👑العُــــــــــــمــــــــــدة👑

البارت 24💞

👑العمـــــــدة👑
♡..مجنــــون ليلـــى..♡
#التتمة 24

بقات غير كتشوف فيه
تنهد وهو كيشوف فيها وفعويناتها لي ساحو بالماسكارة تحت عنيها حتى لخدودها والشرطة تخربقات ورموش وحدة طارت او وحدة باقة  وشعرها تشعكك ولات حالتها حالة كتخلع ..مد يديه لكلينيكس وبدا يمسح ليها فوجها وهي غير ساكتة وكتشوف فيه ..ولكن داكشي مابغاش يتمسح لاصق فوجها.
مدات يديها ليديه ونطقات:ماغايتمسحش بكلينكس ناشف
ميل راسو:ومالك على حالك دايرة هدشي كامل
رجعات شعرها اللور وهزاتو لفوق وجمعاتو بشفنجة لواتها فلخوة وخشات شعر وسط شعر بلا لاستيك ..(زعمة شفنجة بلا لاستيك😁)
ليلى تنهدات:عرفتي شحال  دلوقت باش قاديت وجهي ولسقت الشعر.. جيتي نت فتانية رونتي لي كلشي
بكر :هو غير الشعر والمكياج لي مشا...راه عرس على قدو ترون بسباب راسك القاصح
ليلى :كون قتلتيه..ولا طاحت شي روح
بكر دار شبه ابتسامة:الله يهنيه
بقات شحال كتشوف فيه عاد نطقات:وتبغي دوز حياتك كاملة فلحبس بسباب دمك الحامي وعصبيتك الزايدة
هز راسو بلا بالعرض البطيئ وهو مراقبها كيفاش كتهضر  واخة حالتها مافيها مايتشاف عاجباه وحاس براسو مرتاح وهي معاه دوة:لا ..بسبابك وماشي خسارة فيك
ملاميحو تبدلو وهو كيرجع يتفكر فاش قاسها داك خونا:اي واحد ايقرب ليك ولا يحط يدو عليك راه محضوض لا فلت من يديا سالم
ليلى:حتى لامتى.. وشنو الحل
حط يديه مور عنقها وبدا يطبطب عليها تماك بشوية :نهار ديري عقلك وتبداي تسمعي للهضرة وتبعدي من اامشاكل..داك ساع ما اطيح روح ما انبقاو نضربو حد ونفرشخو دلمو..وتانتي ما اتاكليش لعصى
بقات ساكتة وغير كتشوف فيه
كمل كلامو:صعيب عليك هدشي قوليلي كتحلم ابكر ياك
ليلى:راني بعقلي غير نت الله يهديك
هز راسو باه بلا تاشي كلمة ..عاد تفكر شي حاجة
بكر:وليتي تهزي لقراعي وضاربي تانتي وتشيري على بنادم
ليلى تفكرات تاهي:عتقتك اولد خالتي فاخر لحضة باش ماتقولش راني ماشي ديال العوين
بكر:كتخافي عليا
ليلى:اه كيفما نت كتخاف عليا ودير اي حاجة على قبلي تانا هكاك مانبغيكش تأدى تانا كنجيب عليك النفس ..راك قلتيها نت فيك خويا وبَّا لي ماعنديش ومعزتك فقلبي كبيرة
بكر قلب ااموضوع عرفها لاياش كتلمح ماباغيش يتسيف عليها تاني..ودوة بجدية هاد المرة :المهم كنضن كلامي مفهوم سالينا من شي حاجة سميتها لعراسات والعراضات وخيطي بيطي بوحدك وبلا خباري ..
ليلى:انبقة حياتي كاملة من دار للصالون من صالون للدار ..ما نخرج ما نبدل هاد الحومة دلويل ما نشوف ناس نقيين ..وجهي وجه الحبس
بكر :هدشي تانفكر فيه ونشوف بلانو
ضربات الطم خليها تا تفكر تاهي وتشوف اش دير
جمع الوقفة خرج للبالكون دخل الشيشة ولبيسي ديالو وهي دورات عنيها على البيت قليل فين كدخل ليه مرات معدودة فين عتبات ليه وغير للضرورة فاش ماكايكونش وكتكون خالتها كتخملو لا حتاجت شي حاجة تجيبهالها كتعيط ليها ..غير كتمدها ليها وكتخرج..عجبها زوين ومنضم عكس بيتها هي مرون وبلاكااراتها مشقلبين..ماكملاتش الشوفان وتبركيك شافتو كيسد باب لبالكون   ناضت تابعاه تاهي باش ايهبطو للتحت سبقاتو غادة جيهة الباب حتى كتحس بيه جرها لعندو وعنقها دافنها فصدرو هاد الانسانة راه هي روحو ..كيحس بيها بنتو وختو ومراتو  وحبيبتو والمعدباه ولي زاطمة ليه على قلبو لي يضربها ومايخليش لي يضربها ولا يقيس شعرة منها  واخة تكون مها هو لي مسؤول عليها من نهار تزادت ليلى ديالو ..ليلى ديال بكر وبكر دليلى هكا كبرو  ...زاد عنقها وهي غير واقفة عارفة واخة تبغي تبعد ما ايخليهاش ..بعد شوية ونطق ووجهو مقابل مع وجها :كون هاد القلب لي كنحس بيه كيضرب يحن غير شوية ويضرب ليا  ..كون تشوفيني كيف كنشوفك ..كون تعرفي هاد القلب شحال كيبغيك..بزاف دلحوايج يتبدلو ..نموت ونعطي روحي أ ليلى غير يوقع هدشي والله ما خسارة روحي داك الساع
خلاها غير كتشوف وحل لباب وماتسناهاش تجاوب حيت عارف يا اما جوابها ما ايعجبوش يا اما ما اتلقى ما تقول واتسكت:زيدي
حل ليها لباب خرجات عاد تبعها وهبطو لتحت ..