Part-18
"အား……ဒီနေ့တကယ်ပင်ပန်းတယ်"
သွန်းငယ်ကိုအိပ်ယာပေါ်ဆွဲချပြီး
အပေါ်ကနေဖိထားသည့်ဦးက သွန်းငယ်မျက်နှာဘေးတွင်ခေါင်းကိုမှောက်ချကာ ငြီးနေသည်။
အိပ်မယ်ဆိုပြီး လူပေါ်ကလဲဖယ်မပေးဘူး။
"ဦး ပင်ပန်းရင် သေချာအိပ်လေ
ဒီလိုကြီးဆို ကိုယ်တွေနာနေလိမ့်မယ်"
"……"
"ဦး…သွန်းငယ်နှိပ်ပေးရမလား"
"မင်းကဘယ်ကိုနှိပ်ပေးချင်လဲ"
"ဦးဇက်ကျောတက်တာလား
ခြေထောက်တွေညောင်းတာလား
လက်တွေကိုက်တာလား ပြောလေ နှိပ်ပေးမယ်"
"တစ်ကိုယ်လုံးပဲ မင်းတစ်ပြိုင်ထဲနှိပ်ပေးမလား"
"အယ် အဲ့လိုကျ ဘယ်လိုလုပ်ရမှာလဲ
လက်ကနှစ်ဖက်ထဲပါတာကို"
"ရအောင်နှိပ်ရင်ရပါတယ်ကွာ"
သွန်းငယ်ကိုအပေါ်ဘက်ပြောင်းတင်လိုက်သည့်ဦးကြောင့်ရင်တုန်သွားရပြန်သည်။
ဒါကြီးကရော ခုနကအနေအထားနဲ့ မကွာဘူးမို့လား။
လူနေရာပဲပြောင်းသွားတာ။
"မင်းတစ်ကိုယ်လုံး ကိုယ့်ပေါ်ဖိထားရင် ရပြီလေ"
"အဲ့လိုလား…ဦးပင်ပန်းတာသက်သာလား
ဒီလိုဆို"
"အင်း…မင်းလဲအိပ်တော့ ပေးဖုန်းက"
လက်ထဲက မချသည့်ဖုန်းကိုယူပြီး
ခေါင်းရင်းလှမ်းတင်ပေးသည်။
ထို့နောက်သွန်းငယ်ကိုခပ်တင်းတင်းဖက်ကာ မျက်လုံးတွေမှိတ်သွားသည်။
"အိပ်မက်လှလှမက်ပါစေဦး"
"မင်းသာမပါရင် ကိုယ့်အိပ်မက်တွေ အမြဲလှတယ်
ကိုယ်အိပ်ပျော်ချင်တယ်မင်းလဲတိတ်တိတ်လေးအိပ်တော့"
"ဟုတ်"
ပင်ပန်းနေသည့်ဦးကခဏအတွင်းအိပ်မောကျသွားသည်။
သွန်းငယ်ကသာ ဦးရင်ဘတ်ပေါ်ခေါင်းတင်ပြီး မတိုးမကျယ်ရင်ခုန်သံကိုနားထောင်နေမိတာ။
ပုံမှန်ပဲဖြစ်နေသည့် ဦးနှလုံးသားက သွန်းငယ်အတွက် နည်းနည်းလေးတောင် တုန်လှုပ်မပေးနိုင်ဘူးတဲ့လား။
~~ဂျိမ်း~~
မိုးခြိမ်းသံကြောင့် သွန်းငယ်အတွေးများနေသည့်ကြားက
လန့်ကာတုန်သွားရသေးသည်။
နိုးသွားပုံရသည့်ဦးက သွန်းငယ်ကိုဘေးချပေးပြီး
ပို၍တင်းကျပ်အောင်ဖက်ထားပေးသည်။
စောင်လဲခြုံပေးတာမို့ သွန်းငယ်ကျေနပ်စွာပြုံးရင်းဦးရင်ခွင်ထဲ ပိုတိုးဝင်လိုက်သည်။
ကျေးဇူးတင်ပါတယ် မိုးနတ်မင်းကြီးရေ။
ဒီနေ့တော့ သွန်းငယ် ဦးရင်ခွင်မှာအိပ်ခွင့်ရခဲ့ပြီ။
သွန်းငယ် အိပ်မက်လှလှလေးတွေ မက်နေမှာမို့
ထပ်ပြီးမနှောက်ယှက်ဘူးမို့လား။
