شفته ولا كنت داري بيوم اني بعشقه حبيته وانا قلبي عن الحب تايب

البارت الثاني

الـبـارت الـثـانـي

ـــــــــــــــــــــــــــــــ

بيت ابو اصيل
كان مشعل جالس يسولف مع فهد ويلعبون ورقه ويشربون شاهي
مشعل: تلعب معنا ياعم؟
ابو اصيل: لا
مشعل: امش يارجال وسع خاطرك كأنك ضايق
ابو اصيل: خلنا من اللعب ابيك بشغله انت وفهد
فهد: آمر
ابو اصيل: امشوا معي للعزبه تهتمون بالحلال
ضحك مشعل: رعيان حنا؟
ابو اصيل: اي، يلا قدامي انت وهو يلا
قاموا وركبوا السيارة متجهين للعزبه، وصلوا ونزل
ابو اصيل ونطق: انزل انت وهو والحقوا البل على رجولكم وانا بسبقكم للعزبه
مشعل: ياعم انت تدري ان الساعه 2 الظهر؟
ابو اصيل: اي ادري وين المشكله؟
مشعل: حر
ابو اصيل: اعقب، الرجال مايوجعه الحر يلا اذلف انت وهو

اخذ فهد العصاء ولحق البل وهو متعود على هالشي وياما تعاقبه اذا سواء شي غلط اما مشعل فكان هالشي جديد عليه وكان خايف من الحر ويحاول في عمه الين ركب ابو اصيل ومشى وسحب عليه

فهد: امش
مشعل: ياولد حر
فهد: عادي انا متعود على كذا والعزبه قريبه اصلا
مشعل: آهخ ياربي الله يعين

مشوا يلحقون البل ويسولفون ومشعل يتحلطم من الحر وفهد يضحك عليه.

ـــــــــــــــــــــــــــــــ

العزبه
نزل ابو اصيل ووقف عند الشبك وهو يشوف ناقه بتال توها جايبه حاشي ومخلينها بالشبك
ابتسم وهو يتذكر كيف بتال كان مغرم بهالناقه حيل وكان مسميها
« الذاير »
همس ابو اصيل: نتجت الذاير يابتال تدري ولا؟

( نتجت يعني ولدت)

التفت وهو يشوف مشعل جاي يركض ويغسل وجهه من الوايت
ابو اصيل: وش بك؟
مشعل وهو يلهث: تعبت وراحت طاقتي
كله من ذا النياق الله يهديها
ضحك ابو اصيل: لا وتبي تصير ولد ديره وهذي اخرتها شف فهد ماتعب ولا شي
مشعل: فهد متعود ولا انا لا
ابو اصيل: لا ابشرك بتتعود
فهد: لا وبنزوجك من بنات الديره وتتعود اكثر
مشعل لاشعورياً: تم
ابو اصيل: خفيف الله يصلحك

التفتوا وهم يشوفون سيارة مشاري جايه
نزلوا ونطق اصيل وهو يشوف وجه مشعل احمر من كثر الحر: وش فيه الطماطه؟
مشعل: الله لايوريك اللي شفته
سلم مشاري على ابو اصيل وابتسم وهو يسمع اصيل ينطق: كل هذا عشانك مشيت مع البل؟
مشعل: ياخوي ترا الساعه 2 الظهر الشمس تتلضى وتقول علشانك مشيت مع البل؟ عادي امشي معها بس مب في الظهر !
حمد: انت لو انك رجال ماكان احتريت من الشمس ياتيس
مشعل: ماني متعود على جوكم يالضبان
حمد: على طاري الضبان ترا صدنا ثلاثه وتغدينا عليها والله طعمها في المخ اووووف
مشعل: قليل حياء كيف تاكل اخوانك !!
ابو اصيل: اخوانه ضبان؟؟
مشعل: اي ياعم هو ضب اصلا واخوانه الضبان اللي تغداء عليهم

فهد وهو يناديهم من بعيد: تعالوا سويت الجلسه
جاوا وجلسوا وبدأ اصيل يسوي القهوه وحمد ومشعل يتهاوشون وفهد يسولف مع ابو اصيل ومشاري مستمتع بالجو