#مُعــاويــة
:: 2 ::
خيري حط راسه لوطة وبحزن: لاني نحبها ( قام عيونه فينا كلنا تحشمنا منه وواطينا روسنا ) خلونا نتكلمو بصراحة وانه احني رجالة زي بعض
كِنان: تحبها وطلقتها ؟
خيري: اي لان خفت نكون سبب في حرمانها للامومة .. مرات تتزوج غيري وتكون ام
معاوية باستغراب: وتزوجت غيرك ؟ .. وجابت صغار ؟
خيري بآسى: مانعرف عليها شي .. اول ماطلقتها حولت من الجيهة يللي كنت فيها كلها وقررت ننساها باش مانصعبش الامور عليها
كِنان: انتم كيف تعرفتو ؟
خيري ضحك بخجل: ماتعرفناش .. النصيب جابنا لبعض ( تلفتله وفنص فيه ببصارة ) وانت ياكُرتيح شن عرفك في الدوة هادي ؟
ضحك كِنان: كبرت توا معاش صغير
معاوية: كيف قدرت تنساها ؟
خيري قام عيونه فوق وتنهد: قلتلك تباعدت نهائي عليها
حذيفة بضيق: وهي ؟
خيري: خيرها ؟
حذيفة: يعني لو كانت تحبك ولو شويا كانت صبرت ياما منهم قعدو سنين مع بعض وبعدين ربي حنّ عليهم ورزقهم بعيل
خيري اضايق اكتر: انا حالتي مستعصية .. عقم أبدي .. كان نخليها ع ذمتي ومايسخرش ربي .. بعد تكبر نقوللها شوفي نصيبك ؟ .. راهو حتى البنت عندها عمر معين لو تجاوزاته الجياب يصعب عليها
كِنان اضايق: في اللي يجيبو صغار لكن مايستاهلوهمش ( قرب كرسيه لبوي ) انت تستاهل تكون أب والله حرام
شدّ بوي ايده وطبطب عليها: ماتقولش هكي ( رشف خشمه ) ربي رزقني بيكم .. وانتم نعمة بالنسبة ليا عمري ما نفرط فيكم
حذيفة بحزن: انت اللي رزق وربي مايحرمنا منك ( وقف وباس راس بوي ) عمري ماحسيتك غير بوي وامي وكل شي
بوي تغمر كنان وحذيفة في مرة وتنهد : خليكم زي ماربيتكم .. حنو ع بعض وماتنسوش بعض مع الدنيا وحوستها
ابتسمت وصورتهم .. سكرت الكاميرا ونضت حضنت بوي وبوسنا ايده .. دموعنا كلنا كنا شادينها .. الا بوي وقف وطلع من المكان وخش لداره .. الاكيد انه يبكي وبيفرغ طاقة حزنه .. اكيد تفكرها اكيد وحنّلها .. الله اعلم توا شن وضعها وشن مدايرة مع الدنيا ؟
مرّت الايام بسرعة البرق ..
كنت مقعمز قدام الورشة وقدامي طاسة قهوة مرة مرة نشرب منها شويا .. جت بنت درست قدام الورشة ونزلت
البنت: هييي انت .. في حد يشوفلي السيارة ؟
مارديتش عليها
البنت تعصبت: نكلم في الحيط انا ؟ .. انت هيي نبي من يشوفلي السيارة
برضو مارديتش عليها
زادت ولعت: وين مديرك هآ ( قدمتلي متعصبة ) اطرش انت والا حمار؟
حذفت طاسة القهوة لين طاحت ونكسرت .. شهقت وخافت
معاوية: تكلمي باسلوب
زمطت ريقها: لو سمحت في من يشوفلي السيارة
وقفت ودرت دورة ع السيارة: شن فيها ؟
البنت: مانعرفش كدا مرة توقف بيا
معاوية: ماشي الحال
ناديت طارق يشوفلها السيارة وهيا واقفة برا الورشة .. وانا قعمزت ع المكتب نعدل في الحسابات .. دورة لقيت طارق خاش
معاوية: شن صار ؟
طارق بعدم اهتمام: تمت الامور
معاوية: تمام
طبست راسي نكمل في الحسابات خشت بكل هدوء وقالتلي: انا اسفة
باللامبالة: حصل خير .. خودي سيارتك وتوكلي
البنت ارتبكت: كم الحساب ؟
معاوية: اشري بيهم اسلوب
تعصبت البنت: ماتصدقش عليا .. نغرقك انا بفلوسي
ضحكت وحطيت البيرو وسكرت المذكرة وقمت عيوني فيها: توا بس قلتلك خودي بيهم اسلوب .. نصيحة مني وخيتي بري تعلمي الاسلوب زي مامتعلمة الحاجات التانية
حسيتها تعصبت بس انا مادرتش اي اهتمام ليها .. خدت بعضها وطلعت ..
خش بعدها ع طول غسان مبتسم: شن هالصاروخ هادي ؟
معاوية: لا صاروخ لا كلاشن .. شن جابك ؟
قعمز ع الكرسي وحط رجل ع رجل: شي سيارتي خاطرها تزورك
ضحكت: طارق بالله شوف سيارة غسان خيرها
طارق جي : اوووو غسو وين ديارك ؟
سلم عليه بالقوة: قاعد في هالعظمى
ضحك طارق: شن صار في قرايتك ووين واصل ؟
غسان اضايق: مافهمتش اللي يشوفني يسأل ع القراية انا بس اللي نقرا في هالبلاد شورا
طارق خبطه ع كتفه: تي نبصرو عليك ياحاج .. اعطيني المفتاح نشوفك العزيزة
مدله المفتاح وطلع طارق
تلفتلي غسان: اسمع بنقولك ع موضوع
معاوية: شن في ؟
غسان قدملي راسه: مانعرفش حاس بوي كانه فيه حاجة مالاحظت شي انت ؟
سرحت شويا وقلت: لا شن صار ؟
غسان وخر كرسيه وولع دخانه .. نفث الدخان: الايام اهيا يدوي هلبا ع الموت والفراق ( تلفتلي بحسرة ) كأنه يودع
وقفت من مكاني ومشيت قعمزت في الكرسي اللي مقابله: فال الله ولا فالك .. ( شديته من تيشرته بالقوة ) انت ماتعرفش تقول كلام باهي بكل ؟
لوح دخانه ودفني: تي انا بنهبل اكتر منك .. بوي هذا
تعصبت: انت بوك حي بعيد عليك صح .. لكن حي
وقف مصدوم: شن قصدك ؟
وقفتله وعيوني شرار: يعني مش ح تحس بينا .. ( أشرت بصبعي السبابة ع صدره ) يعني عندك بديل .. وماعندكش احساس بينا بكل لو فقدناه لا سمح الله
انفتحو عيونه اوسع ودفلي ايدي : صح اي
وطلع يجري من الورشة
طارق مستغرب: غسان السيا…
فك منه المفتاح وسكر كوفينوها القدامي وولعها وطلع يجري
طارق باستغراب: خير دعوته المدروش هذا ؟
خش للورشة لقاني ملوح الكرسي ومتعصب
طارق: خيركم ؟
مارديتش عليه .. خديت مفاتيحي ولعت سيارتي وطلعت للحوش طول
……………………
حذيفة: وانا نقول خيره لم شنطته وطلع
استغربت: شن لم شنطته ؟
حذيفة وقف حط البكرج ع النار: كلمته ماردش عليا .. ( تلفتلي ) بعدين خدي شنطته وطلع وين الله اعلم !
تكلمت بحسرة: وين مشي ؟ .. مش قصدي نجرحه
حذيفة جبد الكرسي وقعمز مقابلني: من امتى بينا هالكلام يامعاوية .. اللي درته غلط .. حتى لو كان بوه حي لكن بمثابة ميت عنده .. لا سأل عليه ولا يندري عليه اصلا .. ( وقف خدي سكرية القهوة ) انا وانت وغسان وكِنان كلنا اهني نفس الوضع اختلاف ظروف صح لكن نفس الوضع .. ( حط القهوة في البكرج ) كبرنا وفتحنا عيونا ع بوي خيري .. وع بعضنا خوت .. وتعاهدنا ولا عمرنا جبدنا سيرة امالينا صح ولاه !
سرحت وقعدت نفكر في كلامه
حذيفة: هآ ذهبتلي شيرتي القهوة فاجت
ابتسمت: كيف نوصل فيه ؟ .. عارف روحي غالط
حذيفة يمسح في الغاز: مانعرفش اليوم هوا وكِنان مختفيين
استغربت: كِنان وين مشي ؟
حذيفة: بعته بوي للمحل وع اساس بيرفعلك غداك للورشة
وقفت وجيت بحداه: ماجانيش
استغرب حذيفة: وين مشي زعما ؟ .. ترا اتصل بيه
اتصلت بيه مرتين ماردش تلفتت لحذيفة: تعرف انشغلت ع كِنان اكتر
حذيفة لوح المنشفة ع اللاوندينو: قاعد قلبك مش صافي ع غسان ياراجل !
شاد تليفوني ونحاول مع كِنان: لالا .. غسان كبير ويدبر راسه لكن كِنان صغير شن بيكون صاير معاه زعما ؟
حذيفة ضحك: معاش تنشغل آهو شويا ويخش ( حط البكرج في الصفرة وحط فنجانين ) حق اتصل بطارق بالك جاه غادي !
معاوية: اي كيف نسيت ! ( شديت تليفوني واتصلت بطارق ) هآ طارق جاك كِنان ؟
طارق رد عليا وهوا ياكل: اي وآهو نتغدا
ضحكت: مصح وجهك غداي هذا
طارق: غير من طيبه اليوم فيه بنة غريبة
ضحكت وقلتله: بيكون ياغسان ياحذيفة
حذيفة يأشر بايده وتكلم: بوي اللي طيب اليوم
ابتسمت وتنهدت: ماشي طارق صحتين
سكرت منه وطلعت من المطبخ لقيت حذيفة ماشي للبلكونة تلفتلي: تعالا اشرب معاي !
ابتسمت: لا صحتين بنرتاح شويا
ركبت لداري وسكرت الباب وتلوحت رقدت
…………………
كنت مقعمز في الجنان وفاتح اللابتوب نتفرج ع فيلم .. كانت الساعة 1:30 في الليل .. سمعت باب الحوش انفتح تلفتت لقيته كِنان حاط برنوص التوب ع راسه وحسيته صقعان
معاوية: كِنان خيرك ؟
تلفتلي وجي قعمز بحداي: شن ادير ؟
وقفت الفيلم: نتفرج .. خيرك مارقدتش لتوا ؟
كِنان بضيق: مضايق
سكرت اللابتوب وحطيته ع جنب وربعت رجليا ع الصالون: شن اللي مضايقك ؟ .. احكيلي
قعد يتلفت يمين يسار: هكي وخلاص
ابتسمت: ياودي ادوي مش ح نقول لحد
كِنان: ولاد الشارع كلهم يتسهوكو عليا من كنت صغير يقولولي يابنية .. والموضوع بدي منرفزني حتى من ولاد فصلي نفس الموضوع . ( نحى برنوصه وكان محلق شعره ) هكي نبان راجل توا ؟
انصدمت لقيته محلق شعره صفر: علاش حلقته ؟
رد برنوصه: كرهوني فيه
كِنان كان شعره اصفر وناعم وطويل .. شعرته غزيرة نحلقوه الجمعة الجمعة اللي بعدها نلقوه طاول الله يبارك .. وعيونه خضر وبشرته بيضا وصافية حتى اللحية ماطلعتله دوناً ع ولاد جيله .. سموه بنية لانه فعلا نقشه لو جي لبنت كانت ملكة جمال ..
ابتسمت وطبطبت ع رجله: ماتعدلش عليهم .. هما عارفينك بتتضايق من كلامهم ف يزيدو فيها عليك ويستفزوك .. ( حطيت ايديا في جيوبي من الصقع ) غدوا ناديلهم غسان يربيهم
كِنان بحسرة: تي غسان بروحه يقوللي فيها مرات
شبحتله لقيت في عيونه الحزن: خلاص ولا يهمك انا ماشي غدوا للمدرسة ونكلمهم
كِنان فرح: عادي نقعد نتفرج معاك
فتحت اللابتوب وحطيته بيني وبينه: رغم انه الفيلم للكبار لكن مشيها هي
كِنان بضيق: هآ ريت
ضحكت وغميته بالبرنوص: ياودي نبصر عليك بس .. عموما نعيماً يااصلع
ضحك: ينعم الله عليك
قعدنا ع الفيلم يللي خدي من وقتها ساعتين تقريبا .. كِنان واخده النوم وحاط راسه ع مسند الصالون .. سكرت اللابتوب وابتسمت .. نوضته بالشويا: كِنان نوض لسريرك
يتكلم وهوا مازال في غفوته: مش بنت انا
ضحكت وهزيت كتافه بالشويا: كِنان حبيبي نوض لسريرك انت سيد التريس
فاق بيا وقال: قلت حاجة انا في نومي ؟
ضحكت عليه: لا .. نوض ارقد تصبح ع خير
تكسل ووقف: غدوا مش ماشي للمدرسة
ضحكت: براحتك .. برا لدارك
خش كِنان للحوش .. قمت تليفوني واتصلت بغسان لقيت تليفونه مصكر .. انشغلت عليه وين زعما بات الليلة ؟
………………..
تاني يوم الصبح فتحت تليفوني لقيتها الاحداش .. نضت تكسلت وتنهدت .. فاتتني صلاة الفجر خشيت للحمام توضيت وصليت .. اتصلت بغسان مرتين مقفل عرفت انه حتى للكلية مامشاش .. خديت مفاتيحي نزلت لقيت بوي يوتي في فطوره قعمزت ع طاولة المطبخ
معاوية: ملّا عملة اديرها فينا ياحويج
#Dudu
