( Unicode )
ယနေ့ ကျောင်းပိတ်ရက်ဖြစ်တာကြောင့် စောစောထရန်မလိုပင်။ အခုဆို မနက် ၁၀ နာရီထိုးနေပြီးဖြစ်သော်လည်း ရှန်သ ကို မည်သူကမှ လာမနှိုး။
" အိပ်ရေးဝဝ အိပ်ရတာကအကောင်းဆုံးပဲ "
ဆူညံသံတွေမရှိတဲ့ ရှန်သ ၏ မနက်ခင်း။
အိပ်ယာနိုးသည့်နှင့် ဒီနေ့ဘာလုပ်ရမလဲဆိုတာကို ရှန်သ ခေါင်းထဲတန်းစီတွေးနေမိသည်။မျက်နှာ၌ အဓိပ္ပာယ်ပါတဲ့ အပြုံးကိုပြုံးလိုက်ပြီး ရေမိုးချိုး ပြင်ဆင်ရန်အတွက် အိပ်ယာထဲမှ ထလိုက်သည်။
ကျောင်းပိတ်ရက်ကိုကောင်းကောင်းအသုံးချရမှာပေါ့။အပြင်ထွက်လည်မှာမလို့ ရှန်သ မှန်အရှေ့၌ သူဆံပင်ကိုသေချာပြင်ဆင်နေလေသည်။ ထုတ်ထားသည့် Over Size T-Shirt ဗြောင်အဖြူရောင်လေးကို ဘောင်းဘီအတိုလေးနဲ့ တွဲဝတ်လိုက်တယ်။
အခန်းအပြင်ကိုထွက်လာကာ အမေဖြစ်သူပြင်သွားပေးသည့် မနက်စာကိုနေ့လယ်စာအဖြစ်ပေါင်းစားလိုက်သည်။ စားနေရင်း ဘေးနားကဖုန်းကို လှမ်းယူလိုက်ကာ ' အောက်ထပ်ကကောင် ' ဆိုသည့် contact ကိုနှိပ်လိုက်သည်။
" Hello "
" မင်းဘယ်မှာလဲ "
" အိမ်မှာပဲပေါ့ "
" အပြင်သွားကြမယ် မင်း ပြင်ဆင်ချိန် ၅ မိနစ်ရမယ်။ ငါတိုက်ရှေ့မှာစောင့်နေမယ် ဒါပဲ "
ရှန်သ သူပြောချင်ရာပြောပြီး ဖုန်းကိုအရင်ချပစ်လိုက်သည်။ ထိုနောက် ဘေးလွယ်အိတ်အမည်းကိုလွယ်လိုက်ပြီး တိုက်အောက်သို့ ဆင်းလာခဲ့သည်။ ကျောင်းဝတ်စုံနဲ့မဟုတ်တာကြောင့် ရှန်သ ပုံစံလေးက လွတ်လပ်ပေါ့ပါးသည့် လူငယ်တစ်ဦးလိုပင်။
တိုက်အောက်ကိုရောက်တော့ အရှေ့မှာ ရပ်စောင့်နေသည့် တေဇ ကိုတွေ့လိုက်ရသည်။ တေဇ ပုံစံက ဘယ်လောက်တောင် မြန်မြန်ပြင်ဆင်လာရလို့လဲမသိ အင်္ကျီကကြေမွနေကာ ခေါင်းတောင်မဖြီးထားသည့် ပုံနှင့်ပင်။
" မင်းခေါင်းမဖြီးခဲ့ဘူးလား "
" ၅ မိနစ်ပဲ အချိန်ရမယ်ဆို "
" ဆံပင်ကိုသွားပြန်ပြင်လိုက် ငှက်သိုက်ကြီးကျနေတာပဲ ငါစောင့်နေမယ် သွား "