حب من اول باسينة

💦حب_من_اول_باسينة💦

✨كاتبة: ســــــــاࢪو✍🏻

#حلقة: 06

وصلت لحانوت لماعين... وتاكل في تشيواوا وترمي في قشور الزريعة في لرض

_مولا الحانوت: هااختي حبسي حبسي
شافت فيه بإستغراب طلعاتو من فوق للتحت
_ريحاب: مالك محبسني غير الخير
_مولا الحانوت: حبسي من ماكلة الزريعة رحمة على شوابين... هذا وين كنت نظف فيها كي تخرجي كوليها لابغا ارميها
_ريحاب: معليش برك... عندك باسينات؟؟
_مولا الحانوت: واه كاين
_ريحاب: هيا مليح... وريلي الباسينات لي عندك
جبدلها الباسينات من كل نوع وحدة باش تشوفهم

راحت شافت بلاصة فارغة في الحانوت... وتربعت في لرض وتشوف في نقشة تاع الباسينات
راجل بصدمة: هاااختي واش راكي ديري... حمبوك واش راكي ديري
_ريحاب: اسكت عليا كمل شوف شغلك
_مولا الحانوت: راكي تزعقي عليا... منشرة عليك الباسينات ومتربعة في نص الحانوت تهربيلي في ليكليون

_ريحاب: هاني نشوف فيهم ليكليون الله يبارك دايرين الحرب باش يفوتو لحانوتك... كون ماشي انا راك تبعد في ذبان... وديجا روح عليا ياك جيتك بدراهمي ماجيتكش نطلب... ماهو ماعندكش عبلة في دار باش تحس بيا على واش راني ندير درك

_مولا الحانوت: شكون عبلة... استغفرالله يااربي حسبي الله في ظالم
_ريحاب: ايه استغفر استغفر... باش يفتح عليك ربي ويباركلك ..... هاه واخيرا لقيتها
_مولا: الحانوت الحمدلله ياربي حمدالله بعد الذيق يأتي الفرج الحمد وشكر ليك ياربي رحمتني

_ريحاب: هيا برك صدعتلي راسي
_مولا الحانوت: ماكي قلتيلي استغفر يفتح عليك ربي سبحان الله استجابلي في لبلاصة
_ريحاب: المهم بشحال الباسينة
_مولا الحانوت: 85ألف
_ريحاب: ايي قلبي... قلبي يسطر عليا يايوما الحنانة
تخلع مولا الحانوت: ختي مالك ياك لباس راكي مليحة
توغت في وجهو... وخرجتلو عينيها
_ريحاب: واش الباسينة مرصعة بذهب... تتمسخر بيا 85 كون تقعد هي والله مانشريها... شد لخماج عندك
_مولا الحانوت: ليا نص ساعة وانا صابرلك وعلى لسانك لي مسلطاتو عليا... من بعد ماتشري والو
_ريحاب: لالا مانشريش سلعة غالية ومولاها رخيص
_مولا الحانوت: اخرجي عليا الله لايرربحك
_ريحاب: ان شاء الله في راسك.... جبدت قشور زريعة من جيبها... ورمتهالو في الحانوت.... وهربت تجري

#saroo
#ممنوع_النقل_من_دون_اخذ_اذن_مني