العصر بيت ابو ماجد|
جالسين يتقهوون ومروقين
لين بصوت عالي وشبه صراخ: يمااااااا
ام ماجد بعصبيه من صراخها: وصمااااا ليه تصارخين
ابو ماجد: خير تدعين على البنت
ام ماجد بعصبيه: ماتسمع صراخها فجرت اذني
ابو ماجد: ولو ماتدعين عليها
نط ماجد: يبا بعد مايصير لين تصارخ
ابو ماجد: انت انطم مالك دخل ولد امه
طالع ماجد ب امه واشر لها بمعنى معليك طنشي، وابتسمت ام ماجد لانو ولدها معها،بنفس الوقت لفت سديم على ماجد غمزت له ونطقت: ترا ادري تصلح العلاقه مو غلا
ظحك ماجد: لا تفهميني صح هههههه
سديم: ادري بك حيوان
ماجد: اقول عاد احترمي نفسك هاذي امي ادافع عنها مو عشان شي
سديم: طيب ياولد امك الحين راضيه عنك افتح الموضوع
ماجد: توقعين توافق؟
سديم: احس اي لانها مروقه يلا فرصتك ياوحش
تبسم ماجد وطالع ب امه وابوه وطالع ب لين الي ولا همها وعلى جوالها
تنحنح ماجد: يما يبا ابيكم بموضوع
ابو ماجد: وشي
ماجد بعجله: ابي اعرس
فرحو كلهم وام ماجد زغرطت من الفرحه
ام ماجد: اجل بكره نروح ونخطب بنت خالتك هيا
ماجد: لا لا لا فيه بنت ببالي
نطقو كلهم بفضول:من
ماجد بتردد: بنت عمتي منيره
ام ماجد: خيررر تبي تتزوج هالعانس
لين: يما بنت عمتي مو عانس
ام ماجد: انطمي انتي اسمعني يا ماجد هالزواج ماراح يتم لو على جثتي تسمع و..
قاطعها ابو ماجد: وانتي وش دخلك من الي بيعرس انتي ولا هو اسكتي بس
ماجد: يما هاذي حياتي لا توقفين بوجهي تكفين وبعدين ماقلت ابي ريم انا ابي حنين
لين: عاد حنون تجننن اهنيك على اختيارك
سديم: يما حرام عليك الولد يبيها ليه توقفين بوجهه هاذي حياته هو بيعيشها مع الي يبيها ويرتاح لها
ام ماجد: عادي يختار الي يبي بس بنات عمتك لا يعني لا واذا فكرت مرا ثانيه بس تفكير والله لا اغضب عليك ليوم الدين
ماجد: يما تكفينننن
ابو ماجد: ماعليك انت تبيها من بكره اروح اخطبها لك ولا ترد عليها
ام ماجد: اي روح اخطبها ما راح امسكك بس تذكر اني غضبانه عليك
قام ماجد بنرفزه : يالله
ولحقته سديم ، لف ابو ماجد على ام ماجد: ارتحتي الحين؟ بس والله بزوجه حنين لو هو رافض عشانك، وش ضارينك اهلي فيه عشان كل هالكره عاجبك كسرتي بخاطره
قامت ام ماجد: والله عاد ولدي وكيفي ازوجه الي ابي
______________________________
العصر عند جود|
تسوي القهوه وهي تفكر بكلام سعود وسرحانه قطع تفكيرها صراخ ام سالم
وهي تنادي وتبكي،فزت من مكانها تركض تشوف ايش صاير دخلت المجلس حصلت ابو سالم طايح على الارض وام سالم ماسكه راسه وتبكي
جود بخوف: ايش ايش فيهه
ام سالم ببكي: مدري مدري طاح فجأة اركضي اتصلي على سعود بسرعه
راح تركض وتدور ب المكان ادور الجوال بعجله حصلته
جود: وش مسميته
ام سالم: وجه السعد اعجليييييييي
اخذت تدور بين الارقام ويدها ترجف حصلته لاكن جا في بالها كلامه عنها وتراجعت واتصلت على الاسعاف
ام سالم: ليه ما اتصلتي على سعود
جود: الاسعاف اسرع واحسن
ماهي الا نص ساعه وجات الاسعاف اخذت ابو سالم وركبت معها ام سالم
لاكن قبل يمشون تذكرت انو جود البنت الوحيده ب المحطه وكلها عماله وخافت عليها نزلت بسرعه تاخذها وقفها صوت الممرض: مايصلح ياخاله بس شخص واحد
ام سالم: هاذي بنت الوحيده مستحيل اخليها هنا لحالها اخاف عليها
الممرض:بس....
قاطع كلامه الممرضه الي معها وهي تأشر له بعادي وراحت جود معهم
وصلو المستشفى ونزلو ابو سالم بسريره وهم يركضون وام سالم تبكي وراه
جود ماسكتها وتهديها، دخلو ابو سالم ب غرفه وانتظرو ب الممر، لفت ام سالم على جود: جود اتصلي على سعود
فتحت جود الجوال واتصلت على رقم سعود واعطت الجوال لام سالم ثواني وصلها صوته: ارحب
ام سالم: البقى
ابتسم سعود يوم عرف انها ام سالم: هلا والله خاله شلونش اخبارش
ام سالم: والله ياسعود اخباري زين بس ابو سالم...
وقف سعود سيارته: وش به
ام سالم: ياسعود حنا ب المستشفى**** ابو سالم طاح علينا فجأة
سعود: جاي جاي الحين
____________________________
لف على سحر ونطق: مقدر الحين اوديش مرا ثانيه ان شاء الله
سحربنرفزه: وهالمرا تجي ب السنه مرا وبعدين من الي اتصلت عليك وحنا متفقين نروح نأثث الغرفه
سعود بحده: صوتش لا يرتفع
سحر: منهي طيب
سعود:خالتي
سحر :منهي خالتك
صرخ سعود من اسألتها الكثيره:خلاصصص مو شغلش كلي تراببب كيفي اكلمممم اليييي ابي يلااا انزلييي
نزلت سحر ودموعها مغرقه عيونها من اسلوب سعود الي يصير ولد خالتها وخطيبها بنفس الوقت، من نزلت حرك مسرع للمستشفى وصل ونزل مسرعه يدور بعيونه على ام سالم حصلها جالسه على الكرسي وجود واقفه عندها وتهديها، جلس عندها: ياخاله وش فيه ابو سالم
ام سالم: مدري مدري طاح فجأة علينا واتصلنا على الاسعاف
سعود: معليش ان شاء الله مابه الا العافيه
وقف من سمع صوت الدكتور جاي لعندهم وقفو كلهم ينتظرونه يتكلم
ام سالم: ها يادكتور وش به
الدكتور: معليك ياخاله طيب ان شاء الله بس جلطه وعدت الحمدلله
كلهم نطقو: الحمدلله
ام سالم: ينفع اشوفه الحين
الدكتور: اي بس دقايق و صح لازم يترقد عندنا كم يوم لين نتأكد انه بخير اكثر
ام سالم بعجله: انا انا بترقد عنده مستحيل اخليه لحاله
هنا جود بعد كلمتها اتوترت وين تروح وش بتسوي ام سالم وابو سالم بيقعدون ب المستشفى والمحطه بعيده وكلها عماله تخاف تقعد لحالها
انتظرو بهدوء وقاطع الهدوء جود: سعود عادي توديني المحطه
سعود: لحالش؟
جود: اي
سعود: عقلش فيه شي؟ المحطه مابها احد شلون تقعدين لحالش فيها
جود: عادي بدبر نفسي بس توديني ولا لا اذا ماتبي قول لا وخلاص
سعود: طيب اخذش عندنا البيت عند خواتي تقعدين لين يطلع ابو سالم
جود: لا مابي اقعد عند احد بتوديني ولا اروح مشي
ام سالم: ياجود ماينفع تروحين لحالك روحي مع سعود وحنا ان شاء الله مابنطول
جود ب اصرار: لا مابي اقعد عند احد خلاص بروح مشي وانتي ياخاله سلمي على خالي وتحمدي له ب السلامه عني ماقصرتو لو ايش مستحيل انسى معروفكم
ومشت جود تطلع برا وهي ماتدري وين تروح و وش تسوي ومامعها جوال حتى لاكن لحقها سعود: هي وقفي
لفت جود: نعم؟ شوف اذا بتسمعني كلامك الي يسد النفس ف انا بغنى عنه مالي خلق
سعود: عذه انتظري بتكلم
جود: ها
سعود: مو تبين تروحين المحطه
جود: اي!
سعود: خلاص بوديش
سكتت شوي تفكر بعدين نطق لما حس انها خافت : معليش انتي ف وجهي مايجيش شي يلا الحقيني
راحت واره وركبت ورا وحرك للمحطه
____________________
بيت ابو خالد|
صوت بكي حمود مالي البيت،جات حنين: وش فيك حمود تبكي
حمود ببكي: اكلتتتت شاااييي
حنين: وش اكلت
حمود مستمر يبكي ويقول: اكلت شاااااييي
حنين: حمود وش فيك
جات اريام تظحك ونطقت حنين: وش فيه انتي تظحكين ولدك يبكي
اريام وهي تظحك: ياغبيه يقولك اكلت شي يعني ما اكل شي جوعان ههههه
حنين: اهاااا والله ولدك الغبي يقلب الكلمات المهم سوي له اكل فضحنا طالع على عمه حسين بطيني
على دخلت حسين: وش به حسين هااا
حنين: ليتنا طالبين مليون
ظحك حسين وشال حمود: يازينه الي طالع على عمه امش وانا عمك اوديك نجيب اكل بس لي ولك
حنين: حسون انا بعد جبلي
حسين: معصي اجل انا مفضح وبطيني
حنين: شدعوه امزح معاك شفيك ياخي
حسين: ايه ايه تمزحين اجل
حنين: اي
حسين: على كيف حمود يبي اجيب لك ولا لا
حمود: اي جبلها عشان ماتبكي
حنين: ياحيوان اوريك
ظحك حسين وطالع ومعه حمود ،لفت حنين على اريام :اسمعي عندك شي اليوم؟
اريام: لا
حنين: حلو
اريام :ليه
حنين: مالك دخل اذا فكرت اقولك
اريام: انقلعي بس
علاقة اريام مع البنات جداً قويه ويمونون على بعض عكس علاقتهم مع خلود الي ودهم يذبحون بعض
________________
كنت بطوله البارت بس ماودي اطول عليكم اكثر اعرف مقصره مرا بس الشغف دخل بغيبوبه مؤقته😭
زيدو الدعم عشان اتحمس اكثر واحاول اكتب اطول ان شاء الله🤍
وشكراً لتعليقاتكم الي تفتح النفس🤍🤍
