🎀 قصة أقوى مما أدرك 🎀 بالدارجة المغربية

🎀 الفصل التاسع 🎀

🎀أقوى مِمّا أُدرِك 🎀 سكينة آيت الكبير🎀

🎀 هدى - الجزء : 56 🎀

ضحك وناض وجد ليها حوايجها اللهم يدوش ليها هو ولا تبقا هاكاك تدوخو..كان كلشي خرج بقاو غي هوما بجوج .. وجد ليها كلشي و مشات سبقاتو كتفك شعرها فاشلة بحرا مافكاتو كولو محروق ما تحمل تشوف فيه من لتحت حيدات حوايجها وبان لحمها تدبغ ليها خصاتو عناية طويلة باش يرجع كيف كان..حيت الجسم الى كان فشكل ومع الوقت خسر كيتصلح لكن العكس الى كان من لول الجلدة سمرة راه مستحيل ترجع بيضة..مع دخل لقاها عريانة لابسة غي السليب تبسم ملي شاف ظهرها مزيناه ثقبة الزين جوجات ومشا كيدوش ليها بلطف وكيعاملها كي الدرية الصغيرة مكيهضرش وهي كثر منو حدها كتحس براسها ضايعة وصافي...بحالا كانت فشي حلم..نعسات فاقت لقات راسها مزوجة وحاملة من لفوق..دوش ليها وخلاها تتوضى جاب ليها حوايجها لبساتهم وخرجات وحدة خرا ..النور على وجهها..باسها فمها وقال:بالصحة

تبسمات ليه ومشات للبيت ومشاعرها باردة تجاه هاد السيد لي نعم زوجها وضريف وكيعاملها زوين وصابر ليها لكن السؤال واش عمرك حسيتي معاه أنك مرا واش عمرها حسات براسها كتنتامي ليه؟؟عمرها عنقاتو وحسات بحنان فشكل ولا اللهفة شاداها عليه..حطات راسها ومشاات عاود من فرط التعب مخلياه كيتعشا بوحدو وكيفكر فحياتو معاها..

فبعض الاحيان كيخصنا وقت باش نفهمو ونستوعبو شحال من حاجة وارائنا ومبادئنا كتختالف من وقت لوقت..مثال بسيط وحدة فسن معين كتقول بلي ميمكنش تحط تصاورها فمواقع التواصل الإجتماعي ومن بعد كتلقاها حطاتهم علاش؟؟حيت نظرتها تبدلات سوا شي حد بدلها ليها او لا كتاشفاتها راسها وستوعباتها وهاد النوع الأخير،هو لي كيكون رابح ديما فقراراتو حيت كيلقا راسو مبدلوش شي حد إنما هو ستوعب داكشي فلحظة من الزمن.

والسن كيكون عامل كبير باش الواحد يستوعب مثال بسيط اخر..ولد فسن المراهقة مباغيش يقرا مباغيش يمشي للمدرسة كتهضر مو ويهضر باه ويهضرو لي دايرين بيه وكذلك الناس لي دارو نفس غلطو لكن مكيقتانعش وكيدير شنو بغا ولكن ملي كيكبر وكيتبدل المحيط و كيبدا يحصد شنو زرع كيلقا بلي ديك الفكرة صحيحة والناس عندهم الصح اما كيكون مشا الحال وكيبقا نادم او كيغير راسو..

وهذا حال هدى لي نوعها خصها تجرب الحاجة وتدار بيها وتقدر تريسكي ويقول ليها العالم راه داكشي ما مزيانش لكن غتزطم وتجربو وفلخر تحصد وتجلس تندب..

هي أصلا إنسانة كسولة وفنيانة ومعيفينة و مع الحمل كملات..لا دوش لا نقا لا تهلية..غي النعاس والفراش والتقية..دوزات أكفس شهور فحياتها عطاتها فيها غي البكا والشكا والتنخصيص وشد ليا نقطع ليك مع الزوبير لي ولا كينعس فالصالون باش مينعسش حداها بديك الريحة لي كتقلب الميت من قبرو..هي إنسانة مهملة ورجعات أكثر اهمالا لنفسها..مكتاكل مكتشرب لي كلاتها كترجع فيها تقية..عنقها وبيطانها عمرو بالكلف تالحمل والكوزينة كدخل ليها الى عمرات حيت كتعيف الماكلة..جاو دارهم جلسو معاها جوج سيمانة تدللات فيهم وتفشاات كيفما حتى الزوبير تفشش حيت ولى كياكل ماكلة