سبحان الله وبحمده سبحان الله العظيم..لا تلهيك الروايه عن الصلاة
ابوي كان شديد علينا ماعنده تفاهم ابد كان يضربنا على اتفه غلط كان يتفنن في ضربنا كان يتوقع الضرب يصنع منا رجال ماكان يحسب انه بكل ضربه يكسرنا ألف مره بدون مايحس كنا نكره أبوي كره غير طبيعي كره بحجم العذاب اللي نتعذبه بسببه كنا نتمنى يموت اليوم اللي يسافر فيه أبوي عندنا عيد اذكر مره جاء المدرسة والمدير شكى من احمد وحنا بثاني متوسط قام وضرب احمد قدام المدير والمعلمين .
ذاك اليوم مستحيل انساه باقي اذكر شكل احمد يتلوى من الضرب وهو عصبي ولاهو قادر يبكي ولما روحنا كمل الناقص .
مره قومنا لصلاة الفجر وكانت الدنيا مطر وبرد شديد وقال الحقوني المسجد لما شفنا المطر والبرد صلينا في البيت ورجعنا ننام.
ورجع ابوي والمسجد وعقاب لنا خلانا في الحوش تحت
المطر حدود ساعتين واقفين كان احمد ياخذ يديني ويحطها بين يديه ويحركها علشان البرد.
واستمر ابوي على هذا الحال واستمر أحمد في العناد ابوي كان يتحكم حتى في ملابسنا نلبس الشي اللي يعجبه هو حتى اصدقائنا كان هو اللي يختارهم وكنت انا عادي ارضى بأي شي خوف من بطش أبوي بس احمد كان يعارض ويرفض ويسوي اللي هو يبغاه والنتيجة معروفه ضرب او سجن له في مخزن المزرعة. حتى سجلنا في القطاع العسكري غصب عنا وخطب لأحمد بدون مايدري ولما عرف حلف مايتتم زواجه وهرب من ابوي قبل الملكه بيوم و ماكان قدامه إلا أنا زوجني البنت بدون اي اعتراض مني لاني اخاف منه كان صعب علي اتزوج وحده اكبر مني بثلاث سنوات واتزوج وحده كان اخوي بيتزوجها ولا اعرفها وكنت مخطط انا وأحمد مانتزوج إلا اخوات علشان نكون مع بعض ولا نفترق لكن أمر أبوي وتزوجتها مكره وجاني منها ولدي محمد نسخه من جده وعمه أحمد وحتى وانا متزوج ابوي كان يتدخل في حياتي بكل شي زوجتي ماقدرت تتحمل تدخل ابوي بكل صغيرة وكبيرة في حياتها طلبت الطلاق وابوي اول من وافق وجبرني اطلقها ونكاية فيها وفي أهلها اخذ محمد من عندها وعمره شهرين واحرمها منه ..
وبنفس الأسبوع خطب لي جميلة بنت خالي وبدون شوري وتزوجتها والحمدلله حياتي معها كانت مستقرة حاولت قد مااقدر ان علاقتي في عيالي تكون مبنيه على الحب والتفاهم كنت حريص كل الحرص اني مااعيد اللي سواه ابوي معنا كنت ابغى يكون حب عيالي لي حب طبيعي مو حب خوف مني .
ولا اذكر مره اني ضربت احد من عيالي بدون سبب في الفترة اللي كان احمد غايب انا كنت احس فيه لما يتعب لما يتضايق لاني كنت انا اتعب ويضيق صدري كنت احس فيه وهو بعيد ويوم وفاته تحديدآ يوم عرفه ضاق صدري حتى نفس ماقدرت اتنفس من الصباح وانا تعبان لين الظهر اخر شي ضاق صدري مره وانا اصيح واشق ثوبي واغمي علي لمدة ساعتين اثاري احمد كان يحتضر ..
