#مُعــاويــة
:: 5 ::
يقولو الوقت كفيل ينسيك اوجاعك اللي فاتت .. ممكن وقت غير وقتنا مافيش حد فينا نسي يللي صار مع كِنان كلنا حياتنا وقفت .. حذيفة يوميا يتلو القرآن في دار كِنان ولا فارقها يوم يمشي لقرايته ويرجع لقرآنه تواصلنا بينا خف هلبا .. غسان سارح طول الوقت وع ابسط كلمة ينفعل ومش قادر يسيطر ع اعصابه .. أما انا كرهت الحوش ومايربطني بيه طيف كِنان وعتابه عليا مش مفارقني يوم ..
كنت مقعمز قدام الشجرة يللي تعلق فيها كِنان ومتعصب نشبحلها .. وبدون تفكير ولا اصلا في فرصة للتفكير خديت السرّاق وجريت عليها قصيتها بغل غلي .. ولانها شجرة وعروقها كبار ومغروسة في الارض بثبات كانت اقوى مني ومن السرّاق اصلا .. طحت ع ركابي وقعدت نبكي .. نبكي ونتحسب ربي في كل من كان السبب في انتحار كِنان يللي انا منهم .. مسحت دموعي بالقوة ونضت خشيت الداخل لقيت بوي وعمي مسعود يهدرزو .. شافني جاني عمي مسعود وقال: ياولدي بوك ناسيني شكله ؟
استغربت: لالا بوي من اللي صار في كِنان مرة مرة يتلخبط .. اكيد من الصدمة
مسعود: قاللي ارفعني لامي
استغربت وابتسمت وطبطبت ع كتفه: تو نشوفه
مسعود ابتسم: ارفعوه للمصحة بالك فيه شي مرات يحتاج لدكتور
مسحت ع وجهي وابتسمت: اي اكيد
طلع عمي مسعود روح .. قربت من بوي وقعمزته
ابتسمت: بوي شن تحس ؟
بوي يشبح لملامحي بس حسيته مستغرب: انا مازال ماتزوجتش اصلا
انفتحو عيوني ع وسعهم وانصدمت: بوي بالله عليك ماديرش فيا هكي .. نرفع نعاينك !
سكت شوية وبعدين قاللي : معاوية وين كِنان
فرحت وسط دموعي .. ابتسمت: كِنان الله يرحمه
وقف قاللي: بنرقد شويا نحس في روحي تعبان
وقفت وشديت ايده: خليني نساعدك
………………
مشيت لحذيفة نجري لقيته يصلي .. سلم من الصلاة شبحلي لقاني داهش وقف جنبي
حذيفة: خيرك داهش شن في ؟
ثنيت ركابي واستنشقت هواء: بوي ياحذيفة بوي
حذيفة مستغرب: خيره ؟
قعمز بحداي
شبحتله: بدي ينسى هلبا .. اكيد من اللي صار ولاه ؟
سكت حذيفةشويا وبعدين شبحلي : مايكونش زهايمر ؟ .. ليه ايام مش طبيعي
مسحت ع وجهي بالقوة: بنرفع نعاينه
حذيفة: بنمشي معاك خللي نقول لغسان
شديت ايده لما فتح تليفونه وقلتله: بالله فوته كان يدير مشكلة فكنا منه
حذيفة: اي باه .. هي نمشو
…………………
بداية زهايمر ؟ .. شن يعني هالمرض وليش تحديدا جي في الوقت الصعب هذا ؟ .. محتاجين بوي وهدرزته وكيف يونس فينا بعد اللي صار مع كِنان .. محتاجين دعواته لينا ويذكرنا بذكرياتنا معاه .. محتاجين تلاوته للقرآن .. محتاجين نسمعوه ينادي فينا بالواحد .. بوي للاسف مش مذكر غير اسمي .. مذكر معاوية بس اللي مايغلطش فيه .. معاوية
أما الثانيين ف كان يغلط في اسمائهم وصفتهم اصلا .. يخطر عليه كِنان ع اساس فرد من افراد اسرته لكن شن صفته مش مذكرها .. مذكر آيات القرآن .. لان القرآن الكلام الوحيد الذي لا ينسى .. كلام الله كيف ينساه وهوا كل ليلة لازم يقراه .. كان مصّر ع حفظنا للقرآن بس حذيفة بس اللي فلح فينا
……………….
كيسة معبية ادوية قاعد نقرا فيها بحذر ومهتم بالتفاصيل
غسان: شن سببه ؟
نقلب في الروشيتا: بالك نتيجة صدمة والا ارتفاع السكر وين نندري انا !
غسان حط ايديه ع راسه: علاش ماسألتوش الدكتور ؟
رديت عليه بلامبالاة: مايهمنيش .. يهمني توا يتعافى ويرجع لصحته احسن من قبل بس
وقف غسان وجي بحداي وقعد يشوف للادوية: هادي كلها بنعطوهاله ؟
تنهدت: للاسف اي .. حذيفة وين ؟
حط الادوية وشبحلي: ناداه عمي مسعود
استغربت: خيره شن يبي فيه ؟
غسان: مانعرفش قاله بنتي مسحورة والا ملبوسة وين نندري عليها
قعمزت ع الكرسي: لا حول ولا قوة الا بالله .. مافيش حد مرتاح فيك يادنيا ( شبحلته واذكرت ) معاش كلمت نهال ؟
غسان قعمز مقابلني: لا
رديت عليه: علاش ؟
غسان: مش وقتها .. مش ناقص انا
تعصبت: شن دخلها هيا ؟ .. هكي احسن باش كان ماصارش نصيب لا يوجعك قلبك لا قلبها
غسان: اضحك انت .. تحساب اي وحدة تقدر توجعلي قلبي ؟
قلبت عيوني: ياراجل ! .. اسمع ( قطع كلامي مسج ع الفيسبوك فتحته انصدمت ) هادي نهال
استغرب غسان نتض يجري جي بحداي : خيرها !؟
سكرت تليفوني وشبحتله بستفزاز: مش ماتهمكش !؟
غسان: ماتخلينيش نفصل عليك .. شن باعتتلك المصيبة !
ضحكت وفتحت تليفوني وقريت المسج: المصيبة بعتت .. السلام عليكم خوي معاوية كيف حالك ؟ حبيت نطمن ع صديقك غسان سامحني ع التطفل لكن لقيتك اقرب صديق ليه وشكرا
سكرت تليفوني: ها شن نرد ؟
شد تليفونه : كيف عرفت انك اقرب صديق واصلا انا مقايل انه خوي معاوية ؟
ضحكت ع غبائه: اكيد في بوست معترف بقرابتي ليك وبعدين فسرت انك صديقي مش خوي ممكن اللقب او اسم الاب وين نندري ؟
غسان باستغراب: مش مداير اسم بوي الحقاني .. المهم توا ماتردش عليها
فتح الباب وطلع بعدين رجع: معاوية رد بالك ترد عليها
ضحكت: تي باهي
………………
نقرض في البصل: كيف مسحورة ؟
حذيفة مقعمز ع رخامة المطبخ: مانعرفش لكن حسب مايحكي بوها انها فالحة في كل شي
ضحكت وحطيت البصل في الطنجرة: يعني كان فالحة يسحروها ؟
حذيفة: امالا شنو ؟ .. توا يحسدوك حتى ع دم وجهك
استغربت: آهو كِنان الله يرحمه
حذيفة: شوف شن دارو فيه من الحسد
خديت طماطم الحكة: باهي توا انت عالجتها والا كيف ؟
ضحك حذيفة: شن عالجتها مصحك .. حتى الحوش ماخشيتله كلمتله شيخي في الجامع اكيد يعرف حد
رديت عليه: ربي يشفيها ويعافيها
حذيفة: هيا مسكينة ماعندها حد .. خوتها متزوجين وعايشين حياتهم مش مدورين لا بوهم لا اختهم
نقصت النار الطنجرة: امها متوفية ؟
حذيفة: حسب مافهمت من لما كانت صغيرة متوفية
رديت عليه وانا نغسل في ايديا: الله يرحمها
………….
حطيت المكرونة في صفرة وناديت عليهم: تعالو تغدو
نزلو الزوز يجرو من الدروج سباق .. غسان ديما رابح لانه خفيف عقل ووزن الزوز .. بوي قعمز خدي كاشيكه وبدي ياكل .. كنت نراقب فيه ومتوجع ع وضعه .. تغير بوي معاش زي قبل .. لكن وجوده بينا مهون عليا ونحمد في ربي عليه مليون مرة .. زعما يللي فقدو اهاليهم وهما كبار شن وضعهم ؟
غسان: بوي تمشي تخطبلي ؟
ضحكت: شن مش مازال ومش وقتها ووو شن صار ؟
غسان: صكر فمك تربح وخلي الموضوع يمشي ع حاله
حذيفة خبطله كتفه: ربي يتمم ع خير
أما بوي شبحلي وقال: معاوية من هالشباب ؟
لحظة صمت وقهر ووجع .. كلنا نشبحو لبعض .. انكمدنا باللقمة .. تنهدت وابتسمتله: هادم خوتي
بوي: خيرهم ماروحوش لليوم ؟
دمعت عين حذيفة: ماتبيناش نجوك شكله ؟
ضحك بوي ببراءة وعفوية: لا تفضلو الحوش حوشكم
غسان حط كاشيكه وناض لداره .. لحقته ( غسان .. غسان وقف )
تلفتلي والدموع في عيونه: شن تبي ؟
رديت وانا داهش: خيرك ماكملتش غداك ؟
غسان: شبعت بنطلع للشباب
تنهدت ومارديتش عليه .. حسيت بوجعه اكيد يفكر كيف بيخطبها ؟ .. وكيف بيتكلم مع الناس وماعنداش من مسانده غير بوي .. وبوي مش ع عقله ؟ .. رجعت للصفرة لقيت بوي صوته عالي وحذف الصفرة ع طول ايده .. اول مرة نشوفه بالحالة هادي اضايقت عليه .. شديته من ايديه وقعدت نهدي فيه : آووش خيرك بوي شن في من ضايقك ؟
قعمز وهدي شويا وشبحلي: هدا والله مامزبوط معاش تخليه يجينا
تلفتت لحذيفة: شن قلتله ؟
حذيفة كان مرعوب: والله ماقلت حاجة .. سألني ع امه قلتله توفت بس
ناض بوي من جديد يعلي في صوته: سكر فمك ياحيوان امي عايشة .. والله ماتتحشم اعتبرها امك
شديت بوي بهدوء وسميت بالرحمان: استهدى بالله يابوي حذيفة مايعرفهاش هذا علاش
حذيفة شبحلي مستغرب .. شبحتله وهمست: قول اي شي
حذيفة استدرك الموقف: سامحني يابوي تلخبطت بس
طلع حذيفة من الدار وفي عيونه دموع .. انا هديت بوي وقعمزته وبوست ع راسه : معليشي صغير يتعلم
ركز في عيوني قاللي: علاش تبكي ياولدي ؟ .. ماتخافش انا نحميك منهم
تغمرته وتنهدت: عارفك والله ربي مايحرمني منك
وفي داخلي قلت ( بتحميني من خوتي يللي ربيتنا مع بعض .. انت قربتنا من بعض .. بتحميني منك ؟ )
#Dudu
