အာဏာရှင်ကြီး၏ ချစ်လှစွာသော ဧကရီ (ခေတ္တမျှ ရပ်နား)

အခန်း (၂၆)

Unicode
.
.
ရှောင်ကျစ်ကော ပြောသည့်စကားမှာ မှန်ပေသည်။ နှစ်ရက်မပြည့်မီမှာပင် အမတ်ကြီး၏ နာမည်ကို မည်သူမျှ မပြောရဲကြတော့ပေ။ နှစ်သစ်ကူး နီးလာသော်လည်း လမ်းမများပေါ်၌ လူသူကင်းမဲ့နေလေသည်။ ပုံပြင်ပြောသူကို ဝန်းရံလျက် ပုံပြင်ဇာတ်လမ်းနားထောင်နေကြသည့် မြင်ကွင်းမျိုးကိုလည်း ထပ်၍ မမြင်ရတော့ချေ။

စာအုပ်ဆိုင်များသည်ကား အရှေ့ဘက်တွင် ခင်းကျင်းပြသထားလေ့ရှိသော ပုံပြင်စာအုပ်များကို အနောက်ဘက်၌ ဝှက်ထားကြတော့သည်။ ပုံမှန်လာဝယ်နေကျဖောက်သည် မဟုတ်လျှင် သူတို့ မရောင်းဝံ့ကြပေ။

ယုံလဲ့လမ်းပေါ်တွင် မြင်းရထားလုံးငယ်တစ်စီးသည် ဖြည်းညင်းစွာ ဖြတ်သန်းသွားနေ၏။ အထဲတွင် ထိုင်နေသော အင်ပါယာကြီးကြပ်ရေးမှူးသည် စာအပြည့်ရေးထားသော စာရွက်အား ဂရုတစိုက် သိမ်းထားလိုက်ရင်း သူ၏မျက်နှာသည်လည်း ပြုံးရွှင်နေလေသည်။

နောက်တစ်နေ့တွင် သူသည် အမတ်ဝူနှင့် ပတ်သက်သော သက်သေခံချက်မှတ်တမ်းကို ဧကရာဇ်မင်း ရှေ့မှောက်တွင် တင်ပြလိုက်၏။

တစ်ချိန်တည်းမှာပင် တစ်စုံတစ်ယောက်က နန်းတော်၏ *သမ်းဝမ်ကူး ကို ထုရိုက်လိုက်တော့သည်။ ဟောင်းနွမ်းစုတ်ချာနေသောအဝတ်အစားဝတ်ထားသည့် အဘွားအိုကြီးတစ်ယောက်သည် စည်တော်ရှေ့တွင် ဒူးထောက်လျက် အကြိမ်ကြိမ် အရိုအသေပေးနေ၏။ သူမသည် ရှိုက်ကြီးတငင် ငိုကြွေးနေလေသည်။

*登闻鼓(Dēng wén gǔ)- ပဒေသရာဇ်စနစ်ရှိသောတရုတ်ပြည်ရှိ တရားစီရင်ရေးခန်းမအပြင်ဘက်တွင် စည်တော်ကြီးတစ်လုံးကို အများအားဖြင့် ထားရှိကြသည်။ တစ်စုံတစ်ယောက်က မကျေမနပ်ချက်ရှိတိုင်း ၎င်းကို ထုကာ တရားသူကြီးချုပ်ကို တိုင်တန်းနိုင်သည်။

"အမတ်ဝူဟာ လူတွေရဲ့ အသက်ကို ဂရုမစိုက်ဘူး။ ဧကရာဇ်အရှင်ရဲ့ အုပ်ချုပ်မှုအောက်မှာ ဒါက တရားမျှတမှု ရှိပါရဲ့လား။ အမတ်ဝူဟာ လူတွေရဲ့ အသက်ကို ဂရုမစိုက်ဘူး။ ဧကရာဇ်အရှင်ရဲ့ အုပ်ချုပ်မှုအောက်မှာ ဒါက တရားမျှတမှု ရှိပါရဲ့လား..."