#مُعــاويــة
:: 13 ::
( عمي مسعود كيف حالك ؟ .. اتصلت بيك لو في امكانية الخميس نزوركم ونديرو رؤية شرعية بالك البنت عندها راي تاني .. تمام باذن الله السلام عليكم )
………………
نراجي في الخميس بالساعة وبالدقيقة ممكن بالثانية بالتعبير الاصح .. واقف نغسل في اماعيين العشي خطرت في بالي
في جنينة وحدنا نا والزين تحت التوت في ظله قعدنا ❤️
في جنينة غلانا والتفاح والمشمش معانا ذقنا الحب في جنة هوانا سهرنا الليل معادش رقدنا💕
ﻓﻲ ﺟﻨﻴﻨﺔ ﻛﺒﻴﺮﺓ ﻳﺎ ﺍﻟﺤﻼﻝ ﻣﺶ ﻧﺎﺳﻲ ﺍﻟﺤﺴﻴﺮﺓ ﻳﺎ ﻣﺒﻬﺎﻙ
ﻣﺶ ﻧﺎﺳﻲ ﺍﻟﺤﺴﻴﺮﺓ ﻧﺴﻴﻨﺎ ﺍﻟﻨﻮﻡ ﻣﻌﺪ ﻓﻴﻪ رقدنا..ﻧﺎ ﻭﺍﻟﺰﻳﻦ
في جنينه وحدنا نا والزين❤️
ﻓﻲ ﺟﻨﻴﻨﺔ ﻏﻼﻧﺎ ﻭﺍﻟﺮﻣﺎﻥ ﻭﺍﻟﻤﺸﻤﺶ ﺣﺪﺍﻧﺎ ﻭﻭﺭﺩ ﺍﻟﺤﺐ يزود هنانا نسينا النوم ماعادش رقدنا نا والزين❤️
في جنينه وحدنا نا والزين❤️
خش غسان قعد يدربك ع الرخامة ويغني معاي .. وكذلك حذيفة باعتبار انها الاغنية قديمة ف كان حافظ منها شويا ف شاركنا الفن
غسان يغني بكل حواسه ونحس انه كل كلمة يقولها كان يقصدها ع نهال .. ( نسينا النوم ماعادش رقدنا )
فعلا نسينا النوم .. كملت الاماعيين تلفتلهم وصفقت : حي الله فرقة حسبالله
ضحك حذيفة: هبلتوني جرتكم
غسان: بكل الاغنية اهيا تنخص هنا ( اشر ع قلبه ) اقسم بالله
حذيفة: استغفر الله
غسان لوي فمه مش عاجبه : بدي يستغفر الفنان
مسحت ايديا : بالله ماتقلبوهاش مشاكل فكوني .. بنطلع للسوق بعدين بنوازي طرحة
ضحك غسان وبدي يلف ويدور حوليا: اشييي اشيييي بيطرح الباشا
ضحكت بخجل: عقبالك
خبطني ع كتفي: انت قول وفعل بالله اما انا ماعندي كان الدوة
حذيفة بضجر: بدينا في دسكة النكد .. ياودي ماواتتش نمشولها حورية البحر
غسان مشاله لواله ايده لين توجع حذيفة: بلا تسهويك يافرخ خيرلك ره
حذيفة يضحك: ارخيني ياعيل خلاص
تنهدت: والله انتم الزوز عواويل.. من بيمشي معاي ؟
كيف بيتكلم غسان رن تليفونه وشن شاف الرقم لقاها نهال: هادي نهال ( باستغراب ) ردلها التليفون والا شن القصة ؟
خفت منه الموقف: خليك طبيعي افتح الخط واسمع الصوت قبل
فتح الخط وكان صوت تليفونه واضح واحني الزوز سمعنا معاه: الو غسان ؟
كان صوت انوثي تباعدنا ولفينا ظهورنا بخجل وضحكنا
شبحلنا وطلع من المطبخ
حذيفة: غدوا عندي تسميع في الجامع نكمل ونمشو مع بعض
شبحتله: مش ناوي تغير الجامع ؟
حذيفة رفع كتافه: لا مرتاح مع شيخي ومايبينش نسيبه اصلا
ابتسمت وخبطت ع كتفه: ربي يوفقك وتحفظ كتاب الله وادير اللي احني ماقدرناش نديروه
حذيفة ابتسم: انتم فشلتو عليه بس .. كان واصلتو راكم زيني توا
تنهدت: عندك الحق
خبط ع كتفي: تبي قول وفعل ع قولة غسان
ضحكت : اشبح شن صار جديد مع البنية
حذيفة تلفت للباب: تو ع خشته لو خشلنا فرحان معناها الامور مستفة ولو قالب وجهه معناها تحمل ماجاك
ضحكت: يستر الله
…………….
ليلتها خلينا غسان البرا يتكلم بالتليفون وانا وحذيفة رقدنا في الدار .. ناض الصبح حذيفة بكري ونسمع فيه يكلم في غسان: مش باهي هكي .. مااختلى اثنان الا كان الشيطان ثالثهما
غسان: صبح ياحذيفة خليني في حالي
حذيفة: مش لمصلحتك ره ولا لمصلحتها يوم تتزوجو تنصدمو في بعض
غسان: زمري عليك فال
حذيفة: غسان انت عارف غلاوتك عندي ومانبيش يوم نشوفك متكدر والله مانتحمل نشوفك مضايق في حياتك فلهذا انا نبيك تفيق لعمرك بس
غسان نفخ بصوت عالي: آوووف حاضر
حذيفة يصفق في ايديه: لا حول ولا قوة الا بالله
تكلمت بصوت عالي: ماتعرفوش تتعاركو الا فوق راسي الواحد لا يرتاح لا ليل لا نهار
حذيفة: مش عراك هذا نقاش
غسان: وخيره الاخ من مضايقه في الليل .. شن حذوفة لقت حذوفتها ؟
حذيفة حذف عليه المخدة: ضم فمك وتحشم
بعدين شبحلي: اكيد معاوية يكلم في بنت مسعود
نفخت وحذفت عليه مخدتي اتخطاها: تحسابنا زيك متاع لوقني ومواعيد
غسان رفع ايديه: هاها قلتوها بروحكم متاع لوقني ومواعيد ومني اللي خلاني هكي ؟ .. ماهو انتم ( بدي يقلد فينا كيف نتكلمو ) استنى ياغسان بوي مريض استنى ياغسان الظروف مش مزبوطة اصبر ياغسان كِنان اشبح خيره
اندفع حذيفة: لا هادي ماجبتش فيها كِنان الله يرحمه ماليشي علاقة
غسان: باهي توا كيف الراي ؟
تكسلت وحكيت عيوني: اقسم بالله الواحد يصبح لله وانا نصبح ع سيرة غسان ونهال قطعتنا ياراجل برا تزوجها وريحنا
غسان قرن حواجبه: شن تحسابها صبلي نشربلك .. تي موضوع وقصة
حذيفة: احكيلنا خرافة ام بسيسي هي
غسان قعمز ع الفراش ربع رجليه: هذا ياحنة
قطعت عليه بضحكة طويلة: بدت تطلق عليك بكلامها ياراجل
غسان ضيق عيونه: محسدي .. ( تلفت لحذيفة ) خللي نكمل .. المهم عرف بوها بالموضوع وقربع الدنيا بس خوتها ماعندهمش علم بشي .. وهيا تقرا تمشي وتروح وبوها قدام الباب يراجي فيها بعدين قالتلي تأسفتله ووعدته وعطيته كلمة انك ح تجي وتخطبني شي يوم .. وانا لتوا ماد وجهي بينكم وشم عارف شن ندير
حذيفة باستغراب: شن استفدت من مكالمتها باه ؟
تنهد غسان: طول المكالمة تعاتب وتلوم كيف تخليني وتبيعني
حذيفة: وانت شنو ؟
غسان وقف ع الروشن وزفر بضيق: انا مش حاكيلها عليا وع حياتي وبوي الحقاني وبوي اللي رباني
خبطت الحيط: ها ريت نقولك قوللها كل شي قوللها وانت شيي تهز في راسك
غسان تلفتلي: بدل ماتوقف معاي تهزبني ؟ .. شن تبيني نحكيلها ! .. وكان تنفر مني
حذيفة: وخللي والله تتقربع شن مافيش غيرها فهالبلاد !
غسان: في غيرها وهلبا بس زيها لا مافيش
حذيفة ضغط ع عيونه
رديت بحدة: شن فيها زايد بالله عليك ؟
غسان تنهد واضايق: حكيتلكم اللي صار توا دبرولي في حل
حذيفة: اليتم مش عيب والظروف اللي انت عايشها خير بهلبا من غيرك في اللي معاه بوه وامه بس مش مرتاح ومكرهينه في عيشته .. غسان خليك واثق من نفسك وبرالها واحكيلها كل شي
رديت عليه : شوفني انا
انفعل غسان: شن نشوفك انت ؟ .. فرق بيني وبينك كبير
وقفت وعيوني في عيونه بتعصب: شن الفرق يعني ؟ .. انت بوك عايش وانا ميت تحت التراب
دفني غسان وبدي يعلي في صوته : ياريته ميت راني مرتاح وبعدين انت كل شويا شوفني انا شوفني .. شن ضروري نكون زيك وندير زيك ؟
قرنت حواجبي: ماتقدرش اصلا
شدني من رقبة تيشرتي: شن قصدك ؟ .. ومن انت باش نكون زيك ؟
حذيفة وقف بينا: صلو ع النبي ياولاد مش هكي
دفه غسان: اطلع منها انت .. يللي ماتغلطش بكل يللي ديما ع صراط المستقيم يللي مافيش زيك في الكون
حذيفة مصدوم: علاش تقول هكي ؟
شديته من ايده ووجهته ليا: غسان دير عقل
دفرني بقوة لين شديت في الحيط: مانيش عاقل وماعنديش عقل اصلا .. تقدر تقوللي انت شن اللي معرقل حياتك ؟ .. مني اللي واقفلك فيها وكل شويا يوضحلك انك بلا عقل ؟ .. تبي بنت مسعود ظرف اسبوعين بتكون حلالك اما انا بنت الناس يللي ربطتها بيا شن مصيرها ولا كلب فيكم فكر فيا وفكر قداش متعذب ومضايق منه الموضوع .. حذيفة فالح يخطبلي كل يوم خطبة شكل وانت شايف روحك الجنتل يللي كلهم طايحين عليه حتى من بنت مسعود شايف روحك عليها .. والخميس ماشي بتشوفها واتم فيها ! يللي ع اساس ماتبيهاش ومش بوي مريض وقاعد عند محمود مش حتى معانا ؟ .. وين مبادئك وكلامك الاول مشً وقته بوي لازم يحضر وتوا تغير كل شي .. وانا ( خلط ع صدره ) وانا شنو ؟ مني حاس بيا ؟ .. من قال غسان خللي نسايروه ع قد عقله ونمشو معاه ؟ .. كلكم تحبو رواحكم ولاهيين في حياتكم وانا قاعد نحمل في ذنوب غيري وانا ماليا ذنب في شي ره
انا وحذيفة مافيش داعي نوصفولكم الموقف .. الاثنين مصدومين .. حذيفة الخوف مجتاحه ع غسان .. طلع غسان برا الاستراحة وقربع الباب .. طلع حذيفة بيلحقه شديته: خليه يهدا تو يروح
حذيفة: ماعنده وين يمشي ره ؟
رديت عليه بخوف: عارف فلهذا تو يرجع
حذيفة انهد حيله ع الصالون: خيره شن صارله ؟ علاش يقول هكي ( شبحلي ) زعما غلطنا فيه حق ؟
قعمزت مقابله: اي عنده الحق الوحيد اللي قاعد غارق في دوامة بينا احني وبين نهال
حذيفة كان يحاول يسيطر ع دقات قلبه وحاط ايده ويرقي في نفسه: والله وجعني رغم انه قال كلام يوجع
طبطبت ع كتفه: معليشي معذور
حذيفة: نتصل بيه ؟
هزيت راسي بالنفي: خليه براحته .. بنمشي ندوش وبنطلع للسوق وتي روحك
حذيفة يشبحلي ومصدوم: تطلع للسوق ولا كأن حاجة صارت ؟
كنت ماشي للحمام وقفت وتلفتله: تبي تشريها معاي حتى انت والا شنو ؟
وقف حذيفة وقارن حواجبه: تي خيرك انت ؟ .. غسان طلع مضايق منك وانت بتكمل يومك هكي عادي ؟
عصبت وعليت صوتي: شن انا بس اللي تكلمت .. وبعدين شن تبيني نديرله انوض نندب توا باش يولي ؟
قرب مني حذيفة: اقسم بالله صدق فيك غسان
وطلع حتى هوا من الحوش .. تنهدت واتكيت ع حافة المدخل وحكيت ع جبهتي بتعصب شن الحل معاهم ؟ .. كملت دوشت وطلعت فطرت وصليت وركبت سيارتي ومشيت هكي هايم مش عارف روحي وين ماشي ؟ .. والا لمن ماشي ؟ ..
لقيت روحي قدام محل ملابس شباب .. درست سيارتي ونزلت .. بين التيشرتات والسواري والسراويل قاعد نلف .. لمحت موقف عجبني وسرحت فيه ..
الوالد: ياولدي هادي تناسب للمناسبة
الشاب: لا يابوي توا ماتشوفش في الطرحات كيف ؟
الوالد: والله انتم جيل ماينعرفله راي تو طالعين من الحوش بتاخد سورية وسروال توا صبحت في بدلة رسمية بكل ؟
الشاب: مش بدلة رسمية تو ادجاكة وسورية ولت بدلة رسمية ؟
الوالد: امالا شن يقولولها ؟
الشاب صاحب المحل يضحك .. اما الولد وبوه عاجزين في اتفاق ع لبسة معينة
قطع سرحاني صاحب المحل : ادور في شي معين ؟
ابتسمت: عندي رؤية شرعية مش عارف شن نختار ؟
ضحك وقال: ربي يتمم ع خير ( قام قطعتين ) عندك هادي وهادي .. ( ردهم وطلع سروال ) هذا يناسب اكتر شي
قمت سروال جينز: عجبني هذا اكتر
الشاب: لا هدا سبور .. انت تحتاج لرسمي شوي باش عمك ينعجب بيك
ضحكت: منعجب بيا قبل ماناخذ حتى بنته
ابتسم: ربي يبارك محظوظ الباين
ابتسمت بنوع من الغرور: من يومي حظي يفلق الصخر قول ماشا الله
ضحك الشاب: ياسيدي الله يبارك وربي يسعدك
كملت اختيار لبستي وخلصت وطلعت .. تلفتت للشاب وبوه يللي مازال يتخاصمو ع الذوق .. ابتسمت وليست نظارتي الشمسية وطلعت
………………
حطيت التوست في الماكينا وقعدت نستنى فيه .. قعمزت ع الكرسي وفتحت تليفوني ع رقم غسان ترددت هلبا باش نتصل بيه .. تنهدت وسكرته وحطيته ع جنب .. شفت للساعة لقيتها 3:00 ظهراً ولتوا ماحد منهم شرّف وين مشو ؟
شميت ريحة حاجة انحرقت اذكرت التوست .. طلعته وقعمزت بعد سخنت الشاهي وقعدت سارح نفكر فيهم .. مكانهم خالي .. طيفهم يلوح يمين يسار .. قعدت بروحك يامعاوية ! .. غرور منك والا تكبر والا قاعد نكابر معاش فهمت روحي .. حكيت جبهتي ومسحت وجهي بتعصب .. تنهدت والتنهيد قلبي ضرّه .. الوحدة موحشة .. والوحشة قاتلة
طارت النية من الماكلة نضت توضيت وفتحت المصحف قلبت صفحاته لين جت ع سورة يوسف قريتها بترتيل ونحاول نجيب كل الاحكام يللي فيها
عن مكيدة الاخوة ليوسف .. عن غيرتهم ع بوهم .. عن حلم في الصغر وتحقق وقت كان الايمان قوي .. ليش خطرت في بالي السورة هادي بالتحديد نقراها ؟
زعما انا يللي كدت لخوتي وخليتهم يتباعدو عليا في الاول كِنان ضربته وكره حياته وانتحر .. واليوم غسان وحذيفة في مرة !!
تعوذت من الشطان .. واتصلت بيهم الاتنين كانو مقفل .. تنهدت وقعدت نفكر وين ممكن يكونو !
………….
صباح يوم الخميس ::
مافيش حد منهم بيّن .. وين مشو بس !
اطريت نواصل يومي اليوم بالذات لاني عاطي كلمة للناس وعيب نوخر ..
طلعت لبستي كانت عبارة عن سورية سماوية ببطم بيج وسروال كاجوال لونه بيج وطلعت سبيدرو ابيض عادي ودخلت السورية في السروال وساويت شعري وبخيت عطري ولبست نظارتي الشمسية ( اطلع طول ) وانا نشوف للمراية غازلت روحي وطلعت
اتصلت بعمي مسعود وخبرته اني في الطريق ربع ساعة ونكون عنده .. اكيد في تجهيزات خفية .. درست السيارة تلفتت يميني حوشنا الاول مظلم ومسكر زي ماخليناه .. تنهدت وتوكلت ع ربي
طفيت السيارة وطقيت ع الباب فتحلي مروان: تفضل معاوية
حولت السبيدرو وخشيت قلت: بسم الله .. السلام عليكم
سمعت صوت عمي مسعود في المربوعة : معاوية تفضل تفضل
أشرلي مروان ع المكان: هنا تفضل
خشيت للمربوعة كانت بأثاث بسيط .. حاطين ع احد زواياها سرير طبي لعمي مسعود .. ابتسمت وسلمت عليه : كيف حالك توا ان شا الله بخير ؟
ابتسم: اي الحمد لله .. انت كيف حالك وحال وخيينك ؟
ابتسمت وتظاهرت السعادة: بخير كلهم
مسعود: قعمز قعمز
قعمزت قريب منه وكان وجهي احمر ومتوتر تمنيت لو خوتي معاي ابتسامة منهم تقويني .. خش مروان
مسعود: وين اختك ؟
شبحلي بحدة: تو تجي
ابتسم عمي مسعود: يااهلين وسهلين بيك اي قوللي شن صار في الحاج خيري ؟
ابتسمت بوجع: والله حجرو حوشه وباقي رزقه والحمد لله
انتخص مروان: وين بتسكنو ان شا الله ؟
فنص فيه عمي مسعود: مش طالب منه حوش انا يهنيني ع بنيتي بس
مروان زفر بضيق: قول ان شا الله
علاش كارهني وحاقد عليا رغم انه مافي بيني وبينه شي
مسعود: اي ياولدي .. انا طالب منك تهنيني ع بنيتي بس اهم شي هناها وانا واثق وعارف لمن عاطي بنتي .. ونبيك تهنيني ع قرايتها ماتوقفهاش عليها
مروان: غير يكمل قرايته .. وبعدين مش مهمة القراية يابوي
شبحله عمي مسعود وتلفتلي: سمعتني معاوية ؟
باين عليا بنحصل حصلة بنت كلب .. شن واحد يتكلم والتاني يرد عليه .. الطير يغني وجناحه يرد عليه ..
مسعود: قبل كل شي انتم توا وين قاعدين ؟
بارتباك: في الاستراحة ماهو باسم حذيفة كاتبها بوي
اندفع مروان: وانت شن كتبلك ؟
سكتت مارديتش وكنت ضام ايديا بتوتر
مسعود شبحله وفنص: مروان نادي اختك
مروان نفخ: باهي
ناض مروان وقف ع الباب وقال: جيبي القهوة
كنت متحشم من وجود بوها ف قال: مروان خليها في الجنان زي مافهمتك
شبحلي مروان ولوي شاربه: تفضل معاوية للجنان
نضت شبحت لعمي مسعود: نستاذن
طلعت من المربوعة ونحس في روحي نرعش مع بعضي .. احتكاكي معدوم بالجنس اللطيف وعمري ماتعاملت معاهم ولو تجيني معاملة انثاوية نبعتها لطارق طول .. طلعت لقيت طاولة وكراسي خديت كرسي وقعمزت ومروان كان مقابلني ويفنص فيا .. زاد من حدة التوتر يللي بينا
طلعت البنت وكانت لابسة عباية وشاربة ع الاسود .. قمت عيوني بنركز فيها كانت جايبة صفرة القهوة .. رن تليفوني رقم غريب من الربكة طلعته وفتحت الخط
( انت معاوية ولاه ؟ )
اي انا من معاي ؟
( بوك في المصحة €€€ اغمي عليه وجبته هنا تعالو تصرفو )
وقفت من الصدمة وقلت: شن تقول ؟
وقف مروان وقاللي : شن في ؟
حطيت ايدي ع كتفه: بوي تعبان .. راجع ان شا الله
لما بنطلع خطمت من جنبها سمعتها قالت: القهوة ؟
#Dudu
