فلتسميه جنون عاشق لا يريد سوى ضحكة منك

الـبـارت الـرابـع عـشـر

طلعت من غرفة ملابسها ترفع شعرها و تلبس عبايتها و تاخذ شنطتها و جوالها تفتح الباب تطلع من غرفتها تنزل للصالة و شافت خواتها اللي ينتظرونها و قالت : تاخرت عليكم ؟
خيال : لا بس يالله تاخرنا على المصممة
هزت راسها و مشوا يطلعون و ركبوا السيارة و قالت جنان : نبي شيء نشريه
هزت راسها كيان و وقفوا عند الدرايف ثرو ياخذون القهوة و مشت متوجهين للفندق اللي بيكون فيه الزواج و قالت خيال : كلمتني المصممة وقالت انهم بدو يجهزون الفستان و الطرحة
هزت راسها كيان : يارب يضبط
جنان : بيطلع حلو عاد مرا متحمس لانه التصميم ياخد العقل
ابتسمت كيان : والله خايفه من ذا الزواج احس الف فكرة ببالي
خيال : طبيعي يا قلبي تحسين كذا عادي
هزت راسها و وصلوا للفندق و وقفت كيان السيارة و نزلوا يدخلون الفندق و ناظروا لفخامة المكان و شافوا المصممة و قالت كيان : عذرا على التاخير
ابتسمت المصممة : لا عادي
ابتسمت كيان و مشوا يجلسون على الطاولة و طلعت المصممة الايباد و قالت المصممة : وين العروس ؟
كيان : انا
ترا راسها المصممة و قالت : طيب افكارك عن العرس كيف تبينه ؟
كيان : مدري
جنان : اجل مين يدري ؟ حنا ؟
رفعت كتوفها كيان و قالت المصممة : مبدئيا حنا بنكون مسؤولين عن كل شيء بالفندق سواء كان من خدمات او  ضيافة و حتى تصميم الفندق انتِ احكي افكارك و انا ارتبها لك
كيان : ابي مكان كله ورد و خصوصا التوليب و ابي الاوان تكون بالوردي و البني ابي اجواء و كأننا برا السعودية
المصممة : وين ؟
كيان بتنهيدة : امستردام
ضحكت جنان : مكان بدايات العشق و الهيام
ضربتها خيال و هي تضحك و قالت جنان : و انا صادقة
ضحكت المصممة : طيب بنضبط لك اياها طيب تبين كنبات و لا طاولات ؟
كيان : ابي طاولات و عليها ورد و شموع
هزت راسها المصممة و بدات ترسم بالايباد و من خلصت لفت عليهم الايباد و شافوه و قالت المصممة : رأيكم ؟
ابتسمت كيان : حلو مرا
المصممة : نعتمد ؟
كيان : اعتمدي
هزت راسها المصممة و اكدت الرسم اللي رسمته و الالوان اللي اختارتها كيان و من خلصوا طلعوا يركبون السيارة و قالت خيال : الهير ستايل و الميكب ارتست كلهم اكدوا على موعدنا
هزت راسها كيان و كملت خيال : حتى اللي بتسوي مسكتك اكدت علينا
جنان : و ترا كلمت الدي جي و وافقت بس باقي البلاي ليست
كيان : حلو والله و لفت على خيال : مرا شكرا تعبتكم معي
خيال : وشدعوه كيان خوات حنا
جنان : يبغالها جلد قسم بالله
ابتسمت كيان و مشت متوجها لبيتهم

-

لبست عبايتها و ناظرت لعبدالعزيز: يالله نروح للموعد
قام من مكانه عبدالعزيز : اليوم بنعرف اذا اخ او اخت غيث
هزت راسها و قال غيث : بروح معكم
عبدالعزيز : ايه بتروح
ركض غيث قدامهم بحماس و ابتسم عبدالعزيز يشابك يدها بيده يمشون و امامهم غيث و نزلوا و قال غيث لشوق و متعب اللي جالسين : بروح اشوف اخوي
متعب : رح معهم و علمني عشان اشوف اشتري طقم لك و له او نسحب عل، البنت
غيث : يارب ولد وع البنات مابي
ضحكت شوق : حرام عليكم البنات حلوين
كشر غيث و طلع من البيت يركض و راحوا معه اهله يركبون السيارة متوجهين للمستشفى و نزلوا متوجهين لداخل و وقفوا عند الاستقبال عشان ياخدون اشعة لنوف و كانوا ينتظرون و كان غيث اللي جالس بينهم متحمس بهاللحظة و قاموا من نادتها الممرضة يدخلون لغرفة الاشعة و انسدحت نوف ترفع البلوزة تكشف عن بطنها و ابتسمت تسمع صوت النبض و ناظرت لغيث المتحمس و ناظرت للممرضة اللي قالت : تبين تعرفين الجنين ؟
هزت راسها و قالت الممرضة : ولد
صرخ غيث بحماس و ناظر لعبدالعزيز اللي شاله يحضنه : بيجي اخو غيث
هز راسه غيث بحماس : بيجي اخوي انا اخ كبير الحين
ابتسمت نوف و قامت من مكانها تشوف فرحتهم بالولد و قال عبدالعزيز: راضية ؟
ابتسمت : دامه منك اكيد راضية
ابتسم لها و عدلت شكلها و طلعوا مع بعض و حاوط كفها : يا ام الاولاد
ابتسمت : هلا يا ابو الاولاد
عبدالعزيز: شعورك و انتِ حامل بولد مرا ثانيه
نوف : شعور حلو احب الاولاد انا
ابتسم غيث و ناظر عبدالعزيز لغيث : كان عندي واحب اغار منه و تنهد : الله يعين بس
ضحكت : تغار من عيالك ؟
ابتسم : اغار من اي شيء يشغل بالك عني
ابتسمت بخجل و طلعوا من المستشفى يركبون السيارة يرجعون للبيت و وصلوا للبيت ينزلون و شافوا سيارة السواق اللي جاي تاخذ دبش كيان يوديه لبيتها و دخلوا للبيت و شافوها تلبس عبايتها و معها البنات و قال عبدالعزيز : خلاص اغراضك صارت ببيت مرهف
هزت راسها : خلاص بروح لبيته
تنهد : ما امداني اتهنا معك و جاء خذاك
ابتسمت : وين بروح تراني بالحي اللي وراكم
عبدالعزيز : غير عن لما تكونين قدامي و بعدين ذا ما يجلس بالرياض يعني ننساك
ضحكت : ما ياخذني منكم شيء و قامت من الكنبة : يالله بنروح حنا مع السلامة
جنان : قبل ما نروح ها بنت ولا ولد ؟
غيث : بيصير عندي اخ
كشرت جنان : وع طفشنا من الاولاد
كشر غيث و قالت خيال و هي تضحك : تمزح معك اصلا حنا نموت بالاولاد
ابتسم لها : انتِ كيوت مو نفس هذي
ناظرته بطرف عين جنان : هذي عمتك يا حلو
ضحكت كيان : خلو المزح ويالله نروح لا نتاخر
جنان : مشفوحة على بيت حبيبك
ضحكت : ايه بالله
مشوا يطلعون يركبون سيارة كيان متوجهين لبيتها و كانت تناظر للسيارة اللي امامها و فيها اغراضها و هي تسوق هي حاليا مو قاعدة تستوعب اللي تعيشه هي قاعدة تعيش اخر اللحظات بانها تكون عايشة لحالها بكيانها و محد معها هي جالسه تخلص اخر المهمات بانها تنتقل معه لحياته طول عمرها هي ما توقعت بعمرها بتجرب شعور انها تجهز لليلتها معه و لحياتها اللي بتبديها مع انسان تحبه و توده تحس انها بحلم لحظة انها بتكون معه بعد يوم فكرة مستحيلة و وقفت عند البيت ينزلو مو اخذت المفتاح تفتح باب بيتهم هي و حبيبها و عوضها بهالدنيا و دخلت و قالت جنان : ماشاء الله وشذا البيت يهبل
ابتسمت كيان : اختيار مرهف
خيال : يجنن ماشاء الله يارب يجعله ليت العمر
كيان : يارب
دخل السواق اغراضها و قالت كيان : يالله
شالوا عباياتهم و بدو يرقون اغراضها معها و اخذت الشنطة اللي تحت تحط خيوطها و صوفها جنب مرسمه و ناظرت لصورهم و هم صغار و رقت تدخل غرفة نومهم تشوف اغراضه الموجودة و نزلت السنطة على الارض تفتحها و بدات ترتب و البنات معها و اخذت مكياجها تحطه جنب مكينة حلاقته ، عطورها جنب عطوره ، اكسسواراتها جنب ساعته ، كريماتها جنب كريمه ، مشط شعرها جنب مشط شعره و فتحت الدواليب تحط شنطها جنب شنطه  ، فساتينها جنب ثيابه و ناظرت لهالتفصيل اللي تذوبها كل شيء بينهم صار مشترك و كأنهم صاروا واحد و ناظرت لجوالها من جتها رسالة [ الحلوه ما شفتها صارلي كم يوم ]
ابتسمت [ تشوفها بالفستان الابيض ان شاء الله ]
مرهف [ يعني مافي امل اشوفك ]
كيان [  اعتذر بس مافي امل ]
مرهف [ طيب انتِ وينك ؟ ]
ابتسمت و صورت له المنطر اللي امامها فستانها و ثوبه و ارسلت له
مرهف [ و تحقق حلمي و فستانك صار بدولابي ]
ابتسمت و سكرت الجوال تروح للبنات و من خلصوا من ترتيب كل شيء طلعوا و شافت البيت لاخر مره بالمره الجاية بتكون جايه و يدها بيد مرهف طول العمر و ابتسمت تركب السيارة ترحع للبيت