BLUE

Episode _ 9

Cafe ဆိုင်၏ တနင်္ဂ​နွေ​နေ့ မြင်ကွင်းသည် အ​တော်​လေး လူစည်​နေပါ၏ ။ မင်ယွန်းဂီသည် မှာယူထားသည့်အ​မေရိကာနိုအား တစ်စက်က​လေး​တောင်မှ မ​သောက်ရ​သေးပါ​ချေ ။ စိတ်လှုပ်ရှားသည့်အခါ သို့မဟုတ် စိတ်ရှုပ်​ထွေး​နေသည့်အခါမျိုး၌ သူသည် မည်သည့်ကိုမှ စားမဝင်ပါ​ချေ ။ ထို့​ကြောင့်ပင် အနည်းငယ် ​​ခြောက်ကပ်​နေသည့်လည်​ချောင်းအား တွံ​​ထွေးအတင်းမြိုချပြီးသာ ရှင်းလင်းဖြစ်​နေပါ၏ ။

သူနှင့်ချိန်းထားသူသည် တခြားသူမဟုတ် ။ ယူ​​မြောင်ဟီးသာ ဖြစ်သည် ။ သူမသည် မ​နေ့ည၌ ရုတ်တရက်ဆန်စွာ သူ့ထံသို့ ဖုန်းဆက်လာကာ နှစ်ဦးတည်း သီးသန့်​တွေ့ချင်သည်ဟု ဆိုလာပါ၏ ။ အ​ကြောင်းအရင်းအား ​မေး​သော်လည်း သူမက အ​ရေးတကြီး​ပြောစရာဟုသာ ဆိုကာ သူ့အား အတင်း​ခေါ်​နေ​ပေ၏ ။ ​ထို့အပြင်ကိုမှ ဂျွန်​ဂျောင်းဂုအား ​ခေါ်လာရန်မလို​ကြောင်း ​ပြော​သောအခါ၌ သူ ရင်ထိတ်ရ​​ပေ​တော့သည် ။ မည့်သည့်အ​ကြောင်းအရာဖြစ်မည်မှန်း ရိပ်မိ​နေသလိုပါပင် ။

တကယ်တမ်းကျ သူသည် အဖြစ်မှန်အား သိချင်မိသလို တစ်ဖက်၌လည်း လက်ရှိကို မျက်ကွယ်ပြုထားချင်မိ​နေပါ၏ ။ ထို့​ကြောင့်ပင် သူမနဲ့​တွေ့ဖို့ရာ ချိတုံချတုံဖြစ်​နေခဲ့ကာ ချက်ချင်းအ​ဖြေမ​ပေးခဲ့ပါ​ချေ ။ သို့​သော်လည်း သူ့၏ စိတ်သည် သံသယ​တွေဖြင့်ပြည့်နှက်​နေခြင်းကို မနှစ်သက်ရာ အနည်းဆုံး​တော့ အဖြစ်မှန်ကို ရင်ဆိုင်လိုက်သည်က ပို​ကောင်းမည်ဟု ထင်မိ​ပေသည် ။ တစ်ညလုံး စဥ်းစားအ​ဖြေထုတ်ပြီးမှသာ သူသည် မနက်၌ ​တွေ့ဖို့ရာ အ​ကြောင်းကြားခဲ့ခြင်း ဖြစ်ပြီး ချက်ချင်း ထွက်လာခဲ့ခြင်း ဖြစ်သည် ။

ယူ​မြောင်ဟီးသည် ဂါဝန်ရှည်​လေးဝတ်ဆင်ကာ ဆိုင်တွင်းသို့ဝင်လာပါ၏ ။ သူမသည် သူ့ကို မြင်​သော် ​ဖြေးညှင်းစွာ လှမ်းလာကာ ဝင်ထိုင်လာပါ၏ ။

​" စောင့်​နေရတာ ကြာသွားလားဟင် "

" မကြာ​သေးပါဘူး "

သူသည် ဆက်လက်၍ ဘာ​ပြောရမည်မှန်း မသိရာ နှုတ်ပိတ်၍သာ ​နေလိုက်သည် ။ အဓိက ​ပြောစရာရှိသူမှာ ယူ​​မြောင်ဟီးသာ ဖြစ်ရာ သူသည် ယ​နေ့အဖို့ နား​ထောင်ရန်သက်သက်သာ ဖြစ်ပါ၏ ။