🌸 " حِينَ انوِي " 🌸
🍃 الحلقة الـ38 🍃
ثاني يوم نضنا علي صوت عمتي تعيط نضنا مخلوعين
انا / شن في 😳
مهند / يستر الله ، ونزل يجري ، انا لبست المصلية متاعي ونزلت نجري
مهند / خيرككك شن في ؟؟؟؟
فريدة / يا حليييلي علي وخيتي ترملت صغيييرة ياااا ناري علي رويجلها 😭😭😭
انا / إنا لله وان اليه راجعون 💔
مهند / تي غر من قالك عمي سمير توفا " بو رندة "
فريدة / تو كلموني خوالك 😢 هيا ارفعني لوخيتي راهي منكسر ضهرها
مهند / البسي بسررعة هيا نبدل ونرفعك وركب بسرعة
ركبت وراه / اصبر بنمشي حتى انا ، لبست عبايتي ونزلنا وعمتي طول الطريق وهيا تبكي لين وصلنا لحوش كميلة وكانو يديرو ف الخيمة خشينا ولقينا كميلة ورندة منهارات واخته دايخة ورندة تعيط ويهدو فيها
رندة / ووووووه عليا بوووووي 😢 ويييين مشيت وخلييييتني يا وبيي 😢 ويييين مشيت وخليتني وووووه عليا
انا مشيتلها / عظم الله اجرك يا رندة ادعيله بالرحمة حرام اديري هككي
رندة دفتني جيت طايحة / حووووولو علياااااا حولو 😢😢 طلعوووني نشوفه طلعوووني نشوفه قبل ما يديرو عليه التراب
انا قامني بنت وانا ضهري بيتكسر من الطيحة تقول مقصودة يا سبحان الله ، مع ان متأكدة ان مش قصدها
كميلة / ياااااا حليييييلنا سمممير 😭 منووو بينا من بعدك 😭 منووو لينا من بعدك 😭 ناااار حارة يا ضي عييووني 😭
فريدة / اهدي يا كميلة وادعيله الليلة اوله ليلة ف القبر 😢 ان شاء الله ربي يثبته عند السؤال 💔
انا كنت ناوية نخش نعول معاهم بس حسيت روحي بنرجع مش قادرة ندير شي وبندوخ من الزحمة ومن الطيحة لان لما دفتني جيت ع الحيط بقوة ، بس رندة ف لحظتها من الحرقة اللي ف قلبها مستعدة ادير اي حاجة المهم تبرد النار اللي ف قلبها ، نفس النار اللي ف قلبي ، واللي مستحيل تبرد
طول العمر 🔥 ، شوية وجابوه دخلوه للمربوعة خشوله كميلة ورندة وفريدة وامه واخته ونساوين خوه واقاربه عماته وخالاته وشوية وجو رفعوه والحوش انقلب عياط ثاني ، وانت مر قدامي شريط وفاة بوي الله يرحمه ، كأن اليوم ، كيف سمعنا الخبر وكيف جابوهولنا جثة مصقعة وملفوفة ، مجرد نزلناله بسناه ورفعوه ، وحنى النار ركبت فينا ، رندة وحيدة بوها ، كان مدلعها بشكل لا يوصف ، وكانت متعلقة بيه بزيادة ، خلاص البنت قريب تهبل ،رفعو صلو عليه ودفنوه وانا اتصلت بمهند مردش عليا ، وقعدت ندور ف الحوش وقالقة خلاص نبي نرد مش قادرة ونحس ف روحي الدنيا لاعبة بيا وانا خلاص مش متحملة عياط وبكي قعدت نتصل بمهند وهو لا حياةَ لمن تنادي للمغرب وبعتله مسجات اني تعبانه وضروري يرد عليا ، وانا خلاص قريب نموت نبي نروح ، ومبيتش نسأل عمتي ، لانها اكيدة ح تبات ، مر الوقت وجت ال11:30 وانا خلاص دموعي ينزلو نحس ف روحي فشلت ومش مركزة ومنبيش ندوخ ف حوش الناس شوية واتصل بيا
