على شروق الشمس بقبيلة الشيخ غازي والجميع منتظر بمجلس الشيخ
الجده مزنه بقلق : اقول ياغازي ماني مرتاحه وينه جواس
الشيخ غازي بهدوء : جواس رجال ماينخاف عليه وظافر وجابر والبقيه معاه
مهره : يمه ترى جواس ماعاد صغير تخافين عليه
الجده مزنه هزة راسها : اييه مير وضحه ينخاف منها ووضاح ماهو قدها
الشيخ غازي تنهد : لو انه ماراح لاجل شما كان ماتركته
مهرة بحيره : وش القصه تخفون شي انتم
الشيخ غازي عقد حواجبه : ماضي يابنتي واندفن
مهرة بحده : جواس مرتبط بذا الماضي
الجدة مزنه بحدة : لا جواس ولدي ماله علاقه ابد
دخل كهلان ومنيره يسلموا وقعدوا
كهلان ناظرهم بغرابه من ملامحهم الغاضبه : اليوم يردون
الشيخ غازي : اي قلت لهم مايطولون اكثر من ليله مير وكاد صار شي
منيرة بهدوء : شما وكاد ترد معاهم متوقع تبقى هناك
مهرة رفعت حاجب : مير ليه راحت وماتبيهم
الجده مزنه ناظرت البعيد : يبقوا اهلها يابنتي
الشيخ غازي عقد حواجبه : شما راحت لاجل شي ماهو لاجل تبقى يامزنه
كهلان ميل فمه : وكاد لاجل وصية ليلى مير الله يسامحك ياجراح لو علمنا من قبل يصير شي
الجدة مزنه ناظرت غازي بقلق : وش لها بالماضي الكل مات تعيش مابقى لها وتنسى
مهرة هزت راسها : شما ماهو مصبرها غير الانتقام وكاد وضاح مخبي شي كايد وراحت تفهم الي يصير
منيره تنهدت : المهم جواس ولدي مايتعب معاها
دخل كنعان وعليا وفاطمه يسلمون وقعدوا يتقهوون
الشيخ غازي رفع حاجب : كنعان وش البسمه ذي الي شاقه وجهك
كنعان ضحك بخفه : حلمت يبه ان جواس جاينا عروس
الجده مزنه بغضب : كنعاان وش ذا الحلم وكاد ماتغطيت زين
فاطمة بهدوء : مير الشباب كبروا ياعمه ولزوم يعرسون لمتى بينتظرون جواس
منيره ناظرت مزنه : ياعمه جواس مايبي الجوهره لاتجبرينه ويندم الجميع
الجده مزنه بحدة : لو انه مجبور كان مارضى بالخطبه ثلاث سنين مير الحين وش غيره
عليا تبسمت : ياعمه ثلاث سنين وجواس ابد ماذكر اسم الجوهرة بالسانه
مهره بسخريه : ونسيتي يمه شلون خطبتي لجواس
الشيخ غازي بحده : جوااس انهاء الخطبه وانتهاء
كهلان هز راسه : اي مير لارد لزوم يعرس بالي يبي
اقتحم عنان المجلس يصرخ : وصلوا وصلوا عمي ظافر وعمي جابر والبقيه
كنعان بفرحه : شما معاهم ماشفتها
وصلت الخيول ونزل منها جابر وظافر والبقيه يسلمون
اما جواس حمل شما ودخل بيها ووقفها وسط المجلس وابتسم للجده مزنه : شما حرمتي تملكت عليها اليوم
طلع الشباب من المجلس بعد السلام ونزعت شما غطاها وانذهل الجميع بجمالها وراحت مع جواس يسلمون على غازي ومزنه والبقيه تحت صدمة مزنه
الشيخ غازي تبسم وعيونه تتامل سعادة جواس : الف مبروك ياعيالي وشفتك ياجواس معرس
كهلان بسعاده : الف مبروك لا اوصيك ياجواس على شما
كنعان غمز لجواس : انزفيتوا او توكم جايينا
ناظر جواس شما الي عماته يضمنها بفرح : تونا تملكنا وجيناكم مير مرينا قبيلة الشيخ وقاص الله يرحمهم
الجده مزنه عقدة حواجبها : الف مبروك ياولدي مير خيمتك ماتكفي وماهي جاهزه
وقفت شما قرب جواس وبلهفه : بقعد بخيمة البنات لين يجينا عمي طارق اهو بقبيلة الشيخ همدان
هز جواس راسه : بتقعد مع البنات يمه مزنه لين اعدل الخيمه يمديني وزياده
الشيخ غازي تبسم : ابشري يابنتي الحين ارسل مرسول لعمك طارق وانتي روحي ارتاحي الحين
اخذت شما الغطاء وتغطت وحملها جواس واستاذن وطلع من المجلس حط شما بخيله ونط
ناظر شما وببرود : لو انك ماتبي تنزفي قولي
شما ارمشت وببحه حزينه ساخره : ليه ياجواس تبارزت مع قسور لاجلي
جواس رفع حاجب : لاجل شداد قبل يموت صحى ووصاني عليك كم مره قلتها لك
بلعت شما الغصه : ماقصرت
وقف جواس خيله امام خيمة البنات ونزلت شما تمشي وتعرج لين اختفت من عيون جواس غمض عيونه وتنهد
( وش تبي ياشما عجزت افهمك مير ماهو انا الي اطيح وانذل لحرمه ادوس على قلبي ياشما بدوس عليها )
،
باخر الليل وعلى شبة الجمر ومابقى بالمجلس غير غازي وعياله وجابر حكى ظافر على كل شي تكلمت عنه شما
جابر بهدوء : وكاد شما ماهي حفيدة وضحة لاجل كذا وضحة ماكانت طايقتها ابد
الشيخ غازي عقد حواجبه بحيره : وضاح مدري عنه كم متزوج غير وضحه وشو له شما تذكر الماضي
كهلان بصدمه : وشلوون ومانعلم غير بوضحة
كنعان عقد حواجبه : وان كان الشيخ وضاح متزوج غير وضحة وين عيالهن ماهو معقوله ماعندهن
الشيخ غازي تنهد : عايشه كانت امها بنت عمتي لاجل كذا اخذتها لكهلان اما الباقي مدري
كهلان بصدمه : وشلوون يبه مادري ليه ماعلمتني ليه ماقلت ان عايشه قريبتي كان ماتركتها تروح لهم
ظافر منصدم وبهدوء : يبه كهلان ركزوا شما ذكرت ان وصية ليلى كانت بسبب موت عايشه شما قالت لوضحة ان موت عايشه له سبب
جابر رفع حاجب : مير اتذكر ان عايشه ماكان بيها شي صحيح ياكهلان
كهلان شتت عيونه يحاول يركز والذكرى تمر بخياله : اي ضميت عايشه وتفقدتها مير ماكان بيها اي جرح
كنعان ميل راسه : كهلان ليلى كانت بقبيلة الشيخ وضاح
كهلان هز راسه : وضاح رسل مرسول طالب يجمع بناته بذاك اليوم
دخل جواس المجلس والكل ناظره وصمت
جواس بشك : ليه سكتوا
جابر تبسم : ابد نتكلم عن عيال عمانك دامك ملكت وشو له ينتظرون
جواس رفع حاجب : زين جدي يبه بكره باخذ شما ونطلع من القبيله
الشيخ غازي بحده : وين تروحوا لا ياجواس
جواس بهدوء ( وكاد عندكم علوم وماتبون اعلمها ) : مير شما تبي تطلع
كهلان عقد حواجبه : جوااس بعلم شما ماتطلع من القبيله وبعد عمها بيجينا مابيتاخر لما يعلم انها بقبيلتنا
جواس هز راسه ببرود : زين اجل عن اذنكم
طلع جواس والشك يلعب بيه وانطلق لخيمة البنات ووقف ينادي شما
طلت شما عاقده حواجبه : جوااس وش بيك بذي الحزه تنادي
قرب جواس منها وهمس لها : ابوي وجدي رافضين نطلع من القبيله
شما رفعت حاجب : ماهو وقته الحين بكره نطلع بالليل دون نعلمهم
جواس عقد حواجبه : ماتبي الليله نطلع
شما ناظرته بشك : لا انا تعبانه الليله مير انت ليه مستعجل وش وراك ياجواس
جواس ميل فمه : ماهو انتي الي تزوجتيني لاجل اساعدك
شما بسخريه : ايه ودي اصدقك مير صعبه ياجواس
جواس حد عيونه : تراك ناكرة معروف كم مره ساعدتك للحين يا الثعلب
شما وسعت عيونها وارمشت بسرعه : مره تساعدني ومره تكسرني ماتكمل جميلك ابد
تبسم جواس بخفه : ليت بس اقص لسانك ذا وكاد نرتاح
شما حدة عيونها : تراني ابارز بالسيف وكاد اذبحك دون تحس وارتاح
مسك جواس رقبتها بقوه : قبل تذبحيني تتوقعي حد يرضى يبتلي بك غيري
شما ضربت صدره وبصعوبه : وجع خنقتني جوااس
تركها جواس مبتسم والتفت رايح الا ان شما نطقة بغضب : وليه ابتلي بك او بغيرك ولي عم بروح معاه قبيلتنا يامهبول
التفت جواس ومن بين اسنانه : باحلامك تروحين معاه
شما رفعت يدها بتهديد : خل عمي يجيني وبتشوف ياجواااس وشلون بيسنعك
تحرك جواس راد لها مير شما دخلت الخيمه وغلقت الباب واندست بين البنات الي يضحكون على هواشهم
تبسم جواس بسخريه : تشوفين ياشما اجل تهدديني بعمك مير محد بقادر ياخذك مني الا الموت وماني بتاركك
