💦حب_من_اول_باسينة💦
✨كاتبة: ســــــــاࢪو✍🏻
#حلقة: 02
_ريحاب: هوا ولالا هوااا... هوا ولالا هوااا... هوا ولالا. لا نشرب كاس دواء... انا وياك ياحبي... انا وياك ياحبي ... انا وياك يحبي حوايجي وحوايجك يتغسلو في باسينة وحدة ومعانا ربي
_وسيم: غني غني ماهو يخرج عليك لغناء
_ريحاب: واش جاب جدك عندي انت
_وسيم: حكي ملييح ديري صابون
_ريحاب: وسيييم اخرج...
_وسيم: احممم نرجعو لموضوعنا... البارح بابا تودرتلو سيكونت ميل....
_ريحاب: وانا علاه جاي تحكيلي... في حكاية كنت حاضرة عليها
_وسيم: وهي عندك نتي
_ريحاب: واش راك تخرف اخرج عليا
_وسيم: شفتك دخلتيها في صدرك... وكان علابالي بيك غير مابغيتش نقول لبابا...
_ريحاب: قذف المحصنااات معلموكش بلي حرام
_وسيم: قذف المحصنات اه...لالا انا علموني من لإبتدائي سرقة حرام والكذب حرام... خرجيها خرجي خير مانبيعلو يسكانيك اليوم
_ريحاب: حيو!ان... فرانسا راحت ونساتك انت هنا
_وسيم: شفتي كيفاه ودرك خرجيها واعطيني عشرة الالف
_ريحاب: خمس الالف
_وسيم: خمس طاش الف
_ريحاب: مش درك قلتلي عشرة الالف
_وسيم: كل ماتعطيني العرض اقل... نعرض عليك ما أكثر
_ريحاب: عشرالالف خير مانتقو!د عليك درك
_وسيم: هاتي لي جا منك كلو راهو مليح
_ريحاب: استنى نفرغ الحوايج من الباسينة ونمدلك
_وسيم: مرانيش مربوط بباسينة انا... اعطيني خلي نروح
_ريحاب: قاارع قلتلك
بعد ماكملت نشفت ايديها في حوايجها... ونفضت الباسينة من الماء.... وتخرج في دراهم من عبونها
_ريحاب: شوف معنديش صرف... بصح والله ياوسيم تدي اكثر من عشرةالالف... مانتفاهمش معاك....
_وسيم: هاتي برك... مزاش دراهم سرقة وزيد مجحاحة عليها.... على ماحطتهالو في ايدو... غفلاتو بالباسينة لراس....
_ريحاب: وهذي معاها وحدة بونيس
_وسيم: كسر وقلة الجبر... هك بغيتي تحلليلي راسي يالخامجة يالهجالة
_ريحاب: كون غير... وفقدت معاها ذاكرة تاني نبرمجلك راسك من جديد
_وسيم: بعيد الشر... محصنيين عندي منك مناعة اعوذ بالله من الخبث والخبائث
_ريحاب: ارواح يارخيس نوريلك الخبث والخبائث كي دايرين....
لعبلها حواجبو وهرب... رجعت قعدت باش تشلل القش تعمر في هذيك الباسينة وتستنى فيها تتعمر وماتعمرتش... شافت الماء خارج من تحت الباسينة
_ريحاب: وهذا الماء منين خارج.... وقفت هزت الباسينة وقابلتها تكسرت على جيهة... شهقت
_ريحاب: غادي تسوطني احاااي... غادي تضر!بنيي هاااحاااي... غادي تسقلنيي هاااحاااي غادي تقت!لنيي هااحاااي... قعدت وحكمت في راسها
_ريحاب: واش غادي ندير ذرك حتى دراهم ماعنديش وياااربي كي ندير... روح الله لاتربحك ياوسيم ياوجه شر جرتك مايجيش منها الخيير
#saroo
#ممنوع_نقل_دون_اخذ_اذن_مني
أنت تقرأ
حب من اول باسينة
Humor✨جييتكم بكرونيك قصير...حفيفة... كوميدية من عنوانها باينة نتاع ضحك... فكرتها كانت بسبب منشور حطاتو ملوكة يعني الفكرة كانت بسبابها مام العنوان اختراتو هي.... مهم ديديكاس الملوكة وميلو.... ♡ 💦عنــــــــــــــــوان لكرونيك: ...
