شفته ولا كنت داري بيوم اني بعشقه حبيته وانا قلبي عن الحب تايب

البارت الثالث والاربعون

الـبـارت الـثـالـث والاربـعـون

...........

الليل
بعد صلاة العشاء وبعد ما سولفوا وشبعوا من الوناسه بدا وقت الجد
نطق ابو اصيل في وسط الصمت: يا ابو مشعل
ابتسم ابو مشعل اللي يحب ان الناس ينادونه بهالاسم وهو ينطق: ياهلا
بلع حمد ريقه بتوتر وهو يناظر اخوانه ويرجع يناظر ابو اللي نطق: ادري انه ماهوب وقته لكن العجله زينه
استغرب ابو مشعل: وشو
ابو اصيل: نبي بنت مناهل لولدك حمد خطبه بس حتى يضبط الولد وضعه
ضحك ابو فهد اللي يشوف توتر حمد ونطق ابو مشعل: هذي الساعه المباركه و حمد رجال والنعم فيه لكن راي مناهل مهم انا بشاورها وبرد لكم خبر
ابو اصيل: على خير
تنهّد حمد وهو يصد وطاحت عينه بعين اصيل اللي يضحك عليه وبتال معه
ابو مشعل: استلموه طقطقه
ابو فهد: ماهوب ناجي منها حتى ينحاش
ابو اصيل: مهابيل حتى وهم وش كبرهم
اصيل: لا مو مهابيل نمزح بس
فهد: اما انا فماشاءالله علي صدق
ابو فهد: جاكم يمدح نفسه
ضحكوا واكملوا سوالف و وناسه

ـــــــــــــــــــــــــــــــ

صقر
كان منسدح وراسه على فخذ امه ويتكلم بغصه ويشرح لأمه اللي صاير وكيف فجر عرفت
تنهّدت ام صقر: معليه معليه مردها بترضى
صقر بغصه: يمه وين ترضى اللي سويته مو سهل وتوني ادري ان قلبي يحبها يمه اول مره احس اني صدق احبها ، لما قالت انها تبي الطلاق وخلاص بينتهي كل شيء بينا رجع لي نفس الشعور الموجع اللي عشته مع جميله لما تزوجت
سكتت ام صقر وهي تمسح على راسه وصقر قلبه يوجعه ويدق على اصيل ولا يرد

ـــــــــــــــــــــــــــــــ

الساعه 11
طلع اصيل وتولين من بيت ابو اصيل الى بيتهم وتولين تسولف لأصيل واصيل يمشي معها ومندمج بالسالفه
تولين: شرايك نتسابق؟
ضحك اصيل: تخيلي
تولين: لا جد ابي نتسابق يلا
اصيل: من الحين اقولك ترا بتخسرين
ضحكت تولين: ما اخسر وانا تولين
ابتسم اصيل: نشوف يلا 1 ، 2 ، 3
ركضوا بسرعه وطاحت تولين على طول وهي تنطق: اييي رجللييي
وقف اصيل ورجع يركض لها: بسم الله عليك وش فيك
بكت تولين: رجليي تعورننييي
توتر اصيل وهو يشوف الكعب على رجلها ونطق: يووه انتي لابسه كعب وركضتي والمكان تراب
حضنته تولين وهي تبكي و ساعدها اصيل توقف ومشى وهي متمسكه فيه وتنطق: اصبر بنزل الكعب
قرب اصيل من الجدار يستندها عليه وانحنى ينزل كعبها من رجولها وينزل نعاله وينطق: البسي هذي
لبستها تولين وهي مستنده عليه بكامل جسمها واصيل يشيل كعبها بيده اليسار ويده اليمين ساندها فيها مكملين طريقهم للبيت اللي صار قريب
دخلوا الصاله وجلست تولين على الكنبه وهي تنطق وعيونها دموع: يعورني
بلع اصيل ريقه: وين الشوز حقك؟
تولين: هناك
مشى اصيل ياخذه ويجلس قدامها ويلبسها و راح للغرفه واخذ مفتاح السياره ونطق: بنروح للمستشفى
تولين: ما يحتاج
اصيل: الا يحتاج اخاف صار شيء لرجلك لازم نتأكد
تقدم يساعدها وطلعوا يركبون السيارة ومشوا للمستشفى