"ဒါ...ဒါ...ဘာကြီးလဲ"
ရုံးဟွာတောင်ရဲ့တစ်ဝက် ကားရပ်နားစခန်းရောက်တော့ နမ်ဂျွန်က ကျောပိုးအိတ်ထဲကကားသော့ကိုနှိပ်လိုက်တော့ 'ဝှီ ဝှီ' ဆိုသောအသံနဲ့အတူ ရှေ့မီးသီးနှစ်လုံးထလင်းသွားတဲ့ကားကြောင့် ဆော့ဂျင်ထမေးခြင်းဖြစ်သည်။ဂျောင်ကုကတော့ ဆော့ဂျင်နဲ့ထယ်ယောင်းရဲ့ကြောက်လန့်နေတဲ့မျက်နှာကိုကြည့်ပြီး သက်ပျင်းသာလှိမ့်ချနေသည်။
"အစ်ကိုဒါကိုမသိဘူးလား...ကားလေ"
"ကား...ကားဆိုတာဘာလဲ"
"ကားဆိုတာစီးစရာယာဥ်အမျိုးအစားတစ်ခုပဲ...ဒီကားနဲ့ဆိုကျွန်တော်တို့က...ခြေညောင်းစရာမလိုတော့ပဲ...ဟိုးအဝေးကြီးတွေအထိသွားလို့ရတယ်"
နမ်ဂျွန်က ခြေဟန်လက်ဟန်ဖြင့်ရှင်းပြတော့ ဆော့ဂျင်က Mercedes - AMG G63 အနက်ရောင်တောက်တောက်နားကိုကပ်၍ ထိတွေ့ကြည့်သည်။ဂျိုဆွန်းမှာက စီးစရာယာဥ်ဆိုလို့ မြင်းနဲ့ဝေါယာဥ်ပဲရှိတာလေ။အဲ့တော့ ဒီအနက်ရောင်ပြောင်ပြောင်နဲ့ ဝေါယာဥ်အကြီးကြီးက သူ့တို့အတွက်တော့ထူးဆန်းလွန်းလှသည်။
"ဒါကို...ဘယ်ဖန်ဆင်းရှင်ဖန်ဆင်းခဲ့တာလဲ"
ထယ်ယောင်းရဲ့အူတူတူမေးခွန်းမှာ နမ်ဂျွန်ရော ဂျောင်ကုပါ ခွက်ထိုးခွက်လန်အော်ရယ်ကြတော့သည်။စိတ်မနှံ့တဲ့လူရှေ့မှာ ဒီလိုလုပ်တာဟာ ရိုင်းပြတဲ့အမူအယာဆိုသော်လည်း သူတို့သူငယ်ချင်းနှစ်ယောက်လုံးမအောင့်နိုင်တော့ဘူး။
"ဘာရယ်နေကြတာလဲ!...ငါ့ညီတော်မေးတာကိုဖြေစမ်း!!"
ဆော့ဂျင်က မီးဝင်းဝင်းတောက်နေတဲ့မျက်ဝန်းပြာတွေဖြင့် ဝင်ဟောက်တော့မှ ရယ်နေတဲ့နှစ်ယောက်လုံး ချက်ချင်းရယ်ကြောပြတ်သွားတော့သည်။
"ဘယ်ဖန်ဆင်းရှင်ကဖန်ဆင်းတာလဲဆိုတော့...အင်းမ်...Mercedes ဆိုတော့ Mercedes ဖန်ဆင်းရှင်ဖြစ်မှာပေါ့"
ဂျောင်ကုက ရယ်ချင်တာကိုအောင့်အီးပြီး ခရမ်းနုရောင်မျက်ဝန်းတွေဖြင့် သူ့အဖြေကိုမျှော်လင့်နေတဲ့ထယ်ယောင်းကိုဖြေသည်။
