع حسام الاول لين ناخد بثاره
شبحتلي أمل بتألم وقالت: الله يرحمه ويجعل مثواه الجنة
مسحت دمعة هربت مني ع خدي .. وربعت رجليا .. شديت صورة ليه لابس العسكري وشاد سلاحه بصرامة وقلتلها: هادي أغلا صورة عندي
خدتها مني وابتسمت : اصلا حلوة الصورة هادي
لقيتها مربعة رجليها وكانت لابسة سروال قطني ازرق ومعاه تيشرت نص كم ابيض وعليه فيوكة وردية .. ركزت في عيونها لقيتها تلمع في كل صورة تقيمها .. تكيت راسي ع رجليها .. حسيتها ارتبكت
_ انا تعبان ياأمل .. والله تعبان
حطت ايديها ع شعري وقعدت تمسح عليه : سلامتك من التعب .. شن يوجع فيك !!
_ قلبي <3
_ ربي مايجيبله وجع ان شا الله .. هات نقرالك عليه
_ تعرفي تقري عليه زي أمي !!
_ هههههه انا كنت الشيخة في حوشنا
_ اوكي .. ( خديت ايدها حطيتها ع قلبي ) اقري وريحيني من الوجع بالله عليك
قعدت تقرا عليه في آيات الشفاء .. كنت متخدر كليا من التعب .. بعد كملت حطت ايدها ع شعري وهمستلي ( انت بطل حسام ربي ح يجزيك الخير )
ابتسمت وغمضت عيوني .. خداني النوم ع رجليها ..
,,,,,,,,,,,,,,,,,,,,,,,,,,,,,,,,,,,,,
أمل ::
ارتحت لما ارتاحلي وحكالي اللي يوجع فيه .. قعدت نمسح ع شعره لين خداه النوم .. ركزت في ملامحه اكثر كان قريب مني .. قريب لقلبي وكل حواسي .. شكلني حبيته !! .. لا مستحيل نتوهم ع قولته .. شن فيها ياربي لو كان هذا بوصغاري ؟؟ .. تنهدت .. وكملت متابعتي للصور .. في كل صورة كانت ذكرى .. شويا نضحك .. شويا نتأثر لصور بوه بالعسكري .. لعند ماكملت شوفت لوجهه لقيت في دمعة حاصلة في رموشه .. بصبعي السبابة مسحتها .. ماعاش اللي يبكي حسامتي <3 .. بس حسام في قلبه بنت .. زعما نساها !! .. والا مخطط يتزوجها ؟؟ .. وقت قال عند راجلها حسيته يكذب عليا باش مانخططش بالشر ليها .. رن تليفونه فتح عيونه .. طلعه من جيبه وقال ( لا مش اليوم خليها غدوا .. والله تعبان وبنرتاح شويا .. مية مية سلام ) .. رد تليفونه في جيبه هذا كله مازال ع نفس وضعيته .. بعد حط ثقل راسه ع رجلي قال ( تعبتي !! )
_ لا ارتاح عادي
لفت راسه ليا وقال: رجلك صغيرة ماترفعش راسي كله ههههه
_ هههههه الله غالب عاد
ابتسم .. بعدين همس ( من قال نتزوج وحدة صغيرونة بالله ؟ )
_ علاش انت كم عمرك !!
_ انتي كم تتوقعي !!
_ نحس فيك بداية الثلاثينات !!
_ هههههه 28 سنة
_ كبيير !!
_ قولي ماشا الله تاخديني بعين نموت ههههه
_ لا ربي يحفظك ويطول عمرك
_ في شي ناقص للحوش او ليك انتي !!
_ وجودك بس
تلاشت ابتسامته .. وناض قعمز وشبحلي .. ارتبك وحك جبهته .. انا ضحكت
_ شكلك مش متعود حد يعاكسك
ضحك وقال: ناقص حنان ههههه .. لو ناقصك شي اكتبيهولي في ورقة نجيبهولك تمام !!
_ زي شنو مثلا !!
قلت كلمتي وشديت صورة .. لما رميت عيوني ليه لقيته سارح فيا .. تقريبا نسي ع شنو نتكلمو اصلا .. دخل ايده في شعره وقال : شكلني نبي حلاقة .. طول شعري ولاه !!
_ ايه .. مش حلو هكي .. حق نبيك تجيب مقص معاك
شبحلي مستغرب : علاش !!
_ نبي نقص شعري  ( حطيت الصورة ع جنب وكملت ) تعبت من مشطه وغسله .. زي ماتشوف مليان وطويل
فنص فيا .. وشد ضفرتي وقال: انا مانحبش بنت مجدعة .. خليه هكي نحبه
_ تحب الشعر والا صاحبته !!
ضحك ع جنب وغمزلي : شني متأثرة هلبا بالاتراك .. شوفي ياعيوني انا قلتلك كلامي ومش ح نتراجع .. الحب بينا مستحيل يولد .. انتي صغيرونة توا وماتعرفيش حجم كلامك بس تكبري تو تغيري رايك .. خودي ورقة واكتبيلي فيها الناقص تمام !!
ناض من جنبي .. لوحت ضفرتي ورا ظهري وزعلت .. نبيه يقعد يهدرز عليا مليت من الوحدة .. بس الباين خططي فاشلات زيني .. محبوسة والحبس ظالمني  ..
,,,,,,,,,,,,,,,,,,,,,,,,,,,,,,,,
حسام ::
مقعمز في السيارة وفي ايدي اللاسلكي .. وتكلمت ( خلو عيونكم عشرة ع عشرة .. شباب )
كنت نراقب في الشاب اللي شديناه مع الباقيرا والشباب محاوطين الجيهة بطريقة سرية .. لعند ماقرب منه الراس وقعدو يتشاورو بين بعض .. الخطة مدروسة بعناية وان شا الله تزبط معانا القبضة ..
( سلم سلاحك انت وياه )

#Dudu