مقدرتش نعس ديك الليلة
بقيت كنتقلب في بلاصتي والقراية ، والحرب في البلاد نايضة
وخولة دارت ليا الصداع في راسي .. افففف
وناااري ياربي.... ينعل دينمها شي قراية وحتى الحرب تمشي تخرا
وخولة.. خولة غير تبقى معايا مبغيت والو
قفزت من بلاصتي عندي واحد الرغبة باش نشوفها راه ميمكنش
باينة غاتكون ناعسة دابا... غوت عليهااا... اففف شحال ندمت
مشيت بشوية لبيتها نطل عليها وتعجبت حيت لقيتها مظلمة البيت حيت الصغيورة ديالي كتخاف من الظلمة وكتحكر باش نخليو الضو الخفيف شاعل
قربت من نموسيتها وكندقق فيه فين هو وجه الكتكوتة ديالي
شعلت الضو الخفيف لي قريب من فراشها وتصدمت مني ملقيتهاش ...شعلت الضو ديال البيت المجهد وضورت عيني في البيت ومكينش حسها
مشيت كنجري كنقلب عليها كيلحمق... دخت وتلفت.. مبقيت عارف شنو ندير
مشيت كيلمسطي لبيت مريم وبيت يونس وكاااع البيوت قلبتهم
الا بيت واليديا لي منقدرش نقلبو حيت غايكونو ناعسين
مشيت باغي نتأكد وعندي امل بلي هي معاهم .....
وقفت حدا الباب وكنفكر ايلا مكانتش لداخل معاهم فين غاتكون ؟؟؟
اففف القلق والخلعة والخوف كولشي تجمع عليا دخت
بديت كندق في الباب دقة ورا دقة ورا دقة باين من الدقان بلي مخلووع
خرجات الوالييدة وقالت ليا : "ياك لاباس اولدي مالك "
"واش خولة معاااك"
سولتها وانا كنشوف في عينيها ومكرهتش ندخل حتال لدماغها ونعرف الجواااب قبل ماتنطق بيه
"عفاك أااامي لاما قولي "
"اه.... نعسات هنا "
طاح عليا بحال الثلج مني سمعت هاكا كتافي خفافو بحالي حيدتي عليههم الحجر و مشيت جلست في واحد الكرسي تما ، لواليدة شافت في الساعة ورجعات عينيها ليا : "مااالك اوليدي "
غمضت عينيا مقادرش نهضر ولا نتحرك....
شفت فيها وهضرت بزز: "تخلعت فاش ملقيتهاش في بيتها... مت بالخلعة"
قربات الواليدة مني ومسحات على راسي وقالت ليا :
"غير بشوية عليك اوليدي.... جات كتبكي البارح وقالت بلي كنتي معصب منها وجريتي عليها من بيتك " نااااري مي تاهي باغا تندمني
"صافي باركة والله حتى تنادم معايا الحال وندمت واش مبنتش ليك مزال منعست حتال هاد الساعة؟؟ "
"صافي ااامي سمحلي ليا فيقتك ، تصبحي على خير "
خولة اش هااادشي كديري فيا
فقت في الصباح معطل ومشيت للكوزينة لقيت الواليدة ومعاها خولة
غير شافتني خولة لسقات في الواليدة بحالي كتقوليها انا خايفة منوو عتقيني
كعيت الصراحة مني دارت هاكا واااش الصغيورة بنوتي الحبيبة خولة ولات كتخااف مني ؟؟؟
"خوولة.... اجي عندي..... "
زادت تخشات في الواليدة ومبغاتش تجي عندي، وهادشي خلاني نكعا ونتعصب خرجت من الكوزينة وخليتهم
واحد الشوية وغاتنسى وتجي عندي.... هي غير درية صغيرة و الدراري الصغار دغيا كينساو ولا من الاحسن متنساش باش نتهنى شوية من الهموم
في العشية جات خالت خولة الصغيورة سميتها ( سمية)جات مع ولدها وبنتها (حسام ونهيلة)
الخالة سمية هي الخالة الوحيدة عند خولة وهي لي كانت مقابلاها في الأول كيف قلت ليكم حسام هو الولد الكبير وختو نهيلة صغر من خولة بشي شهورا وصافي وكيبان ليا غايتزاد عندهم شي اخ اخر
خولة عزيزة عليها خالتها ، والخالة سمية مرة مرة كتزورنا باش تطمئن على خولة الصغيورة
دارنا تحولات بحال شي حضانة ديال الدراري الصغار ... الضحك.. البكا.. المضاربة.. الغوات... الحيحة.. اما انا مشيت لبيتي وقابلت قرايتي
مبقاش الصداع في الدار وعرفت بلي الضياف مشاو
في وقت العشا كنت اول واحد جلس باش يياكل حيت كان فيا لمووت دالجووع
الكرسي لي حدايا هو لي كتجلس عليه خولة حيت كنت كنوكلها ... كاع البلايص عامرين الا بلاصة خوولة
"فين هي خولة ؟؟؟ "
سولت الواليدة، وجوباتني :"بغات تمشي مع خالتها حيت غدا الجمعة و خليتها تمشي "
تفاجات حيت اول مرة يوقع هاكا... حيت كانت ديما الخالة كتحي وكتمشي وعمر خولة لسقات فيها وغير ليوم...
مبقاتش عندي الشهية حتى ديال الماكلة كليت غير شوية
العشية ديال الجمعة مشيت مع الواليد باش نجيبو خوولة ، ودخلت للدار وخليت الواليد كيتسنانا في الطوموبيل
كانو مجموعين، خولة ونهيلة وحسام لقيتهم كيلعبو في واحد البيت غير شافوني وقفو من اللعب وبقاو كيشوفو فيا
واش ككككنخلع ولا شنوووو ؟ ؟؟
امم واقيلة حيت طويل ومگدر
ضحكت لهاد المخلوقات وقلت ليهم :"السلام الفنين باقين ماساليتو من اللعب؟ "
حتى واحد مادوا ولا جاوبني ولا حتى ابتسم ليا
المهم.... تلفت كنشوف في خولة وقلت ليها : " الزوينة الصغيورة ديالي يلاه خاصنا نمشيو للدار "
"لا مبغيتش "
كانت اول جملة غاتنطق بيها الصغيورة خولة
"شنووو اخولة راه خاصك تمشي للدار غدا راك قارية"
"غاادي نبقى هنا "
"خووووووولة لاابغيتي نبقى نجيييييييبك كل نهااااااااار هنا،ولكن يلاه دااااباااا راه باباااااتك كيتسنى برا "
باينة فيها هادي ماباغاش تحرك من بلاصتها
ودابا؟؟؟ شنووو اندير مع هااد الصغيورة؟؟؟ كيفااش غانتعامل معاها دابا؟؟
تدخلاات الخالة سمية وقالت:
"بنتي خولة لابغيتي غايجيبك وليد عندنا كل مرة باش تبقاي تلعبي مع نهيلة وجيبي معاك حتى لعابك"
"مبغيييييييييتش" وبدات كتبكي.....
خالتها كيسحاب ليها مكنعاااملوهاش مزيان
شنووو طرا لهاد الصغيورة واش هادشي كامل حيث خرجتها من بيتي داك النهااار
الخالة سمية بدات كتهدن فيها قالت ليها :"غدا احبيبة غادي يجيبك وليدد "
قلت ليها :"غادي نشري ليك نوع لاگلاس لي كيعجبكك "
امم كيبان ليا الفكرة عجباتها بدات كتشووف فيا...
وقالت الخالة سمية باش تشجعها :
"يلاه اخولة المرة الجاية نشريو بزاف ديال لاگلاس ليك وحسام ونهيلة"
وقرباتها مني حتى ولات قدااامي
هزات خولة راسها شافت فيا ... دارت واحد الشوفة منقدرش ننساها
بحالي كتحاسب معايا... وكتقوليا غوووتي عليااا... "
هزيتها وعنقتها في صدري وقلت ليها :"اممم كيفاش تسمحي ليا"
هي اليتيمة لي واخا تعطيها العالم كلووو ماغاديش تعوض ليها حنان مها وباها
"شنووو بغيتي تاتي...دفتر الملونات.. ولا شي لعبة جديدة"
قالت ليا: "بغيت دفتر ولعبة"
"نااااري شحال طماعة.... واااخا ألااالة... لي بغيتي"
وضحكات ليا
ومن بعد حسيت بشيحاجة في سروالي فاش شفت لقيتها نهيلة
"هزززني"
شفت فيها مستغرب وفيا الضحكة
"خولة كتقوليا بلي انت صحيح وكتهزها هي و مريم بزووج"
اللللللله
____________________>____________________>_____________
في ديك الليلة خليت خولة تنعس في بيتي لاخر مرة ... لونت معاها بزاف وقريت ليها قصة وشريت ليها كثر من لعبة ودفتر وكثر من لاگلاص واحد، تقدر تكون هادي هي طريقتي في الإعتذار. الا كنت كندللها بزاف فحيت كنبغيها بزاااف
وهي ناعسة في نموسيتي كنشوف فيها وكنتمعن في ملاميحها، شحال وااعرة وشحال انا متعلق بيها . مشيت لفين كاين الصندوق ديال الاماني
بغيت غير امتى نعرف شنو كاين من ورا هاد الجملة...
( عندما أكبر سوف أتزوج...(... )؟؟؟؟)
بيمن اخولة بييييييييمن؟؟؟؟
فااااش غاتكبري اخولة فاش غاتكبري.....
غاددددي....
_____________
واحد النهار كنا وجدنا مانشربو الانواع و الاشكال من المونادا والعاصيرات ، واليدينا شعلو المجمر في الجردة ... وكنا مرتاحين ومستمتعين داك النهار
الدراري الصغار... اه حتى يونس كنعتابرو صغيور... ومريم وخولة كيلعبو
ويونس غير مهووس بديك البيكالا ديالو، لي ليل نهار وهو شادها
كيتهلا فيها كثر من اي حاجة اخرى، وخولة عزيز عليها تركب معاه
خولة تعلمات تسوقها حتى هي كانت كتسوق ويونس جالس وراها وكتبيداري والگيدوز كيمشي في اليمين واليسار وكيطيحو وكينوضو حيت غير طيحات خفاف ومريم كانت كتعاون الواااااليدة كيشويو اللحم،
والواااااليد مقابل المجمرر كيشعل فيه وانا غير حاضيهم وكنشوف بكل برود.
حتى كنحس بشي حاجة شاعلة في صدري بحال داك الجمر 🔥لي في المجمر....
معرفتش شنو هو....؟؟؟؟
مشا الواااليد وخلاني حاضي المجمر ... وعينيا مرة على الجمر ومرة على يونس وخولة راكبين في ديك البيكالا ....
وسهيت.....
وعلى غفلة...الييكالا كانت كتسوقها خولة الصغيورة ديالي خرجات البيكالا على التوازن ديالها وقبل مايتحكم فيها يونس ويشدها طاحو في الارض
كانت غاتكون طيحة عادية.... ولكن لا ماشي عادية حيت البيكالا دخلات في المجمر
الغوات والبكا كيتسمع في الدار كاملة...جرينا عندهم كاملين مخلوعين عليهم والوالييييدة كتغوت وكتحيح .... مريم كتغوت... يونس كيغوت بالضربة ... وحتى خولة كتغوت...
واحد الجمرة 🔥قاست خولة في ذراعها..
ولكن يونسسس....
تشوه ليه وجهووو شوية... من جهة عينيه اليمنى
وسالا نهارنا بموصيبة و بندبة مكتحيدش واخا دار عميات ولكن ديك الندبة بقات فيه وديما غايتفكر ديك الحادثة
خولة لي خرجات من ديك الموصيبة بحرقة في ذراعها
ولكن مريم .... لسقات ليها فكرة انها السباب في هاد الحادث حيت هي لي كانت كتسوق البيكالا وهي السباب حتى طاح يونس
خولة مؤخرا ولات غير مخلوعة ومدهشرة... وكانت كتبزز عليا نعس حداها مكتقدرش تنعس بوحدها فاش كتفيق في الليل ومكنكونش حداها كتجري تجري عندي...
كيسحاب ليا غير ديك المرة لي غاتنعس حدايا ولكن لا مكانتش هي اللخرة حيت بقات مزال باغاني حداها ومبغانيش نبعد منها
"ولييييد.... انا خايفة... العافية كتضرني"
"وليييد مبقيتش غانركب فيها "
"وليييد مبغيتش نبقى بوحدي... العافية تابعاااني"
"واليد... فاش غانكبر غانولي طبيبة ونعالج يونس... "
وواحد المرة كتبات امنية ولاحتها في الصندوق!
وهاد المرة مسولاتني على حتى كلمة
ولكن انا متاكد انها كتبات :"ياربي تشااافي يونس "
دازو الايام والشهور وكولشي تأقلم و ولف دكشي لي طرا
وأناااا....
كنشك ان شي شيطان خرج من صدري وساق البيكالا حتى طاح يونس...
والموصيبة لي وقعات زادت غير قرباتهم من بعضياتهم...
وانا زادت الايام غير خلاتني نتسطى على خولة....
وزادت شعلااات العافية في صدري.....
فليلساتي تصبحون على واقع اجمل ❤🐥و سنة سعيدة بالحلوة لذيذة 😂❤نتلاقاو المرة الجاية مع بارت اخر ❤✨
أنت تقرأ
أنت لي ❤🇲🇦 (في طور الكتابة )
Romanceالرواية في الأصل بالفصحى ولكن قلت الى تكتبات بالدارجة غاتجي احسن ❤🇲🇦كنتمنى تعجبكم ❤🐥
