-
ثاني يوم الصباح
ام عبدالعزيز و ابو عبدالعزيز جالسين بصاله و يسولفون و البنات بالمطبخ و الرجال كل واحد بشغله الي بالعزبه و الي بالمحل
ام عبدالعزيز : يابو عبدالعزيز انا ودي ازوج سعود بدر و هو اصغر منه عرس و هو بعده
ابو عبدالعزيز : زين ما فكرتي به و مين الي ببالك ؟
ام عبدالعزيز : الشموخ بنت نايف و البنت ماشاء الله عليها اخلاق و دين و جمال
ابو عبدالعزيز : زين ما اخترتي و انا بكلم سعود و بكلم ابوها و بنشوف
ام عبدالعزيز ببتسامه : طيب
-
بعد الغداء
الكل راح يرتاح بحكم انهم جو من راحه الى كرف الا سعود ابوه ناداه يجي يبي يفتح معه موضوع الزواج
ابوعبدالعزيز: شوف بدر اخوك و هو اصغر منك تزوج قبلك و انت للحين ما ودك تعرس
سعود : يا....
قاطعه ابو عبدالعزيز: اسمع امك اختارت لك من خيره البنات
سعود فهم انه امه فتحت الموضوع مع ابوه
كمل ابو عبدالعزيز: الشموخ بنت نايف و معروفه باخلاقها و دينها و كثير تقدموا لها و انت رجال ونعم فيك وش قلت ؟
سعود ببتسامه : ابشر يبه الي تشوفه
ابوعبدالعزيز كان شاك بان سعود يدري بالموضوع : اذا جا ابوها بكلمه بالموضوع و الله يوفقكم
سعود : امين
طلع سعود من عند ابوه و الابتسامه شاقه وجهة
-
غرفة بدر
دخل الغرفه و لقاها غرقانه بنوم و راح بدل و انسدح جنبها و نام بتعب
و قام قبل الاذان بوقت على صوت سعود يصارخ يقوم اخوانه طلع فتح الباب
بدر بعصبيه: ها وشفيك تصارخ
و عبدالعزيـز فتح الباب : قصر صوتك يا حمار العيال نايمين و انت تصارخ من اليوم
سعود مروق و جلس يضحك : صلاة عصر يا حمير قوموا
بدر بعصبيه: ما اذن بعد فيه وقت
سعود: عشان تتجهزون
عبدالعزيز بعصبيه : شف قسم بالله اذا ما تنقلع لاوريك و اتوطى ببطنك الحين
ضحك سعود بقوة
عبدالعزيز ضربه بكتفة : ياخي اقولك العيال نايمين
و بدر ضربه برقبته : انقلع
دخل بدر الغرفه و لقى نور جالسه تمسح على عيونها
بدر : وشفيك صحيتي
نور : وش فيه سعود يصارخ
بدر : جالس يقومنا الحمار
نور : ليه ؟
بدر : عشان نصلي
نور : طيب ليه تقوله حمار يقومنا للصلاة
بدر : باقي وقت على الاذان
نور ضحكت بخفه : ما يتوب
بدر : تصدقين كل التعب راح من شفت ابتسامتك
نور : طيب كل شوي ببتسم مابيك تتعب
بدر ببتسامه : لا اخاف قلبي يوقف
نور ضحكت : ودي تسمعني شي من قصايدك
بدر : ترا ماني شاعر يعني نقول بيتين كذا
نور : عادي اهم شي انه منك
جلس بدر جنبها و قال :
صباحهم خير وصباحي عيونك
يالليّ أبتسامه منك تمحي همومي
ودي أسافر بعيييد في سما كونك
وش أجمل من أني أبتدي فيك يومي ؟
بدر : صح ان الحين عصر بس اعتبريها وقت الصبح
نور : ياخي والله احبك بس مشكلتي ماعرف اعبر
بدر ضمها : انتي بس حبيني
نور : بحبك طول عمري
--
سعود راح يصحي هايف و انجلد من هايف و انحاش
طلع من البيت و جلس يدور بالديرة و يغني بهدوء و الفرح و السعاده متربعين بقلبه و اخيراً بيتقدم لها و وقف لما مر جنب بيت نايف و تنهد تنهيدة طويله و تمنى بذيك اللحظه يتقدم لها
و قال :
انتظر ما بقي شي للنهايه يا الحبيب
تكفى طلبتك النهايه معي عيشها
ماعندي استعداد اخليك لغيري
و يشهد ربي اني أحبك بكل مافيني
-
بعد المغرب بيت نايف
العنود ( ام الشموخ ) : كيف ما تبيه ؟
الشموخ : يمه مابي مو غصب
العنود : يا بنت لين متى بترفضين ترا عمرك بيروح !!
الشموخ : يمه صليت استخاره و لا ارتحت و انا من قبل ما ودي بالبعيد و لا ابي ابتعد عنكم
العنود : شوفي عاد انا نصحتك و انتي ما سمعتي كلامي بعدني لا تجين تبكين عندي
الشموخ : يمه باذن الله ربي بيكتب لي الي فيه الخير
العنود : باذن الله و الله يرزقك الرجال الصالح
-
بعد صلاة العشاء في بيت ابو عبدالعزيز
جا نايف و فهد و الناس ملتمين و تعشوا و خلصوا و جالسين يسولفون
ابو عبدالعزيز : شوف يا نايف انا ودي بطلب
نايف : ابشر بعزك نسوي الي نقدر عليه
ابو عبدالعزيز : حنا نبي القرب ودي اطلب بنتك الشموخ لولدك سعود
نايف : هذي الساعه المباركة و نتشرف بكم و سعود من خيرة الرجال لكن بشوف البنت و باذن الله برد لكم خبر
ابو عبدالعزيز : طيب خذوا راحتكم
