بخيمة الجده مزنه دخلت الجوهرة معصبه وقربت من الجده مزنه سلمت عليها : وشلون ياجده تتركي جواس مع الي ماتتسمى ذي
ناظرتها الجده مزنه بحده : انطقي زين قدامي فاهمه وبعدين لو انك حرمه سنعه ترى صار لك ثلاث سنين مخطوبه لجواس
الجوهرة لمعت عيونها : وش اسوي جواس ابد ما يناظر صوبي واذا حضرت المكان راح جواس بغمضة عين ، ثلاث سنين وانا مرتزه قدامه وين مايروح ومافاد
ناظرت الجده مزنه لشما : لين يرد جواس بعلمه يملك عليك اليوم قبل باكر
نزلت الجوهرة راسها بحزن : ليته يناظر قلبي الي مايدق لغيره ابد
الجدة مزنه عقدة حواجبها : روحي يابنتي لين يرجع جواس يصير خير
راحت الجوهرة وتنهدت الجده مزنه : اييييه من وين طلعتي ياشما وانا الي اقول ان جواس نسى واثريه مانسى
،
على غروب الشمس وقف جواس على حدود قبيلة الشيخ وضاح ، وتبسم : يكفي لهنا ماقصرتوا
زيد تبسم وحط يده على كتف جواس : لو اني اروح معك يكون احسن
جواس هز راسه : لا مايصير بكره بكون هنا على الظهر تقريباً
عوض ميل راسه : دام كذا بتلاقينا هنا ننتظرك مارح نتحرك
ضحك جواس : اتحداك تبقى وحدك لين باكر
جهاد بسخريه : تمزح وكاد عوض يبقى هنا لين باكر
جسار عقد حواجبه : جواس لزوم نتحرك كود نوصل
هز جواس راسه : نلتقي بكره ان شاء الله
تحرك جواس ومعاه جسار ومحمود وبندر وكنان ومازن وزياد وباقي رجاجيل القبيله كانوا خمسه وبكذا صار عددهم ١٢ رجال
وصلوا قبيلة الشيخ غازي بحلول الظلام واتفرقوا
راح جواس لخيمة الجده مزنه متلهف لشما
ويتطمن على بنت خالته ( صدفه خيراً من الف ميعاد ياشما زين الي لقيتك قبل يلقاك حد وماندري عنك )
دخل جواس خيمة الجدة مزنه ومالقاها قرب من شما الممتدده على الفراش تامل ملامحها واكتفاء يناظرها بهدوء ونسى شبه العيون الي كان يجذبه
دخلت الجدة مزنه وناظرته بحده : جوااس وش تسوي
فز جواس وقرب من الجده وسلم عليها : كنت ادور عليك
الجدة مزنه قعدت : اجل ذي من قبيلة الشيخ وضاااح
هز جواس راسه مبتسم : يمه ذي بنت خالتي ليلى شفتي شلون الصدفه يمه مزنه جمعتني مع بنت خالتي قبل يطولها حد من جماعة ساري
الجده مزنه هزت راسها : القدر ياولدي ماندري وش تاليه
جواس ناظر شما بهدوء : بكره باخذها لجدي وضاح وجدتي وضحه
الجده مزنه بحده : ومتى تتملك على الجوهرة طالت الخطبه
جواس بصدمه ( وش الاحساس الي عندك يمه مزنه ) رفع جواس حاجب : اتملك على الجوهرة يمه مزنه ، ترى مابيها وانتي تدرين
الجده مزنه بغضب : جوااس ماهو بكيفك يوم انك وافقت على الخطبه والحين ترفض تتملك وش صار ليه رافض الحين
جواس ناظرها بحده : متى وافقت على الجوهرة ماهو انتي الي تكلمتي دون شوري وعطيتي لهم كلمه ، الجوهرة مابيها بسبب او بدون سبب
فتحت شما عيونها على الازعاج وفزت قاعده تتذكر وش صار لها
ناظرة الجده مزنه على جواس الي قرب منها متبسم وتنهدت ( صاير تتبسم ياجواس وحنا كنا نتمنى البسمه )
جواس بلهفه : شما شلونك الحين عساك بخير
ناظرته شما بحده بعد ماتذكرت وش سوى لها : انت مهبول منت بصاحي وشلون تضربني
شدة شما سيف جواس بسرعه وفزت واقفه رافعه السيف بجهت جواس وبحده : عطني خيلي وخنجري وسيف شداد بسرعه اتحرك
تنهد جواس وميل فمه مبتسم : شما منتي قدي
بلعت شما ريقها واخذت السيف لرقبتها : اجل بذبح حالي ياجوااس
جواس بصدمه : وكاد انجنيتي اتركي السيف ياشما اتركيه
الجده مزنه بعصبيه : اتركي السيف وضاح موصي عليك ناخذك له سالمه
شما بصدمه تبعها غضب : وضاح العجوز ماني رايحه له لو بموتي فاهمه
جواس اشر لجدته تسكت قبل تفضحة : زين بعطيك الخيل والخنجر والسيف تعالي
طلع جواس من الخيمة وشما تتبعه حاطه السيف برقبتها تناظره بحده ،
ناظرهم عنان من بعيد وانطلق لمجلس الشيخ يعلمهم
اما جواس كان يمشي مبتسم وشما تتبعه
التف جواس وناظرها وضحك بخفه : وين رايحة بذا الليل ياشما للصباح يصير خير وش قلتي
شما عقدة حواجبها : جواس تستهبل علي
ضحك جواس : الي تشوفينه ياشما مير ترى انا مدين للشيخ وضاح بحياتي يعني لزوم اردك له بخير برضاك او غصب عنك
استغرب الشيخ غازي والجميع على كلام جواس الي اجتمعوا قبل يتكلم
الشيخ غازي : اتركي السيف يابنتي وش تسوين
شما بحده : دامكم تعرفون وضاح العجوز ماني بقاعده
كهلان بصدمه : وش تقولين عن الشيخ وضاح تراه جدك يابنتي
شما بعصبيه : ماهو جدي ذاك الشايب ومايقرب لي ابد وماني بنتك انا شما جراح بن وقاص ومن ماسمع عن ابوي وجدي بطول الصحراء او بعرضها
ناظر الجميع جواس واشر جواس على الجميع لاجل يسكتون : زين بعطيك السيف والخنجر
دخل جواس خيمته وطلع بخنجر شما وسيف شداد وناظرها رافع حاجب : خذي وعطيني سيفي بتركك تروحي
شما بسخريه : يكفي مره ماني هبلا عطني خيلي
تبسم جواس ومشى وشما تتبعه والكل يتبعهم بقلق
فك جواس خيل شما الي جات بيه وناظرها : وهذا خيلك عطيني سيفي
شدت شما الخيل مبتعده عنهم ونطت عليه ورمت سيف جواس وانطلقت
جواس حد عيونه : بتندمي ياشما ، الكل ينتظرني بمجلس الشيخ لين ارد
شد جواس خيله واخذ سيفه وانطلق خلفها متوعد فيها
الشيخ غازي بتفكير : وكاد جواس مايبيها تدري انه يقرب لها
ظافر حد عيونه : وش بيها انجنت ماتبي تروح لجدها
كهلان زفر بضيق : وشلون عمي وضاح ماعلمنا عن توام ليلى للحين
الجده مزنه رفعت راسها : تعالوا ننتظر لين جواس يرد ونفهم منه وش الي يصير
،
