#مُعــاويــة
:: 28 ::
راجعت الصور وطلعت للحوش .. كنت مشتاق لرغد .. لكلامها .. لصوتها .. لكل شي فيها
………………..
حذيفة: ماهو قاللي انت متفوق هذا علاش قبلوني نقري في الكلية نفسها
ضحك غسان: اضرب هي اصغر واحد فينا بيدير فلوس قبلنا
كنت نلعب بمفاتيحي: عينك انا خدمت قبلكم كلكم
حذيفة: الرزق ع ربي ماتندريش مرات خدمنا قبلك وانت تبدخ قبلنا
ضحك غسان بهزوة: مش باين
حذيفة انفعل: مش باين لانك انت غبي ومش مآمن بربي .. ياراجل اتقي الله في نفسك خليك متفائل واضحك وافرح وخليها ع ربي علاش شايل هم هكي كبره من كتر وسواسك واحباطك
رفع عيونه: ماك مش حاس بيا
حذيفة وقف: شن تبيني نحس ؟ .. اليتم وحاسه الفشل ومجربه الايام الصعبة وعشتها شن تبيني نحس تاني ؟ .. ايدك في ايد ربي تو يمر كل شي
قطعت ع كلامه: صح كلامه ياغسان انت هلبا تفكر وتسحن في روحك .. قول شن موضوعك نشيلو معاك الهم علاش سمانا خوت ؟
حذيفة تنهد وقعمز: سامحني غسان
غسان فرد ظهره وابتسم: كلامكم كله صح وع راسي لكن انا مش قادر نطلع منها المتاهة اهيا ؟
حذيفة: نهال ؟
نفي براسه: تي لا ياراجل موضوع وتسكر هذا
تنهدت: بوك واختك ؟
غسان: مش مفكر فيهم بكل
حذيفة رفع ايده باستسلام: منو امالا ؟ حيرتنا
غسان تنهد: نبي نرتاح معاش نفكر معاش نضايق نبي نفرح ونعيش حياتي .. قرايتي عجزت فيها وانا نحس قرايتي كل شي في حياتي لو ضاعت شن وجودي بالله ؟
ضحكت بصوت عالي: ياوالله حالة معناها معاوية مات ماعنداش وجود !
ضحك بالشويا: تي لا مش هكي .. انت ماتحبش القراية لكن انا كنت ممتاز في قرايتي وانت توا خليك صريح ماتبيش صغارك يكونو خريجين جامعات ؟
ابتسمت وتخايلت روحي واقف بين ولادي الخريجين وبشهادات عليا
غسان ضحك: شوفه ها مشي لعالم تاني
حذيفة ضحك: ياودي ماحد يتمنى السو لولاده ولا لروحه .. مالاخير ياغسان بنصارحك بشي
رفع عيونه فيه: شنو ؟
حذيفة: والله العظيم مانكدب باهي
غسان انفعل: تي باهي قول
حذيفة: يشهد عليا ربي اني فخور بيك وفرحان انك خوي وصاحبي وشريكي .. فرحان بان بوي خيري جمعنا هنا وخلّا بينّا رابط غير الدم والاسم .. رابط مايزعزعه شي .. انا لما نحصل في مشكلة اول من يخطر في بالي انت ياغسان رغم انك اهوج ومتسرع لكن ينشد بيك الظهر والله
ابتسم غسان: شهادة نعتز بيها ..( مسح ع وجهه ) مانعرفش نقول كلام باهي ره
ضحكت وفتحت تليفوني ع الفيسبوك
يُقال أن الصدفة خير من ألف ميعاد ..
لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً ..
من قد يتصور أنها قادرة على تغيير حياتنا إلى الأبد و تغيرنا معها أيضاً..
من هُنا تبدأ الحكاية .. صُدفة!
ماهي الا ثواني رغد دارت لايك ع البوست وبعتتلي مسج ( تلقح والا كيف ؟ )
ضحكت ع جنب وسكرت التليفون .. وتسامرنا انا وخوتي وركبت منهم منهك وتعبان .. خشيت للحوش ناديتها
( رغد .. رغد )
فتحت باب الدار لقيتها متكية ..
جيت قعمزت ع حافة السرير : شني اديري في روحك راقدة ؟
صوتها حزين وهادي : لا مش راقدة
جبدت الغطاء من عليها: باهي نوضي ديريلنا قهوة نشربوها مع بعض
حولت الغطاء وناضت : حاضر
لحقتها للمطبخ: خيرك من غير نية ؟
حطت البكرج ع النار: تعبانة بس
تنهدت: خيرك استشعرتي لما نزلت البوست ؟
ضحكت ع جنب: شن خطرها عليك .. تتغزل في خوتك غير اليوم ؟
رفعت حاجبي باستفزاز: ديما نتغزل فيهم غير انتي هذا وين ركزتي
طلعت سكرية البن وبدت تحط في البكرج: مالاحظتش
اول مابدت تطلع ريحة القهوة سيبت البكرج وحطت ايدها ع فمها وطلعت تجري من المطبخ للحمام مباشرةً .. استغربت طلعت نجري وراها سكرت الباب وين فتحته لقيتها ترجّع ( حشاكم )
رديت الباب ورجعت للمطبخ لما سمعت فوجان القهوة .. طفيت النار ورجعتلها
طلعت من الحمام تمسح في فمها بفوطة صغيرة وكان ذابلة بمعنى الكلمة ..
شديت ايدها: نساعدك ؟
شدت ايدي بالقوة: قريب طلعت روحي
دخلتها للدار: ارتاحي انتي تو نكملها انا
حطت ايدها ع فمها وخشمها: بالله عليك ماتقربهاش مني نحس في روحي بنرجّع مرة تانية
اتكت ع السرير قربت منها: نرفع نعاينك؟
حركت راسها بالنفي : لالا هذا وحم طبيعي للحامل
رفعت حواجبي باستغراب: شن عرفك ؟
مسحت ع وجهها ورجعت رقدت: امور بنات مش شورك
لويت فمي وطفيت الضي: راك تنسي صلاتك بس
رغد: باه
………………
مشيت للورشة نرتب في العدة سمعت صوت مش غريب عليا .. سامعه قبل هالمرة
السلام عليكم
تلفتلها لقيتها نفسها الدخيلة ع حياتي فجاءة دون سابق انذار
رديت بلامبالاة: تفضلي
وقفت قريب عليا: مش راضي تتلفتلي ؟
شبحتلها: شن تبي اختصري يااخت
ضحكت بصوت عالي: طارق وهنيتك عليه لاهي في سيارتي .. نقدر نهدرز معاك ؟
تنهدت وقعمزت ع كرسي المكتب : غبتي هلبا قلت اكيد لقت فاش تلهى
قعمزت ع الكرسي الي بعد المكتب: لا اطمن مش ناسياتك .. حتى لو العالم كله قرر يلهيني
زفرت بضيق: شن تبي ؟
هنادي شبحتلي بحدة: نبيك
ضحكت ع جنب: لاني يتيم ماعنديش اهل ؟
ضحكت: انت حتى لو بااهلك تقعد حلمي
قدمت راسي وشبكت ايديا: اسمعيني جاي .. انا مش ساهل لدرجة كلمتين منك ينضحك عليا ونسيب بنت الناس ونرحب بيك
هنادي بثقة وهيا تتلمس في اوراق ع المكتب: ماتصلحش بيك
ضحكت: والله ؟ .. انتي تصلحي بيا برايك ؟
شبحتلي بتركيز: اي .. انا نشوف فيك قمر حلو ويلمع لكن صعب مانقدر نوصله
رفعت حواجبي : قلتي حكمة ؟ والا توقضي في روحك انك في مكان الغلط ؟
رفعت كتافها: مايهمنيش لو تزوجتني التانية .. لو نسكر في دار معاك مايهمنيش
وقفت بصرامة: نوضي درقي وجهك شكلك هبلتي حق حق .. ناقصني غير شكالك
وقفت وابتسمت: مانلومكش هادي بنت مسعود مأثرة عليك
فنصت فيها وعقدت حواجبي: اي ونحبها ونعشقها .. وانتي خليك في اوهامك لاني صعب عليك
خدت بعضها وطلعت .. ورجعت تلفتت وابتسمت بتهكم وطلعت خدت سيارتها ومشت
خشلي طارق مستغرب ويصفق في ايديه: البنت اهيا مش طبيعية بكل
ضحكت وقعمزت ع الكرسي: هادي وحدة مش مزبوطة تفوتلي يومين عشرة وتجيني راني نحبك يامعاوية
طارق ضحك: والله الا عرفت وراها قصة
قعمز ع الكرسي وقعمزت مقابله
تنهدت: مريضة .. تي ليا شهرين بس متزوج ماحلني نمل من مرتي اصلا
ابتسم طارق: ايح يعني اللي متزوج سنين عنده الحق يمل ؟
رفعت كتافي: الراجل لا .. لكن اللي عنده خلل في دماغه يمل من الشهر الاول
تنهد طارق: ياريت عندك اخت الزفت
ضحكت: علاش ؟
طارق: وحق ربي راجل وسيد التريس انت .. كلامك يوزن بلاد تي لو عندك اخت ناخدها حتى لو كانت خليقة زيك
ضربته برجلي ع رجله: حيوان احترم نفسك
ضحك: ياسيدي انبصر .. معاوية يجنن
ابتسمت ع جنب: قالتلي حلم يصعب وصوله
ضحك لين دمعو عيونه: ماتحسابك بطرف بكلاوة تتلخبط
عقدت حواجبي: واطي
ضحك طارق: بجديات شن موضوعها اهيا ؟
رفعت كتافي: مانعرفش تلحق فيا وتبي الحق ولاه ؟ .. خايف منها تسببلي مشاكل مع المرآ انت عارف النساوين عقولهم صغيرة
طارق: ناقصات عقل ودين
ضيقت عيوني: يعني ع اساس انت اللي عقلك ودينك كاملات تربح ريحني
ضحك: باه شن نوع المشاكل اللي بتسببهالك ؟
تنهدت: وين نندري ع عمها .. إن كيدهنّ لا عظيم
نضت وقفت وشبحتله: اسمع عندي مكالمة تو نجي
طارق: تمام العدة هادي تبي تزييت ؟
حركت راسي بالايجاب: اي اي
طلعت وقفت قدام الورشة ورفعت تليفوني واتصلت بيها .. مكالمتين باش ردت
رغد: ايوا
انا: ياحليلي ع الصوت .. ياحليلي ع الرقة .. وووه معاش نقدر
ضحكت بالشويا: نازلة عليك الرومانسية اليوم ؟
ضحكت: تو كان تكلمت عادي راك قلتي جفاف
رغد: شن ادير ؟
انا: شي في الورشة مع طارق
رغد: ربي يعاونك ياقلبي
انا: شن حالك توا ؟
رغد تنهدت: نازل عليا النوم بس
انا: اييح يعني الواحد بعد عامين تلاتة باش يعاود عملته ؟
رغد: عملة شنو ؟
انا: الصغار قصدي
ضحكت: هذا لو فكرت مازال .. شعفة
انا: استغفري ربك في غيرك متمنيهم
رغد: ااه يامعاوية لو تحس ربع اللي نحس فيه .. هذا قاعدين في البداية
انا: يهون يهون .. وانا معاك ماتخممي في شي
رغد: بوك مع من قعد ؟
انا: بوك ؟ مش كان عمي ؟
رغد زفرت بضيق: ياودي خيرك بديت ع الوحدة ونص ياسيدي عمي خيري مع من قعد ؟
تنهدت: مع غسان اكيد
رغد: ااه .. تبي شي ؟
انا: لا سلامتك
رغد: مع السلامة
سكرت الخط .. قعدت نتأمل في التليفون يللي ياما رفعته يوم الفاتحة بتردد نتصل بيها او لا .. شوق وحب ولهفة واليوم تسكر عليا بكل حزم .. واساسا كلامها بلا نية .. تنهدت ورجعت لشغلي
…………….
مرّت الايام ::
وكانت فيها رغد تعبانة وراقدة وبس .. حذيفة بدي في شغله الاكاديمي وبدي يدرّس ومنسجم في خدمته ومواصل عباداته وطاعاته ماغاب لحظة ع الصلاة في الجامع .. وغسان يكابر ويحاول ينسى مامضايقه من وضع اعتيادي بس هو مأثر في نفسيته هلبا ويتضاعف الوجع كل مايفكر فيه ..
فتحت الضي بصوت عالي: سكر بالله عليك وخليني في حالي
طفيت الضي : خيرك رغد نوضي تحركي شويا مرات تنشطي ؟
رغد: مانبيش مش متحملة شي
تنهدت وقعمزت ع حافة السرير: باه نرفعك لاماليك
رغد: لا
ربعت ايديا: باه نمشو نتعشو برا ؟
رغد: لا
جيت جنبها ورفعت الغطاء من ع وجهها: قولي شن تحسي ؟
رغد جبدت الغطاء: خليني بروحي معاوية
زفرت بضيق: هذا كله وحم ؟ والا شن موضوعه ؟
رغد: خليني معاوية
وقفت وفتحت الروشن عيطت عليا: سكر الروشن معاااوية
سكرت الروشن خوفا من حد يسمع صوتها وجيت قربت منها: ياسر منه الهبال اهوا رغد .. ماتبيش تطلعي امورك ماتبيش تنوضي تتحركي امورك اما تعيطي عليا واطيحي قدري لا هنا ستوب احترميني شويا
عدلت تقعميزتها ومسحت ع وجهها: انا مانعرفش شن صاير معاي والله
قعمزت وابتسمت بحب: انا والله نبي نغيرلك جوك وعارفك تعبانة ووجع الولادة قالت عليه مريم في القرآن ( قَالَتْ يَا لَيْتَنِي مِتُّ قَبْلَ هَٰذَا وَكُنتُ نَسْيًا مَّنسِيًّا )
ابتسمت وشدت ايدي بحب: سامحني وربي مايحرمني منك غزالي
ابتسمت: ولا منك .. فلهذا بالشويا عليك مرة مرة غيري جوك واطلعي من جو الكآبة يللي انتي فيه غزالتي
ابتسمت وتغمرتني : نبي نرقد هنا تخليني ؟
مسحت ع شعرها: معاوية كله ع بعضه ليك مالي حد غيرك
غمضت عيونه: ياريت العمر كله
ابتسمت: عندك فيها شك! .. باذن الله نقعدو هكي العمر كله ويجعل يومي قبل يومك يارب
رغد: لالا يومي انا قبل
ضحكت بصوت عالي: انا عارف علاش ماتبيش تقعدي 4 شهور وعشر ايام في الحوش ولاه ؟
ضحكت رغد: لا والله بس مانبيش نذوق لوعة فراقك معاوية
تغمرتها بقوة: ياحليلي بندوخ ره
خبطتني ع كتفي بالخفيف: بالك حامل ياولد
فنصت فيها: بدينا في الغلط
ضحكت: انبصر ياودي .. هي نوض نتطلعو نغيرو جو ؟
فرحت: ياسّلام نوضي هي
طلعت بيها رغم انها ذابلة ووجهها شاحب .. رفعتها لميدان الشهداء وتمشينا وخدينا عصائر طبيعية بحكم كرهها للقهوة وتوابعها ..
محظوظة رغد بوجودي معاها زي ماانا محظوظ بوجودها معاي .. سبب كرهها لمشية حوش اماليها سببلي عرقلة بسيطة في تواصلي معاها .. وخلّا فجوة بينا وقت خيرتني بينها وبين عيلتي اكيد كفة عيلتي بترجح مهما تعددت السنين .. ومهما كان في خلاف بينا والا كانت هيا الاقرب ليا .. هادم عيلتي ولو كانو مش دمي ومش بنفس اسمي .. فأنا مش يتيم رغم يتمي .. وانا مش وحيد ولا فاقد اسرتي .. الاسرة رابطها اقوى من الدم ومن الكنية .. تلقى الحن من الجار مرات وماتلقاشي من بوك .. مع هذا لا ننكر فضل الام والاب لوجودها في الحياة طالما الرابط شرعي والحمد لله .. رحمة الله عليك ياكِنان قداش كنت موجوع من داخلك ومش حاسيين بيك
بنسميه كِنان لو ولد طبعا
رفعت حاجبها: ومن قالك عاجبني الاسم ؟
ضحكت: تو يعجبك لو تشوفي صورة كِنان خوي
نفخت بضيق: واك يامعاوية جايين بنغيرو جو ره
اضايقت: لاحظت ماتحبيش سيرتهم شن جاك الوحم عليهم ؟
رفعت كتافها: لا لكن انت هلبا تتكلم عليهم
ضحكت: شن تبيني نتكلم ع البنت يللي تجيني في الورشة؟
وقفت وجمدت في مكانها .. واصلت السير بعدين تلفتلها: خيرك وقفتي ؟
رغد: تتكلم بجديات انت ؟
جيت بحداها: اي .. مانعرفش شن تبي تفوت فترة وتجي .. مع هذا ولا تهمني
رغد مذهولة من كلامي: اسمها هنادي ؟
قرنت حواجبي وشبحتلها بحدة: تعرفيها ؟
رغد ضحكت ع جنب وشدت ايدي وبدت تتمشى : عرفتهم مش ح يخلوني في حالي
باستغراب: من هما ؟
ضحكت: نساوين خوتي
ضغطت ع ايدها ولفيتها ليا: خيرهم شن يبو بالزبط ؟
تنهدت رغد وابتسمت بوجع: وحدة منهم كانت تبيني لخوها رفضت وقلت لبابا ع عمايله
عقدت حواجبي: عمايل شنو ؟ خيرك يابنت صندوق مسكر تخوفي فيا منك ره
مسحت ع وجهها بلطف: طويلة القصة .. نحكيلك وقت تاني
سكتت لحظات وبعدين تلفتلها: اسمعي هنادي موضوعها منتهي من قبل وزدتي توا أكدتيلي انها مبعوثة ف موضوعها سكريه نهائي وماتفكريش فيه .. لكن موضوع خوتك بتقوليهولي توا والا بعدين المهم تقولي الحق توا مانبيش نتعبك حامل وتوا قاعدة تتمشي بالك تدهشي بس
رغد ابتسمت وتمسكت بايدي: انا محظوظة بيك
تنهدت: بنسميه مسعود ولدنا شن رايك ؟
ضحكت وخبطتني ع كتفي بالخفيف: خلاص نسموه كِنان ولا تزعل وتاخد ع خاطرك
ابتسمت: انتي كويسة لكن مانعرفش علاش تمشي بالردس
شهقت وخبطت ع صدرها: حي ع الكلمة
ضحكت: قصدي بجديات ضروري ماتنقرصي باش تفيقي انك متزوجة معاوية ع سن ورمح
ابتسمت: مغرور
تنهدت وكملنا التمشاية وانا سارح فيها وهيا سارحة بس مش عارفة وين .. علاش نحس فيها غامضة وماتبيش تحكيلي .. هل مش واثقة فيا والا خايفة ع سمعة اهلها مني ؟ .. عندها الحق اول مشكلة صارت بينا عزرتها ببوها لما ترجاني نتزوجها .. ترجاك يامعاوية .. شن شايف روحك ؟
:وين وصلت ؟
ضحكت: نخمم فيك
رغد: تعبت معاوية عادي نقعمزو
ابتسمت: من عيوني
قعمزت رن تليفوني والمتصل كان
: السلام عليكم خوي معاوية .. تعرف صاحب الرقم هذا ؟
انا: اي الهادي ولاه ؟
: اي الراجل عطاك عمره والجيران مايعرفوشي ولقينا رقمك الوحيد المسجل
وقفت مصدوم: لا حول ولا قوة الا بالله ( في هالحظة نسيت انه عنده بنت )
وقفت رغد وهمست: شن في ؟
اذكرت بنته: ءء في معاها بنية ؟
: لا والله .. طاح في الشارع وسعفوه عنده بنت قصدك ؟
تنهدت: خلاص جايكم توا
#Dudu
