🎀أقوى مِمّا أُدرِك 🎀 سكينة آيت الكبير🎀
🎀 هدى - الجزء : 90🎀
العشرة تقريبا كان المحل شبه خاوي..هبطات نص الستار بيدما جمعو البنات المحل من رواين العيالات لي كيجربو ويحطو ميردو الحاجة لبلاصتها ميخليوها مقادة..وفنفس الوقت كانت سيارتو واقفة بعيد وكيتكيف فيها جوان داير رجليه على الفولون وعينيه على المحل لي باقي مشعول فيه الضو عرف بلي باقي ماسالاوش..وتاهو معندو مايدار أصلا مكيفيقش بكري والليل عندو هو النهار..شاف تيلي كيصوني سكت ليه الحس وبقا منشوي بداك الجوان حتى بانو ليه خرجو كاملين وكيضحكو..مترددش أنه ينزل وكحب باش يقاد صوتو معول يهضر معاها..فحين هي راه سلمات على ماجدة لي جا ليها خطيبها وبقات هي وغزلان
غزلان:أنا غدا روبو
هدى:سيري رتاحي ليك شويا عيييت أنا والله(باستها)سلمي على ماماك
مشات غزلان مخلياها كتهبط فالريدو وكتسد فالمحل بالسوارت غي تأكدات بلي راه تسد وهي تديرهم فصاكها وتحركات كتفوه كتجر رجليها بملل باغيا غي تنعس..للحظات حسات بخطاوي غاديين معاها فنفس الريتم مع تلفتات جنبها لقاتو هو نيت غادي معاها كي السخط كتبان كي الكمشة قدامو..تخلعات فلول حتى حطات يديها على صدرها وشافتو كيشوف فيه وكيخفف من مشيتو ياله بغات تهضر وهو يقول:لباس؟
هدى:(بقات كتشوف فيه)لباس
تحركات بغات تمشي وهو يشدها من يديها مرجعها لكن متوقعش ردة فعلها لي جراتها بزربة بحالا عايفة يحطهم عليها:هييييه واش حماقيتي
عبدو:(واقف مدرقها مكتبانش قدامو كون ما الكسوة لي كيحركها الغربي ) حشومة يهضر معانا الواحد ونزيدو
هدى:مكنعرفكش باش نهضر معاك
عبدو:(كيمص شفايفو مبرد )معقلتيش عليا
هدى:(بجدية وعينيها مخنزرين)خونا ديال الكوميسارية
عبدو:هو هذااك
هدى:اش باغي؟؟
عبدو:قلت نسلم عليك
هدى:يسلم عليك الخير
زادت وخلاتو تا جعر وهو يرجعها عاود شادها من يديها وهاد المرة نطراتها بجهد وعلات صوتها:مريييض نتا ولا شنو...متحطش علي يديك
عبدو:خلي ليا نمرتك
هدى:(تصدمات)شويا لباس اخويا؟؟
عبدو:(قطب حجبانو بتساؤل)لي بغا نمرة شي وحدة مريض؟؟(جبد تيلي ايفون اخر ماكاين )كتبي نمرتك
شافت فيه على ديك الثقة فالنفس لي عندو وخسرات فيه سيفتها وزادت مخلياه منشور والبرد كيضرب فيه هو و تيليفونو...من كثرة الصدمة بقا غي واقف مقدرش حتى يرجعها عاود وعينيه حبسو من ترماش متبع جسدها لي كيزرب وممثيقش راه قمعاتو قمعة يعاودها لحفار قبرو..بشويا عليه حتى رجع تيلي لجيبو وساط معصب تقيسو ييدير بيييق ورجع أدراجو من جديد لسيارتو وكيسرط فالقمعة لي عطاتو أما هي مشات كتزرب شدات طاكسي لدارها مرعوبة وكتحاول تفسر تصرفاتو..
أنت تقرأ
🎀 قصة أقوى مما أدرك 🎀 بالدارجة المغربية
ChickLit# أقوى_مِمّا_أُدرك أقوى مِمّا أُدرك، و أجملُ مِمّا أظن. بعد غياب أكثر من سنة، بعد خيط الريح، لي غاع عجباتكم و تفاعلتو معاها، و نجحات الحمدلله، عدت و العود أحمدُ، سالينا قصة و غا نبظاو قصة جديدة، بنفس الأسلوب لي مولفين بيه سكينة آيت الكبير، ولكن بأ...
