ناظرها جواس بصدمه ومن ثم ناظر هزاع وابتسم بسخريه على قهر قلبه : مانستك ابد
وقف هزاع وناظره بحده وقرب من شما : شما من ذا
عيون شما متعلقه بهزاع وملامحه الي تغيرت وبهمس مسموع : ليه رحت دون تودعني كلهم قالوا انك مت
هزاع تبسم بحنيه : صار شي بقبيلتي ورديت ماقدرت اودعك مير
ناظر هزاع لراشد بحده : ليه كذبتوا اني ميت
راشد رفع حاجب : كانت صغيره ومتعلقه فيك خفنا تتهور وتهج تدري بها ماتسمع الكلام
هزاع بغضب : ومالقيتوا عذر غير انكم قتلتوني وانا حي
ميلت شما فمها وبهدوء : المهم انك حي
اعمت جواس الغيره وحس بالخيانه قرب من شما وشدها بقوه وحملها بين يديه وبحده : انتهى اللقاء
شما بغضب : اتركني ياكذاب ماني راده معاك
راشد وقف امام جواس وبعصبيه : ماهي رايحه معاك اتركها ياجواس
جواس ومن بين اسنانه : ومن انت لاجل تمنعني
هزاع مسك كتف جواس بغضب : ومن انت لاجل تاخذها
جواس ناظره ورفع حاجب : حرمتي وبكيفي
راشد بحده : بنت عمي اذا ماتبيك مابتاخذها الا على جثتي ياجواس
انصدم هزاع وناظر شما بهدوء وحيره وترك كتف جواس
جواس ناظر هزاع بسخريه والتفت لراشد : وبنت عمك باي حق تاخذها وتضمك
شما توسعت عيونها بقهر : جواااس راشد اخوي بالرضاعه
جواس ناظرها بصدمه : ماقلتي لي من قبل
شما رفعت حاجب بغضب : ليه انت قلت لي انك ولد خالتي
جواس عقد حواجبه بعصبيه : لاجل اخذك واحميك نسيتي انك كنتي رافضه اي حد يقرب لك
شما شدت شعر جواس بقهر والدموع لمعت بعيونها : ودامك تدري اني بنت خالتك ليه قسيت علي ليه كسرت رجلي ليه اذيتني ياجواس ليه احتقرتني قدام الجميع وماتركت لي حرمه ورفعت شاني بين قبيلتك ليه
بلع جواس ريقه وقلبه يالمه اكثر من شد شعره وبهدوء : بنرد ونتفاهم بالقبيله
راشد ومنقهر من الي سمعه والي حصل لبنت عمه : مستحيل تاخذها الا على جثتي بعد كل الي سويته
جواس بغضب : بدوس على جثتك واروح
شما ناظرتهم وارمشت بخوف : زين هدوء شوي جواس اتركني بوقف بروحي
ناظرها جواس وعيونه الحاده يطل منها الشر
شما برقه تمسح دموعها : جواس بتطمن على عمي طارق من راشد تو ماتكلمنا زين وانت اقعد بعد
راشد بغضب : اتركها ياجواس ونتكلم بعقل
حطها جواس ومسك كفها وضغط عليه بتهديد
شما ناظرت راشد متحمله غضب جواس : راشد من بقى غير عمي طارق من قبيلتنا
راشد وعيونه منحده لجواس : ترى كثير اهربوا من القبيله بذاك اليوم وصلنا البعض منهم والباقي رسلوا مراسيل
شما تنهدت وابتسمت بخفه : مير ليه جيت ساري
راشد رفع حاجب : ترى ماني متهور مثلك مير جيت اراقب تحركات ساري
شما بانتصار : تخلصنا من ساري الحين بقى عياله
جواس بحده : وش مسويه لساري وشلون امسكوا خيلي
شما بفرحه ناظرته : صوبت ساري بسهم مسموم ولما اهربت وتبعوني عيال ساري اخذني راشد بخيله وترك خيلك يجرون وراه وامسكوه
جواس بغضب : جنيتي لو ان راشد ماكان موجود وانقذك كان امسكوك
شما بهدوء : ليتهم مسكوني كان ذبحتهم
مسك جواس شعرها بقوه وبتهديد : والله اني بذبحك وافتك منك ومن جنونك
شما بالم : جواااس شعري يالمني
ترك جواس شعرها ويناظرها بحيره خوفاً من تهورها : والحين لزوم نرد للقبيله الكل خايف علينا
راشد رفع حاجب : لا باخذ شما لابوي يتطمن عليها
جواس بتحدي : باخذ زوجتي وارد لقبيلتي وانك قداها وقف وامنعني
وقبل يتهور راشد وقف هزاع بينهم وبهدوء : ماهو وقته نتهاوش الحين وكاد عيال ساري منجنين وبيدورون على الي اطلق السهم بطول الصحراء وعرضها
جواس بسخريه : ان كنت خايف قولهم جواس بن كهلان ولد الشيخ غازي واهم يدلون الطريق
شما بغضب : انت صاحي تبيهم يروحون للقبيله
جواس ناظرها : كنتي تفكرين قبل تسوين سواتك لاتنسي ان ذي قبيلة زوجك يعني قبيلتك
ارتبكت شما من نظرات جواس وارمشت بتوتر : مير وش ذنب اهل القبيله
راشد ميل فمه ببسمه : اقول عندي فكره انتم روحوا لقبيلتنا وانا وهزاع بنرد لابوي نطمنه ونجيكم
شما هزت راسها بفرحه وناظرة جواس : نروح قبيلتنا ياجواس
تنهد جواس بخفه وهز راسه : زين تعالي نرد بالاول نطمن جدي غازي والبقيه وبعدها نروح لقبيلتك
تمسكت شما بذراعه بسعاده : اليوم بدون نرتاح بقبيلتك
هز جواس راسه بالموافقه وناظر راشد : تعال نتكلم شوي
انسحب جواس وراشد وابتعدوا شوي تحت فضول شما
قاطعها هزاع وبنظرته غرابه : شما شلون ملك جواس عليك ووشلون رحتي قبيلته
ناظرته شما بحيره من سؤاله وردت تناظر جواس : اهربت انا وشداد من القبيله وقت الغزوا وعبرنا الوادي مير شداد طاح بسهم عايض وقتها جانا جواس كان رايح الوادي يدور على رجاجيل من قبيلته مير لقانا واخذنا قبيلته
هزاع ومركز على شما : شلون ملك عليك
تنهدت شما وتبي تركز مع جواس وراشد : وداني لوضاح العجوز ولما رفضت اقعد بالقبيله اصر وضاح ما اطلع الا وانا على ذمة رجال
هزاع بغضب : شلون يجبرك وضاح على جواس واهوا يعملك كذا
شما عقدة حواجبه : جواس تنافس اهو وقسور مير كسب جواس المنازل وملكنا
هزاع وقف امام شما وناظر لعيونها : وشلون تروحي معاه ياشما وهذي معاملته لك
شما ارمشت وذكريات هزاع وحنانه عليها مر ببالها : هزاع صحيح جواس ماهو حنون مير يخاف علي
هزاع بغضب : وشلون يخاف عليك اذا كسر رجلك وهانك بقببلته وماترك لك حرمه
شما عقدة حواجبها : كسر رجلي لاجل اني هجيت ولاجل ماعاد اقدر اهج مير
قاطعها جواس بحده وعيونه على هزاع : ذي امور زوجيه ماتتكلمين معاه عنها وترى شي مايعنيك لاتتدخل فيه
هزاع ناظره بتحدي : اي شي يخص شما يعنيني وانت مملك عليها بالاجبار واذا
قاطعته شما بهدوء : هزااع ترى جواس زوجي وقبل يكون زوجي اهو ولد خالتي
انصدم هزاع وتعلقت عيونه بشما
اما جواس ميل فمه ببسمه وعيونه على شما : تعالي نرد
قربت شما من راشد وضمته وهمست : وش قال جواس
تبسم راشد وتنهد : انشغلي بحالك وبزوجك
ابتعدت شما عنه وناظرته بطرف عين : وتقول ليه اكرهك
ضحك راشد بخفه ونط جواس على خيله ومد كفه لشما الي تمسكت بكفه ونطت وراه وانطلق جواس بخيله
ناظر راشد هزاع ورفع حاجب : هزاع لاتناظر وراها مثل ماصارت لك حياه صارت لها حياه
ناظره هزاع بغضب : ليه كذبتوا عليها بموتي
راشد ناظر للبعيد : انت شيخ ياهزاع وواجبك قبيلتك وهمك كبير منت فاضي لشما وهبالها وان ماقلنا له انك ميت بتهج وتروح تدور عليك وانت تدري بعناد شما
هزاع بعصبيه : زين بقول ان معاك حق مير شلون تركت جواس ياخذها بعد الي سواه
قاطعه راشد بهدوء : هزاع ترى مستحيل اقبل انك تاخذ شما زوجه وجواس رجال مامنه اثنين مير عيبه عصبيته وكل انسان له عيب محد منا خالي منها
تركه هزاع والغضب وصل حده ونط فوق خيله وانطلق
تنهد راشد ونط على خيله وانطلق خلف هزاع
،
اما بطريق شما وجواس الي منطلق بخيله
شما بغضب : ليه اخذت راشد وما اخذتني
جواس رفع حاجب : ماودي اياك تسمعين وش بقول له
شما ضربت جواس بكتفه : ليه وش الشي الي ماينقال قدامي وش بينك انت وراشد
جواس عقد حواجبه : كلام رجاجيل وترى بعاقبك على خيلي الي اخذوه
شما بلعت ريقها وتدري ان جواس يعشق خيله : بتعاقبني علشان خيل بدال ماتقول يفداك الخيل
جواس ابتسم : يفداك الخيل وراعيه ياشما مير وسواتك يبيلها عقاب ولا مايبي
شما ضمته من الخلف وحطت راسها على ظهره : مير وانت شلون تكذب طول ذي الفتره وشلون ماقلت انك ولد خالتي عايشه
عقد جواس حواجبه بحده وعيونها على الفرسان الي يركضون ناحيته : شما طلعي سيفك
فزت شما بخوف تناظر : ماهو معقول شلون صاروا امامنا
طلع جواس سيفه وبهمس حاد : تاخذي الخيل وتجري اذا صار شي
شما هزت راسها بلا : مستحيل اتركك ياجواس ماتشوف كم عددهم وكاد يذبحوك
تبسم جواس لما ناظر اليد الي ارتفعت له وهدى السرعه ومثل االغضب : بترتاحين مني اذا اذبحوني وش تبي بعد
شما ارمشت وبغضب تغطي توترها : اي برتاح مير وشلون اصير ارمله وتوني عروس
وقف جواس خيله لما قربوا منه وضحك بخفه : ذا الي هامك ياشما بتصيرين ارمله
شما بعصبيه : ماهو وقته ليه وقفت قربوا
التف جواس يناظرها بطرف عينه : اجل نموت ياشما ونرتاح من ذي العيشه اقتلك الحين واهم بيقتلوني
شما بصدمه تحاول تستوعب : جواس بيك شي محموم انت ولا منت بصاحي
جواس هز كتوفه ورفع سيفه لرقبتها : انتي انتقمتي من ساري وانتي ماتبي تصيري ارمله وش بقى ياشما لاجل نعيش لاجله
شما والصدمه اشبه بكف انطبع بخدها : جواس وش تقول واهلك وجدتك والي يحبونك وشلون تستسلم تبي تقتلني اقتلني مير انت لاتموت
قربت الخيول منهم وصرخ عنان بفرحه : جواااس
ناظرت شما للفرسان وارمشت تستوعب ان جواس يلعب باعصابها ومشاعرها لمعت عيونها بالدموع وناظرت جواس منقهره من بسمته العريضه : ليتك تموت ياجواس واصير ارمله وش بلاني ربي بك ياكذاب
ضمها جواس يضحك بخفه وكهلان والبقيه مستغربين وش الي صار بينهم
جابر بغضب : وش صار شما متاذيه
جواس والبسمه ماليه وجهه : ابد مافيها غير العافيه وش جابكم وراي
كهلان بغضب : تصرفكم المهبول وش جرى بينكم وين راحت شما
جواس هز راسه : ابد ماسوت شي مير اذبحت ساري
انصدم الجميع وضحك كنعان : بكل بساطه اذبحته
جواس وضم شما اكثر لصدره يخبيها بقلبه : ايه اذبحته وردت زوجتي ماتهج ابد
ابتعدت عنه شما تناظر عيونه بحزن : مير اذا كذبت علي مره ثانيه ترى بهج وما ارد ابد
ضحك جواس بخفه : وش اكذب عليك به
قاطع جواس الغزاه الي حاصروهم وطل من بينهم عايض والشر بعيونه : شما وين رايحه تو بدري
شما بلعة ريقها والخوف على جواس واهله : والله الود ودي اقعد واتقهوى مير العرب اصروا ياخذوني
عايض بسخريه : لا ابد وين ياخذوك تو ماضيفناك
جواس بحده شد على ذراع شما : عايض اسلم روحك ورد من وين ماجيت
ضحك عايض بخبث : افااا ياجواس ذا بدال ماتستقبلني بالاحضان مير الله يسامحك ماهو منك من جدك غازي
ناظر جواس لـ ابوه كهلان بشك : ابعد عن طريقي ياعايض
عايض هز راسه بسخريه بالرفض : ابد ابد ابوي متشوق لشوفت شما ومصر اوديها له يتطمن عليها وترى ياشما جبر بعد عندنا
شما بسخريه : يازين قعده خالي حولها نطت شما من الخيل وانطلقت تجري لعايض الا ان جواس لحق عليها ومسك ذراعها بصدمه : وش تسوين صاحيه انتي
شما ناظرته وابتسمت وعيونها تتامل ملامحه وحطة كفها برقه على خده
عايض رفع حاجب : اقول ياشما ان كنتي تبي تلحقي على جبر وتقعدي معاه اذبحيه وتعالي
جسار بغضب : والله ياعايض اني اشرب من دمك
كهلان وخايف على ولده : شما يابنتي تراه يكذب لاتصدقينه تعالي
جابر بقلق : شما لاتفكري بالي يقوله ردي مع جواس
جسار بحده : شما يكفي جواس ماجاه منك
جواس بغضب : جسااار
شما تبسمت لجواس : مير ياجواس ماني تاركه خالي
توسعت عيون جواس بصدمه وصرخ كهلان وجسار تحت صدمت الجميع
