|ݺ﮼#مُعــاويــة
:: 8 ::
ماحبيتش نعرض خدماتي حسيت روحي بيختها .. نزل وطبس عليا وقال : العشية نجيك انا وولدي وناخذوها السيارة
ابتسمت وهزيت راسي بالايجاب: تمام .. السلام عليكم
طلعت بالسيارة مسافة ماتبعدش وبديت نشح في تيشرتي بنتنفس .. شن هالكمال ياالله والكمال ليك وحدك مش قادر نعيب فيها شي
………………..
في الليل مقعمز مع بوي يشرب في الشاهي ويهدرز عليا ع قصصه ومغامراته وقت كان طفل .. وانا نسمع بتركيز ومستمتع بكل موقف يحكيه .. سكت شويا وقال: معاوية وين كِنان ؟
لحظة صمت غيمت ع الحوش كله ماعرفتش شن نرد وشن نقول ؟
رديت بكل ثقة: عنده قراية يكملها تو ينزل
ابتسم: خلي عينك عليه
داخليا توجعت والموت خشتني .. ظاهريا ابتسمت وقلت : ان شا الله
كنت نتابع في تصرفاته وحركات عيونه يلفو ع الدار ومبتسم .. ابتسامته مبهمة مش واضحة
تكيت راسي ع المسند وتنهدت: بوي شن اغلا شي عندك ؟
ابتسم: ولادي ( ضغط ع عيونه وتغيرت ملامح وجهي ) انا اصلا ماتزوجتش كيف عندي ولاد ؟ .. ( شبحلي وركز عيونه فيا ) انت معاوية ولدي ولاه ؟ .. ولدي انا !
خفت عليه اكتر وثنيت ركابي قدامه وعيوني في عيونه وابتسمت ابتسامة خوف مش اكتر
قلتله وانا ايديا شادين ايديه ومتمسكين فيهم: انا ولدك ( بوست ايده وضغط عليها اكتر ) انا ولدك يابوي وغسان وحذيفة وكِنان احني هنا كلنا ولادك .. انت بوي خيري الانسان الباهي اللي الكل يحبوه
كان يشبحلي بصمت ويحاول يستوعب كلامي
كملت كلامي والدموع في عيوني: ربي يخليك لينا احني نحبوك .. غسان وانا وحذيفة وكِنان نحبوك والله ( تكيت راسي ع ايديه وبديت نبكي ) مانبو شي غير تقعد معانا وحوالينا مانبو شي ياغالي
رفع ايده وحطها ع راسي وقعد يمسح ع شعري : اعوذ بكلمات الله التامة من كل شيطان وهامة ومن كل عين لامة
رفعت راسي ومسحت دموعي: ترقي فيا !
بوي بابتسامة حب: اي مش انت ولدي ؟ .. نرقي فيك خايف عليك من الشيطان
حطيت راسي ع حجره وغمضت عيوني تمنيت اللحظة هادي توقف معاش نبي نواصل حياتي دونه .. علاش نحس في روحي فاقده وهوا موجود ؟ .. لان الهيبة خفت .. لان الاهلية انعدمت .. بس انت بوي وانا ولدك لو مهما يصير
…………….
لا تنسى ي حبَيْبِي أيامي وسنيني
وانك ع قلبي أعز انسانِ
واطلب من الباري يحميك ويحميني
من شر هالدنيا ومن كيد شيطانِ
……………
درت كرسي قدام الورشة وقدامي طاولة صغيرة حطيت عليها براد شاهي وطاستين ناديت طارق يشاركني
طارق: والله وقته تحس الجو بدي يصقع من جديد
ضحكت: وانت من عدوان الشتي طبعا
طارق شرب شويا: اي مانحباش .. كل شي مربوط بالطقس في الشتي اما الصيف برااحتك ياطيب
ابتسمت وقمت عيوني فوق: كِنان يحب الشتي
تأسف طارق ع وضعي وسكت
كملت: ديما يطلع للجنان وقت المطر تصب يقوللي تغسل في الذنوب ( ضحكت بألم ) تعرف ياطارق قاعد كل يوم ناكل في روحي ندم ع اللي صار
طارق: شن اللي صار ؟ .. انت شن في ايدك مسحور الله غالب
استدركت جهله بللي صار قدمت راسي وقلت: نأمنك ع سر رد بالك يطلع منك
خاف طارق وعيونه توسعو: خوفتني ياراجل
حطيت طاسة الشاهي ع الطاولة : احني رافعين قضية في فاتح الكلب بس هرب معاد لقيناه
استغرب طارق: بخصوص شنو ؟
تنهدت: بخصوص كِنان ..( واطيت راسي وكملت بأسف ) فاتح تحرش بكِنان خلاه ينتحر
انصدم طارق ووقف: ينتحر ؟
وقفت جنبه وضربته ع صدره: تي اسكت ياراجل بتلم علينا الناس ؟
هدي طارق ورجع قعمز: يعني كِنان مش مسحور .. كِنان منتحر والسبب فاتح وانتم ساكتين لتوا ؟
شديت ع سنوني وهمست بتعصب: ساكتين شنو ؟ .. تي قلتلك رافعين قضية لكن مافيش اي دليل يتبت انه هوا اللي تحرش بيه
طارق مسح ع وجهه مرتين تلاتة: كيف يعني فهمني ؟
تنهدت ورجعت راسي للخلف: مش قادر ننسى كِنان وكلامه في رسالته لكن القضية خاسرة مافيش دليل ثابت عليه .. ( شبحتله بعمق ) احني مغلوب ع امرنا حاولنا ودرنا اللي علينا بس مافيش ظهر يسندنا قانونياً أما فاتح منهم وفيهم شرطي من يقدر يكلمه !
تنهد طارق وسكت
كملت كلامي بعد شربت شويا من الشاهي : انا قلتلك لاني مليت من السكات حاس روحي بنموت لو ماقلت لحد بنتبلغم .. ولو حكيت لغسان بيتصرف بلا عقل الاولة كان بوي واعي وطلعه بكفالة وتوا لو يخش للحبس من جديد ح يلفقوله تهمة تودره ورا الشمس .. مايرتاحو لين يعدموه
تنهد طارق: عندك الحق الموضوع صعب ويبي جهد وفلوس .. البلاد ولّى حقها فلوس كل شي وليه ثمن
تنهدت وهزيت راسي بمعنى لا: مش قصة فلوس .. قصة الجهد مافيش لا انا ولا غسان نعرفو حد في البلاد يحكم يطلق .. يعني لو تصير مصيبة كلهم بيتبرو منك
هز راسه طارق وضم شواربه: مولية غابة
ضحكت بهزوة: واحرف .. وبعد اللي صار في كِنان كرهت عمها البلاد بكل
طارق: ع اساس ليبيا بس يللي يصير فيها هالعمل .. غير مافيهاش قانون بس الباقي اكبر الدول يصير فيها هكي واكتر .. العقليات المريضة في كل مكان
ابتسمت: نادم اني ماهذرزتش معاه ماخديتاش في حضني وماسمعتش شكوته من الاولاد .. نادم ياخوي اقسم بالله
طبطب ع رجلي: استهدى بالله ومعاش تندم ع شي فات خلاص .. الندم من الشيطان
حطيت راسي بين ايديا: ضربته نحسابه يدلع قلتله نبيك راجل .. مشي وخيي قتل روحه لان كان يشوف في عيون الناس انه الفريسة كلهم يبو ينقضو عليه وياكلوه .. وانا اولهم ياطارق
طارق ساكت
قمت عيوني وحولت ايديا : اللي يتعرض للشي زي هذا تنخدش كرامته وتنهز شخصيته ويفقد نفسه والله .. ماكناش حاسين بيه انا نلعن في روحي كل يوم كل يوم علاش ماقعمزتش معاه وسمعته .. علاش ضربته ؟
وقف طارق شد كتافي بايديه: معاوية ماتلومش روحك ماتقعد تاكل في روحك انت مش السبب في انتحاره .. بالعكس انت كنت تحبه اكتر واحد في خوتك هوا الشيطان لعب في راسه وخلاه يعصي ربي وينتحر
تنهدت: ماعصاش ربي
قعمز طارق مقابلني ومدلي شيشة امية: ربي يسامحه .. خود اشرب امية واغسل وجهك سادك هم وفكر للقدام .. وفاتح خليه ع ربي صدقني ح ينال جزاته معاش تفكر مادام في رب في الوجود
طلعت هواء سخون بقدر المستطاع .. بقدر الوجع يللي داخلي .. شربت امية دفعة وحدة وحطيت الشيشة : ان شا الله خير
دقائق وكانت سيارة مدرسة قدام الورشة بالتمام فيها عمي مسعود وولده .. ابتسمت ووقفت انا وطارق نزل عمي مسعود وطبس ع ولده: روح انت
ماكلفش روحه ينزل وياخد عليه السيارة او يرد عليه حتى ب ( حاضر ) .. طار بالسيارة طيارة
عمي مسعود قدملي ومبتسم: معاوية وين المفتاح
ابتسم طارق وشبحلي : تو نجيبه خليك
قعمز عمي مسعود ع كرسي طارق وشبحلي: خيره وجهك مقلوب ؟
ابتسمت ومسحت ع وجهي: مضايق شويا
مسعود: ع خاطر بوك ؟
رديت : اي
مسعود طلع باكو الدخان وولع سيجارة ونفث الدخان وتلفتلي: كان الله في عونكم .. صاحبه عبد الكريم يجيه ولاه ؟
ابتسمت: اي
كنت مرتبك ومتحشم مانعرفش السبب
طفى دخانه ع التراب ونفث الدخان: قداش يعجبني هالراجل .. واقف معاه وقفة مزبوطة ربي يحفظه
ابتسمت بثقة: اي وهوا اللي عنده الرزق ومستمر في العهد يللي بينهم
مسعود: ربي يبارك .. ( شافلي بتركيز ) قول ياولدي هوا قاعد مذكركم ؟
تنهدت بوجع: مذكرني انا بس
تألم عمي مسعود وصفق ايديه: لا حول ولا قوة الا بالله .. ( قام عينه لقي طارق خدي منه المفاتيح ) بارك الله فيكم ( تلفت لطارق ) كم الحساب ياولدي ؟
طارق ابتسم وشبحلي : قدامك المعلم ياشيخ شوفه
مشي طارق وخلانا .. وقفت: واصل حسابك ياعمي مادور شي
ابتسم عمي مسعود: والله جت في وقتها الكلمة .. توا ماتحتي حتى قرش ( ضحك بهزوة ) زمان بالله يقولك كيف راجل مصنع امنع طالع مفلس توا كلهم يدورو مفلسين
ضحكت ومانعرفش سبب ضحكتي لانه اساسا الموضوع مؤلم اكتر ماهو مضحك ويفوت بهزوة
سلم عليا: صحيتو ولادي وبارك الله فيكم
ابتسمت وسلمت عليه: مافيشي جميل ربي يحفظك
طلع عمي مسعود بسيارته تلفتت لطارق يللي جاي
ايتسمت وقلت: الراجل هذا قد ماندير معاه شويا مش مسيب بوي بكل
ابتسم بفرح: عمي مسعود معروف بصيته غير ولاده طالعين لعمامهم
ضحكت بالقوة: وانت منين تعرفهم ؟
قعمز طارق ع الكرسي: زمان كانو يسكنو هنا .. جُربْ مايخالطوش في حد
رديت: عمي مسعود اجتماعي وهدراز
طارق: وين ماتحطه تلقاه لكن خوته كزمة الحمد لله حولو وتفكينا منهم
خاطري نسأله ع بنته او اي معلومة تفيدني .. لكن شعور الغيرة سيطر عليا ف سكتت وخليتها في خاطري
…………………..
غسان خش عليا في المطبخ نوتي في فطور بوي : صباح الخير معاوية
ابتسمت وحطيت البراد في الصفرة: صباح النور .. شكلك مزهزه
يدوّر ع بكرج القهوة: وين البكرج حطيته وزيد نق عليا تو تصيرللي خارقة
ضحكت وأشرت ع دولاب: غادي تلقاه ( قمت الصفرة ) تعالا افطر معانا
غسان طلع البكرج وعباه امية: جاي هي
طلعت بالصفرة وحطيتها ع طاولة الصالون وقربت لبوي الكرسي وقعمزته .. وقفت ع حافة الدروج وناديت ( حذيفة .. حذيفة تعالا افطر )
صوت بعيد رد عليا: هيا هي
نزل حذيفة وحط شيتاته ع المدخل وجي قعمز ع حافة الصالون جنب بوي: اما احسن فطوري والا فطوره
ضحك بوي: فطوركم الزوز صحيتو .. ( شبحلي وابتسم) نفطرو ونروحو هداكا هوا الحوش بعيد
تلاشت ابتسامتنا وهزيت راسي بمعنى باه .. وصبيت طاسة شاهي ومديتهاله: تفضل هي
خدي مني الطاسة وقال: سلم ايدك ياولدي .. انت متزوج
ع جية غسان سمعها ضحك : لا عانس هذا .. انا قريب نتزوج ياحويج
حذيفة ضحك: ماتندريش .. معاوية مايحبش يدوي ( غمزلي وضحك ) ولاه معاوية
ارتبكت وشبحت لبوي: شن رايك اليوم نطلعو للجردينا .. نشربو قهوتنا ونروحو
فرح بوي وقال: ماعنديش اجتماع انا نقدر نمشي
ابتسمت بألم : تمام
غسان همسلي: شن في ؟ .. حذيفة شن يعرف ؟
ضحك حذيفة وحذفه بالفوطة: شن دخلك ياقصقاص
رد عليه الفوطة: سكر فمك .. ( هزلي كتفي ) شن في يافرخ قول
كان مقعمز ع يد الصالون يللي مقعمز عليه انا وقفت طاح قعدو يضحكو وهوا يتحسس مكان الطيحة وعيط ( والله الا كلب )
ضحكت ورديت قعمزت: شن لحم جمل معاش قهوة ؟
استغرب: شن تقول ؟
حذيفة: من امبكري المية تغلي .. اللي حاطها يادماغ
ضحك غسان وقال: والله نسيتوني فيها
ناض يجري للمطبخ .. ومن حين لاخر نراقب في بوي بصمت .. قام عيونه فيا وقال: هكي حلوة اللمة كلنا ع قلب واحد .. انا نحب اللمات هادم خليكم ديما هكي
ابتسم حذيفة وطبطب ع كتفه: اكيد من دون ماتوصي
شبحت لحذيفة وحطيت طاسة الشاهي : انا عندي شغل ضروري في الورشة تقعد مع بوي عادي ؟
ابتسم حذيفة: اي اكيد غير روح بكري لان امتحاني الساعة 3
ابتسمت: تمام
جي غسان وشاد طاسة ورقية فيها قهوة .. حط الطاسة ع الصفرة وباس راس بوي: ارضى عليا ياحاج ماشي لموضوع وان شا الله خير
ضحك بوي وطبطب ع ايده: ربي يرضى عليك
خبطني ع كتفي وقال: بنمشي لخوها
حذيفة باستغراب: عرفت مكانه ؟
غسان: لا بنمشي نطق ع الحوش وبعدين نشوف
تعصبت: خيرك غبي انت ؟ .. هناك واحد ماشي من صبحات ربي للناس وبيطق وبيخطب ؟
غسان قام طاسته: مانيش خاطب .. بنمشي نتعرف عليه
وقفت وقعدت نمثل في السيناريو يللي رسمته في راسي : طق طق منو انا واحد يبي يتعرف ع ولدكم الكبير لان احتمال كبير نخطب بنتكم اللي شدها بوها تكلم فيا وانا بهكي نكون راجل
تعصب مني غسان ودفني: صبح معاوية مش رايقلك
حذيفة وقف: استهدو بالله .. غسان مايصيرش منه الكلام اهوا
غسان شبحله بتعصب: ماقلتش هكي بندير انا اكيد في تصرف تاني يعني مش معقولة غبي للدرجة هادي انا
قعمزت وتنهدت بتعصب: اسمعني ياولدي غلط هكي .. اول شي لازم تحدد موعد مع الجماعة ونمشو كلنا معاك
غسان ضحك بهزوة: شن زردة امالا ؟
قلبت عيوني وشفت لحذيفة: تفاهم معاه
حذيفة: نمشو معاك ياغبي هكي الاصول كيف تمشي تخطب بروحك
قعمزت وحط طاسته ع الارض: تعرفو الموضوع ليه شهر وانتم تأجلو وانا في نظرها توا كلب ولد ستين كلب
بلامبالاة: مااختلفناش انت كلب صح .. لكن تعطل وتجي بشي مقوم غير من الاستهتار اللي انت فيه اهوا
شربت شويا من الشاهي وشبحت لحذيفة: ياخد رقم خوها ويكلمه مش هكي خير ؟
غسان باستهزاء : يالطيف ع الفكرة كيف ماخطرتش في بالي .. انت تستعبط ؟
شبحتله باستغراب: شنو ؟
غسان: هي قطعت علاقتها بيا بكل منين بنحصلها باش ناخد رقم خوها ياعبقري زمانك
سكتت
حذيفة: تمام انا نمشي لشارعهم نسأل ونتقصى ونجيبلك الخبر اليقين
غسان: هدهد ماشا الله
ضحكنا وخديت شربت الشاهي : مش خيرلك من العار .. ارزن ياراجل
غسان خدي قهوته ووقف ع الروشن: نفكر فيها وشاغلتني هلبا زعما شن صاير معاها حتى حسابها مسكراته .. خايف يكون بوها حابسها
حذيفة بلطف: ماتخافش البو ديما يحن ع صغاره
ضحك ع جنب غسان: زي بوي ولاه ؟ .. تعرف كارهه للمليون كان نلقاه قدامي لما نعفس عليه بالسيارة هالكـ..
قطعت ع كلامه: ضم فمك خلاص .. عارف اللي تحس بيه وفاهم عليك لكن ماتندريش ع ظرفه
غسان عيونه شرار: شن ظرفه ؟ .. تبّع نزاواته وشهواته عقاب عمره
حذيفة تأثر: ماتندريش توا شن يعاني .. ومرات حتى توفى بلاش تقعد تتكلم عليه بالغلط وتحاسبه خللي ربي يحاسبه .. وكل امرك لربي وانساه بكل
تلفتله غسان: حسبي الله ونعم الوكيل
تنهد غسان وابتسم يخفي وجعه وألآمه : خلاص خللي ندير دورة ع المحل ونجي
تكيت راسي ع المسند وتنفست بالقوة: الحمد لله ( شبحتله ) شن رايك تطلع معانا العشية للمنتزه ؟
حذيفة شافله بنظرة ترجي: اي خللي تنكتب في التاريخ والعشي ع حسابي
ضحك غسان: تمام راجوني نمشو في سيارتي
ابتسمت: تمام
…………………
العشية حذيفة جهز حوايج بوي وقاله: هي بوي خش دوش ع السريع باش نمشو
بوي ومنهمك في الاكل: حاضر ساعدني يامعاوية
خديت بايده ودخلته للحمام رتبتله لاوازمه وسكرت عليه الباب وخليت المفتاح برا خفت يسكر ع روحه كالعادة ومعاش يعرف يفتح ..
حذيفة: كلمته غسان الهم اهوا يجي ؟
شاد الكاميرا ونتاكد من شحنها: اي قال شويا ونكون عندكم
حذيفة: الشوية هادي ليها نص ساعة
مشي خذيفة يراجي في غسان وانا قعدت مقعمز نراجي في بوي يطلع
وطلع بوي من الدوش لابس تيشرته مقلوب ابتسمت وجيت قربت عليه: بوي هات نساويلك حوايجك
خديت تيشرته وحولته وساويتهوله ورديت لبستهوله .. كان مبتسم ويشبحلي بفخر
بوي: الله يرضى عليك ياولدي
بوست ع راسه: اهم شي انت تحافظ ع صحتك وتشد حيلك
ابتسم: باذن الله .. انا نبي نشوف أمي مستاحشها يامعاوية
طبطبت ع كتفه: توا طالعين للجردينا نروحو نخطمو عليها
بوي: بنرفع معاي كعك حلو غالي عليها
خديت الكاميرا بايدي اليسار وشديت ايده بايدي اليمين : نرفعولها كعك حاضر
نزلنا درجة درجة .. كان قلبي ينبض بسرعة وكنت خايف مانعرفش علاش كل مانكون مع بوي نكون خايف .. هل خايف ينساني ؟ او نفقده في اي لحظة ؟ .. اللحظة اللي كارهها انا من توا واللي متمني عزرائيل يجيني انا قبله .. نزلته لقيت غسان كيف واصل فتحلي الباب القدامي
سند ايده ع الباب : خليني ياولدي نعرف نركب بروحي
غسان شاد ايده الثانية وقعمز ع كرسيه: الحاج شباب ره .. من جماعة الفتنس ره
ضحك بوي: صاحبك يامعاوية دمه خفيف ماشا الله عليه
ضحكت انا: والله ماني عارف ياغسان هادي تلقيحة والا مدح حق
ضحك بهزوة: هيهيهيهي اركب بلا تلقيح
سكرت الباب ع بوي وناديت حذيفة لقيته جايب كيسة ورقية معاه .. حطها جنبه وركب السيارة
سألته باستغراب: شن فيها ؟
حذيفة: صلاية وهركتي .. جبتهم من سيارتي
غسان ولع وطلع: شن قالولك مسيحي ؟
ضحك حذيفة: انت ادخن
شافله في المراية ومرة يشبح يمين ومرة يسار للطريق: شن اللي يدخن مايصليش ؟
حذيفة بانفعال: تي لا ياراجل لكن الدخان انا مانتحملاش عندي الجيوب الانفية
حطيت الكاميرا في الكيسة: غسان مش ناوي تسيبه ؟
غسان مركز في الطريق: غير سيبوني في حالي
حذيفة بلامبالاة: مسيبينك ربي يهديك
غسان اضايق: بدينا هي .. شن ربي يهديك تشوف فيا مختش ؟
تنهدت: يالطيف انت وياه مافيش طلعة نطلعها معاكم لازم ماتتعاركو
حذيفة : تسمع فيه
غسان ولع المسجل جت ع اغنية ليبية قديمة بدي يدندن معاها
لا ميعاده لا انا ولا هوا ولا ميعاده لا نا ولا هوا ولا ميعاده
هللي كما الجمار لون عضاده
لا انا ولا هوا
نفخ حذيفة بملل: هي تفضل هي
غسان سكره: ياودي نبصر عليك .. غنيله يامعاوية قصر عليا مسافة الطريق
ضحكت: نكره جية كما يكره الصقعان بطانية
غسان: كما يكره العطشان دلو امية كما يكره المحتاج قرش زيادة .. لا نا ولا هوا
حذيفة يضحك: صوتك ولاه .. مهزلة حق ربي
غسان يعاود في الكلمات نفسهم مرتين باستفزاز
تكلمت: مش حافظ غيرهم ؟
غسان وقف السيارة عند الاشارة : لا مش حافظ
تلفت يمينه ابتسم: حذووف ناشبها يللي جنبك شكلها قنينة
خبط حذيفة ع جبهته: تي كلمه يامعاوية والا انوض نفشخه
ضحك غسان وسكر الرواشن: انت غجري ومتوحش
فنصت فيه نبيه يسكت
تلفت لحذيفة: الدين يسر مش عسر
حذيفة بتمعن في الطريق بعد الاشارة اخضرت: اي نعصي ربي وبعدين نقوله لا والله كنت نتسلى ومانحساباش حرام
غسان : ربي غفور رحيم
هنا بي بوي تكلم بثقل وثقة: وشديد العقاب والا مش سامعها ؟ .. طيع ربي وخليه يرضى عليك تشوف باش ربي يكرمك اما تعصيه وتقول تو يسامحني مايصيرش .. ( شبح لغسان ) انت شاب كويس حرام تخسر روحك ودينك بملهيات سطحية ونزاوات لحظية وتندم عليها طول العمر
سكتنا وكأننا كنا نراجو في هالصوت .. استحشناه كلنا وفاقدينه لينا ايام .. ملامح البؤس والشقاء كانت تعلو وجوهنا من لما غابت الاهلية عن اعز مانملك
استرسل بوي كلامه: مديرك في العمل لو طلب حضور وانصراف وقت معين وهذا طبعا في حالة غيابك بينحسب في رصيدك هل تعصيه ؟
بلا تفكير غسان قال: لا طبعا هدا معاش مافيشي بصارة
ابتسم بوي: رصيدك الحسنات لو تبي مكان خير من مكانك .. زي مافي الخدمة تبي تترقى لمستوايات اعلا حتى ربي يبيك كل يوم احسن من قبله في الطاعات وتعبي رصيدك بالخير
قدمت راسي لبوي وطبطبت ع كتفه من الخلف: الله يبارك يابوي الله يبارك
حذيفة: صح لسانك اقسم بالله قلت كلام ماقدرتش نوصلهوله هالمتخلف
غسان ابتسم وضغط ع رجل بوي: ربي يبارك ع كلامك ( شاف لحذيفة في المراية الوسطية ) شوف الاسلوب بالله يامختل انت
ضحك حذيفة .. انا مفتخر ببوي وكلامه تنهدت ودعيت الله يطول عمره .. شفت لحذيفة يللي بادلني نفس النظرة وابتسم .. شديت ايده وهمستله: فرحان ببوي اقسم بالله
طبطب ع ايدي : حتى انا
غسان مطبس ع الطريق ويلف بعيونه ع المكان : زعما نحصل وين اندرس ؟
حذيفة: حطنا وبعدين دور وشوف
غسان تلفتله: فرض هوا كل ماانا نتكلم انت تتكلم
ضحك حذيفة وتلفت للروشن: اقعد دور امالا
في عسكري واقف بعيد قعد يأشر لغسان بمعنى ( تعالا ) .. قربنا منه وفتح الروشن غسان
غسان: في وين ندرسو ياافندي
طبس العسكري وشافلنا بالواحد: هذا مكان للعايلات بس
تلفت غسان لبوي وتلفتلنا:
#Dudu
