🎀أقوى مِمّا أُدرِك 🎀 سكينة آيت الكبير🎀
🎀 هدى - عبدوو 🎀 الجزء : 212🎀
صبرات حتى بان الضو ديال الله ووصلات التسعود وناضت بهدوء عكس البركان لي فداخلها..حطات للمشة الماكلة ومشات كتلبس عليها عباية وفولار وخرجات هازا التيلي ولبزطام دايرا نظارات شمسية عند أقرب طبيب حشمانة من وجهها لي مغسلاتو مقربات ليه خلاتو كيفما هو حتى دخلات عند الطبيب وطلبات شهادة طبية ديال الاعتداء..صواناو ليها عندو وعطاها شهادة طبية خانزة مغرق فيها ليه حيت شاف فيها بطريقة انسانية..ورجليها قادوها لاقرب كوميسارية ...كي وقفات قدامها بقات كتشوف فيها شحال وتفكرات بلي هنا فين تلاقاتو وهنا فين غتساليها ليه
دخلات نيشان وطلبات دير محضر دخلوها عند البوليسي كي جلسات وهو ينطق:اش وقع؟
حيدات نظاظرها وبانو الكدمات فوجهها:تعدا علي واحد السيد
البوليسي:اش وقع؟؟هو لي ضربك
هدى:اه(ببرود كتشوف فاص ليها)تهجم علي لداري وضربني
البوليسي:مكتعرفيهش؟؟
هدى:كنعرفو..باغي يتصاحب معايا بزز..وكيبقا يتعرض ليا وكيبغي يهضر معايا بزز ملي مبغيتش جا ليا لداري وتهجم علي وضربني
البوليسي:عندك الشهود؟؟
هدى؛(جبدات الشهادات الطبيبة)ها سيختيف..والشهود.مكان حد حيت جا لداري بليل..مكنعرفوووش هو لي لاصقني صحاا وتكرفص ليا على صحتي
حنشات ليه مزيااان ونكراتو باش تغرق ليه حيت عقلها تمسح ومبقاش كيبان ليها نهائيا كعبدو ولى كيبان كوحش..نكرات علاقتها بيه وعطاتهم سميتو وكنيتو واي حاجة غتخصو ..غرقات ليه وضرباتها ليه بنكرة خطيرة عاد مشات لدارها معولة تجمع قشها وتبات ماتصبح...كي دخلات مشات نيشان والدموع فعينيها كيتساقطو بغزارة بلا صدرها لي كيطلع ويهبط بالخلعة والصدمة..هاتفها ماحبسش من الرنين ومكتجاوب حد
جمعات حوايجها فشانطة وبدات كتجمع فالاثاث يدون ماتوقف والسخفة شاداها حيت مواكلة والو والمشة كضور حداها
صونات للسيد لي كان جاب ليها الرحيل نهار اللول وعلماتو بلي باغيا ترحل اليوم الموالي..وضلات فالجميع جمعات كلشي النهار كامل مخلات والو ولدموع محبسوووش من عينيها كل ما كتفكر كيفاش ضربها كتشدها البكية وتجلس تنخصص على حياتها وعمرها وكل مدازت من حدا المراية كتشوف الكدمات وكتزيد تأزم
باتت ديك الليلة حاضنة راسها وطافيا التيليفون مكتجاوب حد ومدخلاتش تشوف حتى شنو وقع فالفيديو حتى غفات كتسنط لعظامها لي عاطينها الحريق حتى صبح الصباح وعبدو مسولش فيها مجاش عندها..
ومع العشرة تصباح كانت لابسة حوايجها بعدما صونا ليها السيد وقالت ليه طلع باش يهز الرحيل...وبدا كينزل شويا بشويا وهي كتحط ليه الاغراض لوخرين
أنت تقرأ
🎀 قصة أقوى مما أدرك 🎀 بالدارجة المغربية
ChickLit# أقوى_مِمّا_أُدرك أقوى مِمّا أُدرك، و أجملُ مِمّا أظن. بعد غياب أكثر من سنة، بعد خيط الريح، لي غاع عجباتكم و تفاعلتو معاها، و نجحات الحمدلله، عدت و العود أحمدُ، سالينا قصة و غا نبظاو قصة جديدة، بنفس الأسلوب لي مولفين بيه سكينة آيت الكبير، ولكن بأ...
