ပြီးခဲ့သည့်ရက်သတ္တပတ်လုံးလုံး သူတို့သည် ယခင်ကထက်ပိုသည့်ချစ်ခြင်းမေတ္တာ ၊ နွေးထွေးမှုတို့ဖြင့် တစ်ဦးကိုတစ်ဦး ပို၍နားလည်နိုင်စေရန် ကြိုးပမ်းခဲ့ကြသည် ။ ထို့ကြောင့်ပင် သူသည် ကတိ တစ်ခုအား မျက်စိစုံမှိတ်ကာ လက်ခံပေးခဲ့သည် ။ ထိုကတိကို ရရချင်း မောင် အတော်လေး ဝမ်းသာသွားခဲ့သည်မှာ ဟန်မဆောင်နိုင်လောက်အောင်ပင် ဖြစ်သည် ။
ယနေ့၌ သူသည် Cafe ဆိုင်လေး၌ မောင်နှင့်အတူရှိနေခဲ့ပါ၏ ။မောင် မှာယူပေးထားသည့် အမေရိကာနိုမှာ တစ်စက်ကလေးတောင်မှ မလျော့သေးပေ ။ စိတ်ရှုပ်နေခြင်းကြောင့် သူသည် အစားစားမဝင်ပါချေ ။ မောင်က ပိုက်ကိုသာ အဆက်မပြတ်မွှေနေသည့်သူ့လက်ကလေးကို အုပ်ကိုင်လာပြီးနောက် ခပ်ဖွဖွလေးပြုံးပြကာ စားပွဲခုံထက် လက်အားဆွဲတင်လာခဲ့သည် ။ ထို့နောက် တင်းတင်းကြပ်ကြပ်ဆုပ်ကိုင်လာပြီးနောက် တိုးတိုးဖွဖွပြောလာပါ၏ ။
" သူ ရောက်လာပြီ "
မင်ယွန်းဂီသည် စိတ်လှုပ်ရှားစွာဖြင့် ဆိုင်ပေါက်ဝသို့ လှမ်းကြည့်လိုက်မိ၏ ။ ဂါဝန်အဝါဖျော့လေးဝတ်ဆင်ထားသည့်ယူမြောင်ဟီးသည် သူတို့အား မြင်သော် အံ့သြသွားသည့်အကြည့်တို့ ပြောင်းလဲသွားခဲ့၏ ။ သေချာပေါက် သူ့အားတွေ့လိုက်ရခြင်းကြောင့်သာ ဖြစ်ပေမည် ။ သူမသည် သူမ၏ သိပ်သိသာပုံမရသည့်ဗိုက်ကလေးပေါ် လက်လေးတင်ကာဖြင့် သူတို့ရှိရာဝိုင်းသို့ ဖြေးညှင်းစွာလျှောက်လှမ်းလာသည် ။
" ယွန်းဂီရှီပါ ပါမယ်မှန်းမသိလိုက်ဘူး "
သူမက ခပ်ဖျော့ဖျော့လေးပြုံးလာပါသော်ငြား အကြည့်တို့ကမူ အေးစက်နေသယောင် ။
" ဟုတ်တယ် ။ ငါ နင့်ကို ကြိုမပြောလိုက်မိတာ ဆောရီး ။ ရုတ်တရက်ကြီး ဖြစ်သွားတာမလို့ ။ ထိုင်လေ "
ယူမြောင်ဟီးသည် မောင့်မျက်နှာချင်းဆိုင် ခုံ၌ ဝင်ထိုင်လာသည် ။
သူသည် ရှေ့မှ မိန်းကလေးအား အကဲခတ်နေမိပေသည် ။ အလွန်အမင်းချောလှခြင်းမျ်ိုးမရှိသော်ငြား ဆွဲဆောင်မှုရှိသည်ဟု ဆိုရပေမည် ။ ပထမဆုံးအကြိမ် တွေ့ဆုံခြင်းမျိုး မဟုတ်ပါသော်ငြား ယခုအကြိမ်မှသာ စိတ်အေးသက်သာစွာဖြင့် သူမအား စိုက်ကြည့်နိုင်ခြင်းဖြစ်သည် ။ တကယ်တမ်းကျ ယနေ့အဖို့ ယူမြောင်ဟီးနှင့် တွေ့ရန် မလိုအပ်ပေ ။ သို့သော် သူသည် သူပေးထားသည့်ကတိအား တည်နိုင်ရန်အတွက် မောင်နှင့်သူမ၏ ဆက်ဆံရေးကို မျက်စိနှစ်လုံးဖြင့် သေချာအကဲခတ်ရပေမည် ။
YOU ARE READING
BLUE
Fanfictionမောင်အတွက်သာဆို သူ ဗီလိန်ဖြစ်ရလည်း အဖြစ်ခံနိုင်သည် ။ တစ်လောကလုံးက အမုန်းတွေကိုလည်း သူခံနိုင်ပါသည် ။ မောင်ကိုတော့ ဘယ်နည်းနဲ့မဆို ပိုင်ဆိုင်နိုင်ရမည် ။ ဒါဟာ သူ့အတွက် အချစ်ဆိုတာပင် ။
