مُعاوية(ليبية_منقولة)

الحلقة 21

#مُعــاويــة

:: 21 ::

طلعت من الدوش لقيتها قاعدة في مكانها .. خيرها هادي ؟
رغد !
تلفتت: نعم !
حسيتها مرتبكة استغربت
قدمتلها : خيرك رغد ؟
صوتها في الرعشة: لا شي غير تحشمت نخش بروحي
استغربت : تمام هاتي ايدك
خديت بايدها دخلتها للدار ورديت عليها الباب: بدلي نراجي فيك
ابتسمت: تمام
طلعت للمطبخ فتحت الثلاجة ونلقى الجراد لام ماهناك من شكلاطة وفاكهة خيرهم هادم ؟ .. تنهدت
ربع ساعة وطلعت وضامة ايديها لبعض وتفرك فيهم
كانت لابسة روب وردي طويل خايل عليها
ابتسمت: هي تعالي شوفي شن ناكلو
ضحكت بخجل: اللي في خاطرك ماتفرقش
اللي في خاطري الله يبارك كملو صغاركم .. مش مشكلة طلعت لبنة وطنجرة القلاية الشباب حطولي منها وعصير وفاكهة .. وجبت خبزة سورية حطيتهم في صفرة ..
وحطيتها ع سجاد الصالون : ان شا الله تو نديروله طاولة
جت قعمزت جنبي: اي عادي
ابتسمت: مدي ايدك كولي هي
بدت تاكل شوي شوي كانت متحشمة .. وانا ابدا ماتحشمت كنت جعان ليلتها ..
مسحت ايديا: هي خللي نصلو .. توضيتي ولاه !
رفعت عيونها فيا: ءء لا
ابتسمت: خلاص خللي نرفع الصفرة وانتي بري توضي باش نصلو
رغد: تمام حاضر
رفعت الصفرة وفرشت السجادة وناديت : رغد هيا
طلعت من الحمام مازالت بتسريحتها بس المكياج ماسحاته: هيا جيت
شبحتلها باستغراب: بنصلو
شبحتلي: ماهو انا ( بلعت ريقها ) ماجبتش معاي بدلة صلاة
استغربت: تمام جيبي عبايتك
ابتسمت بخجل: حاضر
مشت طلعت عبايتها ولفت ع راسها وشاح وجت ..
ابتسمت: الوشاح مش للصلاة غلط
شبحتلي باستغراب: كيف يعني ؟
خديت الوشاح وفتحته: لانه مايسترش جسمك من فوق .. ماتعرفيهاش المعلومة هادي ؟
هزت راسها بالنفي
خديت حطيت الوشاح بطوله ودرتلها خلال: هكي نوعا ما باهي .. غدوا ناخدلك بدلة صلاة انتي علاش ماجبتيش متاعك ؟
واطت عيونها: ماعنديش
استغربت: اها .. خلاص هي استقيمي خللي نصلو
عدلت وقفتها وراي وبديت في الصلاة
بعد سلمت رفعت ايديا للدعاء جت قعمزت جنبي واتكت ع كتفي ..
نزلت ايديا : هي ارفعي ايديك وادعي معاي
ابتسمت: تمام
رفعت ايديها وبديت في الدعاء بصوت واضح

اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه

رددت وراي وبعدين قلنا : آمين
مسحت ع وجهي ومسحت ع وجهها ونضت رفعت السجادة وقفت معاي نحت عبايتها ووشاحها وردتهم للدار
شديتها من ايدها وقعمزتها ع حافة السرير
كانت الابتسامة تعلو وجهي: رغد .. انتي توا حلالي ومرتي .. وانا مانبي ندير شي غصبا عنك ونزعلك
ابتسمت وكيف بتتكلم
استرسلت: ماتتكلميش اسمعيني بس .. انا هنا سندك وذراعك تبي اي شي تطلبيه مني انا انخلقت باش نكون نصك الثاني وانتي نصي .. ومعاك بنكمل ديني ساعديني ونساعدك نرضو ربي وحياتنا تنوّر .. ردي بالك يصير بينا مايصير مايطلعش برا انا والله ماعندي خبرة في البنات بس اطلبي مني نديرلك كدا وكدا ومع الوقت ح نفهم اكيد ونتعود عليك وتتعودي عليا .. نصلحو حالنا بحالنا .. تمام رغودتي !
ضحكت: حاضر
بوست ع راسها ..
………………………..
الصبح نضت بكري لقيتها مازالت راقدة بوست ع راسها وابتسمت .. فاقت بيا
بصوت مليان نوم: صباح الخير
ابتسمت: صباح الورد ( شفت للروشن ) نوضي صحصحي وصلي الصبح وانا بندير دورة ع خوتي ونجي
تكسلت وتنهدت براحة: ضروري ؟
وقفت كيف بنرد عليها سمعت الباب يطق لبست تيشرتي وابتسمتلها ومشيت فتحت الباب
غسان: صباحية مباركة ياعريس
كان قايم صفرة فطور متكامل ..
ضحكت: يعطيك دعوة شن جابك ؟
غسان فنص عيونه: من توا تغيرت علينا ؟
ضحكت وخديت الصفرة منه: لا كنت نازل بنشوفكم
غسان ضحك: هي كولو من تحت يديات حذوفة نايضة من الفجر يعجن ويبل لين طلعت الصفرة هكي
لفيت بعيوني ع الصفرة: بارك الله فيكم
غسان لوحلي بايده سلام: نتلاقو معوشة
رديت عليه: تمام
سكرت الباب برجلي وكيف بناديها لقيتها لابسة طرف طويل ومستور ومتكية ع كتف الباب
شبحتلها وابتسمت: هي بحبحي فطورنا واتي اليوم
ضحكت وقدمت شافت الصفرة: يعطيهم الصحة
حطيت الصفرة ع السجادة وقلتلها: هي صلي وتعالي
شبحتلي : وانت صليت ؟
هزيت راسي بالايجاب وحطيت خيار في فمي : مم
ابتسمت ومشت للحمام .. ممكن ربع ساعة وطلعت لابسة روب الدوش ولافة شعرها بالفوطة .. ولبست وطلعت قعمزت بحداي وبدينا في الفطور
رغد: معاوية عرفني عليك ؟
شبحتلها وضحكت: شن تبي تعرفي ؟
رغد وهي تاكل: اي شي
ابتسمت: تمام انا نحب المكرونة باي نوع نموت فيها
نخصتني ع رجلي: مكرونة شنو مبردك عاد
ضحكت: ماهو وضحي سؤالك شن تبي تعرفي بالزبط ؟
لفت بعيونها فوق: متلا شن تحب في البنت شن اكتر شي يعجبك فيها ؟
انا ومنهمك في الاكل: يعجبني احترامها لنفسها وللناس وادبها وحشمتها في لبسها
لوت فمها: انت محترم هلبا لين مفسد ره
قمت عيوني فيها: وانتي شن تحبي فيا ؟
ضمت شواربها وابتسمت: نحب معاوية باي شكل من الاشكال
ضحكت: والله وكيف هادي ؟
رغد: يعني نحبك انت وقلتلك من زمان نحبك وماحبيت غيرك
انا: شن يعني الحب يابنت مسعود ؟
رغد خبطتني بالخفيف: معاش تقول بنت مسعود قول حبيبتي
انا: اوبااا كبيرة هادي وصعبة عليا بالشويا بالشويا تو نقولهالك حاضر
ضحكت: يؤبرني الخجلان
شديتها من خشمها بالخفيف: ربي يدوملي هالضحكة
ابتسمت بخجل وواطت راسها واستمرينا في الفطور الغرامي
…………
بلعت ريقها بصعوبة ..
لامست خدودها : خلاص اهدي مافيش داعي تتوتري هكي امتى تحسي روحك مرتاحة انا تحت امرك تمام !
هزت راسها بخوف ..
ابتسمت: رغودي خلاص والله
نضت لبست وعدلت روحي ومشيت للمطبخ درت قهوة .. هي لبست شورت اسود وتيشرت وردي ولمت شعرها كودا وجتني
اتكت ع الباب: معاوية علاش انت طيب هلبا هكي ؟
استغربت سؤالها: ماتربيتش ع العنف
ابتسمت وجت قعمزت ع الرخامة: شن تبيني نديرلك غداك
جيت قربت منها وعيوني في عيونها: اللي في خاطرك
رغد حطت ايديها ع وجهي: ياربي منك
تنهدت: ياحليلي انا منك .. قداش بنصبر
ضحكت بخجل: خلاص عاد
وكيف قربت منها فاجت القهوة: حظي زفت
ضحكت وطلعت من المطبخ تجري
صبيتها في فنجان وطلعت للبلاكونا نشرب فيها وشفتلكم شوفة .. اماليها تلات سيارات جايين هنا مداهمة هادي مش زيارة
خشيت: رغد يارغد
طلعت تجري: نعم
انا: اماليك كلهم جو
خبطت ع وجهها: واااك منهم
ضحكت: البسي كويس وطلعيلي سوريتي العربية بننزل للولاد لوطة
رغد: حاضر
…………………
حذيفة: خيرك تحوس دوختلي راسي
تلفتت وايدي نمرر فيها ع لحيتي: ياراجل لاش جايين من صباحات ربي
حذيفة ضحك: راهي قاعدة معاك العمر كله .. تو بيهدرزو عليها شويا وبيروحو ( مدلي الصفرة ) هاك ارفعلهم القهوة
شبحتله باستغراب: من ذهاب شيرتي نسيت نقولك ان المفروض رغد اديرها
ابتسم : معليشي قاعدة عروسة وجديدة
ابتسمت: اي والله عروسة
رفعت الصفرة وضيفتهم وهدرزو شويا وبعدين خدو بعضهم وروحو
ركبتلها طول لقيتها تغسل في الاماعين وحسيت من وجهها باكية رفعت شعرها من ع وجهها
عقدت حواجبي: خيرها رغودتي ؟
رغد تحاول تمسك دموعها: شي مضايقة بس
خديت ايدها وقربتها مني : شن اللي مضايقك .. مش كانو غواليك عندك ؟
رفعت عيونها فيا: انت مش عارف شي
استغربت: كيف احكيلي
كيف بتتكلم شهقت خنقتها العبرة خديتها في حضني ( اووشش خلاص اهدي )
كنت حاضنها وهي تبكي لعند هدت شويا رفعت راسها
شبحتلي بتركيز: معاوية انا والله نحبك
ابتسمت ورفعت شعرها: حتى انا
بانتباه اكتر: تحبني انت ؟
ارتبكت: خلاص عاد بتشديها جرتي ؟
مسحت دموعها وعدلت شعرها: جو نكدو عليا
تنهدت: ماعاش يللي ينكد عليك .. قولي شن في ؟ .. عمي مسعود صايرتله حاجة ؟
ابتسمت: عمك مسعود احلا شي داره في حياته ان زوجني ليك
ابتسمت بحب: والله ؟؟ .. مايجيش يوم وتندمي ع عمق حبك هذا ؟
رفعت كتافها بثقة: لا وانت ؟
حضنتها بقوة: لا .. طول ماانتي معاي صريحة وواضحة انا مش ح نندم
وسط حضني سمعت نفسها وابتسمت: خليها في وقتها ميمو
قمتها فوق: ميمو ماميمو فكينا منها .. اسمي معاوية تمام !
ضحكت بفرح: اصلا اسمك مش محتاج دلع
لفيت بيها بالقوة: ايوا شطورة
ضحكت: خلاص نزلني بطني
ضحكت ونزلتها وقفت ع رجليها : شفت ها الساعة 3 وماتغديناش
شفت للساعة: اووو اهم شي صليتي الظهر ولاه ؟
ارتبكت ولاحظت ارتباكها: اي صليت ( حطت شعرها ورا وذانها ) انا اليوم بنذوقك انت وخوتك مكرونتي شن رايك ؟
حضنتها من الخلف: نشوفو من احلا مكرونتك والا مكرونة حذيفة
ضحكت: مكرونتي تغلب
رفعت راسي: نشوفو
………………..
فات اسبوع من احلا ايام حياتي .. غارق في العسل والكلام الحلو .. جي يوم زيارتها لاماليها .. لبست قفطان لونه احمر مخصر راسم جسمها رسم ودارت مكياجها ولفت شعرها فلو ع قولتها .. وطلعت ملكة بالاحمر
لبست عبايتها: معاوية حبيبي انا واتية
خديت مفاتيحي: هيا
ركبت السيارة معاي اول مرة شديت ايدها وبوستها : بطول عمرك ياغلاي
ضحكت وسحبت ايدها: عيب يشوفونا خوتك
ضحكت: هي توكلنا ع الله
رفعتها لاماليها .. نزلت واستقبلوها بالزغاريط .. انطفي اي صوت مجاورني لما شفت باب حوشنا الاول مفتوح وفي حركة وقدامه سيارتين .. وخرت شعري بايدي وقدمت باستغراب .. لقيت طفل في عمر 7 سنوات تقريبا وقفت عليه وانا في حالة ذهول شن صاير ومن انتم ؟
حطيت ايدي ع كتفه ونزلت لمستواه وحولت نظارتي: عمو علاش واقف هنا ؟
شبحلي الولد وابتسم: حوشنا الجديد
استغربت ووقفت: حوشكم ؟
هز راسه الولد: اناديلك بابا ؟
ابتسمت ع جنب: لالا ربي يهنيكم بيه
لبست نظارتي وركبت سيارتي وتنهدت .. يعني خلاص قدرت تستفيد من عمك وهوا حي ؟ .. تاكل في رزقه ولاعب فيه وهوا حي ؟ .. ورثه وهوا مازال يتنفس ؟ وفوق التراب مش تحته يامحمود .. فوق التراب عمك .. رفعت تليفوني واتصلت بعمي كريم
عبد الكريم: اهلين ياعريس كيف حالك ؟
ترددت وبعدين تنهدت
عبد الكريم: خير ان شا الله شكله في موضوع صاير تعالالي في الحوش انا قاعد
تمام جاي هي
ولعت سيارتي وطفيتها قدام حوشه ونزلت وانا رجليا مش قادر نوقف عليهم .. بعد الترحيب
عبد الكريم: قعمز ياولدي شن في ؟
حطيت نظارتي: عمي .. حوش بوي الاول انباع
طبطب ع رجلي: ياولدي قلتلك مايقدرش يبيعه
استغربت: بس انا شفت ناس وولدهم قاللي حوشنا الجديد
ابتسم: يقدر يأجره بس بيع لا اطمن
تنهدت: راك تفهمني غلط .. بس لما نشوف رزقه هكي صاير فيه نزيد نخاف عليه ( شبحتله بحدة ) نخاف من الدنيا من غيره
ابتسم: ريح بالك وربي يطول عمره يارب
اطمنت نوعا ما : ومعاشه ؟
تنهد: معاشه متحول تلقائيا لمحمود بحكم قرابته .. ف خلاص يعتبر التوكيل والتصرف عنده هوا
واطيت راسي: بس انا مايهمنيش وسخ دنيا .. نبي بوي بس
ابتسم بوجع: بوك يامعاوية مش داري ع روحه وين يعني توا في مرحلة لا يعرف فلوسه لا رزقه ولا شي يخصه .. المعاملة معاه توا كـ طفل يتحسس من ابسط كلمة ويضايق منها .. اهم شي ملتزمين بأدويته ولاه ؟
هزيت راسي بالايجاب: حاليا حذيفة متكفل بيه .. غير يبدا السيمستر بناخده عندي
ابتسم: والله لو من صلبه مااعتقدش يديرو ديركم .. ربي يبارك فيكم
ابتسمت ووقفت: هكي ريحتني نقدر نروح وانا مطمن
وقف وسلم عليا: سلملي عليهم وربي يهنيك ياولدي ويرزقك بالذرية الصالحة
الذرية الصالحة ؟ .. وانا قاعد مالمستهاش ؟ .. مخاوفها هلبا البنت وعندها وجع وتاريخ مش راضية تتكلم عليه .. بس اللي متاكد منه انها نظيفة وماعليهاش اي غبار ..
رجعت للحوش وقعدت مع بوي مدة حسيتها طويلة في غيابها .. بديت تتعلق بيها يامعاوية .. بدت حياتك وجزء منك لا يتجزء .. حسيتها عطلت عند اماليها تو ليها 25 سنة عندهم حبكت يعني لازم تشوفهم بعد اسبوع وتعطل ؟
اتصلت بيها: وتي روحك جاي بنروح بيك
رغد: مازال بكري معاوية عاد
بتعصب: مافيش بكري جايك توا
ولعت سيارتي وطيارة ع شارعهم .. خطمت ع الورشة قبل ماننزل لحوشهم لقيت طارق مداير رجليه ع الحيط ومستند بالكرسي خلعته قريب طاح
طارق: خير بلاك ؟
وانا نضحك: خيرك انخلعت ؟
جبدت كرسي وقعمزت: شن امور الورشة في غيابي ؟
طارق : ماشية ع الكيف .. وانت شن جايني هنا ليك اسبوع بس بالك تحساب روحك غبت قرن ؟
ضحكت: استاحشتك
طارق: كذاب .. حوش نساباتك خطوتين وشكلك حاط العويلة هنا
ضحكت: اي كيف عرفت ؟
طارق: تلمحت سيارتك امبكري كذبت عيوني
خبطته ع كتفه: جيت بنسأل عليك بس .. هي ماشي
لولحلي بايده: سلام ياعريس
……………..
في الطريق
رغد: ومنين عرفتيه وكم عمره وكيف شكله وريني صورته وسعدودك لا عزوز ولا شيباني ولا حموات غبر .. رغد شن درتو اول ليلة ووو .. تعرف لين فديت من اسئلتهم
انا: وعلاش ماتبيش تروحي مادامك فديتي ؟
رغد: نقيس في غلاي
شديت ايدها: ايح مصرع عاد
رغد سحبتها: عيب الطريق
انا: باهي شن جاوبتيهم انتي ؟
رغد بثقة: الحب رفعني ليه مانعرف شي تاني
ضحكت بهزوة: حب عينك .. قولي نصيبي وربي جابه
شبحتلي: اي هكي قلت
شبحتلها: تكذبي ؟ ( ضحكت ) عادي فوتهالك
لوت شاربها: مبردك عاد
انا: شن تغديتي ؟
رغد: اي مرت خوي البلوة دارت رز حتى الكلاب ماياكلوه
ضحكت بدموعي: اسمها بلوة ؟
رغد: تي لا .. هيا بلوة تمشي ع الارض
لفيت بعيوني ع الطريق: تمام شن ناخدو للعشي ؟
رغد: بيتزا نحبها
شبحتلها وابتسمت: قاعدة خايفة مني ؟
ارتبكت: كيف خايفة مني ؟
درست السيارة ع مقهى للبيتزا: خايفة مني يعني خايفة نقربك
هزت راسها بخوف: مش هكي بس خليني ع راحتي معوشة
ابتسمت وغمضت عيوني: حاضر .. ننزل ناخدلك بيتزا ونجي
هزت راسها: تمام
فتحت باكو البيتزا وطلعت تليفونها وتشك تشك تصوير وشدت ايدي وبتصور
دفيتها: خيرك هبلتي ؟
بدلع: حبيبي شن فيها صورة عادية ؟
فنصت فيها: كولي ريحيني من التفاهات متاعك
رغد: قصدك انا تافهة ؟
انا: رغد تربحي
رغد: خلاص مانبيش ناكل
شديت ايدها: خلاص ياستي اسف .. وانا قصدي اللقطات اهما مش للتريس هكي نحس
شبحتلي بدلع: انت هكي تقول اما انا عندي راي تاني .. نبي نكيد نساوين خوتي العزايز
فنصت فيها: رغد فكينا من الكلام ع الناس .. عيب ره
لوت شاربها: باهي باه .. كول يامنكدي كول

……………
ركبت بعد اطمنت ع بوي بعد ماتعشى فتحت الباب .. لقيتها راقدة في الدار .. استغربت فيها راقدة توا ..
نوضتها بهدوء: رغد رغد
فتحت عيونها بصعوبة: روحت حبيبي ؟
قعمزت ع حافة السرير وحولتها شعرها: اي خيرك راقدة توا والحوش طافي ضيه ؟
قعمزت وتكسلت: كسدت قلت نرقد
انا: اها .. باه صليتي العشي ؟
هزت راسها بالايجاب: اي حبيبي اكيد
استغربت: متاكدة ؟
ضحكت في صوتها النعسة: معقولة بنكدب عليك ؟
وقفت وحطيت عيوني ع الروشن وقت سمعت الاذان ملامح وجهها تغيرو وشبحتلي بصدمة
تلفتلها: قلتيلي متاكدة ؟
نزلت من السرير وحضنتني: مدروخني النوم ياعمري
بعدتها عليا: رغد فيك شي مش طبيعي ره .. بديتي تخوفي فيا منك
شبحتلي بصدمة: كيف يعني ؟
تنهدت: ماقصدي شي .. ( خديت الكيسة يللي جبتهالها ) تفضلي
خدت الكيسة وشافتها: ملاية صلاة ؟
هزيت راسي: اي .. وفي مصحف في قجر الدولاب اكيد شفتيه
بربكة واضحة: اي
مسحت ع لحيتي: عطلت بيها الملاية لاني ماعرفتش وين ممكن نحصلها لفيت ع كدا محل
تم الاذان رفعت عيوني: هي توضي خللي نصلو جماعة
هزت راسها: حاضر هي 

#Dudu