#مُعــاويــة
:: 24 ::
تنهدت وابتسمت ودعيتلها في جوفي
( الله يهديك ويصلح حالك ويثبتك ع صلاتك )
…………………..
فقت من نومي مخلوع اذكرت بو غسان .. رقمه ؟ اي وين رقمه .. نضت نجري للحمام نفتش في حوايجي مالقيتاش .. فركست الدنيا كلها مالقيتاش .. نزلت للسيارة مالقيتاش .. نسيت اصلا وقتها شن كنت لابس ؟ .. ركبت وسكرت الباب
رغد تلبس في طرف الروب: خيرك شغلتني ؟
ابتسمت: شي غير ندور في رقم بو صاحبي
استغربت: صاحبك ؟ .. الصبح كلمه وتمت شن نايض توا ادور فيه
جيت قربت منها ولفيت ايدي اليسار عليها : صح كلامك .. هي تعالي ارتاحي
وقفت وشبحتلي باستغراب: متاكد مش داس عليا شي ؟
اتكيت ع السرير وغميت روحي: لا .. تصبحي ع خير
رفعت حاجبها باستغراب ورقدت بحداي: وانت بخير
……………..
الصبح نلبس في حوايجي ع المراية .. فاقت بيا
وابتسمت: صباح الحب ياحبي انت
ضحكت وتلفتلها: صباح الورد .. ولّي ارقدي تو ندير قهوتي بروحي
حولت الغطا من عليها وناضت بخطوات خفيفة وصلتني: لا يمكن .. دام رغودتك ع قيد الحياة القهوة تشربها منها بس
ضحكت وعدلت شعري بالمشط: تمام بري ديريها
قدمت خطوتين ورجعت: معاوية .. كأنك تبي حلاقة ولاه ؟
شبحتلها وابتسمت: اي نراجي في موسم رمضان بنحلق بعدين بنقعد بيها للعيد
ضحكت وطلعت من الدار وعلت صوتها: ع اساس تقدر تقعد شهر من غير حلاقة
استغربت كلامها: ومن قالك مانقدرش ؟
طلعت راسها من باب المطبخ: ناسي يافالح انا بنت جيرانكم وشايفاتك كل جمعة تخفف في شعرك
ضحكت: وسعت منك يابنت مسعود
تعلت ضحكتها: مجازياً يامتعلم
بخيت عطري وطلعت لحقتها: ع سيرة العلم .. مش ناوية تكملي قرايتك ؟
ابتسمت: اكيد بنكملها .. نراجي في النتايج
صبيت طاسة امية وشربتها : اه مانزلوش ؟
وهيا طلعت المق وتراجي في القهوة تغلي : طلعت مادة
شبحتلها نراجي فيها تتكلم .. سكتت
تكلمت بفضول: ايي !؟
تنهدت: درست ع جنب
ضحكت بصوت عالي: يامصطلحاتك .. ( قربت منها وحضنتها ) عادي عادي المهم تكملي
تنهيدة وجعها من وسط قلبها طلعت: معاش تبي تكمل القراية يامعاوية .. ضيعت عمري ع الفاضي
بعدتها: ياستي مانبيكش زي عبد الرحمان انا ره .. نبيك رغودة مرتي وام صغاري .. فلهذا امتى مايسخرلك ربي تتخرجي عادي ع قلبي زي العسل
شبحتلي ببراءة: يعني مش ح تمنعني نواصل قرايتي ؟
ابتسمت بتفائل: لا
وبدلع: حتى لو بدت في رمضان
ابتسمت لعلها ابتسامتي تفرحها وتبعت في نفسها التفائل: اي حتى لو فطرتيني نص بالتن
ضحكت: لا مش للدرجة هادي .. ننزل ع روحي باش نرضي غزالي انا .. ( تلفتت للغاز وحطت البن ) راك الغالي معوش
ضحكت: تمام هيا اعطيني قهوتي تأخرت ع الولد
صبتلي القهوة: شن عندك اليوم ؟
خديت المق: تصوير تخرج .. عبد الرحمان فتحلي هالباب ربي يفتحها عليه ويرزقه
ابتسمت: ويفتحها عليك ياعمري ( باستني ع خدي ) رد بالك ع روحك
عصرت ايدها بشوق: حتى انتي تبي شي كلميني
رغد: بننزل لوطة نشوف عمي ونقعد معاه لو استحقيت شي نقولك حاضر
خديت مفاتيحي: تمام ربي يعاونك
………………
راجعت الصور وشفت للولد: تمام .. يومين بالكثير نعدل ونوازي منهم ونجيبلك الفلاش
الولد فرح: تمام ربي يعاونك ياخوي ( مدلي ظرف ) وهادم حقاتك
ابتسمت وحطيتهم في شنطة الكاميرا: ربي يوفقك والف مبروك التخرج
سلمت عليه وركبت سيارتي واتصلت بأميرتي
رغد: كنا نحكو عليك
ضحكت: ان شا الله بالخير بس
رغد: هوا في حد يقدر يحكي عليك غير بالخير ؟
تنهدت: لسانك اهوا بلوة .. منين تجيبي فيه الكلام ؟
ضحكت: لكن في الحق مش منافقة ره
ضحكت: لا انتي محتالة .. لخباطة
شهقت: هآآ معقولة معوشتي ؟
انا: اسس تحشمي بوي بحداك ولاه ؟
رغد: لالا عمي مشي للحمام .. المهم نبيك تجيب معاك موز جاية النية فيه
ضحكت: حاضر ياقردة .. اوامر تانية ؟
ضحكت: سلامتك
سكرت الخط وفتحت طريقي
خطرلي نتصل بطارق بنراجع مع الحسابات .. درست سيارتي قدام الورشة ونزلت
طارق: مراحب
خشيت سلمت عليه: الشهر قريب يتم قلت نجي نراجع الحسابات
ابتسم طارق وطلع الملف: تفضل هي كنت بنكلمك غدوا تجي تشوفه .. لكن مافيا ماخسرت رصيد
فتحت الملف وبدينا نراجعو مع بعض .. عطيته حقه
وحولت ع جنب ظرف : غدوا بنطلع بكري نجيب عدة جديدة تمام ؟
طارق: تمام .. تبي شي كلمني
ابتسمت: ع طول .. ( طلعت ولوحتله بايدي ) سلام
كيف ركبت سيارتي طق ع المرش عمي مسعود .. نزلت من السيارة سلمت عليه
انا: اهلين عمي مسعود كيف حالك ؟
مسعود: تمام ياولدي كيف حال بنتي معاك ؟
ابتسمت باستحياء: نعم التربية والله
ابتسم فخر: ربي يهنيكم .. باهي اللي شفتك
تلاشت الابتسامة: خير ان شا الله ؟
أشر ع الطريق: توا في واحد سأل ع غسان وبوك خيري
استغربت: من هوا ؟
مسعود: والله ياولدي قاللي انا الهادي والباقي مافهمت منه كلمة غير خيري وغسان
انفتحو عيوني ع وسعهم: وانت شن رديت عليه ؟
رفع ايديه: قلتله حوّلو ليهم وقت
تنهدت براحة: وشن قالك ؟
مسعود: اعطاني رقمه قاللي لو عرفت شي كلمني
ابتسمت بفرح: اعطيهولي تو نشوف موضوعه
فتح تليفونه ومل عليا الرقم: تو شن بدير ياولدي ومن يكون هذا ؟
رفعت كتافي باستغراب: لتوا مانعرف شي .. خللي نتلاقى معاه ونشوفه ونقولك
طبطب ع كتفي: يلا ربي يعاونك وسلملي ع بنتي وقوللها شن نسيتي حوش بوك والا بتجينا من عيد للعيد ؟
ضحكت ببلاهة: لا شن نست .. الخميس بعون الله تجيك وتبات
رفع ايده بحزم: لا تبات لا .. ماعندناش بنات يباتو بعاد ع رجالتهم الا لو صاير شي
رفعت ايديا بنفي: لالا شن صاير شي .. بنتك الله يبارك عليها .. خلاص ماتباتش تمام راضي هكي ؟
ضحك: اي ( لوحلي بايده ) بالسلامة
ياعليك تخلف .. يعني لو وحدة باتت عند اهلها يومين هكي بيكون صاير شي ؟
ركبت سيارتي وع طول للحوش .. درست ونقلب في تليفون يمين يسار .. نتصل .. لا .. نتصل .. لا
تنهدت وطفيت السيارة ونزلت
…………..
في الليل مقعمز نشربو في شاهي بالكاكاوية انا وخوتي ورغد جنبي
حذيفة: توا هكي اخر مادة وبيخرجونا دفعة كاملة
غسان: الله يبارك صحة ليك مش زيني سابقك بسنتين ولتوا قاعد ماوصلت لاخر سيمستر
ابتسمت بتفائل: معليشي كل تاخيرة فيها خيرة
غسان بأسف: ع اساس غير في هادي انا تاخرت .. ( تنهد ) نسكت خير
حذيفة همسله: البنت جنبنا مااغلا عليك انكد
شبح لرغد : عادي رغد معاش برانية
ابتسمت رغد وقامت عيونها فيا وواطتهم
بوي: هادي بنية الله يبارك عليها كل يوم تساير فيا .. بنت منو ؟
ضحكت: هادي بنت عمي مسعود عرفته جارنا زمان
قعد يلمح بايديه: لا ممكن بالشكل نزبطه
ابتسمت: اي ممكن
غسان: تعرفي يارغد .. كنا ميتين بالشر قبلك توا الله يبارك حتى البازين ناكلو فيه كل جمعة ( شبحلي ) من قال بالله
ابتسمت رغد وبصوت هادي: عادي خوتي انتم صحتين عليكم
حذيفة وعيونه لوطة: الله يبارك فيك ويسعدك
شبحت لرغد: ع سيرة بوك سألني عليك امبكري وقالك امتى بتزورينا ؟
ارتبكت وقعدو عيونها يلفو ع المكان وبعدين ركزت فيا: بعدين نهدرزو
ابتسمت: تمام ( حطيت طاسة الشاهي ) بوي تبي شي ؟
بوي: لا ياولدي سلامتك
حطيت ايدي ع كتف حذيفة: هي ربي يعاونك وشد مليح باش نفرحو بنجاحك
ابتسم: اي اكيد
غسان حط طاسته .. ناضت رغد تلم في الطواسي
غسان: خليهم خليهم مرت خوي تو نقيمهم انا
ابتسمت وحطت الطاسة في الصفرة : لالا عادي
غسان فنص فيا: والله لما تحطيهم عيب عاد كل يوم مشقينك في الحوش
ابتسمت: تمام صحيت
طلعت واستاذنت: تصبحو ع خير
شبحتلها: اركبي تو نلحقك عندي موضوع بس
هزت راسها بالايجاب ومشت
رجعت شبحت لغسان : غسان في موضوع بنقولك عليه
كان بيقيم الصفرة حطها: شنو ؟
حذيفة: خللي نرفع بوي يبدل حوايجه ويرقد
هزيت راسي بمعنى باه : تصبح ع خير حاج خيري
ابتسم بوي: وانتم بخير ياولادي
طلع حذيفة وبوي وانا قعمزت بحدا غسان
شبحتله وابتسمت: تلاقيت مع عمي مسعود وخبرني انه بوك سأل عليك
شبحلي بحدة: خيرك معاوية شارب حاجة ؟
شبحتله بنفي: لا ياغسان غير اسمعني
غسان: مانبي نسمع شي لا بوي لا نعرفه .. قصدي انت واعي للي تقول فيه ؟
شديت ايده يللي كانت ترعش من الاعصاب: اهدا تربح وافهمني
نفض ايدي ووقف فتح الروشن وطلع دخانه: سكر عمه الموضوع
وقفت لحقته وقابلته: هذا مهما كان بوك
رفع حواجبه: بجديات انت ؟
ولع دخانه
تنهدت: ياغسان خلينا نفهمو منه ليش رجع توا ؟
غسان بلامبالاة: مايهمنيش
شديته من كتافه: وانا يهمني نعرف
غسان شبحلي من فوق لتحت: والله ! علاش من موكلك عليا ؟
زفرت بضيق: يهمني لانه بوك وين تندري مرات ربي سخره يرجعلك باش تخطب نهال وراسك فوق
لوح السيجارة ونفث الدخان : البنت اللي تبيعني نتبرع بيها
حطيت ايديا في جيوبي : نهال ماباعتش .. نهال انفرض عليها الامر
رفع كتافه : طز فيها وفيه وفيهم كلهم
شبحتله بتعصب: نسيت شن دارت ع خاطرك ؟
شبحلي باستغراب: شنو ؟
انا: كلمتني وقعدت ادور فيك وانشغلت عليك لما انحبست
غسان تنهد وماردش
ابتسمت: فوتها نهال توا .. خليني في بوك
غسان: زي بوي زي نهال زي خوها زي اي واحد باعني وقت انا محتاجه .. لا نبيه ولا نبي سيرته هنا في الحوش معاوية كان تبي تقعد خوي ورفيقي ولو مستغني عليا افتحه الموضوع تاني تمام ؟
قربع الروشن وطلع من الحوش .. تنهدت لما رفعت عيني لقيت حذيفة واقف
قعمزت ع الصالون منهد الحيل: سمعت شن صار ؟
حذيفة قعمز مقابلني: اي .. عندك رقمه بوه ؟
هزيت راسي بالايجاب
حذيفة: اتصل بيه ووصله كلام ولده عليه بالك ع ايديك يصير الصلح
شبحتله بتعجب: صلح شني ؟ .. يصالح بوي ويفارقني ؟ لا والله غسان عندي بالدنيا
ابتسم حذيفة: انت مش فرض ربي عليه .. لكن والديه فرض عليه يواصلهم ويطيعهم
رفعت راسي ليه: فكنا ياشيخ من فتاوي حسب الطلب
حذيفة دفني بقبضة ايده: بجديات لازم يواصل بوه بعد فترة ح يعرف روحه غالط ويصالحك اطمن
تنهدت بضيق .. ركبت لشقتي وانا مشغول ع غسان .. خشيت لقيتها ترتب في المطبخ
ابتسمت: ماتعييش من الضمان انتي ؟
ابتسمت رغد وقربت مني: لالا نضم في حوشي من الليل باش ننزل لحوش خوتك
ضحكت وحطيت المفتاح ع الرخامة: حوش خوتي ؟ مش حوش بوي صار ؟
رفعت كتافها: اللي هوا عاد المهم الهدف واضح
اتكيت ع الرخامة وهيا تحوس بحداي: محلاه حسك في الحوش يابنت .. مانقدرش نتخايل روحي بعيد عليك
ضحكت بصوت عالي: اختصار هذا كله انا مانستغناش عليك
ضحكت ع جنب وواطيت عيوني باستحياء: اللي هوا عاد المهم الهدف واضح
حطت ايديها في نصها: تقلد فيا ؟
ضحكت وشديت خدودها: ليا الشرف
ابتسمت: جعان !
هزيت راسي بالنفي: لا صاير موضوع ونبي نحكيلك شوري عليا
فرحت شدت ايدي ومشت بيا للصالون: احكي نسمعلك
ابتسمت: بو غسان رجع ويبي يشوف ولده لكن غسان رافض وتلاقينا معاه في المول يومها واليوم بوك قاللي عليه
شبحتلي بعدم فهم: غسان بوه مش ميت والا هوا مش معروف ؟
نكرت: لالا بوه معروف واسمه الهادي .. سيبه صغير في دار الايتام وسافر
خبطت ع وجهها: حقير عنده الحق غسان يرفضه
رفعت حواجبي: هادي ع اساس انتي العاقلة وقاعد نشاور فيك
ضحكت: والله بجد .. يملّح مصح وجهه انا لو بوي يموت ولا يشوفني الله
تنهدت: ماعاديش بيك قلبك اسود يابنت ؟
رغد: واللي ماينساش السية يبدا قلبه اسود ؟ .. اذا كان كلمة موجعة تقعد في القلب يابال يسيبني وانا لحيمة حمرا في هالدنيا السودا
واطيت راسي: نبي كيف نقنعه يكلمه ؟
رغد: ماتقنعاش خليه ربي ينتقم منه
خبطت ع جبهتي: تي يابنت وين تندري ع ظروفه علاش سيبه والا علاش سافر ؟ .. مرات خوف من النظام السابق كان يلاحق فيه او شي حد مهدده
ضحكت بصوت عالي: اللي مايدير شي مايجيه شي .. كلنا عشنا زمان وتوا والحمد لله ماحد قرب جيهتنا
لوت فمي بنفور: نبي نصالحهم خلاص انا سكرت راسي
وقفت ورفعت شعرها ذيل حصان والتوكة في فمها: كيفك
شبحتلها: وين ماشية ؟
مددت ايديها فوق بعد لمت شعرها: بنرتاح شويا سادها اليوم
ابتسمت: عندك الحق تصبحي ع خير
خشت للدار وانا سرحت شويا نفكر في طريقة للصلح .. بعدين فتحت اللاب وعدلت الصور وخشيت رقدت مع الساعة 2:00 ليلاً
……………….
تاني يوم فقت متاخر شويا لقيت رغد مش في الحوش .. عرفت انها نزلت قعدت مع بوي لان حذيفة وغسان مشو لاشغالهم .. توضيت وصليت .. وخشيت للمطبخ لقيتها مجهزتلي فطوري ابتسمت
قعمزت فطرت ورفعت تليفوني اتصلت بغسان واطمنت عليه انه رجع امبارح وطلع لكليته الصبح .. غسلت اماعييني عينة ليها ع تعب الحوشين .. وخشيت بدلت حوايجي وبنسلم الفلاش لصاحبه .. اذكرت رقم بو غسان
فتحت عليه واتصلت: السلام عليكم
: وعليكم السلام
انا: هذا رقم عمي الهادي صح ؟
: والله مانعرف ياخوي الراجل هذا لقيناه مغمي عليه في سيارته نقلناه للمستشفى ونراجو في حد يتصل بيه لان تليفونه مافيشي ولا رقم .. انت من تكون ؟
انصدمت: اي مستشفى ؟
: الطبي ياخوي
انا: تمام جايكم
مشيت نجري للسيارة تلاقيت مع رغد مطلعة الحوايج بتنشرهم
رغد: صباحو حبيبي
لوحتلها بايدي: تو نجي مستعجل بس
استغربت: ان شا الله خير
ركبت سيارتي وولعتها: خير خير
ع الطبي فوراً .. خشيت للاستعلامات وسألت ومشيت لغرفته يللي كان فيها اكتر من مريض ومصاب .. لقيت الممرض يركبله في كيس تغدية
شبحتله بألم: من امتى هوا هنا ؟
الممرض: يومين .. والبنية هادي معاه بس ماعرفناش نتفاهمو معاها
استغربت: اما بنية ؟
تلفت الممرض حوالين السرير: شورها مشت للحمام .. معاه بنية صغيرة
استغربت اكتر: كم عمرها هكي ؟
الممرض: تقريبا 10 سنوات
تنهدت: يستر الله
الممرض: بالله لو تعرفه تموله اجراءاته الراجل متلوح عليه والبنت ماقدرناش نتفاهمو معاها .. صغيرة وماتعرفش تتكلم عربي
غمضت عيوني بألم: لا حول ولا قوة الا بالله .. حاضر حاضر
شويا وخشت بنية شبحلها الممرض: هاي .. وين كنتي ؟
شبحتله بعدم فهم : I don't understand
شبحلي الممرض: ها ريت
هزيت راسي: تمام
طلع الممرض .. نزلت لمستواها ركزت في ملامحها .. اوربية بس لمحة غسان فيها .. بتكون اخته في الاكيد .. شن المصيبة يللي طحت فيها ياغسان .. ابتسمت وفتحت تليفوني ع المترجم
( who’s that ! )
من يكون هذا !
شبحت للتيلفون وابتسمت
#Dudu
