#مُعــاويــة
:: 18 ::
واصلت ماكلتي وماعاش رديت عليه
…………..
حددت يوم الفاتحة وكان يوم الثلاثاء وبما ان ماعندناش عنصر نسائي ف قررنا نديرو فاتحة في الجامع وبعدين يروحو الولاد معانا نتزردو وخلاص ..
غسان: تمام نحطو الصالون هنا !
نلف بعيوني ع الشقة يللي تمت في ظرف شهر ونص وخدت منا مجهود نفسي وجسدي .. يعني لو كنت انا مشغول كان غسان يشتغل عليها وحذيفة متكفل ببوي من كل شي .. عمي عبد الكريم بعتلي هدية العرس كان دولاب مطبخ متكامل وطارق الزبون وناجي خلص نص غرفة النوم بحكم ان شاب وصغير في العمر وحالته ع قده ..
ابتسمت: دير اللي يعجبك
غسان: والموجيرة بالك عندها راي تاني
ضحكت: تجي بعدين ادير رايها
غسان: تم
وهذا حد جهدي وفلوسي درت صالون ومطبخ والدار وعمي مسعود قاللي ( ماعليكش في كهربائيات المطبخ واماعيينها عليا انا )
طق الباب فتحت لقيته طارق : اهلين وسهلين ( تغمرته ) وينك ياراجل
طارق ضحك: اول مابعتلي صورة الزبون ع طول شريته وجيت ( مدلي كيسة ) تفضل ياسلطان
ضحكت وخديته منه شفته وسكرت الكيسة: تفضل حذيفة وبوي في الصالون
خش الداخل: ووين هداكا النفاخ
ضحكت وحطيت الكيسة ع المدخل: اسكت كان يسمعك بس
سلم ع بوي وحذيفة وقعمز: قهوتي صادة
وقف حذيفة : تو نديرها انا
شده طارق من رجله: نبي السلطان يديرها شن مازال ويبدا يفشك بالمدام ديري قهوة ديري شاهي خللي توا نذوقها منه
ضحك حذيفة وانا شبحتله بحدة: واطي
مشيت للكوجينا طلعت البكرج وعبيته امية وحطيته ع النار .. رن تليفوني رقم غريب رديت طول : ايوا
صوت انوثي قاتل : معاوية معاي !
زفرت بضيق : تفضلي !
البنت: انا هنادي عرفتني
فصلت: انا مافهمتش شن تبي في عمي ! .. من موصيك عليا ؟
ضحكت : بالشويا عليك ياسلطان مش باهي تتعصب وتتنرفز عيش ايامك
ضحكت بهزوة: والله ! .. باهي اللي قلتيلي .. طيري
سكرت عليها الخط ورديته في جيبي وصلني منها مسج شفته ( وراك وراك طمن روحك )
تكلمت بصوت واضح : خيرها هادي شن تحس وصلنا لوقت البنت تهدد ياوالله عليك مخطر احرف
ع وقفة حذيفة: هبلت تهدرز مع روحك ؟
تلفتله وضحكت: لالا موضوع في الورشة بس
استغرب: شن في ؟
طلعت الصفرة حطيت فناجين : مافي شي يخوف اطمن .. غير توا وين حطيت المقروض بنحطه
ضحك: فكني من غسان لو يروح مايلقاشي يتفجر فيا
فتحت الدواليب طلعت البن وحطيت في البكرج: خليه عليا غير طلعهولي توا
طلع الحافظة حذيفة حطها ع الطاولة ومشي .. حطيت الصفرة ولحقته قعمزنا نهدرزو طرالها وجرالها لين الوقت فات بسرعة وماحسيناش بيه
……………..
حذيفة كلم شركة تنظيف وجاب عاملة نظفت الحوش كله وخلاته ع اللمسات الاخيرة .. بينما غسان مشي هوا وناجي وجابو بعض التحف وحاجات خفيفة .. وانا وطارق ومعاي بوي ركبنا الستاير وحطينا مستلزمات التنظيف في دولاب الحمام .. وطارق حلف يعبيلي الثلاجة يبارك فيه ربي ..
ناجي: خلااااص اليوم هلكنا
غسان تلوح ع الصالون في شقتي: دهشنا ولقينا بنت في المحل قعدت ترفع فينا وتجيب كسرتلي راسي
ناجي ضحك: عاد انت وين تفهم في الحاجات هادي
غسان: شن لون كوجينتكم وشن لون الصالون وبرا عاد .. حتى فرشة الحمام قالت شن لون فرش الحوش تو شن دخله ؟
ضحك حذيفة: يحكيلي الشيخ ع بناته يقوللي بيهبلوني كل مانطلع يبو حاجة ولما نرفعهم يطلعو بالسوق كله
ضحكت: معناها انا بندعي ربي تكون ضنوتي ولاد بس
غسان فزع: لا تربح جيبلنا بنات نبو من يدلعنا عقاب عمرنا
ضحك حذيفة: شن بتقعد في الرقبة شكلك ؟
غسان قرن حواجبه: خودلك هي
طارق تنهد: لالا عليك وع البنات يامعاوية اسألني انا
حذيفة شبحله باستغراب: انت مش عندك اخت بس ولاه ؟
طارق ابتسم: اي وتزوجت قداش ليها عندها تلات بنات اقسم بالله يشوفوني انا وبوهم راقدين في المربوعة يجو يغطونا ويطبطبو علينا وبوهم بزايد ويبدو يطفطفو عليه اول ماينوض يبدو جرت امهم ديري قهوة لبابا وحلو وكل وحدة تجيبله حاجة اللي امية اللي قهوة اللي كيكة والله قريب نحسده ( ضحك ) شن نحسده حسدته وفات
ابتسمت بحب: ربي يرزقنا البنات انا ماعنديش فرق بين ولد وبنت نحس كل حد ومكانه
حذيفة: البنات موصي عليهم الرسول صلى الله عليه وسلم
بوي تنهد ووقف بابتسامة معبية الوجه وكان سعيد: ووصانا مانضايقوهم ولا نزعلوهم ( رفقاً بالقوارير ) انا ربي مارزقنيش البنات لكن كنت حنون ع اميمتي ووخيتي
شبحنا لبعض باستغراب .. بوي عنده اخت ؟
حذيفة بارتباك: عندك اخت يابوي ؟
طبعا سادت لحظة الصمت .. قعمز بوي وسبقوه دموعه وقال بصوت يرجف: عندي ربي خداها مني قبل ماتكبر ونشوفها عروسة
حذيفة غمض عيونه بصوابعه وتأثر وندم ع سؤاله
غسان جي بحدا بوي : تشوف حفيداتك عرايس وسمي وحدة منهم ع اسم اختك شن رايك ؟
نخصه ناجي وهمسله: اعرف شن اسمها قبل
تلفتله وبنفس درجة الهمس: هوا خللي يتزوج معاوية قبل وبعدين ساهل
ابتسمت وجيت جثيت ع ركابي مقابل بوي : الله يرحمها ويجعل مأوآها الجنة ( بوست ايده ) ولا تبكي ياغالي باذن الله لو طعمني ببنت سميها انت الاسم اللي تحبه وتبيه
سكت بوي شويا وابتسم بعدين قال : بنسميها أمنة ع اسم أم الرسول الحنونة
لفيت بعيوني ع الحاضرين كلهم: واختك شن كان اسمها ؟
بوي طبطب ع ايدي : آمنة
ابتسمت : أمنة معاوية .. أمنة معاوية ( شبحت لحذيفة ) حلو الاسم !
حذيفة غمزلي: مش عادي
غسان ضحك: اضرب هي سمينا بنتك ترا جيبهالنا ننحلوها
خبطته ع رجله: سكر فمك
ضحك وشبح لناجي: شني نجيوة قبل حوش العريس نمشو نضمو حوش العرس
ناجي قرن حواجبه: نجيوة أمك ياكلب
ضحك حذيفة: جاتك في الريش انا يقوللي حذوفة مرة وحدة
غسان يضحك بدموعه: وخيره حذوفة اسم دلع راقي
طارق: بالله مادلعش اسمي اخطاني
ضحكت : وانا كان يقوللي معوشة وبعدين اطوّر يقول مومو
غسان شبحلي: تو بنقولك بو أمنة
بوي ابتسم: اي حلو انت يامعاوية سمي أمنة .. ( أشر بصبعه ع الجميع ) كلكم سمو أمنة
غسان: لا يابوي مااتفقناش هكي .. بنتلخبطو ره
ضحكت: حاضر يابوي كلنا أمنة .. ( أشرت ع حذيفة ) أمنة حذيفة ( أشرت ع غسان ) وأمنة غسان ( وأشرت ع طارق وناجي ) هادم فوتهم خللي يسمو ع امهاتهم
ضحكو الزوز ..
طارق : انا بنسمي أمنة بنتبعكم
ناجي: قعدت غير انا .. أمنة ناجي الله يبارك علينا النساوين مايحكموش فينا
ضحكت ووقفت: هي ننزلو انديرو بكبوكي جعت
غسان وقف: هات ايدك يابوي ( شد ايد بوي ) انا بندير دورة ببوي كملوها نادوني
حذيفة: هادي كتحة لا دورة لا هم يحزنون
ضحكنا وعارفينه مش متاع عوالة ديما هرّاب من الحوسة
…………….
جي يوم الخميس المترقب .. وبدت مراسم الفاتحة .. حذيفة طلع بيجيب الشيخ وغسان قعد مع بوي يحوس عليه .. وانا في الدار متوتر طلعت زبوني ولوازمه .. وقعدت نستنى .. ناجي مشي جابلي العبمبر والروزاطة وطارق موصي ع بكلاوة ليه ايام وتلخبطوله في الطلبية قعد يلف ع المحلات يدور في العدد المحسوب ..
حذيفة: اي اي في جامع @@@ خلاص هي شويا وجايكم
خشلي للدار: قاعد مابدلتش ؟
شبحتله لابس زبون ازرق كحلي متكامل وساعته الفضية ..
ابتسمت: ماشا الله طالع عليك اللون
حذيفة ضحك : بدل ياراجل معاش وقت
ابتسمت : تمام هي
خديت قمت الزبون وحطيته: حذيفة!
حذيفة كيف بيسكر الباب رجعلي: نعم
في رجفة في صوتي وعيوني لانو وضعفو نزلو دموعي: تمنيت ( سكتت وبعدين قلت ) تمنيت بوي بصحته هكي ويحضر معانا كل شي
واطى راسه حذيفة بألم: حتى هكي يامعاوية هوا موجود حوالينا وحاس بينا .. ( رفع راسه وشبحلي ) الحمد لله يامعاوية ربي جبار الخواطر
ابتسمت وقدمتله: حذيفة
صوته يرجف وشبه اختفى: نعم
خديت في حضني وهمسلته: كيف نكون زيك علمني .. كيف نحس بالحمد كيف ؟ كيف نستطعمها الكلمة ونرتاح بيها !
حاول يتمالك نفسه عن البكي وطبطب ع ظهري بايده: رددها ديما يامعاوية ( بعدني عن حضنه ومسح دموعه بقوة ) تي خيرنا الزفت راك بتسكن فوق منا خيرني تقول نودع فيك
ضحكت ومسحت دموعي: ياراجل صعبة اقسم بالله
ابتسم: مابعد البنات
شيحتله بنص عين: ايواااا خيرها اليوم سيرتنا كلها بنات وبنات ؟
حذيفة خبطني ع كتفي : يسيبو في حياش تربو فيهم من اول مافتحو عيونهم يسيبو في عادات وطبايع وحياة بالكامل ويجو لحوش جديد حياة جديدة وطبايع جديدة وراجل بيكون بعيد كل البعد عن بوها يااحسن يااسوء كل وحدة ونصيبها
ابتسمت بوجع: لا شكله معاش صارللي معاش نبي ندعي ربي يرزقني بينات نربيها ونكبرها ويجي ولد كلب ياخدها ع الجاهز !
تنهد حذيفة: انا قلتلك هالكلام باش هالله هالله ع بنت الجيران وراعيها وداريها واتقي الله فيها
شفشفتله شعره: المفروض بوي يقول هالكلام
ابتسم: بيقوله صدقني .. هي معاش وقت وتي روحك
لوحلي بايده سلام وطلع سكر الباب
شبحت لروحي في المراية وبديت نلبس ونردد في كلمة ( الحمد لله ) نبي نستشعرها ونحس بيها داخليا
………………
طلعت من الدار بدو الولاد واحد شاد الدربوكة والثانيين يغنو ويصفقو
براوة ياسمح الصيفات .. بارودك فات النجمات
حل الباب ع وسعيته .. معوشة عنقر طاقيته
كيف الصقر يحوم وراها .. سكر راسه لين خداها
ضربته غسان بايدي ع الخفيف: تي سكر فمك شن اطيحلي في قدري
غسان: اسكت تربح هدا دليل الحب
شبحتله بتفنيصة: يعطيك دب يهنتشك
ضحك وكمل
حشانا مانديروش العيب .. نخافو ع اللحية والشيب
شبحلي : اهو قمناهولك هي
ضحكت: منين تجيب فيهم بس ؟
رفع تليفونه فوق: من النت ياغالي امالا تحسابني خادم مع الحمصة قبل
ضحكت: كمل كمل
يامبروك عليك دياره .. ياواجد في العين اقداره
الغالي درناله دولاب .. معاش يعلق فوق الباب
تهنى ياقلبي وارتاح .. الغالي درناله مطراح
بوي قطع عليهم: ياولادي راهي الفاتحة تبدا وتفوتك
غسان غمزله: الاخيرة هي
العقبة ليكم يالبنات .. سبات يحادي سبات
خبطه ناجي: بنات شنو يافرخ
ضحك غسان: مافيش حاجة ع الولاد ماه
حذيفة: هي نوضو خلاص وقت والشيخ اكيدة وصل
غسان: طارق وخوه مهنينا ع الجو غادي
نضنا ركبت سيارتي بروحي .. وغسان ركب سيارته ومعاه ناجي وحذيفة رفع بوي معاه .. وبدو فيها فيشطة
وصلنا للجامع صلينا العصر جماعة وبدو في التجهيز .. وانا كنت نستنى في نساباتي شويا وكانو حاضرين عمي مسعود وولاده وخالها وعمامها وازواج خالاتها وعماتها والجيران المشتركين بينا وصحابنا والصحبة البعيدة الكل كان حاضر
غسان وحذيفة ع قدم وساق مايبوش شي يفوتهم كانو مشرفين ع كل شي .. وبوي كان جنبي
غسان لابس زبون زيتوني مع عيونه السود كان طالع الله يبارك وناجي زيون اسود وطارق زبون بني وذهبي وبوي الغالي كان لابس زبون زيتوني نفس لون غسان حاب يكونو لابسين زي بعض نوع من التمييز .. اما انا زبوني كان لونه بيج داكن مش اصفر .. وقعمز جنبنا عبد الكريم صاحب بوي وبدي الشيخ يقول
#Dudu
